حب و إجرام2 (باللهجة التونسية)

الحلقة 49

الحلقة 49:
فقت مفجوعة .. على حلمة أكثر من خايبة .. تنطرت من بلاصتي جيت قاعدة .. تلفتت غزرتلوا .. راقد و لاف يدو على أويس اللي وسطنا .. دوب ما ريتوا اكاكا نجمت ناخوا نفس .. تلفتت هزيت كاس متاع الما.. شربتوا الكل و رجعتوا .. عديت يدي على رقبتي .. نحاول نمحي صورتو بالدم أكاكا من مخي .. منعرش علاش للحظة حسيت نفقدوا .. نفقد السبب اللي راني عايشة على جالو توا .. حاولت ناخو نفس عميق .. عديت عينيا عالبيت الكل .. و عاودت تكيت .. رميت يدي نعدي فيها على لحيتوا.. منعرش كيفاش وصلت أنني نحبوا .. على هاذ الكلمة قلبي دق بالقاوي .. توا قاعدة نستعرف بالشي اللي نحس فيه .. يمكن كنت نحاول نقنع في روحي بالعكس.. المدة هاذي الكل .. اما توا متاكدة من شي واحد انو مستحيل نسلم فيه .. غزرت لاويس كي راقد وسطنا بلا حس.. تقولشي واحد كبير .. قداش هادي الطفل هادا .. بالعادة الصغار يبكوا برشا .ميرقدوش فالليل .. اما هذا لا .. كل مرة نرمي عيني على واحد فيهم .. لين هزني النوم و رقدت..
أمير يحكي :
فقت الصباح .. على ضو الشمس كي ضرب في عيني .. غمضتهم بالقاوي و عاودت حليتهم .. تلفتت غزرت لأويس كي فايق و يلعب بيديه .. و هي راقدة .. تبسمت على جنب .. من الفكرة اللي جاتني .. قمت من بلاصتي .. هزيت أويس بستوا .. و باقي نهمس في وذنوا
أمير؛ شقولك نفيقوا ماما على طريقتنا ..
جبدتوا شوي بستوا.. و غزرتلها راقدة على كرشها .. حطيتوا على ظهرها .. بدا يلعب... و أنا شايخ عليها بالضحك .. خاطر بدات تتململ باش تفيق .. طلعتلوا يدو حكملها شعرها ..و ناض يضحك ضحكت  بالوقت ..
أيلول؛ أ أميييييير شتعمل خليني نرقد
باقي نضحك بالشوي و حاكموا بيد تزيد تقوم و ترمي الطفل هههههه ...
أيلول؛ أممممييير منحبش نعيط يفيق أويس يزززي اخطا شعررري
زاد حط يدو الثانية يجبد فيه .. شخت عليه تقول شي طفل كبير.. .دورت راسها شوي .. بعدتلها شعرها من على وجهها .. ڨحرتلي .. دول حالة عينيها .. هزيت يديا فالسما متاع خاطيني هه .. ضيقت عينيها .. و طلعت راسها شوي لقاتوا فوقها يجبد في شعرها .. تبسمت و حطت راسها عالمخدة ..
أيلول؛ من توا بديت تعلم فيه
أمير؛ هههه لا هاذي فطرة عزيزتي
رميت يدي هزيتوا بستوا
أمير؛ صحيتك يا فرخ .. توا نجم نعول عليك
تلفتت تكات على ظهرها تغزرلنا .. و تتبسم
أيلول؛ فيسع رجعتوا لجيهتك  انتا 😡 هاتوا هوني
قدمتوا حكمتوا حطتوا على كرشها باقية تبوس فيه .. للحظة سرحت معاهم الزوز .. محلاها الفيقة .. وقت يبدا قدامك منظر كيف هكا .. وين ما تخمم في حتى شي خايب .. كان ترا اللي تحبهم قدامك فرحانين .. نظن هذا الشي .. اللي كنت نفركس عليه من سنين .. الإستقرار  .. فقت من سرحتي وقت باقية تشاورلي بيدها
أيلول؛ وين سرحت
ترميت تكيت قدامها .. ميلت راسي شوي على كتافها .. ناخوا في نفس من رقبتها نحكي
أمير؛ كنت نخمم كان باش تعطيني بوسات كيف تاع أويس ولا ناخوهم وحدي
أيلول؛ هههه بجدك أميير غاير منو !
بستها من رقبتها نحكي
أمير؛ شنعمل كان منجمش نصبر عليك أنا أه ؟
أيلول؛ أويس ريت فما عباد غايرة هوني هههه
تقعدت شوي وليت مقابلها .. غزرتلي ندرا كيف .. نشيخ عليها وقت تبدا داخلة بعضها هكا
أمير؛ البوسة متاعي
أيلول؛ أمييير يزززي .. أويس و
أمير؛ أويس يا روحي انتا نظن باش تاقف مع بوك ياخو فطورو عالصباح .. نعرف تقدرلها عاد هههه
طبس باسو .. كبس عليها بيديه الصغرونين عاللحية متاعو .. شخت من الفازة ..
لفيت يديا على أويس كانني معنقتوا ..
أيلول؛ هاكم عالصباح متفاهمين .. كان مجاش صغير يمشي في بالي اللي انتا وراه و زيد
قصيت عليها كي حطيت شفافي على شفافها .. باش تسكت .. حسيت بيها كي تفآجأت .. خاطر أويس فوقها .. حطيت يدي على يديها اللي معنقة بيهم أويس .. جبدت روحي وقت حسيت بالنفس متاعها كي تسكر.. باقي نعدي فيدي على خدها .. حلت عينيها مرهوجة .. فمها محلول شطر .. تبسمت على جنب..
أمير؛ توا ننجم نقول بونجور .. أصلا مفماش أحلى من بونجور كيف هكا .. انني نصبح على وجهك ..
عديت صباعي على شفافها و غزرتلها .. قربها يدوخني منجمش نشد روحي وقت نبدا معاها .. طبست عليها .. غمضت عينيها بالوقت .. غطست في شفافها .. و تفاعلت معايا .. بعدت كان كي تقطع علينا النفس في زوز .. باقي نتنفسوا في نفس الهوا ..
أيلول؛ أ أ أويس
أمير؛ هوكا رايض
أيلول؛ أمممييير
أمير؛ هههههه باهي
قمت هزيتوا عليها بستوا .. رميت عيني ليها لقيتها داخلة بعضها شخت عليها.. وقفت حطيتوا فالپوسات متاعو و ديتوا معايا للكوجينة ..
أيلول تحكي :
دوب خذيت نفس .. لتوا نحس فنفسوا كي يضرب فيا .. تقعدت في بلاصتي غزرتلوا كي خرج.. عديت يديا على وجهي اما وقفت في شفافي .. تبسمت و قمت ناخو دوش .. مدام هو مكانش .. دخلت تفرهدت .. بدلت دبشي .. جيست روب فلوري للركبة .. شعري سيبتوا اكاكا يشيح وحدوا .. اصلا الجو دافي هوني .. حطيت ڨلوس في شفافي و خرجت ..دوب ما حليت الباب خبطت فيه .. شاف فيا ملفوق للتحت .. و غزرلي ندرا كيف .. بلعت ريقي بالوقت و كبست روحي ..
أيلول؛ وجدت الفطور ؟
أمير؛ اممم
أيلول؛ باهي نمشي نفطر توا .. جيت نتعدا حط يدو عالكادر متاع الباب .. غزرتلوا متاع شفما !.
أمير؛ ناوية تهبلني عالصباح انتي ؟
أيلول؛ علاش ياخي ؟؟
أمير؛ اممم مفيبالكش معناها
أيلول؛ لا
غزرلي جا باش يقرب.. طبست و هربتلوا نضحك..
أمير؛ ههههه يطلع منك راو .. ناخو دوش و نجي نتفاهموت عزيزتي
أيلول؛ ههههههه برا على روحك أميير
دخلت للكوجينة طبست بستوا .. باقي يلعب بأكا البوبيات اللي معلقين فالپوسات ..هزيتوا
أيلول؛ و توا إيجا يا فرخ .. مقصرتش كي نوضتني أه هههه
باقية نبوس فيه .. ميتشبعش من أصلوا .. هزيت الحليب متاعو من الما البارد و فاقدتوا لقيتوا دافي ينجم يشربوا .. ريقلتلوا القعدة متاعو و باقي نشرب فيه و ناكل فالتوست متاع الشكلاط متاعي .. دوب ماشبع مسحتلوا .. كملت نفطر .. و مبعد قمت نبدلوا دبشوا.. دوب ما دخلت .. غزرتلوا كي لاف كان المنشفة .. و منشفة في يدو يمسح في شعرو.. عضيت شفافي من المنظر .. هز راسواغزرلنا .. زربت تلفتت .. حطيت أويس في  سريرو.. و رحت للدريسنغ نجبدلوا دبشوا .. دوب ما جبدتوا و تلفتت .. لقيتوا قدامي .. عديت عينيا على وجهوا الكل .. حط يديه الزوز قدام راسي ..
أيلول؛ أ أ أمير
أمير؛ هاك جيت وحدك توا
أيلول؛ بربي 😏 لتوا حاكمها انتا
أمير؛ بطبيعتي مننساش خصوصا وقت يبدا الشي يخصك انتي
أيلول؛ خلي نمشي نبدل لأويس دبشوا و انتا زادة البس فاش قام تخرج ه هكا
أمير؛ ههه معجبتكش مالا
أيلول؛ لا نقصد ايه .. موش عجبني .. تتتي أمير يزي عاد ..
أمير؛ ههه ريض شبيك داخلة بعضك هكا انتي
أيلول؛ تي ماك حاصرني تقولشي تحقيق ..
أمير؛ أيلووول شنييية في راسك
أيلول؛ أه انا ؟ شي
أمير؛ أيلوووول انا اللي نعرفك شن...
أيلول؛ نحب نعدي يدي على التاتو ..
أمير؛ من وكتاش تدي إذن باش تقرب لملكياتك انتي ؟
غزرتلوا في عينيه .. و نزلت نغزر للتاتو اللي على ذراعو.. هزيت يدي نعدي فيها عليه.. غزرتلوا فعينيه ..باقي يغزرلي كهو .. شعرو مبلول باقي يقطر على سدروا .. منعرش علاش تملكتني رغبة انني نبوسوا .. طلعت يدي من التاتو لورا رقبتوا و نعدي في صبعي على وجهوا .. غزرلي ندرا كيف .. طلعت على طراطش صوابعي و بستوا بوسة خفيفة .. دوب ما جبدت روحي .. عاود لف يديه على وسطي و غطس طاوعتوا في كل حركة يعملها .. جبد روحو شوي .. يرجعلي فشعري للتالي .. طبس لرقبتي طبع بوسات خفاف .. أما طيرني بيهم .. تي نحس في ساقيا معادش يهزوني .. باقية كان محضنتوا و كابسة على ظهروا .. طلع راسو تحت وذني طبع بوسة خفيفة .. و يحكي
أمير؛ شنوة عملتلي معادش ننجم أيلول .. ضيعتني راك
منجمتش حتى نرد عليه ترميت عليه عنقتوا .. لف يديه على رجليا و هزني فحملتوا .. باقي يطبع في بوسات خفاف على رقبتي .. حطني عالسرير و غطس في رقبتي لين حسيت النفس تقطع عليا .. هز راسو غزرلي .. مبعد باسني بوسة على جبهتي .. و قام جبد دبشوا فيسع و خرج بلا ما يغزرلي .. عديت يدي على وجهي نرد فالنفس  .. فقت وقت بدا أويس يبكي .. رحت هزيتوا من سريرو .. و هزيت دبشوا بدلتلوا ..
أمير يحكي :
كنت غاطس فيها.. أصلا باش نهبل عليها .. أما منحبش يكون بيننا شي كبير قبل ما نتأكد من حبها ليا .. منحبش تعمل حاجة تندم عليها مبعد .. ززادة نحب أول حاجة بيناتنا تكون مميزة .. نتفكروها احنا الزوز العمر الكل .. غمضت عينيا بالقاوي .. ريحتها لتوا في خشمي .. تبسمت وحدي .. تي كيف لحقت نعشق طفلة هكا .. كنت باش ننتقم منها ترصاتلي نطيح على راسي.. خذيت نفس طويل .. و تلفتت باش ندخل اما نوقز تيليفوني .. استغربت من الفازة خاطر بدلت النومرو .. باقي نغزر للنومرو متوقعتش جملة... هزيت
أمير؛ منال شتحب ؟
🔜🔜🔜🔜🔜🔜🔜🔜🔜🔜🔜🔜🔜🔜🔜🔜
#يسرى_أمجوج👑
#حب_و_إجرام2