الحلقه التالته :
والله يا ولدي ما عارف اقول ليك شنو لكن قبل المغرب بي شويه اتصل راجل اختك قال امك دي تعبانه وودوها المستشفي وقالت عايزه تشوفك الليله قبل بكره وما اظن تلقالك حاجه توديك هسي فبيت والصباح من بدري اتحرك
_لا حولا ولا قوه الا بالله لالا انا بمشي هسي وبلقي حاجه ان شاء الله .
_طيب هاك القروش دي خليها معاك
_لالا يا حاج الحمد لله معاي قروش
_يا ولدي شيلا احتمال تحتاجها ولو ما احتجتها جيبا لي راجعه ولا انت ما معتبر الحاله واحده
_لالا اكيد واحده
_خلاس شيلا يا ولدي الله يرضي عليك
_عديله يا حاج تسلم .
●مشي الموقف وفعلا ما لقي حاجه توديهو انتظر زمن طويل لحد ما الوقت قرب لي عشره لمن قنع مشي السوق المركزي عسي ولعل يلقي واحد من ناس الخضار ديل مسافر وفعلا اول ما وصل لقي بتاع دفار متحرك نطا معاهو قريب للصبح كدا هو وصل البلد وطوالي راس علي المستشفي لقي امو مرقده جوه واخواتو بره منفقعات بكاء دخل ليها بين الحياة والموت حضنها وقعد يبكي مالك يا بت المني ما هدي انتي كويسه
_اخدت ليها ضحكه كدا رغم الوجع ومسكت يدو اي الحمد لله انا كويسه يا ولدي لكن زي ما بقولو الزرع وقت يكبر ببقي علي الحصاد فخلاس شكلو كدا ان الاوان واتحصد
_لالا بعيد الشر عليك يمه هسي انا بوديك الخرطوم اعالجك هناك
_يا ولدي علاج شنو مرض الموت ما عندو علاج بعدين ان ربنا كاتب لي الشفاء في حتته دي بقوم لكن ما خلاس ان عارفه نفسي راحله فدحين اسمع وصيتي دي ابقي عشره علي اخواتك الكبيره دي تراها بي راجله وياهو ود عمها ما اظن محتاجه رعايتك وسعاد زاتا ماشاء الله هسي دربها مرق وشايفه جايه يخطبوها العيد دا اها دحين ابقي عشره علي تومتك دي عارفاك ما بتقصر وهسي هي ما عارفاني انا عيانه قلت ليهم ما تكلموها وخلوها تقرا اوعك تعرس ليها تخارجا خليها تكمل قرايتا وانت زاتك يا ولدي ان بقيت داير رضاي وسعدي عليك ارجع اقرا الزول بلا علم ما بنفع يا وليدي وقروشك البترسلن لي للعلاج اديتهن خالتك امنه ما اشتريت لي علاجات امك بت المنى معافيه من ربنا دا ما محتاجه ليها دواء اها دحين استفيد منهن واعفي لي عليك يا ولدي وانا عافيه ليك وراضيه عنك يا ولدي .
دي كانت اخر كلمات قالتا بت المنى قبل تتوفي وتخلي عمر في واقع حزين الله يقدرو عشان يتعايش معاهو ، مشو دفنو الام وجاء البيت النورو انطفا بعد رحول بت المنى وبقي مسيخ من دونها وساكت قعد ليهو اسبوع مع اخواتو واخر الاسبوع ناداهن كلهن وقعدن بقي يتونس معاهن عسي ولعل يقدر يصبرهن حبه لكن شويه كلام وهو زاتو انقد بكاء بعد اتزكر لمتهم كلهم وامو بتقلي في البن وابوهو بسمع في الرادي وغايتو بدل يصبرهم بقي محتاج للتصبرو هو
سكت مسافه كدا وقاليهن اها عاد امي الله يتقبلا اها انا داير اديكن وصيه ........
أنت تقرأ
شماعة الظروف
General Fictionالدنيا دي سموها دنيا عشان حاجه دنيئه وعمرها ما كانت حاجه مهمه فما تعيش فيها باللقيتو فيهو غير فيها عشان تمش معاك واوعك ثم اوعك تعلق امالك في ((شماعه الظروف)) الظروف دي ماهي الا عقبات ربنا ختاها ليك عشان تجتازا وتصل لي هدفك العايزو .
