إخترقَت قلبي 💘

البارت 25

يالاه كانت اتجاوبها وهي تدخل عليهم فرحة والابتسامة على محياها، جلسات جنب سناء وحطات يدها على فخذ هاد الاخيرة ..

فرحة : سمحوليا خليتكم بوحدكم

نسرينا : لا اويلي شنو تاتقولي عادي احبيبتي راحنا عارفين اش كاين وزايدون حنا ماشي غراب ولا لا؟

فرحة : معلوم راكم من مالين الدار، وتانا بيت نجلس معاك شويا ونتذاكرو وهانتي تشوفي هادشي مازال مابغا يسالي

نسرينا : حتى نتي داااابا نجلسو ونهضرو يام الله طويلة

فرحة (شافت فسناء) : بنتي سناء الله يرضي عليها تعذبات معانا بزاف نرجعوها ليها فساعة الخير بتصگام السعد ان شاء الله

نسرينا :فحياتك اختي

سناء : ماكاين لاعذاب لا والو اخالتي وكي قلتي راحنا ماشي برانيين وريحان بحال ختي عادي

فرحة : الله يكبر بيك ابنتي

نسرينا : ايوا اسناء ماجاوبتينيش شنو ناويا ديري باش نعلم جدك

سناء : غانمشي معاكم ضروري

فرحة (خرجات عينيها) : ويلي على تمشيو، نسرينا شنو هادشي؟ جيتي غير البارح وباغا تمشي اليوم حشومة

نسرينا : والله مانصيب اختي، خالد عندو الخدمة وحيت اليوم الاحد داكشي باش جابني ونتي عارفاه كي داير إلا الخدمة مايمكنش يخليها

فرحة : عااارفا لي كاين والله ماشبعت منك

نسرينا : ايوا مرة خرى ان شاء الله

فرحة : ان شاء الله بيت نقوليك جلسي نتي ولايني عارفاك ماتقديش تخليه بوحدو دايرا بحالي مع مراد، ولكن سناء ماعندها فين تمشي ويلي من نهار جات وهي فتمارة التوجاد ماجلساتش مسكينة ودابا غاتممشي بلا ماترتاح وديك المرة نيت مشات بحال هكا وبقات فيا كي العافية جبتها تفوج ووقعو المشاكل وضيقناها تا مشات ماتصرطااااتش ليا وحلفت هاد المرة ماتمشي حتى تفوج مع راسها وندورها الدوار ونديها للواد والارض يعجبها الحال

سناء : ولكن اخالتي

فرحة (قاطعاتها) : ماكاين ما ولكن اتجلسي هي اتجلسي ولا شنو باليك انسرينا

نسرينا (بقلة حيلة) : يلا زادت شي يومين خرى مافيها باس

فرحة : الالة غاتجلس ونهار تبغي تمشي غانوصلوها حتى لعندك وها الدار اتبقى عامرة كلشي كاين تاحد مامحرك من هنا حتى تفوت هاد العطلة لي قربات تسالي مابقا ليها والو وشوف تاني ايمتا نشوفوك

سناء (تاضحك) : وااخا اخالتي مايكون غير خاطرك

فرحة (عنقاتها) : ايوا شفتي دابا مزيان

بقاو تايضحكو بثلاثة حتى دخلات عليهم ياقوت جلسات فوق السداري تاتنهج وفسخات خرقتها لواتها وبدات تنش عليها ..