شماعة الظروف

الجزء الرابع

الحلقه الرابعه :
اها انا قعده في البلد دي ما عندي ليها طريقه ، فانتي يا مريم تعالي بي راجلك واولادك واقعدو في البيت هنا عشان نورو ما ينطفي وانتي يا سعاد امي دي خلت ليها قروش كتيره شيليها اديها خطيبك خلي يكمل بيها بيتو وقولي ليهو انها منك انتي عشان ما يتعقد والله يرضي عليكن خليكن مستورات مع رجالكن ، عارفكن ما بتتلومن لكن برضو اعملن حسابكن ، اما انتي يا ((جنو منو )) خلي بالك الايام دي عامله لينا فيها دكتوره حتي في شكلك دي اتغيرتي شدي حيلك وارفعي راسنا واياك واللعب وانا كل مره برسل ليك مصاريفك وبجيك في الجامعه سامعه ، وبرضو انا بكره مسافر ، وسامع خالتي امنه جايه تقعد معاكم هنا ادوها الواضه الورانيه بي حوشا والبيت البي الجاي لي مريم وراجلا ، وانتن اقعدن في اوضه امي ما تخلنها مهجوره عليكن الله، في اللحظه ديك التلاته حضننو وقعدن يبكن وهو زاتو بكي معاهن ، الصباح بدري شال شنطتو واتحرك علي الخرطوم وبدل يجي شايل حاجات الامو الطوالي بتديهن ليهو زمن جاء شايل حزن وهم وحاجات اكبر من عمرو ، وصل المنظثه لقي حاج بكري مستنيهو معاهو بتاعين الدكاكين واقفين يعزوهو عزاهم وقعد في الورشه ونفسو مقفوله من اي حاجه وقعد اسبوع بي الحاله دي جاهو حاج بكري قعد معاهو لقاهو في حاله تحنن الحجر ما عمر البشوش الزمان الضاحك داك قاليهو يا ولدي الدائم الله وكلنا ماشين لي ربنا خلاس كفاياك حزن والله لو امك عايشه ما كان بترضي تشوفك بالحاله دي اثبت يا ولدي وشوف شغلك خلاس الله يرحمها امك وربنا يتقبلا بعد دا ابقي في وصيتها الوصتها ليك ولا انت نسيت ، قوم شد حيلك يا ولدي
_قشقش دميعاتو وبي باقي الحزن الفيهو استغفر وقاليهو فعلا يا حاج بكري الله يرحمها ما كتيره علي ربنا ان شاء الله مسكنا الجنه ، لكن قبل اقوم داير اقول ليك يا حاج بكري ما عارف ليك مدرسه قريبه من هنا انا داير ارجع اقرا واشتغل الاتنين .
_ يا سلاااام يااخ اي دا عمر البعرفو انا، ابشر تب انا عندي صاحبا لي مدير مدرسه في الحله الورانا
دي راجل ضكران كدا نمشي عليهو بعد الضهر .
_عديله يا حاج ان شاء الله
فعلا بعد الضهر مشو ليهو في المدرسه ولاقوهو وهاك(يا حق الله بق الله )) وخشو في الموضوع ،
اها يا حاج عثمان دا عمر زي ولدي والله واكتر خلي القرايه السنه الفاتت وهسي داير يرجع اظنو وصل سنه تالته داير يمتحن السنه دي لكن هو شغال وما بقدر يخلي الشغل فشوف لينا طريقه عاد
_ابشر تب يا حاج بكري لكن السنه خلص انقسمت النص بعد دا بقدر يكمل ؟؟
_اي حاج ان شاء الله بقدر بس انت اديني الكتب وسجلني منازل انا بجي ايام الامتحانات جاهز ان شاء الله .
_عديل يا زول بالبركه وان احتجت اي مساعده انا موجود بس انت شد حيلك الفتره دي .
وبدت قصه جديده في حياه عمر والزمن مشي سريع وعمر انشغل بين شغل الورشه والقرايه اندعك دعكه شديده لمن ظهر في شكلو وكمل من لحم الدنيا ((بقي ضعيف ))  ونزل امتحانات وخلص ورجع لي ورشتو ديك ومتامل ينفذ وصيه امو ويكمل قرايتو  وجات النتيجه ومن الخوفه ما قدر يرسل الرساله زاتو طوالي من دربو ومشي المدرسه لقي الطلاب ديل هناك في حاله هستيريه الببكي بي جهه والمبسوط بي جهه والاسر دي توزع في الحلاوه ساي دخل مكتب المدير لقي النتائج مطلعنها كلها ومعلقنها وخاتين قائمه شرف متين ما  معروف بقي يفتش في النتائج ما لقي اسمو فجاءه سمع المدير بكورك يا عمر.........