الحلقة 44 :
أيلول؛ يا روحي راقد مبنوا هكا
أمير؛ اممم يتقرمش
أيلول؛ باش نديه لبيتي توا
أمير؛ محزرتش الايام هاذي الكل معاك دالتي
أيلول؛ حد ما قالك اسكت على حقك طفرت فيك راهو
أمير؛ صار توا بدينا فالتسلط
أيلول؛ ههه بالطبيعة
أمير؛ اما موش باش نسلم الليلة
نطرت حطيت يدي على فمو ...
أيلول؛ اششش شبيك زدت صوتك اتو يفيق و ميرقدش ...مالا حالة فيكم نتوما الرجال تعملوا كان الفازات اللي متعجبش .. كي تعودوا موش قادرين تجيبوا لولاد فاش قام تدخلوا في تربيتهم و انتوا اقل شي تفيقوهم من رقادهم
جبدت يدي من فوق فمو ... و عديتها رديت شعري للتالي ... غزرت كي يغزرلي مشوكي .. هزيتلوا بحاجبي متاع شنوة ؟...طرشق بالضحك ... و يحاول ينقص في صوتو ... غزرتلوا باستغراب علاه يضحك... ههههه و مبعد فقت لروحي ... شقاعدة نخلوض شمدخلوا و هو موش ولدوا .. و انا نلوم ...
أيلول؛ هههههههههه صاي ....هههه مضحك.....ههههه...ش ...
أمير؛ هههه شبيك ... شعلتي فيا هكاك ... سامحيني برك على تعبك فالولادة مرتي ... المرة الجاية نولد فبلاصتك ...ههههه
أيلول؛ ههههه زايد بلادة هههههههه
تحرك أويس باش يقوم ...ڨحرتلوا قفل فمو ... كبست على شواربي باش نحبس الضحك ...جبدتوا من يدو خرجنا و قفلنا الباب ...
أمير؛ تو نرجع نرقد معاه هيا بونوي
تلفت عاودت رجعتوا
أيلول؛ شنوة الذكاء الخارق اللي عندك تبارك الله عليك
أمير؛ يعيشك نعرف بطبيعتي هكا
أيلول؛ هاهاهاها أصلا السرير اللي قدامو متاعي انا اللي رقدت فيه اليومين هاذوما ..وقت كنت لاهي سيادتك
أمير؛ اممم يعني كي رقدتي فيه ولا متاعك ... راكي طبقي في قانون التملك مدام أيلول
أيلول؛ اممم بطبيعتي مسيو امير الحاجة اللي نحط عيني عليها تولي متاعي و منسلمش فاها بالساهل ..
نزل عينيه و عاود غزرلي ...
أمير؛ كي هكا علاش مسلمة فيا ؟
للحظة ما استوعبتش السؤال متاعو خاطروا باغتني بيه ..بلعت ريقي ...دورت عيني على وجهوا ... يستنا فالرد متاعي ... لساني جمد فبلاصتوا ...قص علينا صوت البكا متاع اويس ...
أيلول؛ شففففت سي أمير ...هاو فاق جرايرك
حليت الباب لحقني
أمير؛ توااا طلع فاق جرايري !!!! موش خرجنا كيف كيف
هزيتوا فحملتي و قعدت على السرير ... نهز فيه باش يرجع يرقد ...
أيلول؛ اممم خاطرا عليت صوتك موش نبهت عليك تهمس كهو
أمير؛ موش فاق كي خرجنا لالا ايلول ... يعني متنجمش تلومني خاطر باز فاق من التشوكيع متاعك ...
أيلول؛ شنننوة تقصد اللي أنا نتشوكع !!
أمير؛ أوووووفف راسي وجعني من النقاش
أيلول؛ أنا زادة هيا بونوي اغلق الباب وراك باهي
تكيت حطيتوا قدامي ...حطيتلوا السوسات ... و نهز فيه بالشوي باش يرقد ... غزرتلوا كي جا تكا قدامي على ظهرو حاط مرفقوا على وجهوا..بيناتنا أويس ... هزيت راسي شوي غزرتلوا ..
أيلول؛ شتعمممل ؟
أمير؛ أيلول صاي غلبت ... تو كي يرقد نروح ..
سكت باقية نغزر لأويس منعرش كيفاش هزني النوم ...
أمير يحكي :
عينيا بداو يتغمضوا ... أصلا اليومين هاذوا دوب نرقد ... تلفتت غزرتلها كي غطست فالنوم و أويس زادة ... محلاه منظرهم هكا ... تبسمت ... غزرت لتريكوا بيجامتها كي طلع بلا مانحكي عالشورط ...غمضت عينيا بقوة و حليتهم ... وقتو توا أيلول ...تقعدت جبدت الغطا رميتوا علينا... اصلا ماش قادر نقوم تاعب عاللخر ... بست أويس .. طلعت راسي غزرتلها ... طبست بستها على جبهتها ... جبدت روحي تكيت على جنبي نغزرلهم لين رقدت....
...........................
وفاء؛ ههههههه أكيد براء
براء؛ اما توا تتحبس كون تتأكد الحكاية
وفاء؛ اممم و اذاكا المطلوب ...
..............
أيلول تحكي :
ضرب فعيني ضو الشمس ... خلاني نفيق تلفتت غزرتلوا كي حاكم يدي اللي لافة بيها أويس ..السخطة رقد هوني .. أصلا مبين تاعب ... جبدت روحي بالشوي ... محلاهم الزوز هكا عالصباح ...
ريقلت الريدو باش ميفيقهمش الضو...حليت الباب بالشوي و خرجت ...رحت لبيتي خذيت دوش نحيت بيه التعب متاع البارح... لبست روب فلوري للركبة ...مع أديداس بيض ...شعري سيبتوا مموج كيف ماهوا ... و نزلت ... لقيتهم وجدوا الفطور ... رحت حضرت الحليب متاع أويس و حطيتوا يبرد ... هزيت كاس متاع قهوة و الجورنان قدامي ... غزرت للفوطو متاعي ... نطرت هزيت الجورنان ...
[ أيلول مالكة شركات مواد التجميل ... جانب آخر لدارك التي سبق طلبها دوليا بسبب جرائم متسلسلة.. و تم الإفراج عنها بعد اختفاء الأدلة ... المدعوة أمام قضية انتحال شخصية .. ]
عديت عينيا عالبلاصة الكل ... العصب طلعلي ... وحدها هي تعملها ... خاطر غيرها كون عينهم يعملوها هام عملوها ... اصلا كان أمير الكيلر و براء و هي اللي يعرفوا ... براء مقالش من قبل علاش يقول توا ... الكيلر مستحيل .. و أمير كان معايا البارح .. أصلا شنوة يستفاد .. بقات كان هي ... و هذا يعني أنو ما ماتتش .. هه كنت متوقعة شي كيف هكا ... اما وقت توصل .. تدخل فالشي اللي حد ما يتجرأ يدخل فيه ... توا وقت باش نرجع للعب متاعي .. غفلت برشا ... هزيت التيليفون ...
أيلول؛ وي معاك دارك ... اممم .. فيسع لملي الرجال ... عندنا ما نعملوا ... و في يدك ساعتين ... تو تخلقلي بلاصة وفاء ... مووش مساعدتي ... فيسع ... علقت عليه ... هزيت الجورنان كمشتوا فيدي ... و قمت ... دوب ما وصلت الباب ... حسيت بيدوا على ذراعي ... قريب طيروا ... دزني عالباب تقفل ... غزرتلوا و هو اكاكا مدهشر بالرقاد .. شعروا داخل بعضوا ... نفسي طالع هابط .. خاطرني معصبة عاللخر ...
أيلول؛ أمييير سيب منيش قد بعضي و عندي ما نعمل .. سيييب أمييير ... لازم نفرزها ليوم ... وقت باش نرجع للعب متاعي ... و ناخو حقي من اك.....
قص عليا كي حط شفافو على شفافي ... باسني بقوة و عضني ...خلاني نتهز من الوجيعة ...جبد روحوا شوي كهو ... شفتي نحسها باش طير ... طلعت يدي ..
باش نحطها على شفتي ... حكمها .. و تكاها لفوق مع الباب ... عدا يدو على شفتي و جبد يدو غزر للدم ... غزرت ليدو و غزتلوا ... لف يدوا تحت شعري ... و حط جبهتوا على جبهتي ...
أمير؛ سامحني
أيلول؛ علاش عملت
نزل باسني بوسةخفيفة ... ورجع جبهتوا على جبهتي ...
أمير؛ خاطرك استفزيتني أيلول ... تستفزيني كي تتعاملي بشخصية دارك ... نفدددد و منجمش نتحكم فاعصابي .. خاطرك تولي وحدة خلاف منحبهاش ... تولي تراي كان فأهدافك .. من غير ما تشوفي شنوة اللي حولك .. تنساي وجودي حتى .. منحبكش تولي دارك ... حتى لو شكلها هكا اما من الداخل منحبكش تولي هي ...
أيلول؛ ملزومة أمير ... بسبتك رجعت لهاذ الوسط ... انتا اللي رميتني من جديد لهاد الحفرة ... كنت برا و كنت هاربة من هاذ العالم المسخ ... قلت اخيرا باش نتهنا من كلشي فيه دم .. وكره .. اما بعملتك متاع الإنتقام ... خليت جنوني اللي كبستوا سنين يرجع ...انتا سبتي أمير ...
غمض عينيه و تنهد
أمير؛ نعرف ...على اذاكا باش نخرجك كيما رميتك
أيلول؛ مستحيل أمير ..فات الفوت توا ...
أمير؛ ما فاتش أيلول ...كي نحب على حاجة نعملها ... توا شبيك مقلوبة عالصباح.
هزيت الجورنان... جبد روحو شوي ... يغزرلوا ...تلفتت نغزر للبعيد ... جبد الجورنان من يدي ... عدا عينيه عليه ..و غزرلي
أمير؛ تسما ما ماتتش
أيلول؛ مبينة
أمير؛ باهي خليها فيدي
أيلول؛ أمييير
أمير؛ باش نبعدك على كلشي كيف ما رميتك ... آثق فيا ...
أيلول؛ نحب ناخوا ثاري منها أمير ...
أمير؛ انا نجيبها بين رجليك باهي
أيلول؛ باهي
أمير؛ تو نمشي
أيلول؛ وين ؟
أمير؛ موش قلتلك آثق فيا
أيلول؛ أما
أمير؛ ايجا
حكملي يدي طلعني لبيتوا ... حل الدريسينغ منعرش فاش يعمل ... لبس تريكوه ... و جا عندي ...عنقني ... نزل راسوا لوذني
أمير؛ سامحني
رشق البرا فالقفا متاع رقبتي .. تنطرت .. باقية نفارع فيه لين ... ظلام كلشي بين عينيا ....
🔜🔜🔜🔜🔜🔜🔜🔜🔜🔜🔜🔜🔜🔜
#يسرى_أمجوج👑
#حب_و_إجرام🗡
أنت تقرأ
حب و إجرام2 (باللهجة التونسية)
Actionكل الوسائل متاحة في الحب و الحرب ... و حين يتعلق الأمر بهوس التملك ... تتحول الأمور الى معركة جنون... الفائز فيها من يصل إلى ما يريد بأقل الخسائر و أكبر الغنائم....في معركة استبيحت فيها كل الطرق.. و الكل دخل في شطرنج... ستؤدي بحياة الكثيرين إلى الهل...
