#زوجة_مع_وقف_التنفيذ
الفصل التاسع
انا.. مافيش حمدلله على السلامة قبل
عوض اب عثمان .. حمدلله على السلامة اكيد يا بنتي لكن نبو نعرفو من دار فيك هكي
مودة .. هيا ماكان معاها حد الا ايمان
عثمان .. احكي فرحة من اللي دفك
انا .. ايمان
عثمان .. شنو اللي صار بينكم
انا .. قبل مانقول اي شئ مانبي منكم حد يكلم ايمان وحقي ربي ياخذه لكن هي ليها عذرها
عثمان بعصبية .. عذر شنو اللي يخليها ادفك لو كان لقدر الله قتلاتك هضاك الوقت شنو العذر اللي بنلقوه ليها
امال .. اهدى يا عثمان وبعدين فرحة تاعبة مش في باب نقاش
انا بوجع .. اه يا عمتي والله نتوجع ممكن نروح مانحبش المستشفيات بكل نا
عثمان .. هي صبي نساعدك
انا باحراج .. ممكن تساعدني عميمة وحنان
عثمان .. نا راجلك
ومد المفتاح لحنان وقاللها اسبقيني على السيارة افتحيها ورفع الغطاء اللي عليا ومانندري عليه الا وهو طابني حسيت بالاحراج لكن فعلا جسمي مدقدق كله تقول ماشية عليه رولا
واول ماخشينا للڤيلا قبل ماينزلو من السيارة
انا بصوت بان فيه الوجع .. عثمان عمتي وحنان تو توعدوني ماحد فيكم يقول كلمة لايمان
عثمان بعصبية .. ليش ان شاءالله
انا.. عثمان نا والله تاعبة نتكلم بالغصب كان ماتوعدونيش تو ماني نازالة من السيارة وارفعوني لحوشنا تعانيني اختي
امال .. بس يابنتي هضا حقك كيف تبينا نسكتو عليه هو لولا رحمة ربي لكان الضر اكبر
حنان .. وبعدين من قال ماتعاودهاش
انا.. حقي خذيته يكفي لمتكم احذاي تو وكيف ادافعو عليا هذا حقي وصلني وزيادة وايمان ليها اعذارها
عثمان .. غير اعذار شنو
انا .. انا تاعبة يا عثمان وجسمي مش متحمل قمعيز السيارة وبعدين نحكو
عثمان وفهم عليا اني نبي نحكي معاه برواحنا .. به وعد يا فرحة
انا.. عمتي وحنان شنو
امال .. امري لله وعد
حنان .. يعني شنو بنقول وعد
ونزلني عثمان من السيارة وهو طابني بالذات اني مقمعزة في الكرسي القدامي وهو مفرود زي السرير ولما قريب يخش بيا الڤيلا قابلتني ايمان ولاشعوريا لقيت روحي ندفن في وجهي على صدر عثمان مانبيش نشوف وجهها او ممكن شعور خوف اللي دفتني مرة تقدر ادير اكثر من هكي
عثمان بهمس وكأنه حس بيا .. ماتخافيش معاش في حد يقدر ايدرلك حاجة
حنان .. حطها في داري يا عثمان على الاقل اندير بالي منها
وانا ما تكلمتش لان نحس في روحي محرجة من شيلته ليا ومن حطت وجهي في رقبته لما شفت ايمان
حطني عثمان على سرير حنان وغطاني
عثمان .. ارتاحي مابيت عصام جاب الدواء
انا.. نحس في جسمي كله مدقدق
عثمان .. لاباس عليك يارب الله غالب حتى حقك ماخليتينا ناخذوه
انا.. بتاخذه من مَن يا عثمان من مرتك ام ولدك او بنتك اللي جاي من حب عمرك من حب درت المستحيل بيش تاخذه من حب خلاك تبيع وتشري في الناس على خاطره
عثمان .. آسف وطول عمري ونا نتأسف شوي (وحب يغير الجو ) شنو دايرة غذاء
انا بشهقة .. حي نسيته والله ماني عارفة ولعت الغاز عليه او لا قبل مايدق الباب
عثمان بضحكة .. ماتخافيش الشغالة اتصلت بيها حنان اول ما رفعاتك للمصحة وطفت الغاز بس ماقلتيش شنو دايرة
انا.. دايرة مصلي ومعاه برودو وسلاطة جردينة وسلاطة خضرا
عثمان .. كلهن عرفتهن لكن المصلي شنو هذا
انا..بورديم وطني على الطريقة التونسية
عثمان .. يمي معناها نصبي نجيب الغذاء ونجي
انا.. لا كلملي حنان عشان المصلي يبي تسخين وانت مش حتعرف
عثمان .. عندك حق
أنت تقرأ
(سلسلة البيوت اسرار) الجزء الثالث بعنوان زوجة مع وقف التنفيذ
Contoسلسلة متصلة منفصلة يعني مش لازم تكون قريت الاجزاء السابقة عشان تفهم الجزء هذا التنزيل يومي باذن الله
