🌼جنتي🌼( كرونيك باللهجة التونسية : مكتملة )

part 2

"اششششش ،توا صار ايلي صار ،المهم الحبس لا وانا نعمل المستحيل باش ماتوصلش لغادي "
تبعو للباب وشافو يركب كرهبتو و يشد الطريق ،تلفت الجبل ايلي داير بيه ،مانجم يرى شي كان الشجر ،السخانة تحرق و الشمس قوية موش عادية سكر الباب و ترمى مغمض عينو ،متمني يحلها يلقى كل شي تبدل ،لا عركة لا ضرب لا هروب ولا يتخبى ،فقد اعصابو وفقد معاها حريتو وممكن يفقد بوه ويترمى في الحبس و يضيع عمرو ،خذاتو عينو مع خيالاتو و مخيلاتو ،رقد كيف ما مطيش روحو ،الجو رايض لا حس لا دبك ولا حد يطير نومو ،فيقو حس تخربيش لبرا ،قام عاقد حواجبو يثبت فيلي يسمع فيه ،وقف محضر روحو،شنوة هذا ؟ حل الباب وطل ،الليل قريب يطيح و نسمة جبل باردة لفحتو ،ثبت مليح وشاف يمين ويسار اما ماشاف شي ،رجع صوت التخربيش ،الشي ايلي خلاه يهبل في راسو ،كبتا منين جاي الصوت ومشى خطيوة خطيوة ،وساعت عينو موش مصدق ايلي يشوف فيه ،خزرلها من فوق للوطة ،روبتها الزرقاء وصباطها الابيض ايلي توسخ ،الدم ايلي على ركبتها ،شعرها المشعشط مع ضو المغرب عطاه لمعة ماتوقعهاش ،شادة عصى في يدها و تخربش في الحيط
"شكونك انت ،وشنوة تعمل في الجنينة ،تي منين ...
قبل مايكمل ،طاحت مرمية لوطة ،جرالها يتقفد فيها ،يا والله وحلة تزيد تموت هي يولي واحل في زوز ارواح ،حاول يفيقها شي مازالت دايخة ،حملها ودخل بيها للدوش حطها وسيب ماء بارد اكيد ضربة شمس لانو سخانة النهار هذاكا بالذات غير عادية ،هبط الماء عليها وبلها بكلها تفقدها حية والا ميتة ،تنفس براحة وهو يرا فيها تحل في عينيها بالشوية،الماء بارد بارشا تقول مثلج ،رعشت ولمت ساقيها ليها
" لاباس ،يابنتي لاباس "
قعدت اتبع فيه بعينيها ،عقد حواجبو موش مصدق ايلي قاعد.يصير ،رمالها منشفة " نشف روحك "
خرج و من غير مايسكر الباب ،تلمس لحيتو بكل عصب ،منين هبطت عليه ها المصيبة زادا.
قعد.يمشي ويجي كي المهبول ،موش مستوعب في ها البلاصة هبطت عليه من السماء طفلة ولا زادت داختلو،سمع حثلتها تلفت يلقاه تقطر بالماء وروبتها لصقت على بدنها
"عطيتك منشفة باش تنشف روحك موش باش تخرج تقطر"
كيف ما العادة ساكتة وتخزرلو
"انت شكون ضايعة !؟ بكوشة ،ماتسمعش!؟
باقي ساكتة ،وهو الدم طلع لراسو " يابنتي حل فمك وتكلم راك شتباسي جد والديا
خزرتلو بعين مليانة خوف و ووخرت خطوات لتالي
"تي التكلم الزح ،اووو نحكي معاك تسمع فيا ،ماتسمعش
شاورلها بيدو بمعنى انت شكون بالكي تطلع بكوشة وماتسمعش ،تلمست جروح ركبتها ايلي حرارو بالماء
" شباش نعملك انا توا ،لا انجم نحكي بالتاليفون ولا نهزك للمركز ،عندكش تاليفون  انت
باقية تخزرلو موش فاهمة
"يابنتي حل فمك تحرك ،اعمل حاجة "
صاح بقوة صوتو ،سكرت وذنيها وبدات تصيح ،وساعت عينو موش مصدق،تقول في هستيريا ،جبدها من يدها وبعدهم على وذنيها" يزي ،اسكت...باهي صفا
سكتت وهي تثبت فيه
"باهي قلي اسمك علل الاقل ومنين
شافت لون عينيه الخضراء الغامقة تفكرت لون الجنة ايلي قالتلها عليه جيهان " جنة،جنة جنة "
"اسمك جنة
" جنة جنة جنة جنة
بعد يدو عليها وهو يغلي "اذا انت جنة انا جهنم باهي "
عدى يدو على شعرو وعلى لحيتو "شو انت شتكمل ليلتك هوني من غدوة مانخبش نراك ،اول ماتفيق تهز روحك وتمشي " 
دخل لللبيت وسكر الباب على روحو ،قعد.اطرف اافرش يحاول يهدي اعصابو ايلي تلفت ،طفلة ماهيش عادية،تحسها بيها حاجة و حالتها مجرحة و روبتها بالتراب ،تكونش حد اغتصبها والا عمل فيها حاجة ،يمشيش توحل في راسو ،وقف يمشي ويجي الدنيا ضياقت بيه والنفس متاعو ضاق ،قعدت واقفة بروبتها ايلي بدات تشيح ،نزلت بساقها على فردة الصبادري نحتها وكملت الثانية بساقها الاخرى ،بعدت شعرها على وجها ،مشات ودقت الباب
"جهنم ،جهنم انا جيعانة
" مانيش الطباخ متاعك ،تنجم تشوف الكوجينة وتاكل
"مانعرفش نطيب
" توا وليت تتكلم ...اومورك هوكا قدامك طيبت كليت ماطيبتش اقعد اكاكا "
رمشت عينها برزانة ووقفت قدام الباب تستنى يحل اما ظاهر ماهوش باش يحل ،لوجت لين لقات الكوجينة ،ظاهرة ماتستحقش تعب باش تتعرف،دخلت وساقيها حفيانة دارت بعينها تشوف ،حلت الفريجيدار مالقات شي ملي تحبو ،باكو حليب جبدتو وخرجتو ،تلفتت للماعون وين ،خذات كاس كبير فلت من يدها وطاح تكسر ،وصلو صوت التكسير ،ديراكت حل الباب وخرج  تمشيش تعمل مصيبة ،دخل يزرب لقاها تلم في الڨزاز بيدها
"سيب عليك ،خليه تو نلمو ايجا من هوني
من غير ما تخزر عفست على الڨزاز
" رد بااااالك ....اوو ياخا ماريتش"
قاعدة تخزرلو تقول ما عفست على شي
"اقعد على الكرسي
طاوعتو كي الطفل الصغير ،لم طروف الكاس المكسر و جبد مقلى وحط شوي زيت وجبد حوتة فوحها وحطها كمل قص شوي بصل وطماطم وحطهم ،جبدلها بلا و حطهم وريحتهم فاحت مدهولها قدامها ،تلفت يجبد في فرشيطة وسكينة ماحبدهم الا مالقاها بدات فيها خنيفري بيدها ,ميتة جوع ظاهرة قعد يثبت فيها ،حكايتها حكاية عندها مرض نفسي ظاهرة ،لازم يعاملها بلين ،ماهيش خايفة منو وبريئة وتصدق كل شي يقلها وتعمل ايلي يقلها عليه
" كي تكمل تاكل هاو بيتادين نظف بيه جرحك وحط عليه ها الفاصمة والبس حاجة في ساقك "
خزرتلو وهي تمضغ وفمها معبي ،عينيها المزيانين ايلي مليانين حكايات ،عرف فيهم حكايات وجعوها بارشا ، هز روحو وخرج للجنينة ،لازمو شوي هواء باش يهدي روحو ويعرف شيعمل ،سمع تخربيش وتطبطيب تلفت يلقاها وراء البلار متاع البورت فناتر تشاورلو باش يحل ،مشالها حل عليها ،وجه لوجه فرق طول واضح حسها كي البنوتة الصغيرة ،مدتلو البيتادين والقطن "داويلي ساقي"
تمسمر في بلاصتو ،هاذي نرمال في مخها شيولي خديم تحت ساقها ،خزرتلو ببراءة وهي تستنى فيه ياخو الدبوزة من عندها ،مد يدو وخذاها وهي تسرسبت ومشات لكرسي وقعدت ،مدت ساقها على الطاولة بكلها جروح وزادت طرف الڨزاز دهل في ساقها ،قعد على ركايبو و حاول يتفقد ساقها بعد مانظف الجرح و داواه ،وقف وقعد مقابلها" شنوة تعمل هوني
سكتت وماحبتش تجاوب "
"فمة حد عملك حاجة ،ضربك ،خطفك ...
شاورتلو براسها لا " فمة شكون باش يجيك والا قالك استناني هوني "
"لااااااا
صاحت وهي فادة من الاسئلة متاعو
" باهي غدوة لازم تمشي
عقدت حواجبها وهي تڨحرلو "شنوة ،شبيك تتشوحرلي "
طفتو و تكنورت مي القطوس وغمضت عينها ،قعد يثبت فيها ،فيها حاجة سبسيال ،تقول طفلة صغيرة ،من عقلها بايتة مع راجل عازب و ووحدو وموش خايفة ،خزر لساقيها العريانة وروبتها ايلي طلعت لفوق افخاذها ،استغفر الله ياربي ،دور كرسيه و غمض عينو وسرح فيلي صارلو في ها النهار المبروك.
"جهنم ،جهنم ،جهنم قوم"حل عينو على صوتها ،شعرها غطى وجها و بان في رقبتها جرح ،تنفض من بلاصتو ،شافها تضحك
"فمة بيسين ،ماء نهبط نعووم"
عملت بيدها كي الحوتة كي تعوم
"باهي برا اهبط
جرات للبيسين كي الصغير ،وهو دخل لداخل نيتو يدوش ويبدل حوايجو ،سيب الماء ودخل تحتو ،الماء بدا يرتحلو في اعصابو غمض عينو  واستحلاه ،جاه صوت من برا " جهنم جهنم " صوتها اكيد ،خرج يجري بعد تفكر ايلي هو موش لابس شي ،اول شورط عرضو لبسو ومشالها يجري ،لقاها تبقبق في الماء باش تغرق ،هبط جبدها خفيفة ريش ،طلعها على اطرف البيسين وهي تتنفس بقوة و شعرها لاصق على رقبتها وروبتها على بدنها ،ثبتت في وجهو ايلي الماء يقطر منو ،طلع بجنبها "ياخا ماتعرفش تعوم !؟
شاورتلو براسها لا،قعد يثبت فيها ،عينيها الخايفة و وجها الشاحب وشعرها المبلول ،اية في ااجمال سبحان الله ،بلع ريقو ووقف ،مدلها يدو باش تاقف شدت فيها ووقفت ،تبعتو ودخلو ،اول مارات التريكو متاعو هزتو ودخلت بدتلو وخرجت ،جاها طويل يضحك وفضفاض ،ضحك وهو موش منجم يشد روحو على المنظر ايلي قدامو ،شافها تتبسم بدورها وهي شادة في اجناب التريكو
" هايل عليك هههه...خلينا نطيبو حاجة ناكلوها شقولك
تبسمت وسبقتو للكوجينة ،بدات تعاون فيه هاي مدتلو كاس هاي مغرفة ،حضرلها طاولة مزيانة قعدت تاكل وشاهيتها محلولة ،اما هو قعد يتبع في حركاتها و يترشف في قهوتو ،كملو كلو قعدو قدام التلفزة ،هو حط فيلم يتفرج وهي معاه ،اما موش مركزة في الفيلم مركزة في لحيتو ،مدت يدها تمس فيها ،بعد وهو يخزرلها ،قعدت يدها ممدودة وهي تخزلو باستفهام موش مصدق شبيها وشنوة تحب بالرسمي تحب تمس لحيتو !؟ عاودت قربت منو ومدت يدها لحيتو ،المرة هاذي ماتحركش خلاها تمس لحيتو ،نفسها سخون على وجهو ،رقبتها العريانة وقربها منو و لمستها على وجهو ،خزرة عينها التايهة شجعتو قرب منها اكثر قرب من شفايفها لكن هي متمسمرة تخزر لعينو موش فاهمة شيعمل ،بعد عليها وبعد يدها ،قام وخلاها ،لعن النهار ايلي جات فيه ، طفلة مريضة وبيها حاجة كيفاه يجي لبالو يتصرف اكاكا ،قعد لين هدا و نجم يرجع لحالتو ،رجع يلقاها رقدت.