إخترقَت قلبي 💘

البارت 20

كانت تمشى وسط الاشجار مستمتعة بالطبيعة الخلابة وصوت العصافير منغمها .. وقفات تحت شجرة شامخة ومدات يدها تاتلمس أوراقها الخضراء راسمة ابتسامة ساحرة .. حسات بشي حد وقف وراها ودارت شافت فيه لقاتو خاشي يدو فجيابو تايشوف فيها ..

ياسين : فرحانة؟

سناء (حركات راسها بالايجاب) : بزاااااااف، هاد البلاصة غزالة وتاتريح النفس وهاد الهواء نقي تاينعش الروح

ياسين : وي زوينة، تانا كانرتاح فيها

سناء (بامتنان) : شكرا بزاف على اليوما، عمري فرحت قد هاكا

ياسين : وهادشي لي بغيت، غير تكوني فرحانة، مازال اتعيشي حوايج بزاف غايعجبوك كثر

سناء : وانا موجودة ههه

ضحتكها خلات قلبو يقفز من بلاصتو، شافيها بهيام وسهى فيها ثاني الشيء لي خلاها تنزل راسها بخجل كاترجع شعرها ورا وذنيها وحنيكاتها حمارو .. ياسين لقاها فرصة انهم غير بوحدهم وبعاد على الناس وتا حاجة ماغاتشوش عليهم .. قرب ليها وشد يديها وسط يديه ..

ياسين : سناء

هزات فيه راسها وشافت فعينيه نيشان وقلبها تايضرب بجهد ..

ياسين : بيت نقوليك شي حاجة وماغانلقاش حسن من دابا .. سناء أنا (سكت شحال عاد كمل) أنا كانبغيك

اعترافو كان صدمة بالنسبة ليها .. بلعات ريقها وعينيها مهرباهم ماقدراتش تشوف فيه ويديها مازال مزيرهم وسط يدو .. لسانها تعقد وماعرفات باش تجاوبو .. أما هو شافها هكاك وعرف راسو صدمها ولكن هادي الحقيقة واخا يعيا يخبيها اتبان واحد النهار اللهم يعجل بيه ..

ياسين : عارف تصدمتي ولكن هادي الحقيقة اسناء .. كانبغيك وكثر ماتخيلي، ايمتا وكيفاش ماعرفتش ولكن لي عارفو أنك نتي اول وحدة دق قلبي ليها، ماكنتش معمر راسي بهادشي تا شفتك، اتقولي مازال صغار على هاد الهضرة ولكن هادشي لي عطا الله، ماعرفتش شنو تايوقع ليا فاش كانكون معاك ماكانبقا نشوف تاحد من غيرك، وماكانسخاش بالوقت يدوز .. كانبغيه يزيد يطوال باش نبقى معاك ونشوف وجهك لي ولا مرافقني حتى فنعاسي، كانبغيك اسناء، وبغيت علاقتنا تطور وماتبقاش محصورة غير فالصداقة صافي حيت انا مامعتابركش صديقة ولكن حاجة كثر

فلتات يدها منو ورجعات اللور مبعدة عليه، عطاتو بالظهر مغمضة عينيها وعاضة على شفايفها .. مامثيقاش شنو سمعات من فمو .. كان عندها شك ولكن ماعمراتش راسها بيه وقالت أنها فقط كاتهيأ .. ولكن دابا واعترافو قلب كلشي .. حتى قالت لقات اصدقاء جداد دخلو لحياتها وعمروها ونشطوها وهادشي لي وقع دابا يمكن يخليها تخسر واحد منهم .. واحد لي اعتبراتو خوها ودارت ليه مكانة كبيرة فقلبها واتجيها صعيبة تخسرو .. ياسين بقا تايشوف فظهرها تايترقب جوابها لي يا إما يحييه او يقتلو ..