مهم..💛
فى حاجه لفتت انتباهي والمعظم بيكون واخدها
هزار ،،،
فى حاجه اسمها سيئات جاريه زى بالظبط ما فى حسنات جاريه ،،،
يعني مثلا صور البنات الى مثلا بتنزلوها ولو حتى هزار وترفيه الصور دى ممكن اى ولد يتفتن بيها فيقوم واخدها ومشيرها عنده وغيره تعجبه فياخدها وينزلها وهكذا ،،
طب واحنا ليه ناخد ذنب الشباب إلى بتتفتن دى ؟!
حاجه تانيه مثلا الناس إلى بتنزل اغانى وحالات الواتس كلها اغانى أو كليبات ،،هو مش فى غيركم بيشوفها واكيد بتعجبهم فبينزلوها عندهم وينشروها وغيرهم ياخدها وينشرها وانتم مش بس بتاخدوا ذنب عشان سمعتوها لاء كمان بتشيلوا ذنب الى سمعها وشيرها ،،،
طب على الأقل احنا فى رمضان واننا المفروض دا شهر للطاعه وفرصه بتيجي فى السنه مرة والخسران الى بيعديه من غير استفاده وعباده وأنه المفروض على الأقل مننشرش الحاجات دي في رمضان ،،
حاجات كتير ممكن نستهون بيها ونقول يعني هو ربنا هيعذبنى على الحاجه التافهه دى ؟!
بس ربنا قال :(ويحسبونه هين وهو عند الله عظيم )
ف منستقلش باى ذنب أو حاجه بنعملها غلط ،،
واى حاجه فيها فتنه أو مخالفه للتعاليم بتاعتنا الى معظمنا ميعرفش عنها حاجه نحاول منعملهاش ،،واحنا لو بصينا فى الدين مش هنلاقيه متشدد ولا حاجه زي ما كلنا فاهمين الفرق اننا مش فاهمينه اصلا ،،
والله يا جماعه دينا جميل جدا ومش متشدد بالعكس الدين يسر وليس عسر بس نفهمه صح وهنعرف كدا ،،
ممكن حد يقولى يعني هو انا بعمل كل حاجه في حياتي صح اصلا لما هتيجي على شويه المنشورات دى الى بنفك بيها عن نفسنا ،، هقوله سبق وقولت زى ما جه فى القرآن نحسبه هين وهو عند الله عظيم يعني منستهونش بأى ذنب ولو حتى صغير اوى بالنسبالنا فهو ممكن يكون عند ربنا شي عظيم جدا وجزاؤه كبير فناخد بالنا ومنستهونش ،،
وممكن بردو حد يقول انتى عامله فيها شيخه علينا واستشيختى بقاا وعماله توعظى فينا ،،،هرد واقول انا لا شيخه ولا حاجه يمكن انا بخطئ اكتر منكم بس الفكرة انى بحاول اقرب واتعظ مش اكتر ،،،
وكمان بصوا حواليكم كدا مفيش اكتر من موت الفجأه وكلهم شباب زى والورد وبيموتوا وهم مفيش فيهم مرض ،،لكن بنقول الله يرحمهم وبعد كدا يكون الموضوع عادى بالنسبه لنا وبننسي ،،حد حاول يفكر أنه فى يوم ممكن ميصحاش من النوم أو يخرج من بيتهم على رجله ويرجع ميت او يموت فجاه وياترى هيموت على طاعه ولا معصيه ،،
حد فكر أنه هيتحط فى القبر لوحده ومحدش هينفعه غير عمله ومحدش هيتحاسب عنه ويشيل عنه فكرتوا فى كدا ؟!،،
بس للاسف بردو مش بنتعظ وبيكون عندنا عادى ،،
تعرفوا أن احنا بنمثل الدين الاسلامي بما اننا مسلمين ،،طب كام حد اسمه مسلم في البطاقه بس حتى الصلاه مش بيصليها ،،وبما اننا مسلمين واجب علينا اننا نمثل دينا باحسن صورة وكمان نساهم فى نشر دينا دا ،،،
مش عايزة اطول اكتر من كدا دى مجرد فضفضه ممكن البعض ميهتمش بيها اصلا بس دى الحقيقه ،،
وانا مش شيخه بس بحاول افيد واستفيد ،،
وخدوا بالكم لان محدش عارف الدور على مين 👌
