تخيلي معايا كدة مثلا انا وانتي اصحاب جدا وبنحب بعض أوي ودايما كويسين مع بعض بس انا قولتلك ف مرة يا فلانة الحاجة دي بالذات بتضايقني جدا واوعي تعمليها ولو عملتيها انا هنتقم منك وبرغم انك بتحبيني روحتي عملتيها فانتي متوقعة مني ايه...أكيد هعاقبك ع الحاجة دي وهزعل منك صح
ولله بقى المثل الأعظم والأجمل والأرحم..يعني صاحبتك دي ممكن تفضل فاكرالك الغلطة دي العمر كله لكن ربنا لما بيلاقيكي توبتي من قلبك فعلا بيعتبرك مغلطتيش نهائي..تعالوا بقى نشوف مع بعض ايه الحاجات اللي بتزعل ربنا مننا والعقاب ايه...
*أولا اللبس الضيق* 🙈
"انتي كبنوتة جميلة المفروض ربنا أمرك تستري نفسك ومفاتنك بس برضو حضرتك بتعاندي وماشية ف الشارع فرحانة جدا بجمالك وظاهرة مفاتنك دي جدا لكل راجل ف الشارع..وشايفة نفسك صح وبتقولي انا عايشة سني..
عاوزة اقولك ان للأسف عقابك هيكون انك هتتحرقي ف النار لانك كدة من الكاسيات العاريات اللي الرسول صلى الله عليه وسلم قال عليهم "صنفان من أهل النار لم أرهما بعد ، نساء كاسيات عاريات مائلات مميلات"....روحي كدة هاتي ولاعة وحطي صباعك بس عند النار وشوفي هتحسي بايه...عاوزة اقولك بقى ان نار جهنم أعظم بكتير جداااا من نار الدنيا والعياذ بالله..انتي فعلا مش هتستحمليها والله وهتفضلي تقولي ياريتني وكفاية بس نظرة الغضب من ربنا واليوم عند ربنا بألف سنة عندنا..انتي مستوعبة؟!! يعني مثلا لو ربنا أمر انك هتتعذبي يوم ف جهنم فمتفكريش انه يوم فعلا وخلاص كدة دي الف سنة بجد وانتي اساسا مش هتستحملي ثانية ف النار💔..صدقيني الدنيا فانية ومفيش حاجة هتنفعك غير أعمالك الصالحة..يلا توبي لله ومن دلوقت البسي واسع وخبي جمالك زي ما ربنا أمرك💜🌸
*ثانيا النميمه*🙊
90% من البنات بيعشقوا النميمة وكمان واخدينها كإنها حاجة جميلة وهزار بقى وفرفشة وكدة ويلا يا بت يا بوسي علشان نقعد ننم ع خلق الله وهيهيهيهييي💃
تعالي اقولك بقى عقابك هيبقى ايه ياللي لسانك شغال كلام ع الناس
هتتعذبي ف الدنيا وف القبر وكمان ف الاخرة
*عذاب الدنيا*..ان حسناتك دي هتختفي بسبب النميمة وسيئاتك هتزيد لدرجة انك خلاص مش مستوعبة انك بتعملي حاجة غلط فعلا
*عذاب القبر*..الرسول صلى الله عليه وسلم كان ماشي ف مرة جنب المقابر فسمع صوت اتنين بيتعذبوا ف قبرهم وكان عذاب واحد فيهم بسبب النميمة..انتي متخيلة انك هتبقي ف مكان ضلمة لوحدك ومش معاكي أي حد من أهلك ولا من صحابك اللي بسببهم اصلا انتي بتتعذبي بس هما لسة عايشين ويا عالم تابوا ولا لأ وانتي للأسف خلاص فرصتك خلصت
*ف الاخرة*..الرسول صلى الله عليه وسلم قال "لا يدخل الجنة نمام"..يعني انتي خلاص للأسف اتحرمتي من الجنة وبقيتي من أهل النار لو استمريتي ع ذنوبك دي💔...يلا بقى استغفري بسرعة ع كل اللي فات وقرري انك مش هتجيبي سيرة حد تاني أبدا وبإذن الله ربنا هيغفرلك كل ذنوبك💜🌸
*ثالثا الأغاني* 💔
انتي يابت شوفتي مهرجان كيكا وسيحا ومهرجان البت مديحة💃..وطبعا هتبعتيلها المهرجان ومعاه كام أغنية رومانسية وكمية من الذنوب انتي مش حملها والله..وللأسف لسة فيه ناس بتعاند وتقولك الاغاني مش حرام وبطلي كآبة والخ...والله هي حرام فعلا وأكبر دليل انك لما بتيجي تصلي بتلاقيها بتتردد ف دماغك..انتي متخيلة تبقي واقفة قدام ربنا وانتي ف بالك موسيقى وقرف من ده💔
وعقابك برضو عظيم..اقرأي كدة الآية دي👇
"وَمِنَ النَّاسِ مَنْ يَشْتَرِي لَهْوَ الْحَدِيثِ لِيُضِلَّ عَنْ سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا أُولَئِكَ لَهُمْ عَذَابٌ * وَإِذَا تُتْلَى عَلَيْهِ آيَاتُنَا وَلَّى مُسْتَكْبِرًا كَأَنْ لَمْ يَسْمَعْهَا كَأَنَّ فِي أُذُنَيْهِ وَقْرًا فَبَشِّرْهُ بِعَذَابٍ أَلِيمٍ"....قوليلي هي الاغنية اللي اتقال فيها رب الكون ميسنا بميسة والكلمة قلبت السوشيال وبقوا كله بيهزر مع التاني بيها دي ايه لا بجد معناها ايه؟!!...انتو مش مستوعبين اللي احنا فيه والله..انتو الغلط وقساوة القلب عمتكم..وبقيتوا بتعاندوا ف كل حاجة والمصيبة ان لو حد نصحك هتقولي الرد ده"انتي هتعملي فيها شيخة"..لا انا مش شيخة ولا حاجة انا كل الحكاية اني بجد نفسي تفوقي من اللي انتي فيه..هتبقى بجد نهايتك صعبة أوي لو استمريتي ع عنادك ده وربنا يهدينا جميعا💔..ارجعي لربنا يا بنتي هي ممكن تكون حاجات صغيرة بالنسبة لك لكن عظيمة جدا عند ربنا "وتحسبونه هينًا وهو عند الله عظيم"💔..بلاش تنشري أغاني وبلاش تسمعيها..عودي نفسك ع جمال القرآن وخلي الناس كلها تسمعه وحسناتك هتزيد بإذن الله فمتعمليش العكس ويلا امسحي كل القرف اللي ع فونك ده ومتزعليش ربنا تاني💜🌸
*رابعا غض البص*
الحقي يابت يا منى شوفتي الموووز ده يخرب بيت حلاوته..وتفضلي تتابعيه ف صمت ع الفيس والانستا وتفضلي تبصي ف صوره وناسية ان في رب بيبصلك نظرة غضب وانتي ولا ف بالك...ع فكرة ربنا لما أمر المؤمنين بغض البصر هو مأمرش الشباب بس لأ هو أمر البنات كمان..."وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ"...ليه بقى مش بتسمعي كلام ربنا..ليه الدنيا وخداكي أوووي كدة..انتي كدة كدة مكتوبلك راجل معين ويا ستي ابقي بصي عليه براحتك وأكيد هو أصلا دلوقت زمانه بيبصبص ع بنات الناس زيك💔
عقابك بقى...ربنا أمرك انك تغضي بصرك فانتي مسمعتيش الكلام صح؟!!..طيب اقرأي الآية دي بقى👇
"وَمَن يَعْصِ اللّهَ وَرَسُولَهُ وَيَتَعَدَّ حُدُودَهُ يُدْخِلْهُ نَارًا خَالِدًا فِيهَا وَلَهُ عَذَابٌ مُّهِينٌ"...وبما ان حضرتك عصيتي أمر ربنا فهيكون جزاكي النار والعذاب المهين💔...احفظي نفسك من النار واحفظي قلبك من أي راجل بيلعب بيكي ويلا ابدأي من جديد واستغفري ومتزعليش ربنا تاني💜🌸
انا كدة حاولت اجيب الصفات السيئة المشهورة بينا بس أكيد في صفات تانية وانتي عارفة انها غلط فبطليها بالله عليكي ومتخليش الدنيا تضحك عليكي..حطي نفسك ف الجنة مش ف النار♥
ربنا يجمعنا ف الفردوس يارب ويبعدنا عن النار وعن عذاب القبر 💜🌸
