شرقات شميسة د الصباح وخيوطها داعبو وجه بطلتنا النائمة .. فتحات عويناتها بلون العسل الصافي، وجبدات يدياتها تاتكسل فبلاصتها وصوتها خارج كيف القطيطات، رسمات بسمة هادئة فاش تفكرات أن اليوم اتمشي مع فرحة للبادية .. اول مرة تغادر مدينتها وتمشي لبلاصة جديدة عليها فقط سامعة بيها والاشياء لي سمعات خلاتها تشوق انها تزورها وتشوفها .. ناضت ببطء من فراشها ووقفات تاتجبد وشعرها مطلوق وراها، حكات جلدة راسها ورتبات فراشها كي عادتها وكي ولفاتها جداها .. عاد خرجات تاتجر فبانطوفتها على شكل أرنوبة بوذينات ورطيطبة .. دخلات للحمام هو الاول قضات حاجتها وغسلات وجهها باش توگض .. هزات فوطة نقية مسحات وجهها بلطف وشافت فالمرايا، اكثر حاجة تاتبغيها هي تأمل وجهها فالمرآة وتبتاسم لراسها هادشي تايزيدها ثقة فنفسها وحبها لذاتها تايكبر، علقات الفوطة بلاصتها وخرجات من الحمام وتمشات فالدار ويديها هازاهم قدام عينيها تاتشوف فظفيراتها متوسطي الطول والنقيين بلا صباغة، سمعات الحس جاي من الكوزينة ومشات ليها نيشان، وقفات فالباب تاتشوف جداها منهامكة فتحضير الفطور .. بدات تسلت بشويا تاتلاحت عليها من اللور معنقاها والجدة قفزات مخلوعة وسناء تاضحك ..
سناء : هههه صباااح النور نيسو
الجدة (شادة فقلبها) : واش مازال ماغاديري عقلك يا هاد الجنية؟ غاتسكتي ليا القلب شي نهار مافيهاش
سناء : شش لايسمعنا خلودي ويتقلق مني، يلا عرفني تانخلع ليه حبيبة القلب ايدير ليا حالة ههههه
الجدة : ههه عفيريتة، شفتك فايقا بكري همم؟ ماموالفاش ليك زعما
هزات زيتونة لاحتها لفمها ودارت متكية على بوطاجي وراسها هزاتو الفوق وميلاتو تاتلعب بشعرها ..
سناء : امم تقدري تقولي الحماس لي فيقني بكري هه
الجدة : اهاه مزيان الالة هي صافي سخيتي بينا
سناء : وشكون بحالكم انمشي ونخلي ليكم الدار خاويا تلقاو راحتكم وترومانساو ليا مع راسكم هاا، رجعو أيام الشباااب
الجدة : الله يمسخك، كوني تحشمي ياهاد البنت
سناء : وينووو على نيسو حشمات وتوردو ليها الحنيكات ههه
الجدة : نتي راشقا ليك هاد نهار وجاتك الگانة عليا، دوزي دوزي عاونيني نحطو هادشي، جدك خليتو تايلبس حوايجو
سناء : هي اللولة
عاونات جداها وداو الفطور حطوة ف Salle à manger المتكونة من ثلاث كراسي على حسابهم فقط .. جلسات سناء بلاصتها والجدة جابت الخبز وجلسات تاهي ولحق عليهم الجد جلس بعدما عطا لحفيدتو قبلة الصباح، هز جورنال لي حطو ليهم concierge وبدا يقلب صفحاتوو ومرة مرة يرشف من فنجان القهوة قدامو وسناء تاتاكل ببطء على طريقة جداها .. سناء مايمكنش تجلس بلا ماتدوي، ماتقدرش تبقا ساكتة واخا ظل جداها تحفظها ان وقت الماكلة ماخاصش الانسان يدوي وخاصة يلا كان فمو عامر ماكلة ولكن هي لي فراسها فراسها ..
أنت تقرأ
إخترقَت قلبي 💘
Storie d'amoreكان لا يؤمن بالحب ومشتقاته، مجرد إسمه يصيبه بالضحك، يستهزئ من اي شخص يدعي وقوعه في فخه كما يسميه .. حتى رآها فإخترقت قلبه كالسهم، أحبها من أول نظرة .. كانت عكسه، فتاة شقية مرحة غير مبالية بأي شيء تعشق الروايات وتحلم دائما بفارسها المغوار الذي سيأتيه...
