حب و إجرام2 (باللهجة التونسية)

الحلقة 45

الحلقة 45 :
أمير يحكي :
تكيتها عالسرير... رجعتلها شعرها للتالي .. طبست بستها ...
أمير؛ سامحني يا روحي ... ضريتك .. مي كان خليتك تروحي كنتي باش تنضري اكثر ... محال نرميك اكثر ..
غطيتها .. بدلت دبشي و خرجت ...
أمير؛ ألو .. تو نبعثلك ميساج .. لازم تلقالي لادراس متاعو فيسع ... فيدك ساعة كهو ...
علقت عليه خدمت الكرهبة ... ديراكسيون عندو غير هو ينجم يفيدني توا ... نسوق و تفكيري عندها ... صوتها يتردد فوذني لتوا : " بسبتك عاودت رجعت لهاد العالم... انتا رميتني لهاد الحفرة ..." .. دوب ما وصلت... حلولي الباب ... دخلت للفيلا .. خبرتني البون انو فميدان الخيل ...مشيت عندو ... كل تفصيل و شبر فهاد الدار نعرفوا .. يمكن خاطر هوني بدا كلشي و هنا وفا زادة... دوب ما وصلت لقيتوا يونترانا كيف ما موالف ... تكيت عالحيط نغزرلوا... نتكيف فالڨارو .. دوب تلفتت راني ... حسيتوا كي تفاجئ.. عمل دورة و جا لعندي .. نحا الكاسك ... و غزرلي ..
ياسر؛ هاك هنا
أمير؛ اممم
ياسر؛ وصل الوقت ؟
أمير؛ وصل
ياسر؛ متأكد
أمير؛ اممم باش نبعد على كلشي
ياسر؛ أمير انا و انتا نعرفوا بالقدا موافقتك شمعناها .. على هاذي طلبت منك هكا ... و انتا تعرف اللي علاقتنا فسدت بسبة هاذ الشرط .. انو تجيني اليوم بعد هاذ الشهور الكل أكيد فما سبب
أمير؛ عشقت
ياسر؛ شنننوة ؟ أمير عشق ! لا عاد محال نأمن
مشا ..لحقتوا .. قعدنا عالشط اللي مقابل الفيلا متاعو .. شعلت ڨارو و نفخت فالهوا ..
ياسر؛ و منال ؟
أمير؛ و منال !!!
ياسر؛ أمير احنا صحيح صحبتنا فسدت بسبة هبالك و جنونك للمافيا .. اما هاذا ما ينفيش انو كنت عشيري .. مهما بعدت محال نخليك تغرق ولا يصرالك شي ..
لف يدو على كتافي .. عنقتوا .. ريحة خويا رجعت من جديد .. رغم كل الظروف و اللي صرل بيناتنا من مشاكل.. اما حاجة من داخلي كانت تقولي اللي اول مرة نعرف نختار صاحب .. غزرتلوا كي مشا خطوات و تلفت غزرلي
ياسر؛ يعني انتا من البلا للبلا .. بالحق حبيت دارك ؟!
أمير؛ هاك في بالك بكل شي
ياسر؛ و بكل خطوة
أمير؛ نصححلك موش دارك .. أيلول
ياسر؛ مينفيش انو هي من المافيا .. أمير شبيك ياخي .. ابععععد على هاذ العالم .. نصحتك من قبل و تو نزيد ننصحك خاطرني صاحبك
أمير؛ باش نبعد و راس خويا .. اما مزالت حاجة وحدة كهو .. و انتا اللي تنجم تفيدني
ياسر؛ في شنوة ؟
أمير؛ نحب على وفاء توا توا ..
غزر للبعيد و مبعد غزرلي ..
أمير؛ ماكش باش ترفض ياسر .. آخر حاجة نعملها و نسيب كلشي خاطرها .. انتا الوحيد اللي تنجم تفيدني توا ..و
ياسر؛ باهي باهي اصبر دقيقة
هز تيلفونو ندرا فيمن يكلم .. مبقاش وقت و تفيق .. ماكسيموم ساعتين .. لازم نلقاها فيسع ..
ياسر؛ هيا أمير
أمير؛ وين ؟
ياسر؛ للبلوة اللخرة متاعك
مشينا ... بين عينيا كهو كي طيح فيديا .. الا ما نوريها اللعب معايا.. لهوني و يزي اللعب متاع الصغار .. خدمت الكرهبة .. لحقوا رجالوا بالوقت و رجالي زادة ..
أمير؛ الوجهة!
ياسر؛ شاليه *****
أمير؛ باهي
خدمت الكرهبة طاير عجاج .. اهم شي نوصلها ..
ياسر؛ متأكد اللي هي تستاهل تعمل هاذ الشي علا جالها .. و تقبل الشرط متاعي !!
أمير؛ اممم تستاهل .. قلبي يقولي هكا .. و باش نقبل بشرطك .. خاطرني مستعد نسلم فبلاصتي فعالم المافيا .. و كلشي متعلق بيه .. خاطر حتى لتوا كنت نعيش على جال روحي اكهو أما توا نعيش على خاطرها زادة .. انا رجعتها لهاد العالم ياسر .. و انا اللي باش نخرها و نخرج منو .. لحق الوقت اللي نعيش فيه كيف الناس الكل .. خدمتي و مرتي .. حياة عادية ..
ياسر؛ فما عواقب أمير .. عالم المافيا موش باش يسيبوك .. غير كان هربت .. كيف ما عملت هي من قبل
أمير؛ لا باش يسيبوا وقت نحطلهم راس وفا قدامهم .. العراب اللي حد ما نجم يوصلوا .. و توفا التمثيلية متاع وذني هاذي ...
ياسر؛ قبلت بشرطي خاطرها مالا ؟
أمير؛ فالاول خممت فيه .. و منجمتش نتقبلوا .. فالتالي كبرت على عالم المافيا .. و الأكسيون اللي نعيشها كل يوم ..و زادة كي مات رامي زدت كبست أكثر .. حبيت ننتقم منها اما لقيت روحي ننتقم من روحي .. خاطرني حبيتها ..
ياسر؛ و رامي ؟ دمو؟
أمير؛ لتوا ما فهمت شي .. اما متأكد اللي فما سبب .. رغم اني عرفت عليها كان الخايب .. اما الايام اللي بيناتنا خلاتني نعرف أيلول
ياسر؛ انتا حبيت جانب أيلول .. باش يجي النهار و تكبح جماح دارك ؟
أمير؛ باش نحاول .. عالاقل ما نندمش على اني ماحاولتش .. .. وصلنا تو نمد إشارة للرجال و نهدوا عليهم ..
ياسر؛ باهي واحد زوز ثلاث let's do it (فلنفعلها) ..
على اشارتي هدينا على الشاليه أصلا مكانش فما برشا رجال حولوا .. دخلنا ما فما حتى حس .. كانوا فارغ ...
..........................
وفاء تحكي :
أنك تكوني مرا فمجتمعنا.. معناها أنك تكوني مقيدة .. بحوايج إي و حوايج لا ..تظطري تتحملي نزوات بوك اللي يروح للدار مع مرا اخرى كل ليلة .. يغزر لفوطوا امك الميتة و يتعداها .. و خوك اللي يجري ورا الفلوس .. كانت الحياة بالنسبة ليا .. كل يوم اني نفيق .. نروح للجامعة و نرجع .. نتحمل تشوكيهم.. قد ما كان عندنا فلوس .. قد ما كانت تبانلي روحي أفقر وحدة .. خاطرني بلا أم .. بابا لاهي بسهراتو .. آخر مرة حكيت فاها .. لتوا نحس بأكا الكف اللي على وجهي .. غمضت عينيا تذكرت وقت جا خويا قالي اللي هو باش يخطب .. وقتها تفآجأت على قد ما فرحت .. على قد ما اسغربت .. خاطرني نعرفوا نسخة على بابا .. كلشي مظاهر .. اما فرحت خاطرو خبرني .. اول مرة نحس بالإهتمام.. اما احساسي كان خايب .. و خايب عاللخر ..
وفاء؛ ييييي جووو .. خويا باش يولي عريس وكتاه نروحو نخطبوا ؟
فارس؛ نروحوا !! هههههه من وكتاه انتي معنية بامورنا وفا .. متنسايش انتي السبة فموت امي كون مجيتيش انتي للدنيا كانت تبقا عايشة
وفاء؛ امانك خويا يزي .. 20 سنة فاتت عالحكاية .. انا معنديش ذنب و
فارس؛ يززززي .. المفيد أنك باش تسافري لاسبانيا تعملي ديبلوم تسيير فما ..
وفاء؛ ههه تحبوا تبعدوني على مخططاتكم ولا باش يعرس بابا ..بوحدة ثانية ..
وقتهافشخني بطريحة .. خلات وجهي مدمدم .. هربت تخبيت منو فالخزانة متاعي .. خرج .. و هاذيك كانت آخر مرة نرا خويا .. كنت فالخزانة نسمع فالحس متاع سلاح و ضرب .. أما كنت خايفة نخرج .. في بالي خويا مزال .. فوت اكا الليلة فما .. فقت الصباح حليت الباب و نزلت نتسرسب.. شي غريب انو الفيلا ما فيها حد .. نزلت للصالة للتحت .. أما وجهي تقلب .. المنظر خلاني .. نطيح من الدرجة اللولة للتالية .. محسيتش بجروحي و كسرتي .. اما اكا المنظر خلاني نعيط كيما جامي عيطت ... بابا و خويا مشنوقين فنص الصالة.. فالتريا .. باقية كان نحكم في رجليهم و نعيط .. حد ما سمعني كيف العشرين سنة اللي عشتها .. خاطرني كنت خيال بالنسبة للكل .. صوت من التالي فيقني على واقعي اللي راني فيه توا .. صوت عساس الفيلا .. الظاهر كان متخبي و كي سمع صوتي خرج ..رحت نجري ليه نترجاه ينزلهم ...هزلي براسوا متاع لا ماتوا .. سقسيتوا وين الكل .. خبرني اللي هوما راحوا لا يموتوا ..
وفاء؛ ش ش شكووون عمممل ه ه هكا !!!
العساس؛ دارك .....
🔜🔜🔜🔜🔜🔜🔜🔜🔜🔜🔜🔜🔜🔜🔜
#يسرى_أمجوج👑
#حب_و_إجرام2