ﺍﻧﺎ ﺑﻬﺘﺖ ﻭ ﻧﻠﻘﺎ ﺷﺠﺮﺓ ﻣﺮﺑﻮﻁ ﻓﻴﻬﺎ ﺩﺭﺟﻴﺤﻪ ﺑﻬﺘﺖ ﻓﻲ ﺍﻟﺪﺭﺟﻴﺤﻪ ﻭ ﻧﻠﻘﺎ ﻋﻠﻴﻬﺎ ﻋﻠﺒﻪ ﺍﺻﻐﻴﺮﺓ : ﺷﻨﻮ ﻫﺬﺍ ؟؟
ﺧﻠﻮﺩ ﺍﺑﺘﺴﻤﺖ : ﻋﺪﻱ ﺛﻮﻓﻲ ( ﻋﺪﻱ ﺷﻮﻓﻲ )
ﺍﻧﺎ ﺑﻬﺘﺖ ﻓﻴﻬﺎ ﻭﺍﻟﺘﻔﺘﺖ ﻭ ﻋﺪﻳﺖ ﺷﻮﺭ ﺍﻟﺪﺭﺟﻴﺤﻪ ﻭ ﻃﺒﺴﺖ ﺧﺬﻳﺖ ﺍﻟﻌﻠﺒﻪ ﻓﺘﺤﺘﻬﺎ ﻭ
.
.
.
.
.
ﻭﻧﻨﺼﺪﻡ
ﻭ ﻧﺴﻤﻊ ﺻﻮﺕ ﺣﺪ ﻭﺭﺍﺋﻲ ﺍﻳﻘﻮﻟﻲ : ﻫﺎﺍﺍﺍﺍ ﻋﺠﺒﺎﺗﻚ
ﺍﻟﺘﻔﺘﺖ ﻭ ﻧﻠﻘﺎﻩ ﻳﺎﺳﻴﻦ ﻭ ﺟﻨﺒﻪ ﺧﻠﻮﺩ
ﺍﻧﺼﺪﻣﺖ ﻭ ﻗﻌﺪﺕ ﺍﻧﺒﻬﺖ ﻓﻴﻬﻢ
ﺑﺠﺪ ﻛﺎﻧﺖ ﺻﺪﻣﺔ ﺑﺎﻟﻨﺴﺒﺔ ﻟﻴﺎ ﻣﻌﺎﺵ ﻋﺮﻓﺖ ﺷﻦ ﺍﻧﻘﻮﻝ ﺣﺴﻴﺖ ﺭﻭﺣﻲ ﻧﺴﻴﺖ ﺍﻟﺤﺮﻭﻑ ﺍﻻﺑﺠﺪﻳﻪ ﻭ ﺍﻟﺴﺎﻧﻲ ﺍﺭﺗﺒﻂ ﻣﻌﺎﺵ ﻗﺪﺭﺕ ﺍﻧﺤﺮﻛﻪ ﻭ ﻓﻮﻕ ﻫﺬﺍ ﻗﻠﺒﻲ ﻳﺪﻟﻒ ﻭ ﻳﺪﻟﻒ ﻟﺪﺭﺟﺔ ﺍﻧﻲ ﺣﺴﻴﺘﻪ ﻳﺒﻲ ﻳﻄﻠﻊ ﻣﻦ ﻣﻜﺎﻧﻪ
ﻳﺎﺳﻴﻦ : ﺷﻦ ﺭﺃﻳﻚ ﻓﻴﻪ
ﺍﻧﺎ ﻃﺒﺴﺖ ﻭﺑﻬﺘﺖ ﻓﻲ ﺍﻵﻳﻔﻮﻥ ﺑﻌﺪﻫﺎ ﺭﻓﻌﺖ ﺭﺃﺳﻲ ﻭﺑﻬﺘﺖ ﻓﻴﻪ ﻭﺍﺑﺘﺴﻤﺖ : ﺍﻳﺠﻨﻦ ﺑﺲ ﺍﺣﻢ ﻟﻤﻦ ﺟﺎﻳﺒﻪ
ﻳﺎﺳﻴﻦ ﺭﻓﻊ ﺣﺎﺟﺒﻪ ﻭﺑﻬﺖ ﻓﻴﺎ : ﻣﺶ ﻋﺎﺭﻓﺔ ﻟﻤﻦ ﻳﻌﻨﻲ
ﺍﻧﺎ : ﻭﻣﻦ ﻭﻳﻦ ﻧﺒﻲ ﻧﻌﺮﻑ ﻳﻌﻨﻲ
ﻳﺎﺳﻴﻦ ﻗﻌﺪ ﺍﻳﺒﻬﺖ ﻓﻴﺎ ﺍﺷﻮﻱ ﺑﻌﺪﻫﺎ ﺣﻜﺎ : ﻟﻲ ﺣﺒﻴﺒﺘﻲ
ﺍﻧﺎ ﺍﻧﺼﺪﻣﺖ ﻭ ﻗﻌﺪﺕ ﻣﻨﺴﺘﻬﺎ ﻭ ﺍﻧﺒﻬﺖ ﻓﻲ ﻳﺎﺳﻴﻦ ﻭ ﻓﻲ ﺑﺎﻟﻲ ﺍﻱ ﺣﺒﻴﺒﺔ ﻳﺤﻜﻲ ﻋﻠﻴﻬﺎ ﺣﺴﻴﺖ ﺍﻟﻌﺒﺮﺓ ﺧﻨﻘﺘﻨﻲ ﻓﺠﺂﺓ : ﺍﺣﻢ ﻛﻴﻒ ﺍﻧﺖ ﻋﻨﺪﻙ ﺣﺒﻴﺒﻪ
ﻳﺎﺳﻴﻦ ﻫﺰ ﺭﺍﺳﻪ ﻭ ﻫﻮ ﻣﺒﺘﺴﻢ : ﺍﻫﺎ ﻭ ﻫﻲ ﻣﺶ ﺣﺒﻴﺒﺘﻲ ﺑﺲ ﻫﻲ ﺭﻭﺣﻲ ﻭﻗﻠﺒﻲ ﻭ ﻛﻞ ﺷﺊ ﻓﻲ ﺣﻴﺎﺗﻲ ﻭ ﺟﺎﻳﺐ ﺍﻟﻔﻮﻥ ﻫﺬﺍ ﻟﻬﺎ
ﺍﻧﺎ ﺭﻗﺎﻟﻲ ﻣﻦ ﻛﻼﻣﻪ ﺣﺴﻴﺖ ﺑﻲ ﻏﻴﺮﺓ .. ﺍﻫﺎ ﻏﺮﺕ ﻏﺮﺕ ﺑﻜﻞ ﻻﻧﻲ ﺣﺒﻴﺘﻪ ﺣﺴﻴﺖ ﻛﻞ ﻛﻠﻤﻪ ﻗﺎﻟﻬﺎ ﻛﻴﻒ ﺍﻟﻤﻮﺱ ﻓﻲ ﻗﻠﺒﻲ ﺣﺴﻴﺖ ﻛﻼﻣﻪ ﻭﺍﺍﺍﺍﻋﺮ ﺑﻜﻞ ﻛﺄﻧﻪ ﺷﺊ ﺟﻮﺍ ﻓﻲ ﻗﻠﺒﻲ ﺍﻧﻜﺴﺮ ﺗﻤﻨﻴﺖ ﺍﻧﻘﻮﻟﻪ ﺍﺳﻜﺖ ﺧﻼﺹ ﻣﻌﺎﺵ ﺗﺤﻜﻲ ﺭﺍﻙ ﺍﺗﻮﺟﻌﻠﻲ ﻓﻲ ﻗﻠﺒﻲ ﻣﻌﺎﺵ ﺍﺗﻘﻮﻝ ﺍﻧﻬﺎ ﺭﻭﺣﻚ ﻭ ﻗﻠﺒﻚ ﻻﻧﻲ ﺍﻧﺤﺒﻚ ﻻﻧﻲ ﻣﻦ ﺍﻭﻝ ﻣﺎ ﺷﻔﺘﻚ ﻣﺶ ﻋﺎﺭﻓﺔ ﻣﺶ ﺻﺎﺭﻟﻲ ﻛﻞ ﺷﺊ ﻓﻲ ﺣﻴﺎﺗﻲ ﺍﻧﻘﻠﺐ ﻟﻤﺎ ﺍﻧﺸﻮﻓﻚ ﻣﺶ ﻋﺎﺭﻓﺔ ﺷﻦ ﺍﻳﺼﻴﺮﻟﻲ ﻗﻠﺒﻲ ﺍﻳﺪﻕ ﻭ ﻧﻘﻌﺪ ﺑﺲ ﻧﺒﻴﻚ ﺍﻃﻮﻝ ﻭ ﺍﻧﺖ ﻗﺎﻋﺪ ﺍﻣﻌﺎﻱ ﻟﻤﺎ ﺗﻤﺸﻲ ﻧﻨﺸﻐﻞ ﻋﻠﻴﻚ ﻭ ﺍﻧﻘﻮﻝ ﻫﺬﺍ ﻭﻳﻦ ﻳﺨﺘﻔﻲ ﺗﻤﻨﻴﺖ ﺍﻧﻘﻮﻟﻪ ﻛﻼﻡ ﻭﺍﺍﺍﺟﺪ ﺑﺲ ﺍﻟﺴﺎﻧﻲ ﺍﺭﺗﺒﻂ ﻭ ﻗﻌﺪﺕ ﺳﺎﻛﺘﻪ ﺑﺲ ﻭ ﺍﻧﺒﻬﺖ ﻓﻴﻪ
ﺍﻧﺎ : ﺍﺣﻢ ﺑﺎﻫﻲ ﻋﻠﻴﺶ ﺣﺎﻃﻪ ﻫﻨﺎ
ﻳﺎﺳﻴﻦ : ﻛﻨﺖ ﻧﺒﻲ ﻧﺎﺧﺬ ﺭﺍﻳﻚ ﻓﻴﻪ ﺑﺲ ﻻﻥ ﺍﻧﺘﻦ ﺍﻟﺒﻨﺎﺕ ﻣﺎ ﻳﻌﺠﺒﻜﻦ ﺍﻟﻌﺠﺐ
ﻭ ﻃﺒﺲ ﻋﻠﻴﺎ ﻳﺎﺳﻴﻦ : ﻭ ﺣﺒﻴﺒﺘﻲ ﻧﺎ ﺩﻟﻮﻋﺔ ﻫﻠﺒﻪ ﻭ ﻣﺎ ﻳﻌﺠﺒﻬﺎ ﺍﻟﻌﺠﺐ ﻭ ﺻﻌﺐ ﺍﻱ ﺷﺊ ﻳﻌﺠﺒﻬﺎ ﻭ ﻣﺶ ﺑﺴﻬﻮﻟﺔ ﺗﺮﺿﻰ ﻭ ﻧﺎ ﻧﺒﻲ ﺍﺭﺿﺎﻫﺎ ﻭ ﻣﺪﺍﻡ ﻋﺠﺒﻚ ﺍﻛﻴﺪ ﺣﺎ ﻳﻌﺠﺒﻬﺎ
ﺍﻧﺎ ﺭﻗﺎﻟﻲ ﻣﻦ ﻛﻼﻣﻪ ﺣﺴﻴﺘﻪ ﻳﻘﺼﺪ ﻳﺠﺮﺡ ﻓﻴﻬﺎ : ﺑﺎﻫﻲ ﻫﺎﻙ
ﻭ ﻣﺪﻳﺘﻠﻪ ﺍﻟﻔﻮﻥ
ﻳﺎﺳﻴﻦ ﻣﺪ ﻳﺪﻩ ﻭ ﺧﺎﺩﻩ ﻣﻨﻲ
ﻭ ﺍﻭﻝ ﻣﺎ ﺧﺎﺩﻩ ﻫﻠﺒﺘﻪ ﻭ ﻋﺪﻳﺖ ﻭ ﺍﻧﺎ ﺍﻧﺤﻮﻝ ﻧﻤﺴﻚ ﻓﻲ ﺍﺩﻣﻮﻋﻲ ﻗﻌﺪﺕ ﻧﻤﺸﻲ ﻭ ﺧﻼﺹ ﻭ ﻣﺶ ﻋﺎﺭﻓﺔ ﻭ ﻳﻦ ﺑﺲ ﻗﻌﺪﺕ ﻧﻤﺸﻲ ﻭ ﻓﺠﺂﺓ ﻭﻗﻔﺖ ﻭ ﺍﻟﺘﻔﺘﺖ ﺟﻨﺒﻲ ﻟﻘﻴﺖ ﺷﺠﺮ ﻭ ﻣﺎﻓﻴﺶ ﺣﺪ
ﻣﻌﺎﺵ ﺣﺴﻴﺖ ﺍﻻ ﺑﺪﻣﻮﻋﻲ ﻳﻨﺰﻟﻦ ﻭ ﺻﻮﺕ ﺷﻬﻘﺎﺗﻲ ﺑﺪﺍ ﻳﻌﻼ ﻗﻌﺪﺕ ﻧﺒﻜﻲ ﺑﺼﻮﺕ ﻋﺎﻟﻲ ﻛﺄﻥ ﻋﻨﺪﻱ ﺣﺪ ﻣﻴﺖ ﺑﻜﻴﺖ ﻣﻦ ﺍﻟﻮﺟﻊ ﻣﻦ ﻟﻠﻲ ﺻﺎﺭ ﻣﺶ ﻋﺎﺭﻓﺔ ﻳﻌﻨﻲ ﺍﻭﻛﻲ ﺑﺲ ﻟﻨﺎ ﻳﻮﻣﻴﻦ ﻭﻻ ﺗﻼﺗﺔ ﻭ ﺻﺎﺭ ﻓﻴﺎ ﻫﺬﺍ ﻛﻠﻪ ﻭ ﺣﺒﻴﺘﻪ ﻣﺶ ﻋﺎﺭﻓﺔ ﻛﻴﻒ ﻣﻤﻜﻦ ﻟﻠﻲ ﻧﺤﻜﻴﻠﻪ ﻟﻠﻲ ﺻﺎﺭ ﺍﻣﻌﻴﺎ ﻳﻀﺤﻚ ﻭ ﺍﻳﻘﻮﻟﻲ ﺍﻧﺘﻲ ﻫﺒﻠﻪ ﻳﻌﻨﻲ ﻟﻜﻲ ﻳﻮﻣﻴﻦ ﺑﺲ ﺗﻌﺮﻓﻴﻪ ﻭ ﺣﺘﻲ ﺣﺐ ﻣﺎﻓﻲ ﺑﻴﻨﻜﻢ ﻭﻻ ﺣﺘﻲ ﺗﻠﻤﻴﺢ ﻭﺻﺎﺭ ﻓﻴﻜﻲ ﻫﺬﺍ ﻛﻠﻪ ﺑﺲ ﺑﺠﺪ ﻋﻠﻘﻨﻲ ﻓﻴﻪ ﻳﺎ ﻧﺎﺱ ﻣﻦ ﺣﺮﻛﺘﻪ ﻧﻈﺮﺕ ﺍﻋﻴﻮﻧﻪ ﺿﺤﻜﺘﻪ ﻣﺶ ﻋﺎﺭﻓﺔ ﻛﻴﻒ ﺻﺎﺭ ﺑﺲ ﻟﻘﻴﺖ ﺭﻭﺣﻲ ﺍﻧﺤﺒﻪ ﺷﻦ ﺍﻧﺪﻳﺮ ﻗﻬﺮﻧﻲ ﻭ ﺟﻌﻨﻲ ﻟﻠﻲ ﺻﺎﺭ ﺻﻌﺒﺖ ﻋﻠﻴﺎ ﺭﻭﺣﻲ ﻭﺍﺍﺍﺍﺍﺍﺍﺟﺪ ﻭﺍﻟﻠﻬﻲ ﺻﻌﺒﺖ ﻋﻠﻴﺎ ﺑﻜﻞ ﺣﺴﻴﺖ ﺭﻭﺣﻲ ﻏﺒﻴﻪ ﻋﻠﻘﺖ ﺭﻭﺣﻲ ﺑﺮﻭﺣﻲ ﻭ ﻧﺎ ﺍﻧﻘﻮﻝ ﻭ ﻧﻨﺼﺢ ﻓﻲ ﻧﺎﺱ ﻳﺎﺭﻳﺘﻨﻲ ﻧﺼﺤﺖ ﺭﻭﺣﻲ ﻗﺒﻞ ﻳﺎﺭﻳﺘﻨﻲ ﺣﻄﻴﺖ ﻳﺪﻱ ﻋﻠﻲ ﻓﻤﻲ ﻭ ﻃﺤﺖ ﻋﻠﻲ ﺍﻻﺭﺽ ﻭ ﻗﻌﺪﺕ ﻧﺒﻜﻲ ﻭ ﻓﺠﺂﺓ ﺣﺴﻴﺖ ﺑﻴﺪ ﺷﺨﺺ ﺍﻧﺤﻄﺖ ﻋﻠﻲ ﻛﺘﻔﻲ ﺍﻟﺘﻔﺘﺖ ﻭ ﻧﻠﻘﺎﻫﺎ ﻫﻨﺎﺩﻱ
ﻫﻨﺎﺩﻱ ﻃﺒﺴﺖ ﻭ ﻗﻌﻤﺰﺕ ﺟﻨﺒﻲ ﺍﻻﺭﺽ : ﺧﻠﻮﺩ ﻛﻨﻚ ﺷﻦ ﻓﻲ ﻋﻠﻴﺶ ﺗﺒﻜﻲ
ﺍﻧﺎ ﻭ ﺍﻟﻌﺒﺮﺓ ﺧﻨﻘﺘﻨﻲ : ﻩ .. ﻥ .. ﺍ .. ﺩ .. ﻱ ﻫﻨﺎﺩﻱ
ﻭ ﻗﻌﺪﺕ ﻧﺒﻜﻲ
ﻫﻨﺎﺩﻱ ﻣﺴﻜﺘﻨﻲ ﻣﻦ ﺍﻳﺪﻱ : ﺑﺴﻢ ﺍﻟﻠﻪ ﻳﺎ ﺑﻨﺖ ﻛﻨﻚ ﺷﻦ ﻓﻲ ﻋﻠﻴﺶ ﺗﺒﻜﻲ ﺧﻠﻮﺩ ﺍﻟﻨﺒﻲ ﺭﺩﻱ ﻋﻠﻴﺎ ﻣﺎ ﺍﺗﺨﻮﻓﻴﻨﺶ ﻛﻨﻚ ﺗﺒﻜﻲ ﺷﻦ ﻓﻲ ﺧﻠﻮﺩ ﺍﺣﻜﻲ ﺷﻦ ﺻﺎﺭ ﻋﻠﻴﺶ ﺗﺒﻜﻲ ﺧﻠﻮﺩ ﻭﺍﻟﻨﺒﻲ ﺍﺣﻜﻲ ﺣﺎﺟﺔ
ﺍﻧﺎ : ﻣﻤﻜﻦ ﻟﻮ ﺳﻤﺤﺘﻲ ﺗﻘﻌﺪﻱ ﺍﻣﻌﺎﻱ ﻭ ﻣﺎ ﺗﺴﺄﻟﺶ ﻋﻠﻲ ﺷﺊ ... ﻟﻮ ﺳﻤﺤﺘﻲ
ﻭ ﻗﻌﺪﺍﻥ ﺍﺩﻣﻮﻋﻲ ﻳﻨﺰﻟﻦ
ﻫﻨﺎﺩﻱ ﻫﺰﺕ ﺭﺍﺳﻬﺎ ﻭ ﻗﺮﺑﺖ ﺍﻇﺒﻄﺘﻨﻲ ﻭ ﺍﺩﻣﻮﻋﻬﺎ ﻋﻠﻲ ﺧﺪﻫﺎ
ﺍﻭﻝ ﻣﺎ ﺍﻇﺒﻄﺘﻨﻲ ﻫﻨﺎﺩﻱ ﻣﺴﻜﺖ ﻓﻴﻬﺎ ﺯﻳﻦ ﻭ ﺑﺪﺍ ﺻﻮﺕ ﺷﻬﻘﺎﺗﻲ ﻳﺮﺗﻔﻊ ﺍﺧﺮﺓ ﻣﻌﺎﺵ ﻗﺪﺭﺕ ﻧﻤﺴﻚ ﺭﻭﺣﻲ : ﺣﺒﻴﺘﻪ ﻭﺍﻟﻠﻬﻲ ﻣﺶ ﻋﺎﺭﻓﺔ ﻛﻴﻒ ﺻﺎﺭ ﻳﺎ ﻫﻨﺎﺩﻱ ﻣﺶ ﻋﺎﺭﻓﺔ ﺑﺲ ﻟﻘﻴﺖ ﺭﻭﺣﻲ ﺍﻧﺤﺒﻪ ﻭ ﻳﺎﺭﻳﺘﻨﻲ ﻣﺎ ﺣﺒﻴﺘﻪ ﺷﻦ ﺧﻼﻧﻲ ﺍﻧﺤﺐ ﺣﺘﻲ ﻧﺎ ﺷﻦ ﻟﻠﻲ ﺧﻼﻧﻲ
ﻭ ﻗﻌﺪﺕ ﻧﺒﻜﻲ ﻭ ﻫﻨﺎﺩﻱ ﺗﺒﻜﻲ ﺍﻣﻌﺎﻱ
..
ﺣﻨﻴﻦ : ﺍﻩ ﻳﺎ ﺭﺍﺳﻲ ﻋﻠﻴﻚ ﺻﺪﺍﻉ
ﻣﺮﻳﻢ : ﻛﻨﻚ
ﺣﻨﻴﻦ : ﻣﺶ ﻋﺎﺭﻓﺔ ﺣﺎﺳﻪ ﺭﻗﺒﺘﻲ ﺍﺗﻮﺟﻊ ﻓﻴﺎ ﻭ ﺭﺍﺳﻲ ﺻﺪﺍﻉ ﺑﻜﻞ ﻭ ﺣﺎﺳﻪ ﺭﻭﺣﻲ ﻧﻄﺒﺦ
ﻣﺮﻳﻢ : ﺗﺮﺍ
ﻭ ﻗﺮﺑﺖ ﻣﺮﻳﻢ ﻣﻦ ﺣﻨﻴﻦ ﻭ ﺣﻄﺖ ﻳﺪﻫﺎ ﻋﻠﻲ ﺟﺒﻬﺖ ﺣﻨﻴﻦ
ﻣﺮﻳﻢ : ﻭﺍﺍﺍﻭ ﺣﺎﻣﻴﻪ ﺑﻜﻞ ﺍﻧﺘﻲ ﺣﻲ ﻋﻠﻴﻚ ﺷﻜﻠﻚ ﺑﺘﻤﺮﺿﻲ
ﺣﻨﻴﻦ : ﺑﻨﻤﺮﺽ ﻗﻮﻟﻲ ﻣﺮﺿﺖ ﻭ ﺍﻧﺘﻬﺖ
ﻣﺮﻳﻢ : ﺣﺘﻲ ﻭ ﺍﻧﺘﻲ ﻣﺮﻳﻀﺔ ﻣﺎ ﺍﺗﺨﻠﻴﺶ ﻋﻠﻲ ﺍﻟﺤﻨﺎﻃﻪ
ﺣﻨﻴﻦ : ﺍﻫﺎ ﺍﺻﻼ ﻋﺎﻗﺪﻩ ﺻﻔﻘﻪ ﺍﻣﻌﺎﻫﺎ
ﻣﺮﻳﻢ : ﻫﻬﻬﻬﻬﻬﻪ ﺍﻣﻄﺮﺷﻘﺔ ﺍﺳﺘﻨﻲ ﺗﻮﺍ ﺍﻧﻜﻠﻢ ﻣﺎﻣﺎ
ﺣﻨﻴﻦ ﻫﺰﺕ ﺭﺍﺳﻬﺎ
ﺻﺒﺖ ﻣﺮﻳﻢ ﻃﻠﻌﺖ ﻣﻦ ﺍﻟﺪﺍﺭ
ﻭ ﻗﻌﺪﺕ ﺣﻨﻴﻦ ﻣﺘﻤﺪﺩﻩ ﻋﻠﻲ ﺍﻟﺴﺮﻳﺮ ﻭ ﺍﻣﻐﻤﻀﻪ ﺍﻋﻴﻮﻧﻬﺎ ﻭ ﻓﺠﺂﺓ ﺳﻤﻌﺖ ﺻﻮﺕ ﻓﻮﻧﻬﺎ ﻓﺘﺤﺖ ﺍﻋﻴﻮﻧﻬﺎ ﻭ ﺍﻟﺘﻔﺘﺖ ﺧﺬﺕ ﻓﻮﻧﻬﺎ ﻣﻦ ﻋﻠﻲ ﺍﻟﻜﻮﻣﻴﺪﻳﻨﻪ ﻓﺘﺤﺖ ﺍﻟﻘﻔﻞ ﻭ ﺗﻠﻘﺎﻩ ﺍﺷﻌﺎﺭ ﻓﺘﺤﺖ ﻟﻘﺘﻪ ﻃﻠﺐ ﺻﺪﺍﻗﺔ ﺧﺸﺖ ﻋﻠﻴﻪ ﻭ ﺗﻠﻘﺎﻩ ﻣﻦ ﻭﺍﺣﺪ ﻗﺮﺁﺕ ﺍﻻﺳﻢ
ﺣﻨﻴﻦ : ﻓﺎﺿﻞ ﺍﻟﺸﻴﺨﻲ ﻣﺎﺭ ﻋﻠﻴﺎ ﺍﻻﺳﻢ ﻫﺬﺍ
ﻭ ﻓﺠﺂﺓ ﺧﻄﺮ ﻋﻠﻲ ﺑﺎﻟﻬﺎ ﺍﻟﻘﺮﻭﺏ ﻟﻠﻲ ﺍﻧﻀﻔﺖ ﻓﻴﻪ
ﺧﺸﺖ ﻋﻠﻴﻪ ﻭ ﺧﺸﺖ ﻋﻠﻲ ﺍﺩﻣﻦ ﺍﻟﺼﻔﺤﺔ ﻭ ﺗﻠﻘﺎﻩ ﻧﻔﺲ ﺍﻟﺸﺨﺺ
ﺣﻨﻴﻦ : ﺣﻲ ﺣﻲ ﻳﺎﺭﻳﺘﻚ ﺣﺘﻲ ﺍﺳﺘﻨﻴﺖ ﻳﻮﻣﻴﻦ ﻭﻻ ﺍﺳﺒﻮﻉ ﻭ ﺩﺯﻳﺖ ﻃﻠﺐ ﻻ ﻃﻮﻝ ﻣﻦ ﺍﻭﻝ ﻣﻦ ﺧﺸﻴﺖ
ﻃﻠﻌﺖ ﺣﻨﻴﻦ ﻣﻦ ﺍﻟﻘﺮﻭﺏ ﻭﺭﺩﺕ ﻋﻠﻲ ﺍﻻﺷﻌﺎﺭﺍﺕ ﺷﻔﺖ ﻃﻠﺐ ﺍﻟﺼﺪﺍﻗﺔ ﺟﺖ ﺗﺒﻲ ﺍﺩﻳﺮ ﺣﺪﻑ ﻭ ﻟﻔﺖ ﺍﻧﺘﺒﺎﻫﺎ ﺍﻟﺼﻮﺭﺓ ﺍﻟﺸﺨﺼﻴﺔ ﻭ ﻗﻔﺖ ﻭ ﺧﺸﺖ ﻋﻠﻲ ﺍﻳﻤﻴﻠﻪ ﺷﻔﺘﻪ
ﺣﻨﻴﻦ : ﻋﻄﻪ ﺍﺩﻋﻮﻩ ﻋﻠﻴﻚ ﺟﻤﺎﻝ
ﻭ ﻗﻌﺪﺕ ﺣﻨﻴﻦ ﺍﺗﺸﻮﻑ ﻓﻲ ﺍﻳﻤﻴﻠﻪ ﻛﺎﻥ ﻛﻠﻪ ﺻﻮﺭﻩ ﻫﻮ ﻭ ﻛﻼﻡ ﻳﻜﺘﺐ ﻓﻴﻪ ﺧﺸﺖ ﻋﻠﻲ ﺍﻵﺻﺪﻳﻘﺎﺀ ﻭ ﻣﺎﻟﻘﺘﺶ ﺷﺊ
ﺣﻨﻴﻦ : ﺣﻴﻮﺍﻥ ﺩﺍﻳﺮ ﺍﺧﻔﺎﺀ ﻟﻶﺻﺪﻳﻘﺎﺀ
ﻃﻠﻌﺖ ﺣﻨﻴﻦ ﻣﻦ ﺍﻵﻳﻤﻴﻞ ﻭ ﺩﺭﺕ ﺣﺪﻑ ﻟﻄﻠﺐ ﺑﻌﺪﻫﺎ ﺧﺸﺖ ﻋﻠﻲ ﺍﻹﻋﺪﺍﺩﺍﺕ ﻭ ﺩﺭﺍﺕ ﺍﻟﻐﺎﺀ ﻟﻄﻠﺒﺎﺕ ﺍﻟﺼﺪﺍﻗﺔ ﻭ ﺳﻜﺮﺕ ﺍﻟﻔﻮﻥ ﻭ ﺣﻄﺘﻪ ﻋﻠﻲ ﺍﻟﻜﻮﻣﻴﺪﻳﻨﻪ ﻭ ﺗﻤﺪﺩﺕ ﻋﻠﻲ ﺍﻟﺴﺮﻳﺮ ﻋﻠﻲ ﺧﺸﺖ ﺧﻮﻳﻠﺔ ﻭ ﻋﺒﺪ ﺍﻟﺮﺣﻤﻦ ﻭ ﻣﺮﻳﻢ
ﺧﻮﻳﻠﺔ : ﺣﻨﻮﻧﻪ ﻛﻨﻚ ﻳﺎ ﻣﺎﻣﺎ
ﻭ ﻗﺮﺑﺖ ﻗﻌﻤﺰﺕ ﺟﻨﺒﻬﺎ ﻋﻠﻲ ﺍﻟﺴﺮﻳﺮ ﻭ ﺣﻄﺖ ﻳﺪﻫﺎ ﻋﻠﻲ ﺟﺒﻬﺔ ﺣﻨﻴﻦ : ﺣﻲ ﺍﺳﻮﻳﺨﻨﻪ ﺑﻜﻞ
ﻋﺒﺪﺍﻟﺮﺣﻤﻦ : ﺗﻲ ﺍﻟﺪﻧﻴﺎ ﺣﻤﻮ ﻣﻌﻘﻮﻟﺔ ﺟﺎﺗﻚ ﺣﺮﺍﺭﺓ
ﺣﻨﻴﻦ : ﻣﺎﻫﻮ ﻣﻦ ﺍﺧﺘﻚ ﺍﻟﺸﺎﻃﺮﺓ
ﻣﺮﻳﻢ : ﻫﻬﻬﻬﻪ ﺍﻧﺘﻲ ﻟﻠﻲ ﺑﺪﻳﺘﻲ
ﻋﺒﺪ ﺍﻟﺮﺣﻤﻦ : ﻛﻨﻜﻦ ﺗﺤﻜﻦ ﺑﺎﻻﻟﻐﺎﺯ ﻓﻬﻤﻨﺎ
ﺧﻮﻳﻠﺔ : ﻻ ﻧﺎ ﻓﻬﻤﺖ ﻳﺎ ﺍﻭﻟﻴﺪﻱ ﻳﻌﻨﻲ ﺍﻟﺘﻠﺞ ﻟﻠﻲ ﻛﺎﻥ ﻣﺎﻟﻲ ﺍﻟﻤﻄﺒﺦ ﻣﻨﻜﻦ
ﻣﺮﻳﻢ : ﻫﻬﻬﻬﻬﻬﻪ ﻣﺶ ﻋﺎﺭﻓﺔ ﻳﺎ ﻣﺎﻣﺎ ﻟﻴﺶ ﻣﺎ ﺧﺸﻴﺘﺶ ﻃﺐ ﺯﻱ ﺑﺎﺑﺎ
ﻋﺒﺪ ﺍﻟﺮﺣﻤﻦ : ﻫﻬﻬﻬﻬﻬﻬﻪ
ﺧﻮﻳﻠﺔ : ﻛﻼ ﺍﻧﺖ ﻣﺶ ﻋﺎﺭﻓﺔ ﺷﻦ ﻧﺒﻲ ﺍﻧﺪﻳﺮ ﺍﻣﻌﺎﻛﻲ ﻳﺎ ﺑﻨﺖ
ﻣﺮﻳﻢ : ﺣﺮﺍﻡ ﻋﻠﻴﻚ ﻳﺎ ﻣﺎﻣﺎ ﻧﺎ ﻛﻨﺖ ﺍﻧﻬﺪﺭﺯ ﻣﻊ ﺍﺧﺘﻲ ﻫﺪﺭﺯﺓ ﺍﺧﻮﺓ ﻫﻲ ﻟﻠﻲ ﺑﺪﺕ
ﻋﺒﺪﻭ ﻭ ﺣﻨﻴﻦ : ﻫﻬﻬﻬﻬﻬﻬﻬﻪ ﺻﺎﺭ ﻫﺪﺭﺯﺓ ﺍﺧﻮﺓ
ﻣﺮﻳﻢ ﻫﺰﺕ ﺭﺍﺳﻬﺎ
ﺧﻮﻳﻠﺔ : ﻟﻤﺎ ﺍﻳﺠﻲ ﺑﻮﻙ ﺗﻮﺍ ﻳﺘﺼﺮﻑ ﺍﻣﻌﺎﻙ ﻭ ﻋﺪﻱ ﺟﻴﺒﻴﻠﻲ ﺑﻨﺪﻭﻝ ﻭ ﻛﻤﺪﺍﺕ
ﻣﺮﻳﻢ : ﺣﺎﺿﺮ
ﻭ ﺍﻟﺘﻔﺘﺖ ﻃﻠﻌﺖ
ﻭ ﺍﻳﺮﻥ ﻓﻮﻥ ﻋﺒﺪ ﺍﻟﺮﺣﻤﻦ ﻃﻠﻌﻪ ﻭﺭﺩ
ﻋﺒﺪﻭ : ﺍﻟﻮ .. ﺍﻧﺸﺎﺀ ﺍﻟﻠﻪ ﺗﻔﻀﻞ ... ﺍﻭﻭﻭﻭﻭﻭﻭﻭﻭ ﻓﺎﺿﻞ ﺷﻨﺠﻚ ﻳﺎ ﻏﺎﻟﻲ
ﻭ ﺻﺒﺎ ﻃﻠﻊ ﻭ ﺍﻋﻴﻮﻥ ﺣﻨﻴﻦ ﺗﻠﺤﻖ ﻓﻴﻪ ﻧﻴﻦ ﻃﻠﻊ
ﻣﺮﻳﻢ : ﻫﺎﻛﻲ ﻳﺎ ﻣﺎﻣﺎ
ﺧﺬﺕ ﺧﻮﻳﻠﺔ ﺍﻟﺒﻨﺪﻭﻝ : ﻫﺎﻛﻲ ﻳﺎ ﺍﺣﻨﻮﻧﻪ
ﺣﻨﻴﻦ ﺍﻟﺘﻔﺘﺖ ﺷﻮﺭ ﺧﻮﻳﻠﺔ ﺧﺬﺕ ﺍﺣﺒﻮﺏ ﺍﻟﺒﻨﺪﻭﻝ ﻭ ﺷﺮﺑﺖ ﺍﻣﻴﺎﻩ
ﺧﻮﻳﻠﺔ : ﻭﻳﻦ ﺍﻟﻜﻤﺎﺩﺍﺕ
ﺣﻨﻴﻦ : ﻣﺎﻧﺒﻴﺶ ﻳﺎ ﻣﺎﻣﺎ ﻛﻤﺎﺩﺍﺕ ﺧﻼﺹ ﺧﺬﻳﺖ ﺑﻨﺪﻭﻝ ﺍﺷﻮﻱ ﻭﻧﻘﻌﺪ ﺍﻛﻮﻳﺴﺔ
ﺧﻮﻳﻠﺔ : ﺑﺲ ﺳﺎﺧﻨﻪ ﺍﻧﺘﻲ
ﺣﻨﻴﻦ : ﻻ ﺍﻧﺸﺎﺀ ﺍﻟﻠﻪ ﺍﺷﻮﻱ ﻭ ﻧﻘﻌﺪ ﺍﻛﻮﻳﺴﺔ
ﺧﻮﻳﻠﺔ : ﻣﺎﺷﻲ ﺍﻫﻮﻭﻭ ﺍﻟﻤﻐﺮﺏ ﺍﺫﻥ ﺻﺒﻲ ﺻﻠﻲ ﻭ ﺍﺭﻗﺪﻱ ﻭ ﺗﻮﺍ ﻧﻘﻌﺪ ﺍﻧﺠﻲ ﺍﻧﺸﻮﻑ ﻓﻴﻚ
ﺣﻨﻴﻦ : ﺑﺎﻩ
ﺧﻮﻳﻠﺔ : ﻭﺍﻧﺘﻲ ﻳﺎ ﺍﻣﺮﻭﻣﻪ ﺻﺒﻲ ﺧﻠﻴﻨﺎ ﺍﻧﺼﻠﻮﺍ ﻭ ﺍﻧﺪﻳﺮﻭ ﺍﻟﻌﺸﺎﺀ
ﻣﺮﻳﻢ : ﻣﺎﺷﻲ
ﻭ ﺻﺒﻦ ﺧﻮﻳﻠﺔ ﻭ ﻣﺮﻳﻢ ﻃﻠﻌﻦ ﻭ ﺳﻜﺮﻥ ﺍﻟﺒﺎﺏ
ﺻﺒﺖ ﺣﻨﻴﻦ ﺗﻮﺿﺖ ﻭ ﺻﻠﺖ ﺑﻌﺪﻫﺎ ﻃﺤﺖ ﻋﻠﻲ ﺍﻟﺴﺮﻳﺮ ﻭ ﻫﻲ ﺣﺎﺳﻪ ﺍﻋﻈﺎﻣﻬﺎ ﻣﺘﻜﺴﺮﻩ ﺑﻜﻞ ﻭ ﺗﻌﺒﺎﻧﻪ
ﺗﻐﻄﺖ ﺑﺎﻟﻮﺭﻏﺎﻥ ﻭ ﻗﻌﺪﺕ ﺍﺗﺒﻬﺖ ﻓﻲ ﺍﻟﺴﻘﻒ
ﺣﻨﻴﻦ : ﺯﻋﻤﻚ ﻳﻌﺮﻓﻮﺍ ﺑﻌﻀﻬﻢ ... ﻻ ﻻ ﻣﺴﺘﺤﻴﻞ .. # ﺑﻨﻐﺎﺯﻱ ﻣﺶ ﺍﺻﻐﻴﺮﺓ ﻟﻠﻲ ﺍﻟﺪﻧﻴﺎ ﻛﻠﻬﺎ ﻣﻤﻜﻦ ﺗﻄﻠﻊ ﺗﻌﺮﻑ ﺑﻌﻀﻬﺎ ... ﺑﺲ .. ﺍﻓﻔﻒ ... ﺍﺳﺘﻐﻔﺮ ﺍﻟﻠﻪ ﻋﻠﻴﺶ ﺷﺎﻏﻠﻪ ﺭﻭﺣﻚ ﺗﻮﺍ ﺍﻧﺘﻲ ﻳﺎ ﺣﻨﻴﻦ ﻫﻮ ﺩﺯ ﻃﻠﺐ ﻭ ﺍﻧﺘﻲ ﺭﻓﻀﺘﻲ ﺧﻼﺹ ﺍﻧﺘﻬﺎﺀ ﺍﻟﻤﻮﺿﻮﻉ .. ﺣﺘﻲ ﻣﻌﺮﻓﺔ ﻣﺎ ﻧﻌﺮﻓﻮﺍ ﺑﻌﻀﻨﺎ ... ﺧﻼﺹ ﺍﻟﻤﻮﺿﻮﻉ ﺍﺳﻜﺮ .. ﻫﻮ ﺍﺻﻼ ﻣﺎﻓﻴﺶ ﻣﻮﺿﻮﻉ ﻏﻴﺮ ﺍﻧﺎ ﺑﺲ ﺩﺭﺕ ﻣﻮﺿﻮﻉ ... ﺍﺣﺴﻦ ﺷﺊ ﻧﺮﻗﺪ
ﻭ ﻏﻄﺖ ﺣﻨﻴﻦ ﻭﺟﻬﺎ ﻭ ﻣﻌﺎﺵ ﺩﺭﺕ ﻋﻠﻲ ﺭﻭﺣﻬﺎ ﺍﻻ ﻭﻫﻲ ﺭﺍﻳﺤﻪ ﻓﻲ ﺳﺎﺑﻊ ﻧﻮﻣﻪ
..
ﻧﺰﻟﻮﺍ ﺍﻟﺮﺟﺎﻟﺔ ﺍﻳﺼﻠﻮﺍ ﻓﻲ ﺍﻟﺠﺎﻣﻊ ﻭ ﻗﻌﺪﻧﺎ ﻧﺤﻨﺎ ﻓﻲ ﺍﻟﺴﻴﺎﺭﺍﺕ
ﻫﻨﺎﺩﻱ : ﺧﻠﻮﺩ
ﺍﻧﺎ ﻓﺘﺤﺖ ﺍﻋﻴﻮﻧﻲ ﻭ ﺍﻟﺘﻔﺘﺖ ﻋﻠﻴﻬﺎ
ﻫﻨﺎﺩﻱ : ﺍﻛﻮﻳﺴﺔ ﺍﻧﺘﻲ ﺗﻮﺍ ؟؟
ﺍﻧﺎ ﻫﺰﻳﺖ ﺭﺍﺳﻲ
ﻫﻨﺎﺩﻱ ﻣﺴﻜﺖ ﻳﺪﻱ ﻭ ﻗﻌﺪﺕ ﺍﺗﺒﻬﺖ ﻓﻴﺎ
ﺍﻣﺠﺎﺩ ﻧﺎﺿﺖ : ﺍﻩ ﻭﻳﻦ ﻧﺤﻨﺎ
ﻫﻨﺎﺩﻱ : ﻣﺰﻟﻨﺎ ﻓﻲ ﺍﻟﻄﺮﻳﻖ ﻳﺎ ﺍﻣﺠﺎﺩ
ﺍﻣﺠﺎﺩ : ﻭﻳﻦ ﺳﺮﺍﺝ
ﻫﻨﺎﺩﻱ : ﻧﺰﻝ ﺍﻳﺼﻠﻲ ﻣﻊ ﺍﻟﺮﺟﺎﻟﺔ ﻓﻲ ﺍﻟﺠﺎﻣﻊ
ﺍﻣﺠﺎﺩ ﻫﺰﺕ ﺭﺍﺳﻬﺎ ﻭ ﺑﻬﺘﺖ ﻓﻴﺎ ﺑﻌﺪﻫﺎ ﺍﻟﺘﻔﺘﺖ ﻋﻠﻲ ﻫﻨﺎﺩﻱ : ﻛﻨﻬﺎ
ﻫﻨﺎﺩﻱ : ﺷﺊ ﺑﺲ ﻣﺮﻳﻀﺔ
ﺍﻣﺠﺎﺩ ﺑﻬﺘﺖ ﻓﻴﺎ : ﻻ ﺑﺄﺱ ﻋﻠﻴﻚ ﻳﺎ ﻟﻮﻟﻲ
ﺍﻧﺎ ﺍﺑﺘﺴﻤﺖ : ﺍﻟﻠﻪ ﻻ ﻳﻮﺭﻳﻚ ﺑﺎﺱ
ﺍﻣﺠﺎﺩ : ﺑﺴﻢ ﺍﻟﻠﻪ ﻛﻨﻪ ﺻﻮﺗﻚ ﺭﺍﻳﺢ
ﻫﻨﺎﺩﻱ : ﻣﺎ ﻗﺘﻠﻚ ﻣﺮﻳﻀﺔ
ﺍﻣﺠﺎﺩ : ﺑﺎﻫﻲ ﺑﺲ ﻣﺶ ﻟﺪﺭﺟﺔ ﺍﻟﺼﻮﺕ ﺍﻳﺮﻳﺢ ﻭ ﺍﻟﻌﻴﻮﻥ ﻳﻨﺤﻤﺮﻥ ﻟﺪﺭﺟﺔ ﻫﺎﺫﻱ
ﻫﻨﺎﺩﻱ : ﺍﻟﻠﻪ ﻏﺎﻟﺐ ﻋﺎﺩ ﺟﺖ ﺍﻣﻌﺎﻫﺎ ﻟﺪﺭﺟﺔ ﻫﺎﺫﻱ ﻫﻲ
ﺍﻣﺠﺎﺩ : ﻣﺎﺷﻲ ﻣﺎﺷﻲ ﺍﺣﻜﻦ ﺍﺳﺮﺍﺭﻛﻦ ﺍﻧﺘﻦ ﺍﻧﺎ ﺣﺎﻃﻪ ﺳﻤﺎﻋﺎﺕ ﺭﺍﻩ
ﻭ ﺍﻟﺘﻔﺘﺖ ﻗﺪﺍﻡ
ﻫﻨﺎﺩﻱ : ﺍﻓﻔﻔﻒ ﺍﺣﺴﻦ ﺷﺊ ؛ﻭ ﺍﻟﺘﻔﺘﺖ ﻋﻠﻴﺎ : ﻫﻨﺎ ﻣﺶ ﺣﺎ ﻧﺴﺄﻟﻚ ﺑﺲ ﻟﻤﺎ ﻧﻮﺻﻠﻮﺍ ﻟﻠﻔﻴﻠﺔ ﺗﺒﻲ ﺗﺤﻜﻴﻠﻲ ﺷﻦ ﻟﻠﻲ ﺧﻼﻙ ﺗﻨﻬﺎﺭﻱ ﻟﺪﺭﺟﺔ ﻫﺎﺫﻱ ﻳﺎ ﺧﻠﻮﺩ ﺷﻦ ﻟﻠﻲ ﺧﻼﻛﻲ ﺗﺒﻜﻲ ﻭ ﺍﻟﻌﺒﺮﺓ ﺧﺎﻧﻘﺘﻚ ؛ ﻭ ﺑﻬﺘﺖ ﻓﻴﺎ ﺯﻳﻦ : ﻭ ﻣﻦ ﻟﻠﻲ ﻟﻘﻴﺘﻲ ﺭﻭﺣﻚ ﺍﺗﺤﺒﻴﻪ
ﺍﻧﺎ ﺗﻨﻬﺪﺕ ﻭ ﺍﻟﺘﻔﺘﺖ ﻋﻠﻲ ﺍﻟﺮﻭﺷﻦ ﻭ ﺍﻧﺸﻮﻓﻪ ﻃﺎﻟﻊ ﻣﻦ ﺍﻟﺠﺎﻣﻊ ﻣﻊ ﺍﻟﺮﺟﺎﻟﺔ ﻭ ﻳﻀﺤﻚ ﻭ ﺍﻳﻬﺪﺭﺯ ﻣﻊ ﺍﻟﺸﺒﺎﺏ ﻣﻌﺎﺵ ﺣﺴﻴﺖ ﻋﻠﻲ ﺭﻭﺣﻲ ﺍﻻ ﻭ ﺍﻧﺎ ﻣﺒﺘﺴﻤﻪ ﻣﺶ ﻋﺎﺭﻓﺔ ﻋﻠﻴﺶ ﺍﺑﺘﺴﻤﺖ ؟؟ ﺑﺲ ﻟﻘﻴﺖ ﺭﻭﺣﻲ ﻧﺒﺘﺴﻢ ﻭ ﻗﻠﺒﻲ ﺍﻳﺪﻕ ﺳﺮﺣﺖ ﻓﻴﻪ ﻭ ﻓﻲ ﺣﺒﻲ ﻟﻪ ﺍﺫﻛﺮﺕ ﻟﻠﻲ ﺻﺎﺭ ﻗﺪﺍﻡ ﺍﻟﻔﻴﻠﺔ ﻟﻤﺎ ﺑﻬﺖ ﻓﻴﺎ ﺑﻨﻈﺮﺓ ﻏﺮﻳﺒﺔ ﻭ ﻗﺎﻟﻲ ﺍﻧﺤﺐ ﺧﻠﻮﺩ ﻋﻠﻴﻚ ﺍﻫﺒﺎﻝ ﻭ ﻏﺒﺎﺀ ﻭ ﻧﺎ ﺣﺴﺒﺖ ﺭﻭﺣﻲ ﺍﻩ ﻭﺧﻼﺹ ﻇﻨﻴﺖ ﺣﺎﺟﺎﺕ ﻭﺍﺍﺍﺍﺍﺟﺪ ﻭ ﻣﻊ ﺍﻻﺳﻒ ﺧﺎﺑﻦ ﻛﻞ ﺍﻇﻨﻮﻧﻲ
..
ﺧﺸﺖ ﻣﺮﻳﻢ ﻋﻠﻲ ﺍﻟﺪﺍﺭ ﻟﻘﺘﻬﺎ ﺍﻣﻈﻠﻤﻪ ﺣﻄﺖ ﺍﻟﺴﻔﺮﺓ ﻓﻮﻕ ﺍﻟﻄﺎﻭﻟﺔ ﻭ ﻓﺘﺤﺖ ﺍﻟﻀﻲ ﻭ ﻋﺪﺕ ﺷﻮﺭ ﺣﻨﻴﻦ
ﻣﺮﻳﻢ : ﺣﻨﻴﻦ ﻳﺎ ﻧﻮﻧﻪ ﻫﻴﺎﺍﺍﺍﺍ ﻧﻮﺿﻲ ﺟﺒﺖ ﺍﻟﻌﺸﺎﺀ ﻟﻴﺎ ﻭﻟﻚ ﺣﻨﻴﻦ ﻳﺎ ﺑﺖ
ﺣﻨﻴﻦ ﻓﺘﺤﺖ ﺍﻋﻴﻮﻧﻬﺎ ﻭﺑﺼﻮﺕ ﺩﻭﺑﻪ ﻃﺎﻟﻊ : ﻡ ... ﺭ ... ﻱ .. ﻡ
ﻭ ﺑﻠﻌﺖ ﺭﻳﻘﻬﺎ
ﻣﺮﻳﻢ : ﺑﺴﻢ ﺍﻟﻠﻪ ﻛﻨﻚ ﺷﻦ ﻓﻲ ﻳﺎ ﺑﻨﺖ
ﺣﻨﻴﻦ ﺑﺼﻮﺕ ﺩﻭﺑﻪ ﻃﺎﻟﻊ : ﻣﺶ ﻗﺎﺩﺭﺓ ﻧﻔﺘﺢ ﺍﻋﻴﻮﻧﻲ ﻭ ﺣﺎﺳﻪ ﺭﻭﺣﻲ ﺗﻌﺒﺎﻧﻪ ﺑﻜﻠﻠﻞ
ﻣﺮﻳﻢ ﺣﻄﺖ ﻳﺪﻫﺎ ﻋﻠﻲ ﺟﺒﻬﺔ ﺣﻨﻴﻦ : ﺍﻓﻔﻒ ﺍﻧﺘﻲ ﺳﺎﺧﻨﻪ ﺑﻜﻞ ﺗﻮﺍ ﺍﻧﻌﺪﻱ ﺍﻧﻜﻠﻢ ﻣﺎﻣﺎ
ﻭ ﻃﻠﻌﺖ ﻣﺮﻳﻢ ﺗﺠﺮﺉ ﻋﻨﺪ ﺍﻟﺒﺎﺏ
ﻣﺮﻳﻢ : ﻳﺎﻣﺎﻣﺎ ﺗﻌﺎﻟﻲ ﺑﺴﺮﻋﺔ ﻳﺎ ﻋﺒﺪﻭ ﻳﺎ ﺑﺎﺑﺎ
ﻭ ﻋﺪﺕ ﺗﺠﺮﺉ ﺷﻮﺭ ﺣﻨﻴﻦ ﻭ ﻣﺴﻜﺖ ﻳﺪﻫﺎ : ﻧﻮﻧﻪ ﺧﻠﻴﻚ ﺍﻣﻌﻴﺎ ﺣﻨﻴﻦ ﺗﺴﻤﻌﻲ ﻓﻴﺎ ﺣﻨﻴﻦ ﻛﻨﻚ ﻣﺎ ﺍﺗﺮﺩﻳﺶ ﺣﻨﻴﻦ
ﻭ ﻗﻌﺪﺕ ﻣﺮﻳﻢ ﺗﺒﻜﻲ
ﻋﻠﻲ ﺧﺸﺖ ﺧﻮﻳﻠﺔ ﻭ ﺭﺍﺟﻠﻬﺎ ﻭ ﻋﺒﺪﻭ
ﺧﻮﻳﻠﺔ ﺍﻧﻔﺠﻌﺖ ﺍﻭﻝ ﻣﺎ ﺷﻔﺖ ﻣﺮﻳﻢ ﺗﺒﻜﻲ : ﻛﻨﻚ ﺷﻦ ﻓﻲ
ﻣﺮﻳﻢ : ﻣﺎﻣﺎ ﺣﻨﻴﻦ ﻣﺶ ﻋﺎﺭﻓﺔ ﻗﺎﻟﺘﻠﻲ ﺗﻌﺒﺎﻧﻪ ﻭ ﻣﺶ ﻗﺎﺩﺭﺓ ﺗﻔﺘﺢ ﺍﻋﻴﻮﻧﻬﺎ ﺑﻌﺪﻫﺎ ﻣﻌﺎﺵ ﺣﻜﺖ
ﺭﺍﺟﻞ ﺧﻮﻳﻠﺔ : ﻣﺎﺷﻲ ﻳﺎ ﺑﺎﺑﺎ ﻣﺎ ﺍﺗﺨﺎﻓﻴﺶ ﻭ ﺍﻟﺘﻔﺖ ﻋﻠﻲ ﻋﺒﺪﻭ : ﻋﺒﺪﻭ ﻋﺪﻱ ﺳﺎﺧﻦ ﺍﻟﺴﻴﺎﺭﺓ ﺍﺑﺴﺮﻋﺔ
ﻋﺒﺪﻭ : ﺣﺎﺿﺮ
ﻭ ﻧﺰﻝ ﻳﺠﺮﻱ
ﺭﺍﺟﻞ ﺧﻮﻳﻠﺔ : ﻧﻌﻴﻤﺔ ﺗﺮﺍ ﻟﺒﺴﻴﻬﺎ ﻋﺒﺎﻳﺘﻬﺎ ﻋﻠﻲ ﻣﺎ ﻧﺘﺼﻞ ﺑﻲ ﺍﻟﻤﺴﺘﺸﻔﻲ
ﻭ ﻃﻠﻊ ﻣﻦ ﺍﻟﺪﺍﺭ
ﻣﺮﻳﻢ : ﻭﻧﺎ ﻧﻘﻌﺪ ﺍﺑﺮﻭﺣﻲ
ﺧﻮﻳﻠﺔ : ﻻ ﺣﺘﻲ ﺍﻧﺘﻲ ﺍﻟﺒﺴﻲ ﻋﺒﺎﻳﺘﻚ
ﻣﺮﻳﻢ ﻫﺰﺕ ﺭﺍﺳﻬﺎ ﻭ ﻓﺘﺤﺖ ﺍﻟﺪﻭﻻﺏ ﻭ ﻟﺒﺴﺖ ﻋﺒﺎﻳﺘﻬﺎ
ﺧﺶ ﺭﺍﺟﻞ ﺧﻮﻳﻠﺔ : ﻫﺎﺍﺍﺍ ﻟﺒﺴﺘﻴﻬﺎ
ﺧﻮﻳﻠﺔ : ﺍﻫﺎ ﻭ ﺗﻮﺍ ﻧﻠﺒﺲ ﻋﺒﺎﻳﺘﻲ ﺣﺘﻲ ﻧﺎ
ﺭﺍﺟﻞ ﺧﻮﻳﻠﺔ : ﻻ ﻣﺎﻓﻴﺶ ﺩﺍﻋﻲ ﺍﻧﺘﻲ ﻭ ﻣﺮﻳﻢ ﺍﻗﻌﺪﻥ ﻭ ﻣﺶ ﺍﻣﻄﻮﻟﻴﻦ ﺍﻧﺸﺎﺀ ﺍﻟﻠﻪ ﻓﻲ ﺍﻟﻤﺴﺘﺸﻐﻲ
ﺧﻮﻳﻠﺔ : ﺍﻧﺸﺎﺀ ﺍﻟﻠﻪ
ﻭ ﺧﺬﺍ ﺭﺍﺟﻞ ﺧﻮﻳﻠﺔ ﺣﻨﻴﻦ ﺷﺎﻟﻬﺎ ﻭ ﻃﻠﻊ ﺑﻴﻬﺎ ﺣﻄﻬﺎ ﻓﻲ ﺍﻟﺴﻴﺎﺭﺓ ﻣﻦ ﻟﻮﺭﺍﺀ
ﻭ ﺭﻛﺐ ﻗﺪﺍﻡ ﺟﻨﺐ ﻋﺒﺪﻭ
ﺭﺍﺟﻞ ﺧﻮﻳﻠﺔ : ﻫﻴﺎ ﺍﻃﻠﻊ ﻳﺎ ﺍﻭﻟﻴﺪﻱ
ﻋﺒﺪﻭ : ﻣﺎﺷﻲ
ﻭ ﻃﻠﻌﻮﺍ
ﻭ ﺳﻜﺮﺕ ﺧﻮﻳﻠﺔ ﺍﻟﺒﺎﺏ
ﻣﺮﻳﻢ ﻭ ﻫﻲ ﺍﺗﺨﺶ : ﺯﻋﻤﻚ ﺷﻦ ﺻﺎﺭﻟﻬﺎ ﺣﻨﻴﻦ
ﺧﻮﻳﻠﺔ : ﺗﻮﺍ ﻏﻴﺮ ﻃﻠﻌﻮﺍ ﻳﺒﻮ ﺍﻗﺮﻳﺐ ﺭﺑﻊ ﺳﺎﻋﺔ ﻋﻠﻲ ﻣﺎ ﻳﻮﺻﻠﻮﺍ ﻟﻠﻤﺴﺘﺸﻔﻲ
ﻣﺮﻳﻢ ﻗﻌﻤﺰﺕ ﻋﻠﻲ ﺍﻟﺼﺎﻟﻮﻥ
ﺧﻮﻳﻠﺔ ﻗﻌﻤﺰﺕ ﺟﻨﺐ ﻣﺮﻳﻢ : ﻣﺎ ﺍﺗﺨﺎﻓﻴﺶ ﻳﺎ ﺍﻣﺮﻭﻣﻪ ﺍﻛﻴﺪ
ﺩﺧﺖ ﻣﻦ ﺍﻟﺤﺮﺍﺭﺓ ﺑﺲ
ﻣﺮﻳﻢ : ﻋﺎﺭﻓﺔ ﻟﻤﺎ ﺷﻔﺘﻬﺎ ﻫﻜﻲ ﻳﺎ ﻣﺎﻣﺎ ﻭﺍﻟﻠﻬﻲ ﺧﻔﺖ ﺑﻜﻞ ﺣﺴﺒﺖ ﺭﺻﻠﻬﺎ ﺷﺊ ﺑﺲ ﻟﻤﺎ ﺍﻧﺘﻲ ﻭ ﺑﺎﺑﺎ ﻗﻌﺪﺗﻮﺍ ﻫﺪﻳﻴﻦ ﺍﺳﺘﻐﺮﺑﺖ
ﺧﻮﻳﻠﺔ : ﻻﻥ ﺣﻨﻴﻦ ﻃﻠﻌﺘﻠﻲ ﻛﻴﻒ ﻣﺎ ﺧﻠﻮﺩ ﻃﺎﻟﻌﺔ ﻟﺮﻗﻴﺔ ﻣﻨﻌﺘﻬﺎ ﺿﻌﻴﻔﺔ ﻛﻴﻔﻲ
ﻣﺮﻳﻢ : ﺍﻓﻔﻔﻒ ﺗﻮﺍ ﻣﺮﺕ ﻧﺺ ﺳﺎﻋﺔ ﺭﺍﻩ ﺍﺗﺼﻠﻲ
ﺧﻮﻳﻠﺔ : ﺍﺳﺘﻨﻲ ﺍﺷﻮﻱ ﻭ ﺍﻳﺮﻭﺣﻮﺍ
.
ﻋﺒﺪﻭ : ﻭﺻﻠﻨﺎ
ﺭﺍﺟﻞ ﺧﻮﻳﻠﺔ : ﺧﻮﺫ ﺩﺭﺱ ﺍﻟﺴﻴﺎﺭﺓ ﺑﻌﻴﺪ ﻭ ﺗﻌﺎﻝ ﻓﻲ ﻗﺴﻢ ﺍﻟﻄﻮﺍﺭﺉ
ﻋﺒﺪﻭ : ﻣﺎﺷﻲ
ﻭ ﻧﺰﻝ ﺭﺍﺟﻞ ﺧﻮﻳﻠﺔ ﻭ ﻧﺰﺍﻝ ﺣﻨﻴﻦ ﻭ ﺣﺎﻃﻪ ﻋﻠﻲ ﺍﻟﻨﻘﺎﻟﻪ ﻭ ﺧﺸﻮﻫﺎ ﺟﻮﺍ ﻟﻘﺴﻢ ﺍﻟﻄﻮﺍﺭﺉ
ﺭﺍﺟﻞ ﺧﻮﻳﻠﺔ : ﻣﻦ ﺍﻟﺪﻛﺘﻮﺭ ﺍﻟﻤﺴﺆﻝ
ﺍﻟﻤﻤﺮﺿﺔ : ﺍﻟﺪﻛﺘﻮﺭ ﻓﺎﺿﻞ
ﺭﺍﺟﻞ : ﻛﻠﻤﻴﻪ ﺑﺴﺮﻋﺔ
ﺍﻟﻤﻤﺮﺿﺔ : ﺣﺎﺿﺮ
ﻭ ﺟﺖ ﺗﺒﻲ ﺍﺗﻌﺪﻱ
ﺍﻟﻤﻤﺮﺿﺔ : ﺍﻫﻮ ﺟﺎ ﻳﺎ ﺩﻛﺘﻮﺭ
ﻓﺎﺿﻞ : ﻣﺴﺎﺀ ﺍﻟﺨﻴﺮ
ﺍﻟﻜﻞ : ﻣﺴﺎﺀ ﺍﻟﻨﻮﺭ
ﻭ ﻟﺒﺲ ﺍﻟﺒﺎﻟﻄﻮ
ﻓﺎﺿﻞ : ﺩﻛﺘﻮﺭ ﻣﻔﺘﺎﺡ ﺗﻘﺪﺭ ﺗﺴﺘﻨﺎ ﺑﺮﺍ ﻭ ﺍﻧﺖ ﻣﻄﻤﻦ
ﺭﺍﺟﻞ ﺧﻮﻳﻠﺔ : ﻣﺎﺷﻲ
ﻃﻠﻊ ﺭﺍﺟﻞ ﺧﻮﻳﻠﺔ
ﺣﻨﻴﻦ : ﺍﻩ
ﻭ ﻓﺘﺤﺖ ﺍﻋﻴﻮﻧﻬﺎ ﻭ ﺗﻨﺼﺪﻡ
ﻛﺎﻥ ﺍﻣﻮﻗﻒ ﻭ ﺍﻳﺒﺰ ﻓﻲ ﺍﻟﺒﺮﺓ ﻓﻲ ﻳﺪﻫﺎ
ﺍﻟﻤﻤﺮﺿﺔ ﺍﺑﺘﺴﻤﺖ : ﺷﻜﻠﻪ ﺩﻟﻮﻋﺔ ﺑﻜﻞ ﺑﻨﺖ ﺍﻟﺪﻛﺘﻮﺭ ﺍﺑﺮﺓ ﻧﻮﺿﺘﻬﺎ
ﺣﻨﻴﻦ ﺍﻟﺘﻔﺘﺖ ﻭ ﺗﻠﻘﺎ ﺍﻟﻤﻤﺮﺿﺔ ﺟﻨﺒﻬﺎ
ﻓﺎﺿﻞ : ﺑﺎﻳﻦ ﻋﻠﻴﻬﺎ ﺩﻟﻮﻋﺔ ﻫﻠﺒﻪ
ﺣﻨﻴﻦ ﺑﻬﺘﺖ ﻓﻴﻪ : ﺗﻌﺎﻟﻲ ﺍﻧﺒﺰﻟﻚ ﺍﻻﺑﺮﺓ ﺑﻨﻔﺲ ﺍﻟﻄﺮﻳﻘﺔ ﻭ ﺍﻧﺸﻮﻓﻮﺍ ﻛﺎﻥ ﻭﺟﻌﺘﻚ ﻭﻻ ﻻ
ﻓﺎﺿﻞ ﺍﺑﺘﺴﻢ : ﺗﺮﺍ ﻭﺗﻠﻴﻨﺎ ﺍﺑﺮﺓ ﻓﻴﺘﺎﻣﻴﻦ ﻳﺎ ﺍﺣﻼﻡ ﻋﺸﺎﻥ ﺣﻨﻴﻦ ﺗﻌﻄﻴﻨﻲ ﺍﻻﺑﺮﺓ ﻭ ﺍﻟﺘﻔﺖ ﻋﻠﻴﻬﺎ : ﻣﺶ ﺍﺳﻤﻚ ﺣﻨﻴﻦ ﻭﻻ ﻻ
ﺣﻨﻴﻦ ﻣﻌﺎﺵ ﻋﺮﻓﺖ ﺷﻦ ﺍﺗﻘﻮﻝ ﻗﻌﺪﺕ ﺳﺎﻛﺘﻪ ﻭ ﺧﻼﺹ
ﺍﻟﻤﻤﺮﺿﺔ : ﺷﻜﻠﻬﺎ ﺧﺎﻓﺖ ﻳﺎ ﺩﻛﺘﻮﺭ
ﺣﻨﻴﻦ : ﻻ ﻭﻋﻠﻴﺶ ﻧﺒﻲ ﺍﻧﺨﺎﻑ ﻳﻌﻨﻲ ﺑﺲ ﺍﻳﺪﻳﺎ ﺍﻳﻮﺟﻌﻦ ﻓﻴﺎ ﻭﺍﺍﺍﺍﺍﺟﺪ
ﺍﻟﻤﻤﺮﺿﺔ ( ﺯﻫﺮﺓ ) : ﻋﻠﻴﻚ ﻋﺬﺭ
ﺣﻨﻴﻦ : ﻻ ﻭﺍﻟﻠﻬﻲ ﻣﺎ ﻋﺬﺭ ﺑﺎﻫﻲ ﺑﺲ ﺍﻳﺪﻳﺎ ﺟﺪﻳﺎﺕ ﺍﻳﻮﺟﻌﻦ ﻓﻴﺎ ﻭ ﺣﺎﺳﻪ ﺍﻋﻈﺎﻣﻲ ﻣﺘﻜﺴﺮﺍﺕ
ﻓﺎﺿﻞ : ﻭﺷﻨﻲ ﺍﺧﺮﺓ
ﺣﻨﻴﻦ : ﻭ ﺧﺎﻃﺮﻱ ﻧﺮﻗﺪ
ﻭ ﻗﻌﺪﺕ ﺣﻨﻴﻦ ﺗﺜﺎﻭﺏ
ﻗﺪﻡ ﻓﺎﺿﻞ ﻭ ﻧﺰﻝ ﻟﺤﻨﻴﻦ ﺍﻟﺴﺮﻳﺮ ﻭ ﺳﻘﻤﻠﻬﺎ ﺍﻟﻤﺨﺪﻩ : ﺑﺎﻫﻲ ﺍﺭﻗﺪﻱ ﻳﺎ ﺣﻨﻴﻦ ﻭ ﺑﻌﺪﻳﻦ ﺗﻮﺍ ﻧﺘﻔﻬﻤﻮﺍ ﻋﻠﻲ ﺍﻻﺑﺮﺓ
ﺣﻨﻴﻦ ﻣﻌﺎﺵ ﻗﺪﺭﺕ ﻋﻠﻲ ﺭﻭﺣﻬﺎ ﺍﻻ ﻭ ﻫﻲ ﺭﺍﻳﺤﻪ ﻓﻲ ﻧﻮﻣﻪ
..
ﻣﺮﻳﻢ : ﻣﺎﻣﺎ ﻭﺍﻟﻨﺒﻲ ﺍﺗﺼﻠﻲ ﺑﻴﻬﻢ ﻃﻮﻟﻮﺍ ﻭﺍﺍﺍﺍﺍﺍﺍﺟﺪ ﻭﺍﻟﻨﺒﻲ ﻫﻴﺎ ﺍﺗﺼﻠﻲ
ﺧﻮﻳﻠﺔ : ﻭﺍﺍﺍﻭ ﻋﻠﻴﺎ ﻣﻨﻚ ﺧﻼﺹ ﺍﺷﻮﻱ ﻭ ﺍﻳﺠﻮﺍ
ﻣﺮﻳﻢ : ﺑﺲ ﻃﻮﻟﻮﺍ ﻫﻴﺎ ﻭﺍﻟﻨﺒﻲ ﻳﺎ ﻣﺎﻣﺎ
ﺧﻮﻳﻠﺔ : ﻣﺮﻳﻢ
ﻣﺮﻳﻢ : ﺣﻠﻔﺘﻚ ﻳﺎ ﻣﺎﻣﺎ
ﺧﻮﻳﻠﺔ : ﺑﺎﻫﻲ ﺑﺎﻫﻲ ﺧﻼﺹ ﺗﻮﺍ ﻧﺘﺼﻞ
ﻭ ﺧﺬﺕ ﺧﻮﻳﻠﺔ ﻓﻮﻧﻬﺎ ﻭ ﺍﺗﺼﻠﺖ ﺑﻲ ﺭﺍﺟﻠﻬﺎ
ﺧﻮﻳﻠﺔ : ﺍﻟﻮ ﻳﺎ ﻣﻔﺘﺎﺡ
ﺭﺍﺟﻞ ﺧﻮﻳﻠﺔ : ﺍ ﻳﻮﺍ
ﺧﻮﻳﻠﺔ : ﻭﻳﻨﻜﻢ ﺷﻐﻠﺘﻮﻧﺎ ﻋﻠﻴﻜﻢ
ﺭﺍﺟﻞ ﺧﻮﻳﻠﺔ : ﺍﺷﻮﻳﺎ ﻭ ﺍﻧﺠﻮﺍ
ﺧﻮﻳﻠﺔ : ﺑﺎﻫﻲ ﺷﻦ ﺻﺎﺭ ﻓﻴﻬﺎ ﺣﻨﻴﻦ
ﺭﺍﺟﻞ ﺧﻮﻳﻠﺔ : ﺍﺗﺒﺎﺕ ﺍﻟﻠﻴﻠﺔ ﻓﻲ ﺍﻟﻤﺴﺘﺸﻔﻲ
ﺧﻮﻳﻠﺔ ﺍﻧﻔﺠﻌﺖ : ﻋﻠﻴﺶ ﺷﻦ ﺻﺎﻳﺮﻟﻬﺎ
ﺭﺍﺟﻞ ﺧﻮﻳﻠﺔ : ﻏﻴﺮ ﺍﻫﺪﺉ ﻳﺎ ﻧﻌﻴﻤﺔ
ﺧﻮﻳﻠﺔ : ﺑﺎﻫﻲ ﻫﺪﻳﺖ ﻏﻴﺮ ﻗﻮﻟﻲ ﻋﻠﻴﺶ ﺗﺒﻲ ﺍﺗﺒﺎﺕ ﻓﻲ ﺍﻟﻤﺴﺘﺸﻔﻲ
ﺭﺍﺟﻞ ﺧﻮﻳﻠﺔ : ﻟﻤﺎ ﺍﻧﺠﻲ ﺗﻮﺍ ﺍﻧﻔﻬﻤﻚ
ﺧﻮﻳﻠﺔ : ﻻ ﻻ ﻭﺍﻟﻠﻪ ﻣﺎ ﻧﺼﺒﺮ ﻏﻴﺮ ﻗﻮﻟﻲ ﻋﻠﻴﺶ ﺗﺒﻲ ﺍﺗﺒﺎﺕ
ﺭﺍﺟﻞ ﺧﻮﻳﻠﺔ : ﻋﻨﺪﻫﺎ ﺍﺷﻮﻳﺔ ﻓﺤﻮﺻﺎﺕ ﻳﺒﻮ ﺍﻳﺪﻳﺮﻭﻫﻦ ﻋﺸﺎﻥ ﻳﻄﻤﻨﻮﺍ
ﺧﻮﻳﻠﺔ : ﻳﻄﻤﻨﻮﺍ ﻋﻠﻲ ﺷﻨﻮ
ﺭﺍﺟﻞ ﺧﻮﻳﻠﺔ : ﻣﺶ ﻋﻠﻲ ﺷﺊ ﻳﺎ ﺑﻨﺖ ﺍﻟﻨﺎﺱ ﺑﺲ ﻫﺬﻳﻦ ﻓﺤﻮﺻﺎﺕ ﻋﺎﺩﻳﺔ ﻳﻌﻨﻲ ﺭﻭﺗﻴﻨﻴﻪ
ﺧﻮﻳﻠﺔ : ﻳﻌﻨﻲ ﻣﺎﻓﻴﺶ ﺷﺊ ﻳﺎ ﻣﻔﺘﺎﺡ
ﺭﺍﺟﻞ ﺧﻮﻳﻠﺔ : ﻻ ﻣﺎﻓﻴﺶ ﺷﺊ
ﺧﻮﻳﻠﺔ : ﻣﻔﺘﺎﺡ ﻛﺎﻥ ﻓﻲ ﺣﺎﺟﺔ ﻗﻮﻝ
ﺭﺍﺟﻞ ﺧﻮﻳﻠﺔ : ﺗﻲ ﻳﺎ ﺑﻨﺖ ﺍﻟﻨﺎﺱ ﻗﺘﻠﻚ ﻣﺎﻓﻴﻬﺎ ﺷﺊ ﺑﻨﺘﻚ ﻛﻴﻒ ﺍﻟﻘﺮﺩﺓ ﺍﻛﻮﻳﺴﺔ ﻏﻴﺮ ﻓﺤﻮﺻﺎﺕ ﻋﺎﺩﻳﺔ ﺑﺲ ﻭ ﻟﻮ ﻛﺎﻥ ﻓﻲ ﺷﺊ ﻛﻨﺖ ﻗﺘﻠﻚ
ﺧﻮﻳﻠﺔ : ﺑﺎﻫﻲ ﺍﻧﺘﻮ ﺍﻣﺘﻲ ﺍﻣﺮﻭﺣﻴﻦ
ﺭﺍﺟﻞ ﺧﻮﻳﻠﺔ : ﻋﺒﺪﻭ ﻃﻠﻊ ﻟﻪ ﺍﻗﺮﻳﺐ ﺭﺑﻊ ﺳﺎﻋﺔ ﻳﻌﻨﻲ ﺍﺷﻮﻱ ﻭ ﻳﻮﺻﻞ ﺍﻣﺎ ﻧﺎ ﻓﺎ ﻗﺎﻋﺪ ﻣﻊ ﺣﻨﻴﻦ
ﺧﻮﻳﻠﺔ : ﻣﺎﺷﻲ
ﺭﺍﺟﻞ ﺧﻮﻳﻠﺔ : ﻧﻌﻴﻤﺔ ﻣﺎ ﺍﺗﺨﺎﻓﻴﺶ ﺣﻨﻴﻦ ﻣﺎﻓﻴﻬﺎ ﺍﻻ ﻛﻞ ﺧﻴﺮ ﻏﻴﺮ ﺍﺷﻮﻳﺔ ﺣﺮﺍﺭﺓ ﺑﺲ
ﺧﻮﻳﻠﺔ : ﺍﻧﺸﺎﺀ ﺍﻟﻠﻪ
ﺭﺍﺟﻞ ﺧﻮﻳﻠﺔ : ﻫﻴﺎﺍﺍﺍﺍﺍ ﻣﻊ ﺍﻟﺴﻼﻣﺔ
ﺧﻮﻳﻠﺔ : ﻣﻊ ﺍﻟﺴﻼﻣﺔ
ﻭ ﺳﻜﺮﺕ ﺧﻮﻳﻠﺔ
ﻣﺮﻳﻢ : ﻋﺎﺭﻓﺔ ﻳﺎ ﻣﺎﻣﺎ ﻧﺎ ﻣﺘﺄﻛﺪﺓ ﺍﻥ ﺑﺎﺑﺎ ﺩﺍﺱ ﻋﻠﻴﻨﺎ ﺷﺊ ﻭ ﺣﻨﻴﻦ ﻣﺶ ﺍﻛﻮﻳﺴﺔ
ﻭ ﻋﺪﺕ ﻣﺮﻳﻢ ﻗﻌﻤﺰﺕ ﻋﻠﻲ ﺍﻟﺼﺎﻟﻮﻥ ﻭ ﻫﻲ ﺗﺒﻜﻲ
ﺧﻮﻳﻠﺔ ﺟﺖ ﻗﻌﻤﺰﺕ ﺟﻨﺐ ﻣﺮﻳﻢ : ﺑﺴﻢ ﺍﻟﻠﻪ ﻳﺎ ﺍﻣﺮﻭﻣﻪ ﻛﻨﻚ ﺍﺗﻔﺎﻭﻟﻲ ﻋﻠﻲ ﺍﺧﺘﻚ ﺑﻌﻴﺪ ﺍﻟﺴﻮ ﻋﻠﻴﻬﺎ ﻭ ﺑﻌﺪﻳﻦ ﺑﻮﻙ ﻧﺎ ﻧﻌﺮﻓﻪ ﻟﻮ ﻓﻴﻬﺎ ﺷﺊ ﻻ ﺳﻤﺢ ﻟﻠﻪ ﺭﺍﻩ ﻗﺎﻟﻲ ﺍﻧﺘﻲ ﻣﺎ ﺍﺗﺨﺎﻓﻴﺶ ﻭ ﺍﻧﺸﺎﺀ ﺍﻟﻠﻪ ﺑﻜﺮﺍ ﺗﻮﺍ ﺍﻧﻌﺪﻭ ﻣﻊ ﻋﺒﺪﻭ ﺍﻧﺠﻴﺒﻮﻫﺎ ﺑﺎﻫﻲ
ﻣﺮﻳﻢ ﻫﺰﺕ ﺭﺍﺳﻬﺎ
ﺧﻮﻳﻠﺔ : ﻫﻴﺎ ﺍﻣﺴﺤﻲ ﺍﺩﻣﻮﻋﻚ ﺳﻠﻢ ﺑﻨﺘﻲ ﻭ ﺗﻌﺎﻟﻲ ﺍﻧﺪﻳﺮﻟﻚ ﺳﻨﺪﻭﺗﺶ ﺗﺎﻛﻠﻴﻪ ﺍﻧﺘﻲ ﻣﺎ ﻛﻠﻴﺘﻲ ﺷﺊ
ﻣﺮﻳﻢ : ﻣﺎﻋﻨﺪﻳﺶ ﻧﻴﺔ
ﺧﻮﻳﻠﺔ ﺟﺖ ﺗﺒﻲ ﺗﺤﻜﻲ ﻭ ﺍﻳﺨﺶ ﻋﺒﺪ ﺍﻟﺮﺣﻤﻦ
ﻋﺒﺪﺍﻟﺮﺣﻤﻦ : ﺍﻟﺴﻼﻡ ﻋﻠﻴﻜﻢ
ﻣﺮﻳﻢ ﻭ ﺧﻮﻳﻠﺔ : ﻋﻠﻴﻜﻢ ﺍﻟﺴﻼﻡ
ﻣﺮﻳﻢ : ﺍﻫﻮ ﻋﺒﺪﻭ ﻟﻴﺶ ﺣﻨﻴﻦ ﺗﺒﻲ ﺗﻘﻌﺪ ﻓﻲ ﺍﻟﻤﺴﺘﺸﻔﻲ
ﻋﺒﺪﻭ : ﻣﺶ ﻋﺸﺎﻥ ﺷﺊ ﺑﺲ ﺭﻭﻳﺘﻴﻨﻲ ﺍﻟﻤﻮﺿﻮﻉ
ﻣﺮﻳﻢ : ﻛﻴﻒ ﺭﻭﻳﺘﻴﻨﻲ ﻳﻜﺬﺑﻮﺍ ﻫﻤﺎ ﺭﺍﻩ
ﻋﺒﺪﻭ : ﻫﻬﻬﻬﻬﻬﻬﻪ ﺍﻧﺘﻲ ﻛﻨﻚ ﺭﻗﻴﻠﻚ
ﻣﺮﻳﻢ ﻭ ﻫﻲ ﺗﺒﻜﻲ : ﻋﺸﺎﻥ ﻫﻤﺎ ﻳﻜﺬﺑﻮﺍ ﻋﻠﻴﺶ ﻣﺎ ﻳﺒﻮﺵ ﺍﻳﻄﻠﻌﻮﻫﺎ ﻫﺎﻟﻜﺬﺑﻴﻦ
ﺧﻮﻳﻠﺔ : ﻭﺍﺍﺍﺍﻭ ﻋﻠﻴﺎ ﺭﺍﺳﻲ ﻭﺟﻌﻨﻲ ﻣﻨﻚ ﻛﻼ ﺍﻧﺘﻲ ﺍﻧﺎ ﺍﻣﺼﺒﻴﻪ ﺍﻧﺠﻴﺐ ﺍﻟﺴﻔﺮﺓ ﻣﻦ ﻓﻮﻕ ﻭ ﺗﻌﺎﻟﻮ ﺗﻌﺸﻮﺍ
ﻋﺒﺪﻭ ﻭ ﻫﻮ ﻳﻀﺤﻚ : ﺑﺎﻫﻲ ﺗﻮﺍ ﺍﻧﺠﻮﺍ
ﻣﺮﻳﻢ : ﺍﻧﺎ ﻣﺎﻧﺒﻴﺶ
ﻗﺪﻡ ﻋﺒﺪﺍﻟﺮﺣﻤﻦ ﻭ ﻗﻌﻤﺰ ﺟﻨﺐ ﻣﺮﻳﻢ : ﻛﻨﻚ ﻋﻠﻴﺶ ﺍﻣﻜﺒﺮﻩ ﺍﻟﻤﻮﺿﻮﻉ
ﻣﺮﻳﻢ : ﻋﺸﺎﻥ ﺧﻔﺖ ﻋﻠﻴﻬﺎ ﻭﺍﻟﻠﻬﻲ
ﻋﺒﺪﻭ : ﻋﺎﺭﻓﻚ ﻋﺎﺭﻓﻚ ﺧﻔﺘﻲ ﺑﺲ ﺍﻟﻤﻮﺿﻮﻉ ﺑﺴﻴﻂ ﺑﻜﻞ ﺍﻧﺘﻲ ﻋﻠﻴﺶ ﺍﻣﻜﺒﺮﺗﻴﻪ ﺍﺗﺒﺎﺕ ﺍﻟﻴﻮﻡ ﺑﻜﺮﺍ ﺍﻧﺠﻴﺒﻮﻫﺎ ﻛﻠﻨﺎ ﺑﺎﻫﻲ
ﻣﺮﻳﻢ : ﻣﺘﺎﻛﺪ ﻣﺎﻓﻴﻬﺎ ﺷﺊ ﻳﺎ ﻋﺒﺪﻭ
ﻋﺒﺪﻭ : ﻭﺍﻟﻠﻬﻲ ﺍﻟﻌﻈﻴﻢ ﻣﺎﻓﻴﻬﺎ ﺣﺘﻲ ﺣﺎﺟﺔ
ﻣﺮﻳﻢ : ﺑﺎﻫﻲ ﻫﻴﺎ ﻧﺎﻛﻠﻮﺍ ﺟﻌﺎﻧﻪ ﺑﻜﻞ
ﻋﺒﺪﻭ : ﻫﻬﻬﻬﻬﻬﻬﻪ ﺍﻣﻄﺮﺷﻘﺔ ﻫﻴﺎ
ﻭ ﺻﺒﺖ ﻣﺮﻳﻢ ﻫﻲ ﻭ ﻋﺒﺪﻭ ﻭ ﺧﺸﻮﺍ ﻟﻠﻤﻄﺒﺦ
ﺧﻮﻳﻠﺔ : ﻫﻴﺎ ﺗﻌﺎﻟﻮﺍ ﺳﻠﻢ ﺍﻋﻮﻳﻠﺘﻲ ﻗﻌﻤﺰﻭ
ﻗﻌﻤﺰﺕ ﻣﺮﻳﻢ ﻭ ﻋﺒﺪﻭ
ﺧﻮﻳﻠﺔ : ﻫﻴﺎ ﻛﻮﻟﻮﺍ
ﻋﺒﺪﻭ : ﻻ ﻭﺍﻟﻠﻬﻲ ﻣﺘﺤﺸﻢ ﻧﺎﻛﻞ
ﻣﺮﻳﻢ : ﻫﻬﻬﻬﻬﻬﻬﻬﻬﻪ
ﺧﻮﻳﻠﺔ : ﻫﻬﻬﻬﻬﻬﻪ ﻋﻄﻚ ﺍﻟﺨﻴﺮ
ﻋﺒﺪﻭ : ﻣﺎ ﺍﺻﻼ ﻟﻜﻲ ﺳﺎﻋﺔ ﻗﻌﻤﺰﻭ ﻛﻮﻟﻮﺍ ﺍﺗﻘﻮﻝ ﺿﻴﻮﻑ
ﻣﺮﻳﻢ : ﺍﻫﺎ ﺻﺢ
ﺧﻮﻳﻠﺔ : ﺍﻟﺤﻖ ﻋﻠﻴﺎ ﻧﻌﻨﻜﻢ ﻣﺎ ﻛﻠﻴﺘﻮﺍ
ﻣﺮﻳﻢ ﻭ ﻋﺒﺪﻭ : ﻫﻬﻬﻬﻬﻬﻬﻬﻬﻬﻪ
ﻣﺮﻳﻢ : ﺧﻼﺹ ﻳﺎ ﻣﺎﻣﺎ ﻣﺎﺗﺰﻋﻠﻴﺶ ﻋﺒﺪﻭ ﺍﻳﺒﺼﺮ
ﺧﻮﻳﻠﺔ : ﺑﺎﻫﻲ ﻛﻮﻟﻮﺍ ﻭ ﺧﻠﺼﻮﻧﻲ ﻣﺎﻋﻨﺪﻛﻢ ﺍﻟﺮﻭﺡ ﻣﻊ ﺗﻬﺪﺭﻳﺰ
ﻭ ﻗﻌﺪﻭ ﻣﺮﻳﻢ ﻭ ﻋﺒﺪﻭ ﻳﺎﻛﻠﻮﺍ
..
ﻧﺰﻟﻮﺍ ﺍﻟﺼﺒﺎﻳﺎ ﻭ ﺍﻟﺮﺟﺎﻟﺔ ﻣﻦ ﺍﻟﺴﻴﺎﺭﺍﺕ
ﻭ ﻧﺰﻟﺖ ﻧﺎ ﻭ ﻫﻨﺎﺩﻱ ﻭ ﺍﻣﺠﺎﺩ ﻭ ﺳﺮﺍﺝ
ﻫﻨﺎﺩﻱ : ﻫﻴﺎ ﺧﻠﻴﻨﺎ ﺍﻧﺨﺸﻮﺍ
ﻣﺎﻣﺎ : ﺧﻠﻮﺩ ﻫﻴﺎ ﻳﺎ ﻣﺎﻣﺎ ﻭﺗﻲ ﺭﻭﺣﻚ ﻋﺸﺎﻥ ﻧﻤﺸﻮﺍ
ﺣﻨﻲ : ﻋﻠﻴﺶ ﻳﺎ ﺭﻗﻴﺔ ﻣﺴﺘﻌﺠﻠﻴﻦ ﻣﺰﺍﻝ ﺑﺪﺭﻱ ﺍﻗﻌﺪﻭ
ﻣﺎﻣﺎ : ﻻ ﻭﺍﻟﻠﻪ ﻳﻘﻌﺪ ﺍﻟﺨﻴﺮ ﻳﺎ ﻋﻤﺘﻲ
ﺍﻣﺠﺎﺩ : ﺧﻠﻴﻬﺎ ﻳﺎ ﺍﻋﻤﻴﻤﻪ ﺭﻗﻴﺔ ﺧﻠﻮﺩ ﻫﻲ ﺍﺑﺮﻭﺣﻬﺎ ﺗﻌﺒﺎﻧﻪ ﻃﻮﻝ ﺍﻟﻄﺮﻳﻖ ﺭﺍﻗﺪﺓ ﻭ ﺻﻮﺗﻬﺎ ﺭﺍﻳﺢ ﻭ ﺍﻋﻴﻮﻧﻬﺎ ﺣﻤﺮ ﺍﺗﻘﻮﻝ ﻛﺎﻧﺖ ﺗﺒﻜﻲ
ﺍﻧﺎ ﺍﻧﺼﺪﻣﺖ ﻣﻦ ﻛﻼﻡ ﺍﻣﺠﺎﺩ ﻭ ﻟﻘﻴﺘﻬﻢ ﻛﻠﻬﻢ ﻳﺒﻬﺘﻮﺍ ﻓﻴﺎ
ﻣﺎﻣﺎ : ﺍﺧﻠﻮﺩﻩ ﻛﻨﻚ
ﺑﺎﺑﺎ : ﺧﻠﻮﺩ ﻳﺎ ﺑﻨﺘﻲ ﺷﻦ ﺍﺗﺤﺴﻲ
ﺍﻧﺎ ﻣﻌﺎﺵ ﻋﺮﻓﺖ ﺷﻦ ﺍﻧﻘﻮﻝ ﻭﻻ ﺍﻧﺪﻳﺮ ﻭ ﺭﻗﺎﻟﻲ ﻣﻦ ﻟﻘﻄﺔ ﺍﻣﺠﺎﺩ ﺍﻟﺤﻴﻮﺍﻧﺔ ﺑﻬﺘﺖ ﻓﻴﻬﺎ ﺑﻐﻞ ﻟﻘﻴﺘﻬﺎ ﺗﻀﺤﻚ
ﺍﻣﺠﺎﺩ : ﻛﻨﻚ ﻳﺎ ﺧﻠﻮﺩ ﺷﻜﻠﻚ ﺍﺗﻘﻮﻝ ﻭﺣﺪﺓ ﺍﻣﺴﻴﺒﻬﺎ ﺣﺒﻴﺒﻬﺎ
ﻫﻨﺎﺩﻱ : ﺍﻣﺠﺎﺩ ﻓﻜﻴﻨﺎ ﻣﻦ ﺍﻟﺒﺼﺎﺭﺓ ﺍﻟﺒﺎﺭﺩﺓ
ﺍﻣﺠﺎﺩ : ﻣﺎ ﻗﻠﺖ ﺷﺊ ﺑﺲ ﺷﻜﻠﻬﺎ ﻣﺶ ﻃﺒﻴﻌﻲ ﺧﻠﻮﺩ ﺣﺘﻲ ﻫﻪ ﺷﻮﻓﻮﺍ ﺍﻋﻴﻮﻧﻬﺎ ﻛﻴﻒ ﺣﻤﺮ
ﺣﻨﻲ : ﺧﻠﻮﺩ ﺍﺣﻜﻲ ﻛﻨﻚ ﻳﺎ ﺑﻨﺘﻲ
ﺭﻓﻌﺖ ﺭﺍﺳﻲ ﻭﺑﻬﺘﺖ ﻓﻲ ﺣﻨﻲ ﻭ ﺍﻃﺐ ﻋﻴﻨﻲ ﻓﻲ ﻋﻴﻦ ﻳﺎﺳﻴﻦ ﺗﻤﻨﻴﺖ ﺍﻧﺴﻜﺖ ﺍﻣﺠﺎﺩ ﻫﺎﺫﻱ ﻭ ﺍﻧﻘﻮﻟﻠﻬﻢ ﺍﻫﺎ ﻛﻨﺖ ﻧﺒﻜﻲ ﻭ ﻧﻌﻴﻂ ﺍﺧﺮﻩ ﻭ ﺍﻟﻌﺒﺮﺓ ﺧﻨﻘﺘﻨﻲ ﻋﺎﺭﻓﻴﻦ ﻟﻴﺶ ﻻﻥ ﻃﻠﻌﺖ ﻋﻨﺪﻩ ﺣﺒﻴﺒﺔ ﻟﻤﺎ ﻗﻠﺒﻲ ﻧﺒﻀﻠﻪ ﺻﺎﺭ ﻫﻜﻲ
ﻫﻨﺎﺩﻱ : ﻣﺎﻓﻴﻬﺎ ﺷﺊ ﻳﺎ ﺍﻋﻤﻴﻤﻪ ﺧﻠﻮﺩ ﺑﺲ ﻣﻦ ﺗﻌﺐ ﺍﻟﻄﺮﻳﻖ ﺍﻛﻴﺪ ﺧﺬﺕ ﺑﺮ ...
ﻣﺎ ﻛﻤﻠﺘﺶ ﻫﻨﺎﺩﻱ ﻛﻼﻣﻬﺎ ﺍﻻ ﻭ ﻧﺎ ﻫﻠﺒﺘﻬﺎ ﻭ ﻋﺪﻳﺖ ﺷﻮﺭ ﺍﻟﺒﺎﺏ ﻣﺶ ﻣﺘﺤﻤﻠﻪ ﻛﻠﻤﻪ ﻣﻦ ﺣﺪ ﻭ ﻻ ﻋﻨﺪﻱ ﺗﺒﺮﻳﺮ ﻻﻱ ﺣﺪ ﻭ ﻻ ﺟﻮﻱ ﻗﺎﺑﻞ ﻟﻨﻘﺎﺵ ﺍﺻﻼ
ﺟﺖ ﻧﺒﻲ ﻧﺮﻛﺐ ﻣﻦ ﺍﻟﺪﺭﻭﺝ ﺷﻮﺭ ﺑﺎﺏ ﺍﻟﻔﻴﻠﺔ ﻭ ﻧﺴﻤﻊ
ﺟﺪﻱ : ﺧﻠﻮﺩ
ﺍﻧﺎ ﻭﻗﻔﺖ ﻭﺍﻟﺘﻔﺘﺖ ﻋﻠﻴﻪ
ﺟﺪﻱ : ﻣﺶ ﻋﻴﺐ ﺍﺗﺴﻴﺒﻴﻨﺎ ﻭ ﺗﻌﺪﻱ ﻭ ﻧﺤﻨﺎ ﻧﺤﻜﻮ ﺍﻣﻌﺎﻙ
ﺍﻧﺎ ﻣﻌﺎﺵ ﻋﺮﻓﺖ ﺷﻦ ﺍﻧﻘﻮﻝ ﻭﻻ ﺣﺘﻲ ﺍﻧﺮﺩ ﺣﺴﻴﺖ ﺍﻟﻴﻮﻡ ﺑﺸﻊ ﺑﻜﻞ ﻛﻞ ﺷﻲ ﻏﻠﻂ ﻛﻞ ﺷﻲ ﻋﻜﺲ ﻣﺎ ﺍﻧﺎ ﻧﺒﻲ ﺍﻓﻔﻒ ﻧﻴﻦ ﻛﺮﻫﺖ ﺍﻟﻴﻮﻡ
ﻧﻀﺖ ﻣﻦ ﺩﻭﺍﻣﺔ ﺍﻓﻜﺎﺭﻱ ﻋﻠﻲ ﺻﻮﺗﻪ ﻟﻠﻲ ﻛﺎﻧﻦ ﻫﺪﺍﺀ ﻣﻦ ﻧﺴﻤﺔ ﺍﻟﻬﻮﺍﺀ
ﻳﺎﺳﻴﻦ : ﻛﻨﻚ ﻳﺎ ﺧﻠﻮﺩ ﺷﻦ ﻓﻲ ﻛﻨﻪ ﻭﺟﻬﻚ ﻭ ﺍﻋﻴﻮﻧﻚ ﺣﻤﺮ ﺑﺲ ﻗﻮﻟﻴﻠﻲ ﻓﻲ ﺣﺪ ﺍﻣﺰﻋﻠﻚ .... ﻗﻮﻟﻴﻠﻲ ﺑﺲ
ﺍﻧﺎ ﺭﻓﻌﺖ ﺭﺍﺳﻲ ﻭﺑﻬﺘﺖ ﻓﻴﻪ ﻛﺎﻥ ﺻﻮﺗﻪ ﻫﺎﺩﻱ ﻭ ﺍﻋﻴﻮﻧﻪ ﻓﻴﻬﻦ ﺷﺊ ﻏﺮﻳﺐ ﻣﻌﺎﺵ ﻋﺮﻓﺖ ﺷﻦ ﻫﻮ ﻣﻌﺎﺵ ﻟﻘﻴﺖ ﺭﻭﺣﻲ ﺍﻻ ﻭﻧﺎ ﺍﻧﻘﻮﻝ
ﺍﻧﺎ : .................................................
# ﻛﻠﻬﻢ _ ﺍﻧﺼﺪﻣﻮﺍ _ ﻣﻦ _ ﻛﻼﻣﻲ
ﺍﻧﺎ ﻓﻲ ﻫﺬﻙ ﺍﻟﻮﻗﺖ ﺑﺲ ﻓﻄﻨﺖ ﻟﺮﻭﺣﻲ ﺷﻦ ﻗﻠﺖ
ﻭ ﻣﻌﺎﺵ _ ﻋﺮﻓﺖ ﺷﻦ ﺍﻧﺪﻳﺮ
ﺑﺠﺪ ﺗﻤﻨﻴﺖ ﺍﻻﺭﺽ ﺗﻨﺸﻖ ﻭﺗﺒﻠﻌﻨﻲ ﻣﻦ ﺍﻟﻜﺎﺭﺛﺔ ﻟﻠﻲ ﺩﺭﺗﻬﺎ ﻭ ﺍﻧﺎ ﺩﻳﻤﻪ ﺍﻟﺴﺎﻧﻲ ﺍﻣﻄﻴﺤﻨﻲ ﻓﻲ ﺍﻟﻜﻮﺭﺍﺙ
# ﻳﺘﺒﻊ
