(سلسلة البيوت اسرار) الجزء الثالث بعنوان زوجة مع وقف التنفيذ

الفصل الاول

اهلين عزيزاتي اتمنى ان اجد التفاعل بتعليقاتكن على احداث القصة ..حياة

#زوجة_مع_وقف_التنفيذ

الفصل الاول

نتفرج على روحي في المرايا مش مصدقة انا هذي نا كيف الكوافيرة مطلعتني حلوة رغم اني مش جميلة ولا شينة جمالي عادي عيون متوسطات لونهن قهوي ورموش عاديات يبانن بالمسكرة وكان ضحكت عيوني يسكرو خشمي وسط وفمي ممكن الحاجة الوحيدة الحلوة فيا هو وبشرتي الصافية رغم انها قمحية بس مش داكنة واجد هي اقرب للبيضاء والتسريحة تهبل دايرتها لشعري اللي رغم طوله مش ناعم وكثيف اطريت انديرله بروتين فرد ويعلم الله كيف لميت حقه و درته عروس عاد وصبغته باللون العسلي لان شعري بالاصل مش اسود لما نكون في الشمس يعكس بلون بني داكن وطلع عليا يهبل ومابيتش ندير ميش والڤيلو بسيط لكن انيق ومع هذا كله ماقدرتش نرسم حتى ابتسامة بالكذب على وجهي كيف بنرسمها ونا اليوم دخلتي على راجل ماشفتاش حتى صورة استغربتو صح ونزيدكم من الشعر بيت انه هو اللي مايبيش يشوفني ومعاها اخته جتني في الكوافيرة وقالت ليا هو مايحبش التصوير وماهوش خاش للقاعة فقلت بالك ملتزم وطمنت بالي قلت راجل ملتزم ويخاف ربي ان شاءالله يخاف ربي فيا مع اني ماضني طالما جاي من طرف خوي
مرح .. طالعة ماشاءالله عليك حلوة من الاخير
انا ..عيونك الحلوات حبيبتي
مرح بدمعة في عيونها .. كيف بنقعد في الحوش هذا بلاك
انا وجيت حضنتها .. انتي عارفة ان شرطي للموافقة هو انتي تكملي قرايتك والمعفن مايمدش ايده عليك
مرح .. ربي مايحرمني منك يا خيتي والله تضحياتك بسببي كبيرة صعب نوفيها
انا .. انك تنجحي وتجيبي مجموع كبير يدخلك للجامعة اللي تبيها هذا احسن رد ترديه ليا على الاقل نحس روحي اني ماضحيتش على الفاضي
مرح .. ان شاءالله مايريح تعبك معاي باذن الله ناجحة
انا .. يارب
مرح .. هيا الخرا يرن
انا وقلبي بدا يدق .. هيا لبسيني الكاب

ولبستني مرح كابي وساعدتني ركبت وركبت لقدام مع خونا عزيز امه هكي مسمينه نا واختي

انا فرحة علي بس بالاسم فرحة للاسف لكن بالفعل من عمري15 سنة ماشفته الفرح من لما باتي مات ونا والفرح في خطين متوازيين مستحيل نتلاقو مع ان عمري مافقدت الامل في ربي
باتي متزوج امي الثانية لان مرت باتي نادرة بعد ماجابت خونا عماد صارلها نزيف قوي وبسببها حولولها الرحم فباتي بعد صبر عشر سنوات وزن من امه تزوج امي جابتني امي نا الاولى وعلى راسي طول مرح لكن لما تما عمري عشر سنوات ماتت امي ومع انها بدت معانتنا مع مرت باتي الا انا باتي كان يصد فيها معظم الوقت وبعد وفاة امي بخمس سنوات لحقها باتي بسبب جلطة لما اكتشف ولده الدلوع عزيز امه زي مامسمينه نا ومرح يتعاطى في المخدارت وهنا كانت كسرتي الثانية بس الاقوى لان خونا الفالح وبحكم هو الوصي علينا اصرف في قطعة الارض اللي معقبها باتي لينا ومباش يصرف فيها مهما استحق لان باتي كان يقول نلقوها وقت عازة كبيرة لكن خونا الفالح باعها وزعميته فتح بي حقها محل مواد غذائية مع ان حقها يفتح سوبر ماركت او مول صغير لكن الباقي صرفه على كيفه والكسرة الاقوى بيعنا حوشنا الكبير اللي كانت فيه دار لكل وحدة فينا وعلى دورين وواسع وسكنا في شقة صغيرة امه في دار ونا واختي في دار وهو يرقد في المربوعة وطبعا داري نا واختي هيا ناكلو ونشربو فيها لان الصالة دايرتها نادرة لاستقبال الضيوف ومع هذا كله ماعلينا يقتلني بالصدمة الاقوى الاقوى اللي فعلا كسرت ظهري صح القراية

بعد ماكملت ثالثة اعدادي قالي اختاري انتي والله اختك تكمل ولما قلت اختي تكمل قالي خلاص امنا دوري على شغل بيش تصرفي منه على قراية اختك وكان فتحت فمي وناقشت على الفلوس مصيري طريحة نين نمشي للمستشفى من وراها وتو معاش يضرب فيا لان عرف نقطة ضعفي يضرب في مرح بيش معاش نتكلم على اي شئ وفعلا حتى زيجتي هذي وافقت وبشرط انه مايمدش ايده على مرح وتكمل قرايتها
دورت شغل واجد نين تعبت وماحصلت من بيشغل بنت صغيرة وعندها شهادة اعدادية بس وبعدها سيبت شهادتي وقعدت ندور في شغل ان شاءالله نكنس ونمسح خدامة يعني وفعلا حصلت ليا جارتنا شغل في شركة ادوية ومعدات طبية اشتغلت فيها في البداية نمسح ونلمع في الارفف ونرتب في المعدات والادوية وبعدها قعدت نساعد في البنية اللي تشتغل لما تقعد ادير في الجرد فانتبه ليا صاحب الشركة وكلم البنت انها تعلمني كيف نشتغل على المنظومة لانه حس اني فطنية ونلقطها عالطاير وبعدها زاد راتبي وتميت نشتغل في البداية مع البنت وبعدها اتقنت الشغل تميت ناخذ في فترة بروحي وطبعا عشان عماد مايستفردش باختي ويضربها بسبب او بدون سبب خذيت فترة الصبح وبعد قريب ثلاثة سنين ثبتت روحي في الشغل والبنت تزوجت وسيبت العمل لكن في وحدة اخرى معانا تمسك معاي فترة الصبح وارتحت معاها واجد لانها طيوبة عكس البنت اللي تزوجت وراتبي زاد للاحسن لدرجة تميت نصرف منه حتى على الحوش لكن يافرحة ماكملت اهو زوجني واطريت نسيب الشغل شفتو لما قلت ليكم الفرح في طريق ونا في طريق ثاني
وصلت للقاعة وكانت حلوة واصلا كيف لحقو حصلو فيها حجز في وقت اسبوعين بس نين استغربت نا ومرح لان القاعة هذي تبي قبلها بشهور بيش تحصل فيها على العموم عدى الفرح حلو وبعد وقت طلعوني وببكاء ودعت وخيتي ونا نستودع فيها عند ربي وجاء اللي اسمه راجلي ركبني للسيارة بدون لاسلام ولاكلام حتى مساعدة ما ساعدنيش في الركبة ساعدتني اخته حنان واختي بس وبدون اي كلام مشينا شور المفروض شقتنا وبرضو الدروج واجد ومافكرش يساعدني لان نسكنو في الدور الثالث في ڤيلا اهله وركبت بصعوبة الدروج واول ماخشيت للشقة ورفعت راسي وشفت .......
#حياة
تعديل اخطاء املائية وحوارية #الصابرة
والشكر لمصممتنا الحلوة #رورو على الغلاف الجميل