(سلسلة البيوت اسرار) الجزء الثالث بعنوان زوجة مع وقف التنفيذ

حقيقة

حقيقة
نبي نوضح حاجة واجد يبعتولي على الخاص ويقولولي ياريت تكتبي قصص واقعية فحابة انوضح حاجة ان قصة فرحة لعند ماطلقها عثمان هيا قصة ماخوذة من قصة حقيقة بس عارفين الحقيقة كيف
انه تزوج وتمتع بيها زي اي زوج وزوجة لمدة ثلاثة شهور وهيا كانت من مواليد 97 والقصة هذي من خمس او ست سنوات تقريبا تخيلو عمرها وقتها كم كان وبعد ثلاثة شهور جابها لهلها زيارة وخلاها على اساس اسبوع ويجي يروح بيها لانه كان في مدينة ثانية وبعد اسبوع تتصل بيه تلقى في فونه مقفل انشغلت عليه ولم ترن على اهله ما يردوش عليها وبعدها باسبوع ثاني جاها وجايب معاه دبشها وذهبها وكل حاجة في الحوش حتى من صباط الحمام جابه لها وقال لهلها خف العيش والملح بينا وعلى قد ماحاولو مافهمو شئ وطلقها وعطاها موخرها بدون اي مشاكل وكل ماحد يدخل مايصير منه شئ ويوم رمى عليها اليمين اتصلت بيه وحلفاته باغلى حاجة عنده يقوللها السبب تخيلو السبب
ان كان يحب وحدة وانجبرت تتزوج ولد عمها ولما عرف ان في مشاكل بينها وبين راجلها جاء سئل امه لو يبي يتزوج وحدة مطلقة عادي توافق فردت الام وقالت له ليش ان شاءالله انت شاب ووتزوج مطلقة مستحيل يصير الكلام هذا وبالنصيب البنت اللي تزوجها غلطت في رقمه وفي ظرف شهر كان متقدم ليها ويوم عرسهم كان يوم طلاق حبيبته من ولد عمها وبعد ثلاثة شهور اللي هنا كانن عدة حبيبته فطلق اللي تزوجها وهكي يبقى زيه زي حبيبته تزوج وطلق سكرت البنت مقهورة تدعي وتتحسب عليه لليوم هو تزوج حبيبته وعايش اموره تمام وهيا بعمرها اللي ممكن اثنين وعشرين مايدقش بابها غير الارمل اللي عنده عرم عيال او المطلق
وهذه حكاية قريبتي ان شاءالله ربي يفرج عليها
تبوني نكتب ليكم قصص واقعية هكي سامحوني معناها طلبكن مش عندي لاني قبل مانكون كاتبة كنت قارئة وكنت مهما كانت الرواية حزينة المهم عندي تكون النهاية سعيدة على الاقل يكبر الامل جوايي ونقول اكيد المستحيل باذن الله يتحقق
معليش حكيت واجد بس حتى انبين سبب كتباتي رغم ان اساس القصة واقعي الا اني نضيف عليها من خيالي واجد عشان لعل وعسى تصبح يوما حقيقة ..#حياة