" لنكن جنبآ الى جنب ، لاداعي لأن نكون في علاقه تحت مسمى ما .. لنكن اصدقاء مرة واخوه مره وأحبآء مره... اهم مآ في الأمر اﻵ نصبح غرباء "
#ملاك
=============================
نور صحت بدري ورتبت شقتها استعدادا للضيف المنتظراه .. كانت لابسة شورت فوق ركبتها وتيشيرت من غير أكمام وما فكرت تغيرهم .. ماسكة سيجارة في يدها وبتدخن 🚬.. سمعت صوت جرس الباب .. طفت سيجارتها وقامت فتحت الباب : ليه اتأخرت
ليث بعد ما عايز ليها من فوق لتحت: كان عندي إجتماع الصباح
نور طلعت سيجارة تانية وولعتها : عاوز 😉
ليث : الهباب دا تاني 😒 !! غلطان انا بسمع كلامك
نور : هباب شنو ياخ 😂😂 دا حاجة خفيفة كدا تظبط العقل وتعدل المزااج .. اخد نفس وهتروووق 😌
ليث : آخر مرة سمعت كلامك كنت هغتصب فيها ملاك
نور : اووووبا 😮 ليه ما قلت لي أن ششاء الله بس كملت شغلك للنهاية 😏
ليث : شغل شنو وزفت شنو 😒 أنا قرفان من نفسي بسبب العملتو دا الحمد لله انه راجلها دا جا قبل ما اعمل حاجة
نور : ضربك !! لأنه وشك بيقول كدا 😂😂
ليث : اسمعيني كويس 😒 انا لما اتفقت معاك كان هدفنا واحد انتي عاوزة رايان وانا عاوز أرجع ملاك دا ما معناه انها تتأذى أو تتلمس شعرة منها عشان كدا اعملي حسابك في اليوم الهتضري فيه ملاك انا ما هسيبك في حالك
نور : روق يا شيخخ انا لسة عند اتفاقنا 😏 مع أنها ما تستاهل دا كلو
ليث : انتي اعملي العليك بس
==============================
وسام بقا بعاين لملاك بنظرات مستغربة .. قال ليها بلهجة مستفسرة : جابك شنو 😕
ملاك : من بدايتها كدا بديتها بمشاكل .. ما ناوي تعقل السنة دي بس 😑
وسام : العقل دا موضة قديمة 😌
ملاك : ممكن توروني المشكلة شنو بالضبط
لؤي : لقيته ضامي ليا في نص الساحة 😒
ملاك : ليا😶 وانت بتعرفها من وين
وسام : دقيقة 😕 انتي اصلا بتعرفيهم من وين !! وجيتي هنا ليه وعرفتي كيف
ملاك : لؤي وليا أخواني الصغار جيت هنا بصفتي ولي أمر لؤي ولأنه المدام خايفة من أبوك رجعتك فصلك
وسام : اخوانك !!
ملاك : هتعرف بعدين حبيبي انت عملت كدا ليه 😑 يعني تفاهة وقلة أدب كلهم فيك
وسام : دا كان تحدي وانا قلت ليها 😑
ملاك : تحدياتك دي يوم هتوديك في ستين داهية
قبلت على المديرة وقالت ليها بلهجة ثابتة : اذا أي مشكلة بتحصل هنا بتطلبي ولي الأمر معناها ما هتلقي وقت تعملي فيه حاجة تانية اذا أقل مشكلة ما بتعرفي تحليها وتتصرفي معاها استقيلي من الإدارة .. ولو هتستمرو بالأسلوب دا انا هحولهم مدرسة تانية
المديرة : دكتورة ملاك والله آسفين على الإزعاج .. لؤي خلاص ارجع فصلك
ملاك : لا هيتعاقبو الاتنين
المديرة : حاضر
ملاك : عندي معاكم كلام تاني انتو الاتنين .. طلعت مشت ل ليا وخلتهم في المكتب عشان المديرة تعاقبهم .. كان باقي ليهم تلاتة حصص عشان يطلعو فسحة تاني .. ملاك قعدت استنتهم لحد ما خلصو عشان تتكلم معاهم .. ليا جاتها تاني ومعاها شلتها كلها .. في وقفتهم دي جو لؤي ووسام : انتي لسة قاعدة 😂😂
ملاك : لسانك دا محتاج قص انا ما واحدة من استاذاتك البيسكتو ليك
وسام : خلاص حقك علي
ملاك تلفونها رن وردت طوالي .. شوية وقفلت الخط : انت تخرس ليه ما جيت عرسي 😒
وسام : انتي عرستي فجأة اعمل ليك شنو اجيك طاير 😑
ملاك : انت عرفت قبل شهر لو عاوز تجي كان جيت
وسام : وينه الأمه داعية ليه دا
ملاك : هتشوفو بعد شوية ليا انا هرجع البيت عاوزة حاجة
ليا : ما هتنتظريني أخلص
ملاك : انتي لسة باقي ليك تلاتة حصص تاني وأنا مشغولة ما بقدر استنى
لؤي : انا هرجع معاك
ملاك : ما عاوز تكمل اليوم
لؤي : لا 😪
ملاك : طيب هنقعد لحد ما رايان يجي
وسام اتكلم معاها شوية ورجع فصلو وبعدها البقية مشو بس
قعدو معاها لؤي وليا ووتين
وتين : ممكن أتصور معاك 😊
ملاك : اكييدد 😄 طلعت التلفون واتصورت معاها واتصورو كلهم سوا عدا لؤي ما كان مركز معاهم .. بعد شوية رايان اتصل ووراها انه منتظرها براا .. ساقت لؤي وطلعو .. طوول الطريق كان ساكت لحد ما وصلوه البيت .. نزلو معاه الاتنين عشان يسلمو على جدهم .. لؤي طوالي طلع غرفته بدون ما يتكلم مع أمه وملاك قعدت مع جدها .. رشا لحقته عشان تتكلم معاه .. دقت الباب ودخلت طوالي لقتل راقد في السرير وماسك تلفونك
رشا : اتصلو علي من المدرسة وقالو لي عامل مشاكل .. طلبو ولي أمرك ليه اتصلت عل ملاك !!
لؤي : عارف انك هتكبري الموضوع وتزيديه مع أنه ما مستاهل
رشا : ضربت ولد من غير سبب وتقول لي ما مستاهل !! لؤي انت ما ملاحظ لتصرفاتك في الفترة الأخيرة
لؤي : مالها !! عملت حاجة غلط لا سمح الله !!
رشا جرت من التلفون وهي بتتكلم بعصبية : تلفونك تاني ما هتشوفو إلا آخر السنة ولا حتى في الإجازات .. بطاقاتك هشيلها منك ومصروفك هتاخدو مني انا عشان اشوف آخر الإستهتار دا
لؤي قام على حيله وقال ليها ببرود : وما هتشوفيني إلا آخر السنة لما أسافر معاكم بس .. طلع شنطة من الدولاب وبدأ يدخل في هدومه بكل أريحية
رشا : بتهددني .. امشي ونشوف هتستحمل لحد متين
نزلت تحت وهي هاايجة ودخلت غرفتها .. ملاك كانت سامعة صوت رشا بتصرخ في لؤي .. سألت واحدة من الشغالات عن مكان غرفته ووصفتها ليه .. دخلت لقته بيلم في حاجاته في الشنط
ملاك : لؤي
رد ليها بصوت منخفض : ممكن أعيش معاك السنة دي لحد ما أرجع قطر !! من لما جينا وانا ما مرتاح في البيت دا
ملاك : دي محتاجة سؤال !! بيتي هو بيتك ☺ بس الموضوع ما مستاهل انك تسيب البيت كدا المشاكل دي عادي بتحصل ليه كبرت الموضوع كدا
لؤي : يمكن لأنه من وقت ما جينا هنا كنت عاوز أعيش معاك انتي
ملاك مشت عليه وضمته لصدرها هي ما كانت ضاماه وبس كانت محتوياه 💙.. اتنهد بارتياح قبل ما يقول بصوت ما مسموع : احبكك
ملاك : طيب انت أدخل استحم وانا بكمل عنك
لؤي : طيب
دخل اخد حمام سريع وملاك لمت ليه باقي حاجاته كلها ونزلو
حبوبته اول ما شفته قالت ليه بخلعة : دي شنو الشنط دي ماشي وين يا ولد
لؤي : مخلي ليكم البيت دا ☺ ماشي مع اختي
اختك بتعرفها من متين عشان تخلي أمك وتمشي معاها 😒
لؤي : من الليلة 😒 قبل على ملاك وقال ليها بابتسامة : نمشي 😊 !!
ملاك : يلا .. مشت الصالون القاعد فيه جدها عشان تودعه
اكتر حاجة كانت مريحة ملاك في قعدة لؤي معاها انه علاقته مع رايان حلوة شديد .. طول الطريق هي ساكت وهم يتونسو .. طلعها من ونستها صوته وهو بيقول : كنت هقول ليك اني مسافر بكرة بدري قضي الفترة دي مع أبوك بس طالما لؤي معاك ما مشكلة
ملاك : مسافر بكرة !! خير
رايان : بنت عمي عندها عملية بكرة في رجلها وامها ما بقدر تسافر ف هسافر انا مع عمي
ملاك : okay
سرحت في الطريق لحد ما وصلو البيت .. رايان طلع ليهم الشنط فوق ودخل غرفته .. كان حاسي بتعب غريب ما عارف سببه ونام طوالي
اما لؤي قعد في الصالون لحد ما ملاك غيرت هدومها وجاته طالعة
ملاك : هتنوم في الغرفة كدا وبكرة هنزل معاك تشتري الحاجات العاوزها وتختار ديكورها على زوقك
لؤي : ملاك 😕 في أي مشاكل بينك وبين رايان
ملاك : لا ليه السؤال😅
لؤي : علاقتكم بااردة وتعاملكم ما بيقول انكم متزوجين حتى غرفكم منفصلة
ملاك : مااف أي مشاكل كل الموضوع انه ما كان عندنا فرصة نتعرف قبل العرس ولسة كا اتعودنا على بعض .. دا كل الموضوع
لؤي : ما كنتو مرتبطين يعني
ملاك أخدت نفس عميق قبل ما تحكي ليه عن ليث وكيف اتعرفت عليه وقدر شنو حبته وأنه كان السبب الرئيسي في جيتها السودان لحد ما وصلت ليه عن مشكلتهم الأخيرة ومحاولته في
انه يعتدي عليها 💔
لؤي كان مندمج معها ومتأثر شديد
ملاك : انت لسة صغير على الهم دا ما تاخد في بالك .. ادخل ارتاح واخد ليك نومة خفيفة تريحك
قعدت معاه في الغرفة لحد ما اتاكدت انه نام ورجعت غرفتها .. كانت لابسة بنطلون جينز ومعاه قميص .. لبست من فوقهم عباية ومعاها نقاب .. ربطت بطن اسفنجية في بطنها بتظهر أنها حامل وطلعت .. ركبت عربيتها واتصلت على أبوها : داديي .. انا طلعت وهذا ماشة على المستشفى .. هعمل زي ما قلت ليك وأن شاء الله نقدر نمسكهم
صبري : ملاك خلي بالك من نفسك هنستنا اشارتك بس .. خلي بالك من نفسك انا ما عندي غيرك
ملاك : دااديي انا ما هتحصل لي حاجة ما تخاف .. ساقت لحد ما وصلت المستشفى .. ركبت ميكرفون صغير في عبياتها من جوا ودخلت بخطوات ثابتة .. مشت لحد ما وصلت قسم الولادة ودخلت للدكتور : سلام عليكم
وعليكمالسلام
ملاك : هدخل في الموضوع طوالي .. انا عقيم .. اتزوجت قبل سنة وأهل زوجي كانو ضاغطين علي ودايما بسألوني نفس السؤال : هنشوف ولدك متين !! اضطريت اني اقول ليهم انا حامل وحتى زوجي عايش على اني حامل .. قبل كم يوم عملت معاهم مشكلة عشان امشي اخلي ليهم البيت والمفروض ولادتي الليلة
الدكتور : وانا كيف بقدر أساعدك
ملاك فتحت شنطتها وطلعت من حزم قروش : دا مقدما والباقي بعد ما تسلمني الطفل .. انت بس حدد المبلغ العاوزو وهتستلمو
الدكتور طلع برا شوية وجاها راجع : في واحدة هتولد بعد ساعتين .. جهزي نفسك وممكن تتصلي على أهلك لو عاوزة
ملاك : هتصل عليهم بعد ما اخد الطفل
الدكتور : في إجراءات لازم تعمليها عشان تثبتي انك اخدتيه
ملاك : جدا .. مطلوب مني شنو
طلع ليها كم إستمارة ملتها ووقعت عليها وجات ممرضة ساقتها ..
غيرت هدومها ولبست هدوم المستشفى .. رقدوها في غرفة قريبة وركبو ليها كانيولا من غير إبرة .. قعدت هي وهاادئة وما نطقت بحرف .. مرت الساعتين وملاك لسة راقدة في مكانها .. بعد دقايق جاها الدكتور ومعاه ممرضة تانية شايلة طفل صغير ومسكته ليها .. كان ببكي وهي بتحاول تسكته .. قبل ما يطلعو جا صبري ومعاه اتنين من الشرطة
الدكتور عاين ليهم بخلعة وعاين لملاك الماسكة البيبي
صبري : ما عندك فرصة تنكر أو تبرر العمايل البتعملها دي .. الطاقم الشغال في القسم دا كلو اتقبض عليه
ملاك قامت على حيلها وشالت البيبي عشان توديه لأمه .. بعدها رجعت لبست هدومها ونزلت تحت .. كانت في كمية من عربات الشرطة والمستشفى جاايط .. أبوها مما شافها ضماها : دايما انتي رافعة راسي
ملاك : ما عملت حاجة 😊
صبري : دي كانت فكرتك وانتي بادرتي بيها لو اتكشفت انتي اول زول كان هيتضرر
ملاك : طيب انتو كملو باقي الموضوع انا راجعة البيت لاني ما قلت ليهم طالعة
ركبت عربيتها وساقت بسررعة لقت رايان واقف مع عم إسماعيل برا .. دخلت عربيتها وجوها الاتنين
رايان : مشيتي وين !! بتصل عليك ما بتردي
ملاك عاين للتلفون لقت 6 مكالمات من رايان : كان سايلنت ونسيته في العربية .. لؤي لسة نايم !!
رايان : أي ما صحى .. كنتي وين قلقتينا عليك
ملاك : لما ندخل جوا بحكي ليك .. قعدو في الصالة التحت وحكت ليه الموضوع كله
رايان : ليه ما قلتي لي !! كنت همشي معاك عشان أساعدك .. معقولة تعملي دا كلو براك افرضي حصلت ليك حاجة ما كويسة
ملاك : كنت نايم وما حبيت اصحيك .. كان لازم امشي براي عشان ما يشكو فينا كنت خايفة انهم يتعرفو علي والحمد لله ما عرفوني .. هدخل أصحي لؤي
على بال ما رحمة تجهز الأكل
رايان حس بوخزات في قلبه ولفة راس .. دخل غرفته في محاولة انه ينوم تاني
ملاك دخلت غرفة لؤي وصحته .. دخل اخد ليه دش خفيف وهي نزلت تجهز الغدا .. لقت رحمة بتجهز في الأكل وهي قعدت ترتب في السفرة .. شوية ورايان ولؤي جو نازلين .. أول ما قعدو ملاك صرخت بصوت عالي : رايان 😱 انفك
رايان لمس أنفه باصبعه واتفاجأ لما شاف فيه دم .. قامت بسرعة وشالت منديل وختته ليه في أنفه .. رفعت ليه راسه وثبتت ليه رقبته بطريقة معينة لحد ما الرعاف وقف : خلينا نمشي المستشفى 😥
رايان : مستشفى عشان رعفت !! ما محتاج
ملاك : الرعاف دا ليه أسباب كتيرة يمكن تطلع عندك حاجة تانية 😕
رايان : انا كويس يمكن دا من الحرارة بس
ملاك : متأكد
رايان هز ليها راسو وقعدو في السفرة .. بعد ما خلصو أكل ملاك طلعت مع لؤي غرفته : بديتو دراسة عديل
لؤي : لسة .. المقدمات بس
ملاك : بما انك قعدت معاي هنا فأنا هتابع معاك وهذاكر ليك دروسك كل يوم بكرة هنزل معاك اشتري ليك تلفون وهفتح ليك حساب جديد في البنك بس مع دا كلو انت ما تهمل قرايتك عشان ما تندم بعدين
لؤي : حااضر
في قعدتهم دي ليا ضربت لي لؤي وقعدت تعزي : لللللووؤي لييه مشيت وخليتني برااي 😭😭😭 يعني عاجبكك الحالة الي انا فيها دا
لؤي : ما طرت آخر الدنيا في أي وقت تشتاقي لي تعالي
ملاك طلعت خلته بتونس مع ليا ومشت لرايان .. لقته نايم في غرفته .. اتحسست جبهته عشان تعرف حرارته .. قعدت جنبه مسافة وبعدها مشت غرفتها .. حست أنه عمرها وصل كم وسبعين سنة من الهموم الشايلاها .. من جهة عملية ليث العملها فيها .. ومن جهة لؤي البقى مسؤوليتها .. وأخيرا رايان البقى صاحبها وهسا شايفاه تعبان وما عارفاه ماله .. طلعت دفترها المخملي الأبيض وقعدت تكتب .. اتلفتت فجأة على الساعة ولقت الوقت اتأخر .. قامت بسرعة ونزلت تحت .. لقت رايان قاعد في الصالة .. قالت ليه بصوت هادئ : بقيت احسن
رايان : الحمد لله
ملاك : رحلتك الساعة كم
رايان : 6:00 صباحاً
ملاك : طيييب .. دخلت المطبخ وخلطت عصير فواكه مركز ومن غير سكر .. كبته في كاستين كباار وطلعت .. ادت رايان واحدة وطلعت التانية للؤي
لؤي : ملااك في جيم قريب
ملاك : فوق ليك
لؤي : كيف !!
ملاك : في جيم في الطابق الرابع
لؤي : عاملة جيم في بيتك
ملاك : رايان بيحب الرياضة وأنا بردو بدال ما نمشي كل واحد جيم عملت جيم في البيت
لؤي : تفكير سليم
رجعت غرفتها وناااامت 😴
==================================
الصباح ملاك صحت بدري ولقت رايان طلع .. مشت مشوارها الروتيني ورجعت بعد ساعتين .. أول ما دخلت البيت طلعت الجيم .. بعد ما خلصت دخلت غرفتها واخدت حمام ساااخن .. لبست هوت شورت بتاع جينز وتيشيرت من غير أكمام وخفييف وخلت شعرها مفرود .. نزلت المطبخ وبدت تجهز في فطور صباحي خفيف .. شوية وجا لؤي نازل .. عاين ليها من فوق لي تحت وقال ليها بصوت ضاحك : مالك الليلة ضاربة الهوا 😂😂
ملاك : بما انه رايان مسافر عاوزة اهبب شوية 😂😂 لي فترة مكتومة بملابس طويلة
لؤي : اذا رايان ماف معناها مافي راجل في البيت 😒 مفروض تحترميني
ملاك : حبيبي انت أصغر مني يعني انت أقرب تكون ولدي .. الليلة اعمل أي حاجة عاوزها دي آخر إجازة ليك
لؤي : بعدين هطلع اشوف ليا
ملاك : الأسبوع الجايي عندنا طلعة ماشين مزرعة مع أهل رايان .. هتقضي الفترة ديك في البيت مع أمك ومنه تقضي وقت مع ليا
لؤي : اوووك
ملاك : طيب انت شيل الصحون دي ووديها الجنينة انا هشيل العصير .. ختتهم في صينية بردو وطلعت .. فجأة اتسمرت في مكانها لما شافت رايان قدامها اتمنت الدنيا تتشق وتبلعها قبل ما يشوفها 😂😂 لؤي لما جا ولقاها واقفة دنقر راسو وقد يضحك .. قالت ليه بصوت ثاابت : لسة ما سافرت
رايان : ما هسافر
ملاك : لييه !! أن شاء الله خير
رايان حس بيها خجلانة منه فدخل قعد عشان يديها فرصة تغيرهم لكن هي جات وقعدت جنبه : تعبت تاني
رايان هز ليها راسو بمعنى نعم .. قالت ليه بلهجة مستفسرة : طيب قول لي الأعراض البتجيك والحاجات الحاسي بيها
لؤي : مش انتي دكتورة نسائية
ملاك : دا ما معناه ما بقدر أتعرف على بقية الأمراض
رايان : بحس بصداع غريب ووجع شديد في نهاية راسي .. ودوخة ما مبررة وارهاق وتعب شديد وكسل ومرات بطني بتطم .. بحس بضغط كدا في اضاني .. ملاك قربت منه وختت ايديها في اضانه اليمين واليسار وحست انه واحدة فيهم حرارتها مرتفعة اكتر من التانية وهو واصل : بحس بكتمة وصعوبة في التنفس والرعاف دا اتكرر كذا مرة .. وبحس بوخزات قوية في القلب
ملاك : الأعراض دي كلها وما حصل مرة اتكلمت ولا انا لاحظت ليك ..عندك ضغط !!
رايان : لا
ملاك : الأعراض دي أعراض إرتفاع الضغط .. انت أطلع ارتاح في غرفتك وانا هقيسه ليك عشان اتأكد .. طلعت معاه لحد ما وصل غرفته .. رقدته في السرير وطلعت ليه الجاكيت اللابسه وفكت ليه الكرفته .. مشت غرفتها جابت جهاز الضغط وجات .. قاسته ليه وفعلا كان مرتفع : هتاخد علاجات لفترة لحد ما يرجع طبيعي
طلعت من غرفته وهو متابعها بنظرات ما مفهومة .. ملاك لبست عبايتها وطلعت .. مشت أقرب صيدلية تلاقيها .. أول ما دخلت ووقفت قدام الصيدلانية عشان تشتري الأدوية سمعت صوت عارفاه كويس : ملاك !!
ملاك : نور 😀 اهلين
نور : كيفك ما اتوقعت الاقيك هنا
ملاك : صدفة جميلة .. رجعت للبنت وشالت ادويتها .. اتفضلي معاي البيت
نور : ما عاوزة ازعجك احسن أزورك في وقت تاني
ملاك : لا خالص ما فيها أي إزعاج
نور : طيب اصلا ما جيت بعربيتي
ركبت معاها لحد ما وصلت البيت ودخلو .. أول ما وصلو جوا ملاك طلعت عبايتها ودخلت المطبخ عشان تنبه رحمة انه في ضيوف
نور : بتلبسي كدا عادي !!
ملاك : في حاجة غريبة !! ما انا قاعدة في بيتي 😃
نور : لا ابدا
طلعت فوق لقت لؤي قاعد في الصالة برا : رايان نام
لؤي : شكلو لأنه ما طلع
دخلت الغرفة وجات طالعة بسرعة : طيب أدخل صحيه
لؤي : انتي بتعملي في شنو
ملاك : لؤي قداامي يلا أدخل صحيه .. قام معاها وأول ما دخل الغرفة ضحك عليها نادت لؤي يصحيه لأنه نايم وصدرو عاري 😂😂 صحاه كتير وما صحى .. ملاك قعدت جنبه في طرف السرير وهي بتكفت فيه بخفة عشان يصحى لحد ما أخيراً فتح عيونه بصعوبة .. ملاك رجعت غرفتها وجات راجعة بالسماعة .. ساعدته عشان يقعد ولؤي طلع .. كان جسمه سااخن شديد وانفاسه متصاعدة بسرعة .. مررت السماعة على عضلات صدرو وهو بيرتفع وينخفض بسرعة
ملاك : رايان 😕 انت لازم تمشي المستشفى أو يجي الدكتور هنا حالتك ما كويسة نهائي
عاين ليها بنظرات ما قدرت تفسرها قبل ما يضمها لصدرو 💙.. هو ما كان واعي لتصرفاته وهي شبه فقدت المنطق .. فضلو كدا لمساافة هو ضاميها وهي متسمرة .. زحته منها براحة ورقدته في السرير وطلعت .. أول ما قفلت باب الغرفة أنفاسها اتسارعت كأنها كانت كاتماها نزلت تحت الصالة ولقت تلفونها جنب نور .. شالت واتصلت على خالد عشان يشوف دكتور من المستشفى يجيها في البيت
نور قعدت معاها شوية وطلعت .. أما هي بعد ما الدكتور جا وفحص رايان تاني وراها تعمل شنو ومشى .. ادتو اول جرعة من العلاج وقضت باقي اليوم مع لؤي .. طلبت مصمم ديكور وجاها في البيت عشان لؤي يختار ديكور غرفته .. بعدها اشترت ليه تلفون أون لاين وباقي العفش الهيحتاجه وفتحت ليه حساب جديد في البنك
=================================
مر أسبوع من غير أي أحداث مهمة .. لؤي خلاص اتعود على العيش مع ملاك وعلى المدرسة وصاحب مجمووعة من الأولاد ورجع لحيويته الي كان فاقدها .. أما ملاك كانت قاعدة قصاد رايان وعلاجه واهتمامها بيه لحد ما بقى كويس وجا اليوم المفروض يمشو فيه المزرعة .. لؤي من مدرسته هيمشي بيت حبوبته ويقضي معاهم اليومين الجايين .. أما ملاك جهزت حاجاتها وحاجات رايان وطلعو .. مشو بيت أمه عشان يمشو كلهم بعربية كبيرة .. أمه واخته وولدها ومعاهم مرة عمهم .. سرحت في الطريق والمناظر الشايفاها .. المزرعة مسافة تلاتة ساعات من المدينة .. المنطقة كانت كلها زراعة ومزارع .. وصلو المزرعة الساعة 2:00 وأي زول دخل غرفته .. ملاك من ما دخلت طلعت دفتر من شنطتها وبدت تكتب .. الجو كان حلوو ومغيم بينذر انه جاي مطر غزير .. لما نزلت تحت لقتهم مجهزين الغدا براا عبارة عن مشاوي .. كانت مزرعة كبيييرة شديد .. فيها جزء مخصص لاسطبل الحصين وجزء فيه شجر كتيير وحتى مبناه حلو .. كانت لابسة فستان رمادي وكيمونو أبيض .. لافحة طرحة كبيييرة نيود في كتافينها وهاي هيلز نيود 💙.. أما رايان لابس قميص أبيض مبرز عضلاته وبنطلون رمادي .. حزام جلدي بني وساعة فضية فخمممة 😍.. قعدو كلهم قعدة ظريفة وبدو ياكلو ويتونسو لحد ما المغرب قرب الجو بدأ يتعكر دخلو غرفهم .. ملاك قعدت في البلكونة وهي بترااقب في المكان .. شافت يزن بيلعب تحت والمطرة بدت تنقط .. طلعت طرحتها ونزلت
شوية كدا المطرة زادت وبقت صابة بغزاارة .. رايان قال اتفضل بعد ما سمع دقات الباب .. دخلت رينا وقالت ليه بصوت مبحوح : يزن معاك
رايان : لا .. ما لاقياه !!
رينا : ما لقيته من قبيل بفتش ليه والمطر دا غزير خايفة يكون طلع
رايان : الباب مقفول ما شكلو طلع
نزل معاها تحت وكانو كلهم متوترين .. رينا قعدت في أقرب كرسي ودموعها جات نازلة
مرة عمه قالت ليه بلهجة مغرزة : مرتك وينها ما بتجي تسأل الحاصل شنو
رايان هنا انتبه إنها مافيشة ومن قبيل ما شافها
قعدو يهدو في رينا لحد ما سمعو الباب بيدق .. رايان اول ما فتحه أستغرب من ملاك جات داخلة وهي شايلة يزن ولافاه بالكيمونو بتاعها وشعرها مبلول
رينا مما شافتها مشت وشالته منها وحضنته وهي بتبكييي
رايان : ملاك 😕 كنتو وين !!
ملاك ما ردت عليه وكانت بتعاين لرينا البتشهق مع ولدها .. قال ليها بلهجة عصبية وصوت عالي 😡: ملاك انا بتكلم معاك .. ليه طلعتي بيه في الجو دا !! في زول عاقل بيعمل كدا
مريم : خلاص يا ولدي حصل خير
رايان : خير !! خير كيف وهي طلعت بالولد في المطر وما هاميها انه يمرض أو تحصل ليه حاجة .. طيب قولي كلمة تبرر موقفك 😒
ملاك كانت ساكتب وضاغطة على أسنانها بقووة لفت عشان تمشي جراها عليه بقوة وهو لسة بصرخ عليها : سااكتة ليه !! اتكلمي قولي لي مشيتي بالولد وين
فكاها لما شاف عيونها اتملت دموع 😢.. طلعت غرفتهم وطوالي دخلت الحمام .. طلعت فستانها ودخلتو في الغسالة لأنهما جابت أي غيار معاها .. وقفت قدام المراية واتفقعت بكى .. رايان دخل الغرفة ووقف قدام باب الحمام .. رغم صوت الموية والغسالة العالي بس كان سامع صوت شهقاتها 💔.. دخل يدو في نص شعرو وشد عليه بقوة قبل ما يتكل براسه على الباب وياخد نفس .. قال ليها بصوت منخفض : آسف
بعد ساعة طلعت من الحمام وهي لابسة فستانها وشعرها مبلول .. حست بقشعريرة سرت في جسمها من برودة المكيف .. قعدت قدام التواليت وبدت تجفف في شعرها .. جاها رايان داخل وقال ليها بلهجة صارمة : شيلي حاجاتك وأنزلي عشان هنرجع البيت
ملاك بعد ما جففت شعرها فتشت الكيمونو بتاعها واتذكرت انه مع يزن .. لفحت الطرحة في كتافينها وغطتهم ونزلت .. لقت رايان مدور العربية ومستنييها وأمه بتحنس فيه .. المطرة كانت خفيفة شديد أو شبه واقفة .. ركبت في العربية وجدعت شنطتها في المقاعد الورا .. طلعت الهاي هيلز من رجليها ورجعت الكرسي لورا وغمضت عيونها
رايان : مصرة انك تسكتي
ملاك : عندك مانع انا ما عاوزة أتكلم ☺
رايان : لا هتتكلمي وهتجاوبيني
ملاك : بصفتك !!
رايان : بصفتي راجلك
ملاك : ههه 😂 راجلي !! كأنها غريبة شوية .. على أي حال اول ما نرجع هنبدا في إجراءات الطلاق
رايان : فكرك انا هطلقك !!
ملاك : ما على كيفك اصلا 😊 غصبا عنك
رايان وقف العربية فجأة وقبل عليها : هتعملي شنو
ملاك : كل شي في وقته حلو وكويس انك وقفت .. فتحت الباب ونزلت ورايان طوالي اتحرك .. مشى مسافة طوييلة وبعدها وقف .. طلع تلفونها واتصل عليها .. سمع صوت رنينه في العربية .. عاين تحت ولقى الهاي هيلز بتاعها قاعد .. اتنهدت قبل ما يلف الدركسون ويرجع
ما كان عندها غير طرحتها متلفحة بيها ونزلت حفيانة وشنطتها في العربية .. الساعة 10:35 وهي ما عارفة روحها وين .. كانت منطقة كلها زراعة ومافيها طريق معبد .. مشت على امشاط رجليها وهي مكشرة من الطين البتغوص فيه رجليها .. حست بصوت رجول وراها .. حاولت تسرع من خطواتها بس ما قدرت .. صوت الخطوات قرب منها شديد .. اتلفتت عشان تشوف وراها في زول ولى بتتوهم .. اتفاجأت لما شافت راجل طويل واقف قدامها وبنيته عضلية شبه المصارعين .. قبلت عشان تجري بس هو كان أسرع منها .. ضربها بحديدة في راسها ضربة فقدتها وعيها .. مسكها قبل ما تقع في الأرض وشالها .. مشى بيها شوية لحد ما وصل عربية سوداء ومظللة .. رقدها في الكراسي الورا وركب قدام .. قال بصوت خشن : اتحرك
#نهاية_الجزء_الرابع_عشر
