#زوجة_مع_وقف_التنفيذ
الفصل السادس عشر
ريم بجدية وغرور واضح .. اسمعي بنقولك حاجة لازم تفهميها كويس نا مش عاجبني اختيار خوي ليك ورغم ان الف بنت غيرك واحسن منك تتمناه لكن هذا هو ومعاش ينفع الكلام
انا ووجعني كلامها لكن مابينتش ليها حاجة وببرود .. والمطلوب شنو
ريم .. تحطي قصي في عيونك وردي بالك تفكري تاخذي حاجة هو مايبيش يعطيها لك واذا يوم زعل قصي منك انا اللي حنصبي لك لان قصي هذا باتنا
انا وبنفس البرود رغم النار اللي جوايي من كلامها .. في حاجة اخرى والله خلاص
ريم باستغراب من ردت فعلي .. لا خلاص
انا.. هيا نخشو قبل مايبدو يستغربو تأخيرنا
وفعلا خشينا وكملت القعدة ونسيت كلام ريم لاني حسيته تافه واصلا هيا مش عارفة شنو تحكي المهم بتبين ليا زعميتها مسيطرة والكلمة كلمتها ونست اني نعرف قصي من سنين الله وانه واعر مع خوته ومايقدر حد يرد وراه وبعد وقت روحو هل مروان واتفقت نادرة مع عمتي ماسة ان الفرح يكون بعد شهر من اليوم
لان فرح خوته بيكونو قبلنا باسبوع وطبعا حتى مرح روحت مع عمتي ماسة لانهن في حوش واحد مع بعض واتفقت نا وياها انها تجيني بكرة بيش ناخذ راحتي ونحكي معاها براحة وثاني يوم
بعد السلام والاحضان
مرح بحب .. اهو جيتك من الصبح نين تزهقي مني
انا.. اهناك حد يزهق من غلاه يا هبلة
مرح .. ها طمنيني حبيبة وكيف وافقتي على قصي
انا.. شوفي حظ اختك طلع قصي يحبني
مرح .. احلفي
انا .. والله
مرح ..كيف عرفتي
انا.. هو اللي قالها ليا تعرفي لما قالها ليا ماصدقتش وتبي الحق لتو مازالت ماني مصدقة
مرح.. ربي يهنيك ويعطيك على قيس نيتك انتي انظلمتي اول مرة وان شاءالله ربي ينصفك ثاني مرة
انا.. امين يارب من فمك لباب السماء تو خليني فيك كيف حالك انتي وامورك مع مروان
مرح .. تعرفي عمري مافرحت في حياتي كيف ما تو شاعرة بسعادة مش عادية واهتمام مروان بيا وتخيلي واجد حاجات يبقى خاطري فيهن لكن مانقولاش عليهن بيش مايفهمش اني طماعة زي مرته الاولى اللي كان همها الفلوس وبس لكن بمجرد مايشوف انها عجبتني وسكتت ماطلبتش منه يغيب عليا شوي نلقاه جايبها ليا حتى هدايك وهدايا نادرة وعماد هو اللي اختارهن
انا.. سلمه جياب غير ان شاءالله جبتي لامه
مرح.. نا قلت ليه لما لقيته مهتم بيكم فقلت ليه نجيبو لعمتي ماسة وريم وقصي وحسام وقاسم
انا.. ايوه خليك وخيتي ذكية وحببي راجلك فيك زي مايهتم باهلك اهتمي حتى انتي باهله وبعدين ديمة خلي المعاملة بينك وبينهم احترام ومودة تكسبي الكل وما تفتحيهاش دلالة ع الشارع تقول هلك راه مافيش حد يجي مكان حد مهما اديري تقعدي كنة ومهما يديرو يقعدو عربك
مرح.. صدقتي مع اني نتعامل مع ريم بس باحترام عشان ماحبيتهاش الحق تحسيها هك مغرورة ماتفهمي شئ لكن عمتي ماسة نجك لي فرحانة وجاحدة ان ولدها قرر يبدا حياته من جديد وكيف مروان فرحان وسعيد
انا.. ربي يدوم عليك يا وخيتي
مرح .. به خلينا فيك تو شنو تبي اديري
انا.. شئ
مرح .. كيف شئ
انا.. قصي قالي ماتجبيش بتات والايام اللي كنتي فيهن مسافرة طلعت معاه شفت الڤيلا واخترت فرش لها من كتالوجات هو جابهن ليا حتى العوايز والاجهزة الكهربائية كله اخترته
مرح .. به والله ارتحتي من الدوران
انا.. مع ان عندي فلوس واجد اخرى لكن مباش يخليني
مرح باستغراب .. فلوس وواجد اخرى منين وانتي اللي حيلتك كلهن صرفتيهن على فرحي وبتاتي
انا بضحكة .. استعدي للصدمة وقبل مانقول مرح بالك حامل
مرح .. والله ماني عارفة لان موعدها مازال وانتي عارفة اول ايام فرحي عليا كانت فاذا تو في او لا مش عارفة بس شنو دخل حملي بردك على سؤالي
انا .. ماهو اللي بنحكيه ليك خايفة يصدمك ومن الصدمة تجهضي لقدر الله
مرح .. حسك خوفتيني
انا.. بالعكس اللي بنقوله رغم انه يصدمك لكن حاجة تفرح
مرح.. هيا بسرعة انطقي وصلت آخري راه
انا.. عماد
مرح بنفترة .. كنه عزيز امه
انا .. تصدقي كان نقولك شنو دار
مرح .. اكيد مصيبة جديدة
انا بهزة راس .. لا تغير للاحسن تصدقي من السوبر ماركت اللي فتحه بمدفوعي قعد ياخذ من الارباح وفتحلي حساب في المصرف حطلي فيه مدفوعي كله
مرح بصدمة وفم مفتوح .. اه
انا .. ونزيدك من الشعر بيت يحطلي في نسبة من الارباح في حسابي
مرح تحك في وذانها .. شنو شنو قلتي ماسمعتش زين
أنت تقرأ
(سلسلة البيوت اسرار) الجزء الثالث بعنوان زوجة مع وقف التنفيذ
Historia Cortaسلسلة متصلة منفصلة يعني مش لازم تكون قريت الاجزاء السابقة عشان تفهم الجزء هذا التنزيل يومي باذن الله
