جنة ،،،،سلام

الحلقة -2-

جنة ،،،،سلام
بقلم/فراقد حسن علي
،،،،،،،،،،،،،،،،،،،،
البارت -2-

-كطعت صفنتي صوت نغمة الرسايل دحكت بشاشه التلفون هاي رساله من ساره ((هلو حبيبي ،شو ماكو ،لا تمر لاتجي))

-نهضت جبت السماعات وشكلتهن بالجهاز وصعدت فوك بالطابق الثاني

بيتي طابقين مساحتوا (١٥٠)،البيت الجوه بي ربعه،وهول،وغرفه جبيره بيها غرفة الاخشاب جددتها بعرسي من رحاب ،،

-هم كالولي بالخير على العرس، يوم ألاكشر على رحاب والعرفني برحاب

وبي مطبخ جبير ،وحولي متوسط البيت يصعد منوا الدرج للطابق الثاني ،تحتوا الحمام ،وبي طرمة زينه جبيره مسويها كراج للسياره ،

وحديقه بطرفها كلش صغيره مترين بمترين ،أونس روحي بيها من يصيرلي وگت

الطابق الثاني بي غرفتين كبار ،والباقي كلوا سطح على گبر مساحه البيت الجوه

وحده من الغرف مسويها مخزن للغراض الزايده ،والغرفه الثانيه بيها قريوله أم النفر وكنتور أبو بابين داخلوا ملابس مسفطه شتويه او صيفيه حسب الموسم ،وبوفيه للفراش

هاي ألغرفه تفيد في حالات الزعل ،اذا تكاونه أني ورحاب ،ياهي تنام هين بيها ،،يا أني أنام هين ،واحد من عندنا يفلت بيها

أنجضعت على القريوله واتصلت على ساره ،،وماادراك ماساره

اكثر وحده طولت ويايه ثلاث اشهر صارلها بذمتي متزوجها زواج مسيار

ماأحب الحرام كل وحده اعرفها وتعجبني أتزوجها مسيار اتونس وياها وشوكت ماأمل من عدها اطلگلها وانطيها كافه حقوقها

هدتلياها ضحاوي ،وأكيد بمقابل ،ماكو شي بدون مقابل خلصتلها سالفه رتبتها ودبرتها الها ويه جماعتي وسديتها

كبسوها الجماعه وأخذوها هي وبناتها بقضيه دعاره وفساد وتخريب شباب المجتمع ،،وياها قضيه نصب واحتيال بناتها ينصبون على الشباب ويكشروهم

هي مامعروفه على مستوى الملاهي والنوادي الليله ،لا عدها شقه بمنطقه (....)

اتردد عليها أني وجماعتي وكم واحد عرف نتونس نشرب ونطلع جماعتي كلشي عدهم عادي

اني مااوصل لمرحله الزنا أبد كلوا بالشرع ،

أذا وحده عجبتني اعقد عليها واتزوجها مسيار يلا أتونس وياها من أمل منها أطلكها وانطيها كافه حقوقها المتفقين عليها،،

عاد الله يحاسبني على الشرب وعدم الصلاة،مو عاد الزنا شطلعت هاي مو روح !!شتتحمل من عذاب وعقاب

واحد من الجماعه لاج ويه بنيه ،وماقابله تطلع معوا ،عاد سوالوا السالفه ورتب اموروا وكبس عليها بالشقه هي وبناتها