#سميتك_معشوقي
14
ناضت تسنيم من نومها لقت اكثر من عشر مكالمات ورسالتين
فتحت نقالها وشافت ان المكالمات من نفس الرقم الغريب
فتحت اول رساله .. كان متوب فيها
إنتظرتك ليه طولت الغياب
وأنت لامن غبت لحظات افقدك
جمرةاشواقي تناديك
بعتاب
كيف جالك قلب تنسى موعدك؟
سيد الإحساس حسك كيف غاب
كيف عن دافي شعوري يبعدك
وادري إنك ماتأخرت
بغياب
بس أناإللي دايم
أسبق موعدك
فتحت الرساله الثانيه .. كان مكنوب فيها
تسنيم ردي عليا اني عمر
تسنيم اول ماقرت الاسم انصدمت حطت يدها علي قلبها خافت وجايه بتقفل النقال رن كان اتصال منه قعدت اتفكر اترد ولا ماترد في الاخر ردت
تسنيم : الو
عمر : اهلا
تسنيم : اهلين
عمر : واخيرا عدلتي علينا
تسنيم :.....
عمر : شغلتي بالي كلمتك كذا مره ومارديتي
تسنيم :كنت راقده
عمر : ازعجتك ؟؟
تنسيم : لا .. وانت من وين جبت رقمي .. ؟؟
عمر : مش مهم كيف عرفته .. المهم اني سمعت صوتك
تسنيم : عمر ليش انت اتكلم فيا بالاسلوب هذا ؟؟
عمر : لاني نبيك .. .. انتمنى اسلوبي ماضايقك .. لاني راح نخطبك قريب ..بس الاول خلينا نلقا حل لنوري هذا
تسنيم :هذا خطا اللي ادير فيه
عمر : ليش ؟شن الخطا اللي درته؟
تسنيم : كان حد ورقلي واني انكلم فيك والله يشك فيا اني انكلم فيك من ايام كنت هاربه بصراحه تضايقت لما قريت رسايلك
عمر :اني اسف .. باي >> سكر الخط
تسنيم : خير بلاه هذا شكله زعل واك ناقصاتك انت الثاني؟
________________________________________________
سعد قاعد قدام الحوش امكسد مع جاره شوي ادرس سياره ينزلو منها راجل وولد وبنت صغيرين
الراجل: السلام عليكم
سعد :وعليكم السلام ورحمة الله وبركاته
الراجل: انت سعد ال...
الراجل: اني جار فرج راجل بنتك هاذوما صغاره قال وصلهم لامهم معش يبيهم
سعد تحشم علي وجهه للن حتى احفاده عمره ماراهم ولا سال عنهم: تفضل تفضل
الراجل: بارك الله فيك والله مستعجل بنتسقد قبل الظلام
.
.
.
خش سعد للحوش قبل لايخش داخل سلم علي الولد والبنت
سعد: انت احمد وانتي ساره والا
ساره: ايه انت من
سعد قريب مات من سوالها: إني جدو تعالى
وحضنهم هما الزوز ودمعته نزلت
خش داخل: ياهند ياهند تعالى بسرعه
جت هند تجري تحساب صايره حاجه
لقت صغارها قدامها قعدت اتعيط جرت ليهم وحضنتهم: اه يايميمتي اه وليداتي تووحشتكم الله لايسامحه اللي بعدني عنكم 😭😭😭 قعدت اتبوس فيهم وتبكي وجت امها وريناد وتسنيم علي صوتها وقعدو يغردو معاها وجبدو في هالصغيويرا ويضبطو فيهم
سعد: خلاص عاد خوفتو الصغار بعياطكم من اليوم مش حيبعدو عنك يابنتي عهد عليا لو يطربق بوهم والله ماو طايلهم والمحاكم بيناتنا لين يرد حقك كله
هند: ربي يخليك لينا يابوي ياغالي
تسنيم قعدت متحيره علي عمر وكيف عصب منها وهي ماتحب حد يزعل منها
خشت لدارها وقفلتها واتصلت بيه
تسنيم: الو
عمر ببرود: اهلا
تسنيم: سامحني لو جرحتك بكلامي بس لازم انفهمك وجه نظري
عمر: تفضلي
تسنيم: انت قلت تبي تخطبني وانت اتكلم فيا قبل لاتكلم بوي ولا حتي قبل لانتخلص من نوري وهكي انت اتزيد علي مابيا واني لو بوي قال لا اني ما حنطلع عن شوره
عمر: باهي انت اموافقه بس علي بوك
تسنيم: الشور كله ليه
عمر: ولو ماوافق
تسنيم: ماتستبق الامور انت كلمه وبعده يصير خير
عمر: ان شاء الله خير وسامحيني على الازعاج تحمست شوي وانت كلامك صح
تسنيم: مش مشكله
عمر: مع السلامه
