🌼جنتي🌼( كرونيك باللهجة التونسية : مكتملة )

part 1

ربطت اخر فردة وخزرتلها تتبسّم ،رجعتلها تبسيمة ووقفت روبتها  فلوري بلون السماء تحت الركبة معاها بسكات بيضاء زادت تحفنت ساقها
_"صحة صحة ،هوكا حطيتلكم في الكرهبة شوي عصير وشوي غلة وكسكروتات وماء بالطبيعة و قليتلكم طرف حوت لعل تبدلو المطعم "
_"أنا فرحانة فرحااانة شنمشو نحوسو انا و عايدة "
_"هههه تمشيش تنسى تاخو دواك نص النهار ،وكان بحرتو ما تعوم كان على عينين اختك "
مدت يدها ومسحتلها شعرها بلين ،دخلت اختها عايدة الاخت الكبيرة والمسؤولة عليها ،تفقدتها من راسها لساقيها
_"هيا نخرجو"
لمعت عينها بالفرحة وجرات قدامها للكرهبة حلت الباب ودخلت خلطت عليها اختها حطت المفتاح وقبل ماتدورو قعدت تثبت فيها مليح ايلي خلى ضحكتها تغيب و تستغرب من ها الخزرات ايلي فيهم بارشا كلام ،لبدت في بلاصتها قعد كان النفس ،خدمت عايدة ااكرهبة و مشاو تبعتهم جيهان لين غابو باش دخلت للدار رغم ايلي ماعرفتش شبيها حاسة هكا،متقلقة وموش مرتاحة لها المشية ،اما على الاقل فرصة باش الاخت الصغيرة تبدل ااجو وتخرج .
خرجت يدها للهواء ايلي طيرلها شعرها وغمضت عينها ،مااحلاه ها الاحسان ،حلت عينها لقات بارشا شجر ،عينها ماترى كان اللون الاخضر ،لون الجنة كيما تقلها جيهان "جنة،جنة،جنة،جنة....." قعدت تعاود فيها من غير ماتمل ،الشي ايلي طلع الدم لراس عايدة
_"سكتش تو "
عقدت حواجبها ودخلت ايدها  لكن الكلمة قعدت تعاود فيها اما بصوت ضعيف "جنة جنة جنة جنة..."
_"يا هم اسكت ماناقصة كان هبالك انت وتخضريتك "
لبدت في الكرسي وسكتت ،كل مايبعدو كل ما الشجر يكثر و يدخلو في كياسات محفرة وفارغة
_"بحر ..انت قلت ماشين للبحر و هذا جبل "
"بدلت رايي معادش بحر"
بدات تضرب في الكرسي والبلار " لا لا لا نحبش الجبل "
"اسكت،انا فديت منك راو ومن عقل العصفور هذا من تصرفاتك معادش يساعدني الهبال هذا،ديما وانا واحلة فيك في دواياتك و في همك الازرق وانت  كي العزاء عندي "
عقدت حواجبها تسمع في الكلام ايلي نجمت تفعمو ايلي اختها متغششة ومعادش تحبها" حياتي جرايرك تحطمت ،عرسي كل مرة نأجلو جراير حالتك هاذي،خدمتي وانت والدار واللهوة. قداش مني انا "
وقفت الكرهبة وهبطت نفخت بقوة وبغل حلت الباب عليها وجبدتها من يدها .
رعشت بكلها ومانجمتش تخزر في عينين عايدة ايلي قاعدة تكبس على يدها " نحب نعيش حياتي مرتاحة ،امك وبوك ماتو وخلوك في رقبتي ،كي الحبل خانقني ،ليوم باش نقطع ها الحبل ونمشي ونبعد ،دخلت لكرهبتها وخدمتها ومشات كي العجاجة جرات وراء الكرهبة بكل قوتها ،دق قلبها بالخوف ،نادت لاختها و عيطت باعلى صوتها رغم ايلي غابت عليها الكرهبة ومعادش ترى فيها غير في طريق محفر و حس بايت وسخانة كبيرة ،قعدت تجري لين حست بالنفس يتقطع عليها "عايدة سامحني ،ارجع معادش نغششك ،عااااايدة امان ...عايدة انا خايفة في ها الجبل "
سلاحها الوحيد هي الدموع ،رزنت ساقها و تحرق بدنها من الشمس ،لازم تخلط على الكرهبة ،اختها مستحيل تخليها في الخلاء هذا وتمشي،تو تبرد وترجعلها ،تلفتت على اجنابها مافم حد ومافمة حتى حس ،قعدت تمشي وموش عارفة وين باش تهزها ساقها حاولت تتخبى على الشمس دخلت بين الشجر على الظل فماش مابخفف السخانة ،كل مرة تتجرح من عود والا من شوكة يابسة ،من حشيش شد في روبتها ،قعدت تطيح وتاقف ،مرة تزلق تجي على وجها ومرة على ظهرها ،تخبشت بكلها و جرى الدم من مرافقها وركبتها ،كانت شادة صحيح باش تخرج من اابلاصة ايلي هي فيها والا تشوف عبد يعاونها ،مازال كلام عايدة في بالها و عينيها المليانة شر ،تخلت عليها ورماتها في جبل ماتعرش كيفاه تخرج منو .
تحرقت روحها و بكى قلبها دم ،تخلات على اختها ورماتها في جبل ،جاء لبالها ترجعلها وتلوج عليها و تهزها لاحسن طبيب وتنحي عليها السم ايلي تعطيها فيه ،فبرا تاليفونها طول هزت
"اه حبي وينك اش عملت
ترددت شوي " هانيn
"اه اش عملت قلي ريڨلت الاومور "
"وي
" باهي اول ماتوصل كلمني باش نتقابلو "
علقت مااستناتش تحكي والا تعبرلو قظاش محنوقة وقداه كرهت روحها ،اما ساياي توا ارتاحت منها ،لا عاد فضايحها ولا عاد تستناها تهبل وتدخل للرازي ولا تستناها تموت ،توا باش تتلفت لروحها و تعرس بايلي تحب ،باش يحل كابينا ويخدم و تولي مرتو و تعمل المشروع ايلي تحبو ومخها يرتااااح .
اول ماوصلت لقاتو يستنى فيها ،طلع بجنبها وهو يثبت في وجها الشاحب " عايدة ،انت عملت اللازم ،اختك كانت كي العقبة في طريقك"
"انا ليوم بيدي رميت اختي في جبل في سخانة وهي مريضة،ليوم رميت قلبي "
**""**
"انا ليوم بيدي رميت اختي في جبل في سخانة وهي مريضة،ليوم رميت قلبي "
عدى يدو على شعرها " ياروحي قلبي هو انا،خلينا نعرسو ونعيشو خياتنا،استنينا بارشا تهبل والا تموت من ربي وبايها في الورثة نعملو مشروع العمر وانا نحل كابينتي ،ونعيشو احلى عيشة نجيبو وليدات مزيانين كيفك"
كلامو واحلامو خففو همها شوي " لازمني نبلغ عليها"
"علاه؟!
" لازم نقول مشينا للبحر وغفلت عليها ومعادش نراها ،يمشي في بالهم غرقت "
"كارك غرقتها شكون يضمن ايلي هي ماترجعش"
"رمزي!؟ تحبني نقتل اختي بيدي"
"ياحبي انا نخاف يلقاها حد ويرجعها ونرجعو للصفر"
"لا مستحيل ترجع ،بلاصة منفية وبعيدة وفي قلب الجبل ،تقعد نمشي ايام باش توصل ،و زيد في ها السخانة والعطش وبدنها ايلي هدو الدواء تدوخ وتموت ومايشلق بيها حد "
"باقي مانيش مطمان "
"رمزي يعيشك تزيدش عليا "
جبدها ليه و ضمها عندو وهو يبوس في شعرها"لاباس كل شي تعدا "
جيهان نجمتش تتخيل ولا تقبل ايلي قالتو عايدة " كيفاه ضاعت عليك ،هي وحدها ماتنجم تعمل شي"
"جيهان ،الله اعلم بيا اختي ضايعة وانت واقفة تحلل اش صار"
"هي كان تخليها وحدها في الدار تضيع فمابالك في البحر ،اميد غرقت "
"اذا غرقت يخرجها البحر،لازم نستنو خبر"
"نستنوا،انا شنخرج ونمشي للبلاصة ونبتبت ونعرف كل شي لازم نرجع بيها"
"يزي بربي انا نعرف علاه هذا الكل ،اذا صارتلها  حاجة اكيد انت شتخسر خدمتك ،هاكي علاه خايفة"
"عايدة انا ربيتها كيف بنتي وقت مات بوك وامك انا كنتلها كل شي وقت انت تخدم انا معاها ،في كل وجيعتها وفي مرضها انا معاها ،هي بنتي قبل ماتكون خدمتي "
"مادام هي كل شي في حياتك ،وخايفة عليها ،فازي يا للا ها الدار معادش تحط فيها ساقك مادام هي موش موجودة"
"كيلي اطرد فيا"
"وي بالضبط"
خزرتلها بعين مكسورة ضببت بالدموع " باهي"
بعد سنين في ها الدار تخرج مطردة تتفكر اول مرة دخلتلها،تعلقت بيها اختها كي القشة في الغريق ،بعد موت امها وبوها دخلت في حالة نفسية صعيبة ترقد وتقوم بالدواء ،ملي عمرها عشرة سنين وهي تعاني. وتعيش بيه ،لا عقل لابدنها نجم يتقبل موت والديها ،عايدة الوقت هاكي مازالت في اول العشرينات ومازالت كي عرفت رمزي وقتها مازال يقرى في كلية الطب بين ليلة ونهار لقات روحها مسؤولة على اختها الصغيرة ،الحل ايلي لقاتو هو تجيب مرا تتلهى بيها في غيابها ،حالنعا النفسية تعبت ولات تبكي في عز نومها وتكسر في كل شي
****"**""
سكر الشباك و تلفت لولدو القاعد.على الفوتاي باريحية كاملة ،قعد بجنبو وفرك يدو حسرة " من اليوم شتقعد هوني ،تصرفت مع صاحبي وقال الدار على ذمتك قد مانحب ،البلاصة منفيه وخايبة و مافيها شي اما هاي الدار مزهزة و كبيرة وايلي تطلب تلقاه ،حتى من البيسين موجود في ها السخانة تلقى  وين تعوم،اما رد بالك تخرج من الباب والا تفوت ها السواني ويراك حد وقتها ما عملنا شي"
"يعني هارب من الحبس جيت في حبس"
"حبس!؟ انت شتعرف عليه الحبس وشتعرف علي في الحبس،ماهيش سهرية من سهرياتك والا خرجة من خرجاتك ،ادعي لربي الطفل يخرج من بيت الخطر و يشهد ايلي انت حبيتش تقتلو "
"واذا مات "
"اذا مات ،....
سكت يتخيل في مصير ولدو اذا مات " اذا مات ،انا نضيع موش انت "
يعرف محبة بوه ليه ويعرف قداه مضحي على جالو ،ماخلاه ناقص شي ،فلوسو و ملكو لكل قدام ولدو ماتسوى شي ،جات لبالو هاك الليلة المنحوسة ،جاه تاليفون ولدو عامل عركة في بار مع صاحبو ،وقت خلط لقى العركة كبرت اكثر ملي يتصور ،وقف ولدو وسطهم و شطر دبوزة بلار في يدو بالدم ،وساعت عينو موش مصدق خزر للطفل المسبول وغارق في دمو ،نجمش يستوعب ،نجمش يتخيل ولا يصدق ايلي شافو ،ولدو ضرب واحد بشقف على راسو ،دخل بينهم وجبدو كركرو وبعدو والناس ملمومة تتفقد في الراجل المرمي ،خلطو عليه نيتهم يءشدوه قبل مايهرب اما هو كان خفيف فيسع ماركب ولدو وهرب بكرهبتو ،اخر فيتاس طاير بيه ،قلبو في التسعين عكس ولدو الباهت ،مازال الشقف في يدو بالدم "
صوت ولدو رجعو للواقع
"بابا واخرتها ،باش تجي الشرطة وتهزني ،باش يطلعوني"
"اي يطلعوك لكن وقتها يكون الطفل فاق ويقول عركة وهو تهجم عليك قبل ،خير ماتتعدالك قتل عن عمد"
"وانت ؟! شافوك كي هربت معايا "
"انا ندبر راسي ،اذا دخلت للحبس عادي اما انت لا ،الحبس موش متاعك ،بعد.ماتوفى ها المشكلة نحبك تسافر من هوني جملة وتبعد على الخلط متاعك ،نحبش نتشوى فيك فهمتني"
مشاعرو ايلي غلبتو ودمعتو ايلي ماشاورتش وهبطت  شوات ولدو ودمرتو ،هو ايلي عمل وبوه يخلص ،وقف
"لازم نروح تو ،انا شنبطى عليك ايامات ،شتقعد وحدك تاليفون لا و انترنات لا باش مايطيحوكش،جبتلك كل مايلزمك من ماكلتك ودبشك واذا استحقيت حاجة شوف الدار وفركس بالكي تلقى ايلي حاجتك بيه "
خزر لبوه ايلي غلبتو دموعو ،وقف وعنقو بكل قوتو "سامحني بابا،جرايري هذا الكل"
"اششششش ،توا صار ايلي صار ،المهم الحبس لا