#زوجة_مع_وقف_التنفيذ
الفصل العاشر
فعلا بعد عشرة ايام رجعت لحوش اهلي والحاجة الكويسة مفتكة من تلقيح نادرة وعراك عماد ممكن هذي الحاجة اللي نشكر عليها عثمان طول عمري
مرح.. غير كان تقوليلي ليش رفضتي تكملي زواجك بعثمان طالما هو اللي يبي وعثمان راجل تتمناه كل بنت
انا.. ماقلت شئ عليه ولا عندي اعتراض على حاجة فيه لكن عثمان متزوج ونا مانبيش وحدة تشاركني راجلي لابال اخرى انا اللي نعتبر مشاركتها مش العكس وقدام نفسي كأني خذيت منها راجلها صعب غير ايمان مش ساهلة هالمرة دفتني من الدروج وكسرتني مرة اخرى مانضمنش شنو اديرلي
مرح .. ماهو عمتك وعثمان مش حيخلوها
انا.. ايمان قديش ليها كانت تحاول تركبلي وعمتي مصبية ليها واهو عمتي طلعت ولقت فرصة وجتني مهما حموني منها مستحيل يقدرو يمنعوها عليا طول العمر غير لسانها اللاذع يعني لو كملت زواجي مع عثمان ورزقني ربي بي عيال يعني مش حتسمعهم كلام يهين امهم والله تقول ليهم حقيقة زواجي بباتهم ليش نجيب في مشاكل لروحي مش حينتيهن
مرح بتنهيدة .. عندك حق مع ان تفكيرك لبعيد واجد لكن صح بالذات طريقة زواجك بي عثمان
وعدن ايام وسكرت شهرين وعثمان يتصل ويجيني واليوم هو رافعني عندي مراجعة واحتمال كبير انهم يفكولي الجبس ونحن في السيارة
انا.. الجية هذي حسيتك اكثر راحة وكأن الروح بدت ترد ليك حتى وجهك منور
عثمان .. ايمان
انا.. كنها
عثمان .. تصدقي من لما رديتي لحوش هلك وهيا بدت ترجع ايمان اللي حبيتها وبالذات لما جت مرح اول امس ولمت دبشك وكأنها تأكدت انك خلاص معاش بتردي وتفكرت كلامك لما قلتي انك السبب
انا بفرحة .. الحمدلله يارب والله فرحتلك
عثمان .. جد فرحانة ليا يا فرحة
انا.. عندك شك اني ما نفرحش ليك يا عثمان تي انا فرحانة ليك واجد اخرى وان كان تعلقك بيا وهم بس بسبب تصرفات ايمان معاك ولما اطلقني رسمي حترد حبيبتك زي ما كانت واحسن صدقني وبعدين ليش مانفرحش لصديقي
عثمان .. شكرا فرحة طلعتي فاهمتيني اكثر من نفسي
انا.. العفو
ووصلنا المصحة وبالفعل الدكتور قال ان الكسر جبر كويس وكيف مايجبرش ونا عثمان ماشي جاي كل مرة جايب حاجة من دحي عربي وسحلب وحليب بقر طازج واي حاجة يسمع بيها كويسة للكسر يجيب فيها غير غذاء وعشاي اللي تما كويس والاهم اني مرتاحة من النكد وروح بيا وفعلا كأنه اللقاء الاخير بيني وبين عثمان
انا.. قولها يا عثمان نرتاح نا وانت
عثمان .. ممكن نضمك قبل ماننفصلو نهائي
انا وضميته ليا وحسيت بضمته قوية وشادة دمعتي بالغصب
عثمان ومازال حاضني .. قبل مانقولها توعديني انك اذا استحقيتي لاي حاجة والله عماد نكد عليك انتي والله مرح انك تجيني توعديني
انا ومازالت في حضنه .. نوعدك
عثمان باعدني عن حضنه والتفت عطاني بظهره .. انتي طالق يافرحة
أنت تقرأ
(سلسلة البيوت اسرار) الجزء الثالث بعنوان زوجة مع وقف التنفيذ
Cerita Pendekسلسلة متصلة منفصلة يعني مش لازم تكون قريت الاجزاء السابقة عشان تفهم الجزء هذا التنزيل يومي باذن الله
