(سلسلة البيوت اسرار) الجزء الثالث بعنوان زوجة مع وقف التنفيذ

الفصل الثامن

#زوجة_مع_وقف_التنفيذ

الفصل الثامن

عثمان .. انا بنسافر طيارتي بعد ساعتين بنطلع من هنا للمطار طول فديري بالك على روحك وممكن سفرتي اطول فخليت ليك فلوس ودرت ليك نت عشان نتواصل معاك على طول وتو تلقي ورقة احذاه فيها الباسورد بتاع الواي فاي واذا بتمشي للشغل او بتطلعي اي مشوار كلمي السواق وعيشي حياتك فرحة وزي ماقلت ليك ديري بالك على روحك
انا ودمعة غصبن عني نزلت لاني حسيت كأنه الفراق فعلا .. حتى انت دير بالك على روحك ومرتك وحبيبتك

وبدون مانفطن لقيت عثمان حاضني ودموعي معاش وقفن كأنهن يقولن راك تمسكينا وقديش كان حضنه حلو وبعد عليا ومسح دموعي

عثمان .. معاش نبي دموع فاهمة
انا بهزة راس بمعنى به
عثمان .. هيا سلام وديري بالك على روحك
انا.. ان شاءالله

وطلعت ايمان واستغربت تطويلتها جوا الدار لكن لما طلعت فهمت كانت حولت الڤيلو لفستان ابسط ومستور وخففت حتى من المكياج وسلمت عليا ببرود استغربته وطلعت

وبعدها روحت مع عمتي وقالت ليا اني ننزل نبات معاهن لكن قلت ليها خليني هكي اريح واحترمت رايي واول ماخشيت قابلتني ريحة عطره قالبة الشقة لانه لبس فيها هو واصحابه  ولقيت روحي نبكي بحرقة وندم اني تعرفت عليه وحاولت بيش نرقد ماقدرت  حتى لو مش راقد معاي في نفس الدار لكن مشاركتنا لنفس المكان كانت مونستني وبعدها خذيت الباسورد وفتحت النت ولقيت رسالة على الفايبر من عثمان واستغربتها قلت كيف بعث رسالة وهو المفروض بين احضان مرته
وقريتها

عثمان كاتب (وصلت فرحة انا بخير طمنيني عليك وين رقدتي )
انا رديت ( حمدلله على سلامتك وراقدة في الشقة مش مستحقة نرقد عند حد الڤيلا ونس )

وسكرت على اساس انه راقد رغم انه عطاني متصل لكن قلت اكيد مش قاعد على النت لكن سمعت اشعار واستغربت الحق لما لقيته هو

دردشة على الفايبر
عثمان  (اذا الامور تمام وونس ليش مش راقدة لتو )
انا  ( مش عارفة ممكن فاقداتك )
عثمان كاتب (ماتفقدي غالي تصدقي حتى نا صايرلي زيك )
انا ( وين ايمان )
عثمان ( راقدة تعابة )
انا ومابيتش نقصقص واجد رغم فضولي قاتلني ( لاباس عليها حتى انت ارتاح ليك ايام وانت تاعب )
عثمان ( تو نحاول نرقد وحتى انتي تصبحي على خير )
انا( وانت من اهله ان شاءالله )

وسكرت واستغربت معقولة حاسس زيي بس هو معاه حبيبته اللي تعتبر اول حب في حياته وحتى لو كانت تعبانة معقولة تسيب حبيبها وترقد

ومشت الايام الاولى عليا صعبة وكل يوم عثمان يحكي معاي فايبر واليوم قررت اني نمشي للشركة نشتغل ونلهي روحي احسن وفعلا هكي درت ومالقيتش الدكتور قالولي في مصر وبديت نشتغل ويوم كنت في الشركة وجتني مرح وقعدت مكسدة عندي وخش علينا الدكتور مروان ولد عم الدكتور قصي