جنة ،،،،سلام

الحلقة -9-

جنة ،،،،سلام
بقلم/فراقد حسن علي
،،،،،،،،،،،،،،،،،،،،
البارت -9-

سلام/كعدت الصبح على نغمه التنبيه ،،نهضت بهدوء،،هي نايمه ومدثره حت راسها ،

تمشيت للحمام ،غسلت وبدلت ملابسي العسكريه مبقي بدلتين هنا بالشقه ،

وحده باقيه وسخه مامغسوله ،وحده جديده بالكنتور،ماعندي هنا هواي ملابس مااحتاج كم قطعه لان كلهن بالبيت

طلعت مشطت وعطرت ،ورثت جكاره ،اخذت محفظتي وسلاحي ،وطلعت قفلت باب الشقه ورايه

زتيت نسخه من المفتاح من حدر الباب ،ونسخه شكلتها بالسويج ،،

جنت دائما اخلي نسخه عندي ،ونسخه عند هذنيج البنوات ،بس جنات نسيت بليل انطيها نسخه

نزلت اخذت سيارتي ومشيت للدوام ،،نفس روتين يوميه ،،

خابرني قصي جأ وماخذ اسماء ويلادها وقافلين البيت ومنطين مفتاحوا لشيماء

صارت ساعه ب(١٢)الظهر ،،طلعت ومشيت للمستشفى اسال عن اوضاع جنات وافتهم قضيتها

وصلت للمستشفى ،وبديت أسال عن دكتوره سهاد ،،وصلت لعدها ،شفتها دكتوره محجبه وحجابها كامل

حت محنكه ،ولابسه معاصم مااعرف شيسموهن بيدها،، بدل الجفوف طالعه بس اصابع ايدها وعمرها بنهايه ال(٤٠)

سلام/السلام عليكم ،حضرتج دكتوره سهاد

الدكتوره سهاد/ وعليكم السلام ،نعم اخي اني سهاد ،منو حضرتك

سلام/اني زوج المريضه جنات الفاقده الذاكره وحضرتج كاتبتلها تقرير طبي بحالتها

الدكتوره سهاد /اي نعم تذكترها ،الف اهلا وسهلا بيك ،

بس سوال،، ليش شهرين عفتها وحدها وماأجيت وسالت عنها؟ وتابعت اوضاعها

سلام/سالفتي وياها طويله ،اكدر افتهم من حضرتج اوضاعها الصحيه

الدكتوره سهاد /نعم تكدر،
تفضل استريح هاي غرفتي حتى اشرحلك كل وضهعا،

بس بالبدايه طمني عنها

سلام/الف الحمد زينه أوضاعها

الدكتوره سهاد/ شوف اخي راح اشرحلك حالة جنات بكل وضوح

علمود تعرف شلون تتعامل وياها وتعرف طبيعه حياتها الجديده

-قبل شهرين تقريبا،، تم نقل ٤مصابين من مستشفىً(......) بجروح خطيره من جراء حادث تفجير ،،وانت تعرف عراقنا كله تفجيرات

-وكانت جنات من ضمن الجرحى،،وكانت مصابه واصابتها بليغه في الراس وفاقده للوعي ،،

-وذلك بسبب دخول شضيه في الراس سببت لها حاله تسمى بالطب (النزف خارج الجافية) النزف الذي يحدث بين الأم الجافية (الغشاء الخارجي) والجمجمة, ويحدث بسبب الصدمات,