شماعة الظروف

الجزء السادس

الحلقه السادسه :
_مالك يا بت ؟
اجر اجر الحق اختك وقعت جرا لقاها في الواطه رفعا وجرا بيها علي المستشفي والدكتور اخد زمن جوه لمن هم خافو عديل بعد مسافه جاء طالع قاليهم مبروك جابت ولد
_ولد شنو يا دكتور
_هههه ولد عديل
_لا هي يعني كانت حامل
_راجلا بقا يضحك اي كانت حامل  واهو جابت لينا عمر
_هههه يا زول الف مبروك يتربي في عزك ان شاء الله لكن مالك ومال الشقاء عمر شنو يا زول
_لالا حرم ما يتسمي غير عليك هو نحن لاقين يا باشمهندس والفرحه بقت فرحتين .
قعد ايامو ديك ونسي الخرطوم ولخمتا لحد ما اتصل عليهو حاج بكري
_شنو يا معلم انت ((اللقا احبابو نسي اصحابو ولا شنو ))
_هههههه لالا حاشا وكلا يا حاج يااخ منو البقدر ينساكم
_اها كيف اخبارك والبلد
_والله في نعمه تامه يا حاج انت كيف والورشه والشغل معاك
_والله يا ولدي الشغل تمام لكن المنطقه كلها فاقداك وتسال طوالي منك راجين متين تجي ،وبالسيره دي التقديم دا شغال انت ما ناوي تجي ولا شنو
_لالا خلاس اصلا كنت جاي يوم يومين واكون معاكم
_تما يومينو الفي البلد ديل واتزكر يوم الطلع منها زول شغل والليله طالع منها زول علم وبي ضحكه كدا قال :
((سبحان من لا ينسي احد دكتك الدنيا دكه الما بتعدل ورفعك المولي بي جودو الما بتبدل )).
وصل الخرطوم لقي الناس دي منتظراهو في الدكان وقت سمعت انو جاي واستقبلوهو استقبال حار مشي لي حاج بكري الراجل الوقف معاهو وقفه رجال وكان ليهو اب في دنيا ما بترحم يتيم ، سلم عليهو في راسو ويديهو وقعد اتونس معاهو زييين ، وبكره من الصباح نزل شغل لاقاهو حاج بكري قاليهو خلاس جيت لي الشقاوه .
_ههههههه فايتانا وين هي الشقاوه 
_ اها قدمت ولا لسه ؟؟
_لالا لسه زاتك زكرتني هسي بمش اسحب استمار واقدم .
_عديله ربنا يوفقك يا ولدي
مشي سحب الاستماره وشايف مستقبلو في يدو قدم كل الجامعات الخاتيها في راسو ، وعدا الزمن سريع والنتيجه طلعت جامعه الخرطوم هندسه مدنيه
_هههههه بقي يضحك علي روحو والله دنيا لكن من ميكانيكي لي مهندس مدنيه .
عدا ايامو ديل واندرش في شغلو طلع مصاريف جامعتو ومشي اشتري ليهو هدوم لي الجامعه وظبط امورو تمام وجاءت الجامعه ونزل من تاني يوم قال شنو نظام اول يوم دا حق البرالمه وخاف من حكايه البرلمه البتحصل في الجامعات زي ما ورتو اختو
فعلا مشي لقي الوضع هادي ومافي برلمه طوالي مشي شاف جدولو  وقاعاتو علي وين واخد لفتو في الجامعه وما مصدق انو فعلا في الجميله كان بسمع بيها ساي عند الناس وما اتخيل ابدا انو يوم من اليوم حيدخلها بي نسبه زي دي جاء داخل القاعه لمن انصدم شاف مالم ترا عينه من قبل بنات سماحتن تحير وحاجع كدا ما متخيله بالجمال دا وقف مسافه مندهش في العالم الحيخشو دا ومن اول يوم يدا محاضرات بدا اجتهاد وشيتات ومراجع ما خلاس هو خطي الخطوه الاولي لازم يكمل المشوار وبقي مرتب زمنو بين الورشه والجامعه لحد ما جاء يوم الصباح ولسه ما اتعرف الا علي  بعض الشخصيات بي حكم انو اصلا ما فضي ليهم من الشغل للقرايه سامع ليك حس الجوطه والنبز وشويتين والضرب بدا طوالي خشي يصلح ويحل المشكله شويه كدا ........