وقف الطاكسي قدام العمارة .. نزل السائق حل ليها الباب وعاونها تا هبطات خلاها واقفة ودار اللور حل الكوفر وجبد منو دوك الصيكان الثقال .. بواب العمارة كان جالس فكرسي وحاط راديو حداه طالق الأخبار تايتصنت ليها .. غير شافها وناض طاير لعندها ..
البواب : الحاجة على سلامتك
فرحة : الله يسلمك اولدي
كان صغير فالعمر وعزيز على فرحة حيت ولد مخلق ومؤدب وديما تايمد ليها يد المساعدة وقتما جات تزور ولدها الطبيب المعروف فداك الحي الراقي بالانسانية ديالو وحبو لمهنتو .. وفاش عرفها الأم ديالو ولات عندو عزيزة وتايعاملها بحال مو .. شد الصيكان من عند السائق لي خذا أجرتو من عند فرحة وركب فالطاكسي ديالو ومشا فحالو .. أما هي تبعات البواب من اللور تاتمشى بشويا عليها .. دخلو مع الباب نيشان للمصعد حيت ماتقدرش على الدروج وسلطان كاين فطبقة عالية .. غير تسد عليهم باب المصعد ودار شافيها وابتسامة على وجهو ..
البواب : اش خبارك الحاجة؟ صحيحتك لباس؟ وكي داير واحد الحاج توحشناه
فرحة : لاباس اولدي والحاج تاهو بيخير يسول فيك الخير والربح .. ايوا راك عارفو ماتايبغي يفرق أرضو وجو المدينة مابقا عاجبو
البواب : صراحة المدينة مافيها تاحاجة زينة، غير الصداع والتلوث أما البادية تبارك الله الهوا نقي والطبيعة خضرا
فرحة : بصح ماكاين ماحسن منها، كي راها الواليدة ديالك؟ ولات شويا بعدا
البواب : الحمد لله هاد الساعة راها شويا والله يخلف على سي سلطان راد ليها البال وهنانا من فلوس الدوا والسبيطار الله يحفظو
فرحة : هاداك الواجب ديالو اولدي، الانسان يلا عندو باش يعاون علاش لا؟ حنا كلنا خوت يلا ماوقفنا مع بعضياتنا لاش صالحين، كلشي تايبقى هنا خاص نشوفو اش دينا معانا لهيه وباش غانتلاقاو لي خلقنا، ونتا راك بحال ولدي وتقليد عليك يلا خصاتك شي حاجة جي عندي انا بحال ميمتك
البواب (باس ليها راسها) : الله يطول لينا عمرك الحاجة
وقف المصعد وتفتح الباب وخرجو منو .. كانت الدار قبالتهم، صونا ورجع اللور حادر راسو .. شويا وتفتح الباب وخرجات ياقوت تشوف شكون ومن طابلية لي لابسة والشدة د الخرقة وكمامها المگفضين باينا كانت فالمطبخ، غير شافت فرحة قدامها وطارت عليها عنقاتها فرحانة بيها ..
ياقوت : وا نهاار كبييير هادا اخالتي، مرحبا مرحبااااا
قجاتها رالتعناق والبوسان وفرحة تاهي ماخلاتش من جهدها، ياقوت هي احسن عروسة عندها وتاتحماق عليها وكي تايقولو القلب ع القلب ياقوت كذلك عزيزة عليها كگوزتها .. بعدو على بعضياتهم والبواب مازال حداهم حادر عينيه ماهزهمش فياقوت من الاحترام والادب لي فيه .. فرحة دارت عندو وكمشات ليه شي بركة فيديه هو يحلف وهي تحلف عليه تا اللخر ورضى وقبلها منها وباس ليها راسها ثاني ..
أنت تقرأ
إخترقَت قلبي 💘
Romanceكان لا يؤمن بالحب ومشتقاته، مجرد إسمه يصيبه بالضحك، يستهزئ من اي شخص يدعي وقوعه في فخه كما يسميه .. حتى رآها فإخترقت قلبه كالسهم، أحبها من أول نظرة .. كانت عكسه، فتاة شقية مرحة غير مبالية بأي شيء تعشق الروايات وتحلم دائما بفارسها المغوار الذي سيأتيه...
