حب هجرسي

29

#حب_هجرسيج2

#بارت29

اليوم راح يزفوني للغالي صارلي يومين احس راسي انسطر كلشي ما افتهمت منهن بس ركض

من الحفافه للميش للشيره لنقل نيشاني لعيالي لاختيار البدلات لحجز القاعه

حتى بيبي كام تحجي عليه لان اريد اسوي الحفله بالقاعه
.. وشنو هالتفكهن الا بقاعه .. جا مو هذا بيت جدج سياح نياح من الطول للطول المن رايديه

.. حبوبه ما اريد هنا كوه هي .. مو ذني صاحباتي كلهن تزوجن بالقاعه... شمعنه اني ؟

.. جا حتى العرس صار غيره ...امداج وامداني اذا صار بيج حظ عبن تدورين تفكهن
.. ان شاء الله يصير بيه حظ واجي اذكرج .. وعود غمي روحج ساعتها

شالت عصتها بيبي .... طلعلتها رجليه المشيره
.. اذا ضربتيني رجلي تزورك وارايها للنسوان والعباس واكلهم ضاويه جاي تعذبني واخلي الناس كلها تحجي عليج وتاخذ غيبتج

بطلت بيبي وكالتلها
.. اني اعلمج بت المطي بس خلصي هالصخام العرس وشوفي شأسوي بيج
عفتها واني خربانه ضحك شكد احبج يا روحي
اجه يوم العرس كعدت من الصبح كعدتني امي من الصبح
.. يمه والله ما شبعانه نوم
.. كومي وراج هوسه يا نوم يا بطيخ
.. خرب بحظي .. خرب بحظي ..لاحكَيني حتى النومه

عفتهم ورحت غسلت نزلت اتريك لاكتني بيبي
.. ها ولج فطيم .. اليوم نخلص منج
.. اي ارتاحي راح تخلصين مني

سحبتني الها وبوستني وكالت
.. اتغشمر وياج ....جا ويامن اعارج انوبه .... ويه ذبان وشي ؟

ابتسمت كتلها يعني
.. صافي يا لبن

كالت
.. دبس وراشي وعيونج

ضحكت عليها وحضنتها وبجيت هي هم بجت عليه كام تمسح بالدموع بشيلتها :
.. لا تزعلين مني والعباس احبنج بس اضوجن منج من تطنكرين وما ترضين تعرسين
.. واني  هم احبج بيبي

.. ابريني الذمه خافن زعلتي مني يوم لان طكيتج
..الا هاي ما ابريج الذمه عليها

مسحت دموعها وكام تدور ع عصتها وتكول
.. بت القندره انتي مو شكول نعمه
عفتها وشردت واني اضحك
رحت للصالون وراحت وياي بشرى لل٣ ونص  كملت اباوع لنفسي طلعت بنيه ثانيه صدك المكياج يغير شكل البنيه طلعت اكبر من عمري لان اني بالاصل ناعمه ومعاني وجهي تبين بنت ال١٦ سنه بس هسه لا صؤت شكل ثاني

باوعتلي بشرى ودمعت
.. يمه صلوات على محمد وال محمد هنياله قاسم
.. صدك بشه طالعه حلوه
.. كَمر والله .. تعاي تعاي خلي اصورج

اخذتلي كم صوره بفونها وخابرت هجرس اجانه صعدوني هو وبشرى  وصعدت بشه بالصدر

الطريق كله يسولفون ... وهجرس عينه بالمرايه عليه احس عينه مغرغره دمع من يباوعلي بس يستحي يحجي وياي بكلمه او ما يكدر ما اعرف درت وجهي ع الجامه ودموعي كام  تجري