اهلين عزيزاتي
بصراحة نا زعلانة منكن واجد انا لما نزلت الفصول اللي فاتت مرة وحدة وذكرت السبب ليش نتفاجا في التعليقات اللي تقولي كملي وحلقة اخرى يعني انتن ماتقروش في شنو كاتبة او شنو بصراحة استغرابي كبير وزعلي اكبر وياريت هالمرة تقرن كلامي كويس انا اول مرة في حياتي نفتح نت بالشفرة على خاطر انزل ليكن الفصول الجديدة لان شكل غيبتي مازالت مطولة فياريت مانلقاش تعليق كملي وحلقة اخرى يعني انا بنزل اكثر من فصل (المقصود متابعاتي على الفيس)
#زوجة_مع_وقف_التنفيذ
الفصل السابع
عثمان .. منين الوكال هذا
انا بتوتر .. انـ انـ طيبـ طيبته
عثمان .. به حطيلنا جعان بكل
انا بصدمة انه خذا الموضوع عادي .. شنو
عثمان .. كنك فرحة حطي الغذاء والله دايرتيه ليك انتي بس
انا .. هيا هي توا نحط تو
وقعدت نجهز في الطاولة ونحط في السلاطات وانتبهت انه ماجابش غذاء معاه وبعد ماكملت الحط كلمته وجاء قمعز
عثمان .. اممم من ريحته شكله فايح
انا باحراج .. ان شاءالله تطلع الطعمة زي الريحة
عثمان .. ناكلو ونعرفو
انا .. سمي بسم الله
وبدينا ناكلو وعثمان مانطق بشئ وحاولت نركز على وجه بيش نعرف ردت فعله لقيت وجه عادي ياكل وخلاص وحسيت باحباط
عثمان بعد كمل وكال .. سلم دياتك فعلا ريحة وطعمة
انا بفرحة .. عجبك صح والله
عثمان .. نفسك والله حلو في الوكال كان خطر عليا تسوايك حلو هكي ماكنت جبت وكال من مطعم بكل
انا وانتبهت لحاجة .. بس انت اليوم ماجبتش شنو متغذي برا
عثمان بضحكة .. تي مفترس نص دجاجة وتبسي هكي كبره رز ومعاها برودا وماخليت شئ من سلاطتي وتقوليلي متغذي برا حرام عليك تي انا كليت وكلت فجعان مش جعان بس
انابضحكة .. صحة وعافية على قلبك
عثمان .. الله يسلمك يارب بس نا اتصل بيا السواق وقالي انك نزلتي على سوبر ماركت وانه دفع عليك وسئلته شنو جبتي ولما قالي عرفت انك بطيبي وهذا ليش ماجبتش
انا وقبل بنقوله ليش متأكد اني بنطيب لكن بعدين غيرت رايي
انا.. مابين ماضميت الحوسة وغسلت العوايز نحط شاهي عالنار ونجيب الحلو تكون انت هضمت شوي
عثمان .. بما ان فيها حلو فخليها قهوة احسن
انا .. حاضر
عثمان .. فرحة
انا.. نعم
عثمان .. فرحة ليش ماتغسليش العوايز في الغسالة وحتى دبشك لاحظت انك تغسلي فيه على ايديك ليش ورغم اني ديمة نجيب في موز وحليب على خاطر انك اديري فروبيه لاني عرفت انك تحبيه واجد بس عمري ماشفتك درتيه
انا .. بالنسبة لغسالة العوايز مانعرفش نستخدمها هي وغسالة الدبش
عثمان .. قلتي علمتك كيف تشغليهن (وكانه حس مش هذا السبب بس ) به والخلاط حتى هو ماتعرفيش تشتغلي بيه
انا .. لا بس بصراحة مش حاسة انهن لي عشان نستخدمهن براحة
عثمان .. ماتقوليش هكي طالما انك هنا كل حاجة فيها ليك وحتى لو انفصلنا وتبي ترفعي اللي فيها كله هذا حقك
انا .. لا عمري مافكرت هكي وممكن تخليني براحتي
عثمان بقلة حيلة لانه عرف اقناعي صعب .. براحتك
أنت تقرأ
(سلسلة البيوت اسرار) الجزء الثالث بعنوان زوجة مع وقف التنفيذ
Contoسلسلة متصلة منفصلة يعني مش لازم تكون قريت الاجزاء السابقة عشان تفهم الجزء هذا التنزيل يومي باذن الله
