لديه ابتسامة مسالمة تطمْئِن روحي .. وكأنها تعتذر لي عن كل ما أوجعني قبل لقاءه 💙✨
#ملاك
======================
ملاك عاينت ل ليا لثواني قبل ما تقول ليها : ليا .. عاوزة اطلب منك طلب صغير .. ما تقولي لزول انك شلتي الحبوب من وسام اوكي !! إذا زول سألك عنها قولي ما متذكرة وأنا هتصرف
ليا : طيب
مسحت على راسها بيدها وطلعت
ركبت عربيتها ومشت على بيت وسام .. أول ما وصلت سلمت على غصون ومشت غرفة وسام الي كانت حافظاها كويس .. وشها كان محمر من التعصيب .. لاقته في الممر قبل ما تصل غرفته .. عاين ليها باستغراب قبل ما يقول ليها بصوت متردد : ملاك !!
عضت على شفتها قبل ما تضربه كف قوي .. وبدون ما تتكلم معاه جرته وراها .. ركبته العربية ورجعت المستشفى .. كان طول الطريق ساكت وما حاول يسألها أو يتكلم معاها .. لما وصلو المستشفى عملت ليه فحص دم .. عشان تتأكد اذا كان بتعاطى ولى لا .. وللأسف ما كان بتعاطى .. عاينت ليه بقرف قبل ما تقول ليه : عمرك ما هتبقى بني آدم
طلع من المستشفى في حالة من الا وعي .. الجملة دي سمعها كتير وما كانت فارقة معاه .. من أبوه .. من أساتذته .. بس أول مرة يسمعها من ملاك .. الزول الوحيد الي كان واقف معاه .. حس بذنبه وضميرو بدا يأنبه .. وقف تاكسي ورجع البيت
أما ملاك كانت قاعدة مع ليا .. شوية وجو رايان ولؤي وباقي عيلتها .. بس ما خلوهم يشوفوها .. استأذنت منهم ورجعت عيادتها .. حست براسها لافي شديد .. قعدت في الكرسي واخدت نفس عميق قبل ما تشرب موية وتكمل شغلها .. بعد ما خلصت مواعيدها وطلعت من العيادة اتفاجأت بخالد في وشها
_ ممكن شوية من وقتك !!
_ yeah .. sure
رجعو عيادتها وبدا يتناقش معاها بخصوص الشغل .. بقى بيتعامل معاها برسمية وبس في نطاق الشغل
_ خالد
_ نعم
_ أنا لما قلت ليك اني سامحتك .. ما كنت عاوزة أخلصك من شعور الذنب .. لا .. أنا فعلا سامحتك .. ونسيت الموضوع كله .. ف بطل تتعامل معاي بالرسمية دي .. وياريت انت بردو تنسى الموضوع وترجع علاقتنا زي ما كانت
_ هز ليها راسو بمعنى نعم
_ ما حاولت تصالح سمر !!
_ آخر مرة شفتها قالت إنها ما عاوزة تشوفني تاني .. وأنا احترمت رغبتها .. اتصلت عليها كتير لحد ما في الآخر عملتلي بلوك
_ وأنت استسلمت بالبساطة دي .. حاول مرة تانية .. وأنا هساعدك
اتكلمت معاه شوية وبعدها طلعت .. مرت على ليا واطمنت عليها قبل ما تطلع .. رايان ولؤي كانو مستنيينها تحت .. ركبت معاهم ورجعو البيت .. أو ما وصلو غيرت ملابسها ونامت طوالي .. صحت على حركة رايان في الغرفة .. فتحت عيونها ببطء وقعدت في السرير .. كان طالع من الحمام وبلبس في هدومو .. مسكت تلفونها وعاينت للساعة
_ يادوبها خمسة
_ راجعة العيادة تاني !!
_ لا 😪 .. هياخد مكاني طارق .. المفروض أسجل ليا في المركز
_ جهزي نفسك وأنا بوصلك .. بالمناسبة .. أمك مستنية تحت
_ ماما فاطمة !!
_ ايوة
_ طيب شوية وأنزل ليها
رايان بعد ما لبس رجع شعرو لورا واتعطر .. ملاك اول ما شمت الريحة حست ببطنها قلبت .. قامت بسرعة وجرت الحمام .. كانت بترجع بقوة ورايان واقف جنبها .. غسلت وشها وطلعت من الحمام
_ انتي كويسة !! شكلك تعبانة .. خلينا نمشي المستشفى أول
_ رايان .. انا دكتورة .. ولو حاسة بأعراض مرضية اكيد همشي الدكتور .. بس الموضوع ما مستاهل انا كويسة
_ متأكدة !!
_ يب ☺ .. ابتسمت ابتسامة ناعمة قبل ما تنزل
لقت فاطمة قاعدة في الصالة وجنبها الشغالة بتقطع في خضار
فاطمة : مالك يا بتي عيونك واقعة كدا 😕
ملاك : كنت نايمة
فاطمة : اخدي ليك إجازة ارتاحي فيها .. بتموتي انتي مع الشغل دا
ملاك : انا كنت ماخدة إجازة اكتر من شهرين .. يادوب نزلت قبل أسبوع أخد إجازة تاني 😂😂 !! بعدين انا دكتورة فالضغط دا عادي جدا
عاينت للشغالة وهي مكشرة لقتها بتقطع في طماطم : معقولة بتقطعي في طماطم بايظة !!
فاطمة : قولي بسم الله 😐.. ما بايظة ولى حاجة .. شغل المطبخ دا انتي ما بتعرفي ليه
ملاك : كيف ما بايظة .. ما شامين ريحتها !!
عاينو ليها الاتنين باستغراب قبل ما تقول ليها : يا بتي الطماطم ما فيها ريحة
ملاك : اوكي .. يمكن من التعب
فاطمة : اطلعي غرفتك وارتاحي .. أبوك سافر الليلة وأنا جيت أقضي معاك اليومين ديل لحد ما يجي
ملاك : نورتيناا
دخلت المطبخ وعملت عصير مشكل من غير سكر وصحن صغير فيه مكسرات .. ختتهم في صينية وطلعت غرفة لؤي .. لقته نايم ولسة ما صحى .. ختت الصينية في مكتبته وقعدت جنبه في طرف السرير .. عاينت ليه مسافة قبل ما تصحيه .. قعد في السرير وقال ليها بصوت ناعس : ليه بتعايني لي بالطريقة دي
_ كيف 😂 !!
_ حسستيني انك بتعايني لطفل
_ ع أساس انت كبير يعني !!
_ على فكرة انتي أكبر مني بتمنية سنين بس 😑 ما تعملي فيها كبيرة
_ الموضوع ما ليه علاقة بالعمر .. التجارب الي مرت بيها تخليني أكبر منك بعشرين سنة
_ مناسبة الموضوع دا شنو
_ لأنه انت هسا قاعد معاي .. ف انت مسؤوليتي .. ومفروض انتبه عليك .. على صحتك ودراستك وحتى تصرفاتك .. وعشان ما تتعرض لأي حاجة ممكن تأذيك .. وهسا يلا قوم أخد دش سريع عشان تبدا تذاكر ..
لما اتأكدت انه خلاص صحصح طلعت ومشت غرفتها جهزت نفسها وطلعو .. بعد ما سجلت ليا في المركز مشت ليها في المستشفى .. كانت معاها رشا وحبوبتها .. طلبت منهم يطلعو ويخلوها معاها.. قعدت جنبها بهدوء وعاينت ليها : بكرة هتمشي المركز .. هزورك كل يوم واطمن عليك .. بس المطلوب منك تكوني صبوورة .. يمكن تمر عليك ساعات تكرهي فيها نفسك وحياتك بس هتتجاوزيها .. وأساليب العلاج ممكن تكون صعبة شوية بس عشان تتعالجي ما عشان تتعذبي .. لو في أي وقت حتى لو متأخر احتجتيني ما تترددي في انك تتصلي علي اوكي !! الدكتورة المسؤولة من المركز انا بعرفها .. وهتخليك تتواصلي معاي أو مع أي زول انتي عاوزاه
_ هقعد فيه لحد متين !! والزيارة ممنوعة ولى لا
_ الزيارةة ما ممنوعة بس في ايام محددة ومواعيد محددة .. أما فترة العلاج دي بتتوقف عليك انتي .. بس لازم تعرفي انه هتضيع عليك السنة دي
ظهرت علامات استياء في وشها .. طبطت على كتفها قبل ما تطلع وتخليها مستسلمة للبكاء
======================
ملاك كعادتها صحت بدري وجهزت نفسها عشان تمشي العيادة .. كان في إبتسامة مشرقة مرسومة على وشها .. قعدت في السفرة بعد ما ساعدت الشغالة في ترتيبها .. وعلى غير عادتها شهيتها كانت مفتوحة بطريقة ملحوظة
لؤي : ملاك 😶 .. كأنه ليك شهر ما أكلتي
ملاك : كيف !!
رايان : ما متعودة تأكلي حاجة من الصباح .. بتكتفي بالكابتشينو والسناكس
ملاك : والليلة جا على بالي أكل ممنوع 😐 !!
رايان : بالهنا
ملاك : ماما لسة ما صحت !!
لؤي : امبارح نامت متأخرة
ملاك : ما من عوايدها تساهر
لؤي : كانت قلقانة عليك .. قالت انك عيانة وما عاوزة تقولي ليها
ملاك : فظيعة ماما 😂 .. يلا كمل أكلك بسرعة عشان ما تفوت الباص
لؤي : ليا هتمشي المركز الليلة صح !! هطمن عليها أول بعدين أمشي المدرسة
ملاك : as u want
كملو اكلهم وبعدها طلعو .. رايان كان عندو مشوار .. أما لؤي وملاك اتوجهو المستشفى .. ساقو ليا وأمها ومشو المركز .. قضوها معاها حوالي نص ساعة بعد ما رتبت حاجاتها وبعدها ملاك وصلت لؤي المدرسة ورشا البيت ورجعت المستشفى .. مرت الساعات بسرعة وما حست بالزمن .. عاينت للساعة لقتها اتنين ونص .. لملمت حاجاتها وطلعت .. قبل ما تركب الاساسنير وقفت على صوت بناديها
_ دكتورة ملاك
_ ايوة !!
_ في مريضة في الطوارئ عاوزة تشوفك
_ مريضة في الطوارئ !!
_ ايوة .. طلعوها من الطوارئ وأول ما فتحت عيونها قالت عاوزة تشوفك
عاينت ليها باستغراب ومشت معاها .. اترددت لثواني قبل ما تفتح الباب وتدخل .. اتسعت عيونها من منظر البنت القدامها .. وشها باهت ولونها مخطوف.. عرفت أنها خضعت لغسيل معدة بعد ما اخدت جرعة زايدة كمحاولة إنتحار .. قربت منها ببطء ونادتها بصوت متقطع : ن .. نور !!
قعدت جنبها وهي مستغربة .. ليه عملت كدا وشنو ممكن يكون خلاها تنتحر
بعد دقايق فتحت عيونها .. نادتها بصوت متعب : ملاك .. ثواني ودموعها جات نازلة
ملاك : خليك مرتاحة .. ما تتعبي نفسك
نور : انا كويسة ما تخافي
ملاك : طيب .. ليه عملتي في نفسك كدا
نور قبلت على الناحية التانية قبل ما تحكي ليها : من فترة وبتجيني رسايل تهديد .. في التلفون .. هددوني انه هيقتولني لو بلغت الشرطة .. وامبارح جوني في الشقة .. قفلت باب الغرفة علي وفضلت اتصل عليكم بس ماف زول رد علي وانتي رقمك كان مقفول .. كسرو الشقة كلها وقلبوها .. ما عارفة هم عايزين مني شنو
حسيت بالخوف وما قدرت انوم باقي الليل .. لفيت نفسي باخد كمية من المسكنات عشان اقدر أنوم
ملاك : ما كان انتحار يعني !!
نور : لا
ملاك : طيب ارتاحي وانا بعدين هشوف حل للموضوع دا
ملاك بعد ما اطمنت عليها طلعت من غرفتها ومشت للدكتور المسؤول عن حالتها وعرفت انه ممكن يخرجوها .. كملت الإجراءات المطلوبة وساقتها معاها البيت .. أول ما وصلو ورتها غرفتها وخلتها عشان ترتاح .. سمعت صوت تلفونها رن .. عاينت للاسم و استغربت من المكالمة المفاجأة : الو
_ غصون
_ ملاك .. وسام يا ملاك
_ مالو !!
_ ما عارفة .. من يوم طلع معاك ورجع البيت وهو ما على بعضو .. ما بمشي المدرسة ولما سألتو قال عاوز يجمد السنة دي وما عاوز يمتحن .. وما بيطلع من غرفته نهائي .. أبوه لو جا ولقاه بالحالة دي ما هيريحنا
اتنهدت قبل ما تقول ليها : خليه يعمل العايزو .. يمكن دي اول خطوة في انه يبقى بني آدم
قفلت الخط وهي بتفكر في الموضوع .. لحد ما فجأة ومن غير ما تحس نامت
صحت على صوت رايان وهو بيناديها .. فتحت عيونها براحة واعتدلت في قعدتها .. لقت نفسها نايمة بملابسها : شكلي غفيت فجأة
رايان : لاقيت نور برة .. الجابها البيت شنو
ملاك : كانت تعبانة وفي المستشفى وكمان بتجيها رسايل تهديد واقتحمو شقتها امبارح .. ما بقدر اخليها براها في الظروف دي
رايان : يمكن تكون بتكذب وناوية على حاجة .. نسيتي أنها بتكرهك !! فجأة حبتك وقررت تستعين بيك
ملاك : في النهاية هي صحبتي .. ولو ما ساعدتها هتكون فايدتي شنو !! نور قلبها طيب ومستحيل تعمل فيني حاجة .. بعدين انا بردو غلطت معاها لما حكيت ليها عن زواجي وعرفت بالصدفة .. معاها حق تزعل .. اتثائب قبل ما تكمل : لؤي صاحي !! عنده امتحانات بعد أسبوع وما تابعت دراسته الأيام دي انشغلت ب ليا
رايان عاين ليها مسافة وهو مبتسم قبل ما يقول ليها : كيف ممكن تتحملي المسؤوليات دي كلها وانتي بالرقة دي
ملاك : ماف علاقة بين الاتنين اصلا 😂😂 .. بالمناسبة .. عندي سربرايز ليك
رايان : شنو !!
ملاك : استنى لحد ما أخد دش واصحصح
دخلت الحمام واخدت حمام دافئ خلاها تحس بالاسترخاء .. طلعت من الحمام وشعرها مبلول .. وقفت قدامو وهي بتعاين ليه لثواني قبل ما تقول : you'll become a father
عاينت ليها باستغراب وعدم استيعاب .. شالت يدو وختتها في بطنها قبل ما تكمل : I'm pregnant
أخد دقايق عشان يستوعب الموضوع .. رفعها من خصرها ودور بيها وهي بتصرخ .. طبع قبلة عميقة على جبينها قبل ما يقعد على ركبه ويطبع قبلة تانية في بطنها .. دقايق والخبر انتشر في البيت والعيلة وقررو يعملو عشا احتفالا بالمناسبة دي .. ملاك مشت غرفة نور ولقتها فاضية .. سألت عنها الشغالة وقالت ليها انها طلعت قبل شوية .. شالت تلفونها عشان تتصل عليها لقت رسالة : " ملاك .. انا آسفة لاني ما قدرت أكون صديقة كويسة .. ولأني فكرت كتير اني أذيك .. كذبت عليك في موضوع التهديدات دا .. واخدت جرعة زايدة عن قصد .. كنت واثقة انك هتصدقيني وهتجيبيني بيتك .. انتي أطيب من انك تصاحبي واحدة زيي .. حجزت تذكرة سفر لدبي .. هستقر مع أمي الفترة دي وهتواصل معاك في أقرب فرصة .. كوني بخير "
ابتسمت ابتسامة صغيرة قبل ما ترجع غرفتها وتبدا تجهز نفسها للعزيمة العاملنها
في ظرف ساعتين الضيوف بدو يوصلو و الي هم أهلهم واصحابها .. اتفاجأت بخالد وسمر جو مع بعض .. عاينت ليهم وبعدها نظراتها اتحولت ل أيديهم .. وهنا ظهر عليها الفرح لما شافت المحابس في أيديهم .. سلمت على سمر وحضنتها وبعدها دخلتهم جوة
قضو ليلة مليانة بأصوات ونستهم وضحكاتهم .. ليلة نست فيها مشاكلها وضغوطاتها .. اتجولت بنظراتها في ملامحهم .. أمها البعد 25 سنة رجعت شافتها .. وحبوبتها الي هي أمها التانية .. أبوها .. وحتى أخوها الي بقت معتبراه ولدها .. وأقرب اتنين ليها سمر وخالد الي بقو خلاص مخطوبين .. وأخيراً رايان 💙 .. الإنسان الي دخل حياتها فجأة واخد أكبر مساحة في قلبها .. غمضت عيونها واخدت نفس عميق
========================
مرت تسعة شهور .. ليا طلعت من مركز إعادة التأهيل بعد ما قضت فيه ستة شهور .. شخصيتها اتغيرت تماماً .. بقت هادئة شديد وعاقلة .. أما لؤي خلص امتحانات وباقي على نتيجته أسبوع .. سمر وخالد لسة مخطوبين وعرسهم بعد شهر .. أما نور من آخر رسالة تاني ما عرفت عنها حاجة .. رايان بدا في
مشروع لشركة طيران وخفف من سفراته الطويلة .. أما ملاك اخدت إجازة بسبب الحمل .. صحتها كانت فل وحملها مستقر جدا ..
صحت على صوت لؤي وهو بناديها : ملاك قومي
ردت عليه بصوت ناعس : في شنو
_ انتي صحصحي أول
_ لؤي 😑 .. في شنو من الصباح
_ بما انه الليلة عيد ميلادك فكرت اعمل فوتوسيشن .. اصحي عشان تجهزي نفسك قبل ما الضيوف يوصلو
_ طيب الوقت بدري .. خليني أكمل نومي
_ ملاك الساعة واحدة ونص 😐
_ اوكي .. اووكي .. صحيت .. أهو قمت ارتحت كدا 😒
_ استعجلي
قامت بصعوبة وبدت تجهز نفسها .. لبست فستان للحوامل من فوق أبيض لامع والجزء التحت من الشفون البصلي .. بيديك إحساس أمهم اسكيرت وبلوزة منفصلين .. فردت شعرها الي كانت أطرافه مصبوغة بالاشقر .. وعملت ميك اب ناعم 💙💙
نزلت تحت ولؤي بدا يصور فيها .. ملامحها كانت رايقة وصاافية .. أخد ليها كمية من الصور .. أما رايان كان مشغول بتجهيزات عيد ميلادها .. أول ما وصل البيت لؤي دخلو في السيشن .. صورهم صور كتيرة شديد لحد ما حسو بالوقت اتاخر .. رايان طلع غرفته عشان يغير ملابسه .. اما ملاك ورايان استقبلو الضيوف الي بدو يوصلو .. كان إحتفال عائلي .. ضيوفه أهلهم المعتادين ومعارفها هي .. قدمو ليها كمية كبيرة من الهدايا .. بعدها جابو تورتة عليها صورتها وشمعة على شكل 26 .. غمضت عيونها لثواني قبل ما تطفي الشمعة .. قعدت في كنبة وقعدو جنبها لؤي وليا
ليا : انت المفروض يكون ما عندك نفس تحتفل لأنه نتيجتك بعد عشرة أيام
لؤي : ليه لا .. أنا واثق من نجاحي 😌
ليا : واذا ما نجحت 🌚
ملاك : لا انا متأكدة من نجاحو تربيتي 😌
لؤي : ما تنسي هديتي
ملاك : هديتك جاهزة من قبل ما تنزل امتحانات حتى
لؤي : للدرجة دي واثقة من نجاحي 😂😂
ملاك : yup .. هتصلك يوم النتيجة في المدرسة
لؤي : تسلميني ليها بإيدك 😐
ملاك : مواعيد ولادتي بعد أسبوع غالباً وقت النتيجة أكون لسة في المستشفى أو يادوب طلعت
ليا : فكرتي في الأسماء
ملاك : اكيد .. إذا بنت هنسميها ميان .. واذا ولد هنسميه مهيار
ليا : حلويينن .. منو اختارهم
ملاك : اتفقنا عليهم الاتنين
قاطع حديثهم صوت بينادي ملاك .. اتلفتت على اتجاه الصوت .. ابتسمت قبل ما تقول ليه : ليث .. ما اتوقعت انك هتوافق وتجي
ليث : كل عام وأنتي بخير .. مد ليها صندوق خشبي فيه مجموعة من الهدايا المغلفة .. شالته ختته جنب بقيه الهدايا
ملاك : اتفضل .. ليه محسسني انك غريب
ليث : انا جيت عشان أعيادك واديك الهدية بس
ملاك : طيب على الأقل سلم على الباقيين
نادت رايان عشان يسلم عليه .. سلم عليه ببرود وبعدها عاين لملاك بطريقة غريبة .. قدرت تفهم انه ما حب جيته وهيعصب من الموضوع .. بعدها ليث سلم على خالد وسمر وأمها وطلع
رايان مزاجه اتقلب وبقى ما مرتاح للوضع حتى بعد ما مشى .. بدو الضيوف يستأذنو لحد ما مشو كلهم .. لؤي ورايان رفعو الهدايا في غرفة ملاك والخدم بدو يرتبو في المكان .. طلعت غرفتها وكان التعب ظاهر في ملامحها .. غيرت ملابسها واستعدت للنوم .. قاطعها رايان وهو بيقول : انتي عزمتيه !!
_ منو قصدك
_ ملاك ما تستغبيني
_ ليث !! يب انا عزمته وين المشكلة
_ هه .. بعد كل العملو فيك قادرة انك تتعاملي معاه بالبساطة دي
_ رايان .. انت ليه مكبر الموضوع .. في الفترة ديك ما كان متقبل فكرة اتفصالنا ودا السبب في تصرفاتو الغير مبررة .. بس دا ما بيعني انه سئ
دخل يدو في نص شعرو وشد عليه بقوة .. قال ليها بهدوء : اووكيي
طلع من الغرفة وقفل الباب بعصبية .. اتنهدت قبل ما تقوم وتطلع وراه .. فجأة حست ببطنها وجعتها شديد .. اتجاوزت الألم وطلعت من الغرفة .. مشت بصعوبة لحد ما وصلت السلم ..نزلت الدرجات ببطء شديد .. الألم بدا يزيد أكتر .. عاينت لرايان ال قرب من الباب .. حست بسائل في رجليها .. اتسعت عيونها لما شافت الدم النازل منها .. كان باقي عتبتين بس .. حست بنفسها بدا يكتم وضربات قلبها زادت .. حاولت تنزل بس رجلها زلت .. رايان وقف لما سمع صوت صرختها واتلفت بسرعة .. اتسمر في مكانه لما شافها واقعة في الأرض وبتنزف .. جرا عليها بسرعة .. قال ليها بصوت مرعوب : ملاك
في اللحظة دي جا لؤي على صوتها .. رايان حاول يشيلها بس وقف على صوت لؤي : لا .. ما تشيلها .. هطلب الإسعاف .. .. هي حامل وممكن اذا شلتها تضرها أكتر
مسك يدها وهو بينادي عليها .. كانت مغمضة عيونها ومكشرة شديد .. فتحتها بصعوبة ودموعها نازلة .. قالت ليه بصوت متقطع : رايان .. انا
رايان : ما تتعبي نفسك .. انا آسف لاني عصبت عليك .. ما كان قصدي .. بس .. بس ما عارف ليه عصبت لما شفتك واقفة معاه
ملاك : ماف داعي تعتذر .. ردة فعلك طبيعية وما غلطت .. اخدت أنفاسها بصعوبة قبل ما تكمل .. في حاجة لازم أقولها ليك قبل ما أمشي
رايان : انتي ما ماشة أي حتة .. شوية ويصل الإسعاف .. ما هيحصل ليك حاجة .. وبعد ما تبقي كويسة بعدين قولي أي حاجة عاوزاها
لؤي نزل وانفاسه قايمة من الدم الشافو : دقايق و يصل الإسعاف .. قرب منها بخطوات مترددة وقعد جنبها في الأرض .. عاينت ليه وهي مبتسمة إبتسامة باهتة .. قالت ليه بصوت متقطع منخفض : خ .. خلي بالك من نفسك
سمعو صوت عربية الإسعاف .. لؤي جرا ناحية البوابة عشان يتأكد
عاينت لرايان وكأنها بتتأمله لآخر مرة .. همست ليه بصوت مسموع : بحبك 💙
عاينت لعيونو المدمعة .. بقت شايفة طشاش وسامعة الأصوات بعيدة .. ابتسمت ابتسامة متعبة قبل ما تغمض عيونها
#نهاية_الجزء_الثاني_والعشرون
