အပိုင်း(၂)
............................
နေရောင်ဝါ
"ရေမွန်းနေတုန်းလား ကြင်ယာတော်"
"ဟမ်"
ကျွန်တော်အံ့သြပြီးရင်းအံ့သြနေရသည်။ဘယ်လိုကြီးခေါ်လိုက်တာပါလိမ့်။
"မင်းကဘယ်သူလဲ...ငါကရောဘယ်ရောက်နေတာလဲ"
"မင်းသားလေးကိုရိုရိုသေသေခေါ်မှပေါ့"
ကျွန်တော့်ကိုသူ့နောက်မှလူကြီးတစ်ယောက်ကဝင်ပြောလေသည်။ သူကအသာလေးလက်ကာလိုက်ကာ
"ရပါတယ်ဗျ...သူပြောတတ်သလိုပြောပါစေ...နောက်မှသင်ပေးရမှာပေါ့"
ကျွန်တော်သူ့ကိုနားမလည်နိုင်သလိုကြည့်နေတော့...
"ကြင်ယာတော် ရေနစ်နေတာကို မောင်တော်က လှမ်းတွေ့လိုက်လို့ဆင်းကယ်ထားရတာ။ ကြင်ယာတော်ကိုမြင်မြင်ချင်းနှစ်သက်တာမို့ လက်ဆက်ဖို့ ဘဘတွေနဲ့တိုင်ပင်နေကြတုန်း သတိပြန်ရလာတာပဲ"
"ဟားဟားဟား..."
သူ့စကားဆုံးတော့ကျွန်တော်အားရပါးရရယ်လိုက်မိသည်။ ကျွန်တော်ကရေနစ်တယ်တဲ့ ဖြစ်စရာလား။ကျွန်တော့်ကိုများကြင်ယာတော်တဲ့ သူ့ကိုယ်သူလဲမောင်တော်လို့ပြောလိုပြော။ ယောကျာ်းချင်းလက်ဆက်မလို့တဲ့ အဲလေ...ယူမလို့ဆိုပါလား။
ဘယ်သူကမှလဲမတားကြဘူးလားမသိ။
"ဘယ့်နှယ်ဒီလောက်အကျယ်ကြီးရယ်နေရတာလဲ မောင်မင်း"
သူ ဘဘဟုခေါ်သောလူကြီးကဟောက်ပြန်တာမို့ကျွန်တော်ပြန်ငြိမ်နေလိုက်သည်။ သူကတော့ ဘာမှမပြောပဲကျွန်တော့်ကိုပြုံးပြုံးကြီးကြည့်နေလေသည်။ နေနှင့်ဦးပေါ့ကွာ...ဘယ်သူကကြင်ယာတော်အခေါ်ခံရမလဲ မင်းကိုပြရသေးတာပေါ့...
"နန်းတော်ထဲပြန်ကြရအောင်"
"ကောင်းပါပြီမင်းသားလေး"
"ထနိုင်ရဲ့လားကြင်ယာတော်...ဒီရထားလုံးပေါ်တက်ပါ"
တက်ဆိုတော့လဲတက်ရတာပေါ့။ ရထားလုံးပေါ်ထိုင်မိပြီးတော့မှကိုယ့်ကိုကိုယ်ပြန်ကြည့်မိသည်။ကျွန်တော့်ကိုယ်ပေါ်မှာစွပ်ကျယ်နှင့်အိမ်နေရင်းပုဆိုးက ညကအတိုင်းပဲရှိနေသည်။
