حب هجرسي

31

#حب_هجرسي ج2

Mariam-almusawi

#بارت 31

كعد هجرس ع صياحي مخروع وهو يحضن بيه ويصيح
.. جيلان.. جيلان شبيج .... جيلاااااااااان

واني فاقده بس اصرخ والباب مال الغرفه تكسرت ....البيت كله كعد بحيث هجرس انخبص وبعد ما يشوف دربه

كام بطركَ الشورت فتح الضوه وفتحلهم الباب... واني جنت لابسه بس سيت النوم دخلت حوريه ركض غطتني بالبطانيه ودخلوا عمي وهاشم واني اصرخ

هجرس لبس بجامته واجه يصيح
.. شبيج بويه شو باوعيلي لا تخبلينييييييي

كال هاشم
.. هجرس شبيها فهمنه

صاح بيه
.. هو اني مفتهم السالففففففه حتى افهمك
كعدت حوريه يمي تفرك بأيدي واني اصرخ اريد احجي ما اكدر  حتى بيبي صعدت
.. ولكم شصاير ليش محد يرد عليه

وهو حاضنني .. اجه عمي يمي اخذ دولكة المي واخذ منها مي شويه ومسح وجهي وبيبي تكول
.. ولكم الفرخه صارت صفره راح تموت

واني ارجف وابجي بحضن هجرس يردون يفتهمون مني ماكو دافنه وجهي بصدر هجرس وهو يمسح على شعري انتبه على شعري طالع اشر لحوريه تجيبلي شالي .. جابته وحطته ع راسي

كال عمي
.. بويه جيلان ششفتي شو باوعيلنه

تذكرت الصار حضنت هجرس حيل ورجعت اصرخ ووجهي بصدره ....اللي شفته ما يتسولف.... ويه نفسي خايفه احجيه
كالت بيبي
.. حبوبه تعوذي من الشيطان .. هجرس اقره عليها اقري اية الكرسي بلكتن ترتاح شويه

كالت مرة عمي
.. عوفوها يجوز شايفه حلم وخبصتنه خبيصه بنص هالليل

باوعلها هجرس وعمي خزرها وبيبي كالتلها
.. سعيده لو تحجيلج حجايه بيها حظ لو تولين تنطمرين
كال هاشم
.. اني اكول اطلعوا خلوا هجرس وياها اذا احتاجنه احنه يمه يجوز تستحي تحجي كدامنه .. يله حبوبه .. يله بويه.. حوريه

بيبي كالتله
.. يا وين اعوفن بنيتي .. غير اعرف شبيها
كلها هاشم
.. حبوبه هجرس بس يفتهم منها ينزل يفهمنه .. خليها ترتاح يله خطيه

طلعوا وبيبي اجت باست راسي
.. حبوبه كولي يا الله لا تخافين هاي كلنه يمج وهذا هجرس يمج واذا تخافين تعاي نامي حذاي بالغرفه اني بعدني واعيه

عافتني وطلعت وحوريه كالت
.. هجرس اذا احتاجيت شي دك الباب عليه اني بعد ما انام
.. مشكوره حوري

عافونه وطلعوا وسدوا الباب هجرس بعد البطانيه والشال عني واني ملزمه بيه ودموعي تجري
.. جولي .. بنيتي ... اشو انطيني مجال خلي افتهم منج .. ششفتي؟

جنت اشهك ما اكدر احجي الصار اله اخذ المي من ع الميز وبعدني شويه عنه شربني مي وغسل وجهي وهو يقره آيات واني ارجف رجيف حسيت راح انشمر من وراه
رجع اخذني لحضنه ويقره ايات ويبوس براسي  شويه شويه هدأت والرجفه توقفت ونفسي هدأ ووجهي رجع بيه الدم