🌼جنتي🌼( كرونيك باللهجة التونسية : مكتملة )

part 7

💙💚
ماصدقهاش وقعد يسأل " ايييه ،أنا السبب فيلي هي فيه صفا هكا،انا السبب ،انا ايلي خليتها مرا بعقل طفلة كيما تقول ،تحب تعرف شنوة صار ،انا وكلتها الظواء صباح وليل باش تهلوس وتهبل ،انا ايلي خليتها بيدين طبيب كلو همو يعمل كابينا بفلوس الورثة متاعها ،تحب تزيد تعرف "كانت تصيح وماهمهاش يسمعوها والا لا ،عبارة قدام قاضي واعترفت بذنبها ماخلات شي مخبي" انا وياه كنا شنعرسو ،ايه باش نعيشو كيما ماحبينا وخططنا ونوينا ،تعرف شنوة نوينا ،انو تهبل وندخلوها في السبيطار وننسوها ،وقتها الورثة الكل ليا ،يحل كابينا و انا نعيش مرتاحة ،عملنا هذا الكل  باش هي تموت ،انا هزيتها بيدي كنت باش نغرقها في البحر،نجمتش نوسخ ايدي اكثر هزيتها بعيد بعيد بعيد نيتي تموت ومايراها حد ،يشدعا مريز وماتلقاش دواها تعطش تجوع ،تضيع ،حبيتها تموت وتبعد عليا ونعيش حياتي ،انا ايلي خليتها هكا ،عرفت توا شنوة صار"
توقف العالم الكل عندو ،لا حس لا صوت لا بشر لا حتى نسمة ،قدامو وجه عايدة اكاها ،رزن لسانو ،حل فمو ماردو ،نجمش يحرك ساقو ولا يبعد عينو عليها ،لها الدرجة وصلت الوحشية عند العباد "جنة اختك راو"
"نعرف ،اختي وانا تو متمنية نكون انا في بلاصتها متمنية ربي يهزني ونموت ونرتاخ ملي نغيش فيه تو "
"جنة اختك "
بهتت وهي تسمع فيه يعاود في الجملة "قتلك انا نادمة ومتمنية نلقى حل يصلح بيناتنا ،وانت يا خالد تنجم ترجعلي اختي"
شدتو من ذراعو وتراجتو بعينها ،تقول ضربو الضو ،حاجة المسخة شدتو ،ترعش بكلو وتنفض،بعدلها يدها متقزز " اقلب وجهك ومعادش توريه هوني وجنة تنساها " مشى وخلاها ،خلطت عليه "شكونك انت باش تمنعني مانراش اختي"
"أنا ايلي دقت باب دارو وهي مجروحة وتقطر دم ،جيعانة عطشانة ،وقت انت طيشتها وحبيتها تموت "
"ليليا اختي ،حقيقة ماتنجنش تبدلها "
"ياريتني جيت انجم ،أنا باش نعمل المستحيل باش ماعادش جنة ترى خليقتك ولا تحكي معاك ،خليها تو احسبها ماتت و مبروك عليك الورثة ،تنساش تتعدى تجبد ورقة تقول فيها مجنونة مهبولة و مايحقلهاش فلوس بوها وامها ...يا جيعانة "مشى وخلاها في بلاصتها متمسرة.
رغم انو رجعو للصفر معاها ،وعاودو خدمة من اول وجديد الا انو حالتها تخسنت بلڨدا،حتى لسانها تتطلق،ولا تحكي وتعبر حسو في كلامها بدات تتعدى مراحل من عمرها ،ولات تفهم بارشا حاجات تتواصل مع الطبة وتقبل الدواء ،كل مرة تتحسن في خاجة حتى بدنها ومخها بدا يرجع لطبيعتو وبدا بدنها يرمم روحو بروحو و الدواء يعاون فيه،كيف ماقلنا مافارقهاش لحظة،هو الدواء بالاساس ،ثقتها فيه خلاتها تاثق في الطبة وايلي يعملو وتخسنت بارشا ،حتى جيهان لاحظت الفرق ،جيهان ايلي لوجت لين عيت عليها ،وفي التراتمون و الجلسات مع البسي جبدت اسمها و خكات قداش تحبها ،جابوهالها وكانت فرحتها بالدنيا ،صحيح اقل من فرحتها كي رات خالد لكن فرحت ،من غير مانحكاو على جيهان عاد هاكي تبكي وتعاود ،تخيلها انت انسان فقدت للامل تراه ،وصلت تلوج في القبورات تلقاهاش تسأل الرجال وتوصيهم يلقاوش طفلة مينة ومتعفنة فب الغابة ،كل ماتسمع خبر لقاو جثة مرا قلبها يجي لوطة ،كوشمار عاشتو من غيرها ،نهار ايلي دقو بابها و قالولها حاجتنا بيك بخصوص ليليا وحالتها ،ماصدقتش ،تي هي ترا فيها بشحمها ولحمها وماصدقتش ،بالنسبة ليها تو خالد وجيهان هوما عايلتها.
خلينا نقولو شنوة صار في حياة خالد ،علاقتو ببوه من الاول كانت صعيبة على الاهير لاهو قبل انو ولدو يتبع طفلة مريضة لا خالد يقبل انو يخلي جنة ،لكن بالوقت وقدام فرحة ولدو و حالتو ايلي نساتو في صدمة الحبس ،بدا يتقبل وبدا يعاود يقرب ،ليلة قالو ولدو "جنة بالنسبة ليا اكثر من مرا ،ليليا هي الحاجة ايلي ناقصتني ،النظافة ،انا تمسخت نهارت ايلي قتلت روح حتى ولو موش قصدي، هي الضو ايلي ينورني من داخل ،الايد ايلي تنجم تخرجني من الذنوب والاثم ايلي انا فيه ،جنة تعنيلي اكثر ملي تتصور "
كلمات تحفرو في بالو ،هو ديما يفهم ولدو وتوا فهمو بلڨدا ،ولى متعاطف معاها ولى يسأل على حالتها و يطمن و يصرف اذا استحقت حاجة تتصرف .
الهدمة هاذي خذات شهور من حياتهم ،من شتاء لشتاء تقريبا ،صبروا وتحملوا ووسعوا بالهم و وثقوا انو ربي ما يخيبهمش ،والحمد الله نالو ايلي حبو ،اخيرا جنة باش تخرج من السبيطار .
وقفوا قدام الطبيب ايلي حكالهم وفهمهم وفسرلهم كيفاش يتعاملو معاها ،حالتها مازالت موش مستقرة بلڨدا وتنجم في اي لحظة ترجع لحالتها ،حطلهم اسم الدواء والكونترول الجاي ،خذا الاوراق وطار لبيتها ،لقى سهى لبستها و خضرتها ،خزرتلو وهي تضحك من عينيها "باش نخرج ساياي"
"باش نخرجوا"
شد يدها وكبس عليها ،محمحت سهى " سي خالد ،فاليزتها لميتها انا وجيهان ،وانا كلفني الطبيب باش نجي نتفقدها عندكم "
"انت  تعبت معانا ووقفت معانا وماخليتناش وانا بالذات ملننساش ايلي عملتو ليا ،بارك الله فيك سهى " تبسملها خلاها تدخل بعضها وتحاول تهرب من عينيه "انا ماعملت شي باش تقول هكا "
دخلت جيهان ومعاها بوه
"اه جنة شنوة حالك "
"لاباس ،فرحانة خاطر باش نخرج "
غمزلها خالد ،قرب بوه وخرج مفتاح وشاورلو بيه في الهواء "احم احم ،هذا مفتاح هديتي ليك "
"هدية "
"اي قلت نهدي لولدي حاجة تفكرو بالجنة "
سكت خالد وخدم مخو شوية ،شاخ ضحك "تقليش الدار ايلي في الجبل"
"وي "
عنقو وهو موش مصدق"كيفاه عطاهالك مرة اخرى يمشيش يشك ايلي...."
من غير مايكمل قص عليه بوه
"لا شريتها"
"اوووو هههه لا عاد مانصدقش"
"هدية صغرونة "
خزر لجنة ايلي حاولت تفهم "جنة العالم متاعنا ،الجبل والبحر والجو هههه انا شنهزك لاحلى بلاصة يا احلى جنة "
"ايلي كنا فيها قبل"
"هي بيدها "
لمعت عينها وحس بلهفتها للبلاصة.
طل براسو من الشباك أول ماوصلو للدار في الحبل لفحو العواء البارد طقس شتوي وريح جبلية هايلة،خرجت يدها للهواء وهي مغمضة عينها ،حست براحة كبيرة في عالم طايرة فيه بلا جوانح ،ايلي يسوق كان بوه و بجنبو كانت سهى هي ايلي باش تتلهى بيها وتطل عليها وتكنترولي دواها ،اول ماحبست الكرهبة نطت كي القطوس وخرجت،مدت يديها وطلقتهم وغمضت عينها
"طيارة "
حلت عينو وقت سمعتو ،ضربها على خشمها وشدلها يدها ودخلها من غير مايستنو حد ،تبعتهم سهى بعين فيها بارشا غيرة ،اي غيرة لانو في العام ايلي تعدى تعلقت بخالد وحبتو ،في الاول واول ماراتو دخلتلو بمنطق باش تعاونو لكن هي تقربت منه لا اكثر لا اقل ،في كل مرة كانت تستغل فرصة باش تقعد معاه والا تحكي وعملت موضوع جنة سبة ،في بالها مستحيل يكون يحبها لها الدرجة عملت تدخل معاه في الجو وتطيحو ،لكن خالد اصعب ملي تخيلت ،كان ياسر مسكر قلبو ومايرى كان جنة ،وحست ايلي هي الكل في الكل في حياتو ،وبدات تكرها وتفد منها ،خلينا نقولو ايلي لولا خوفها من كنترول الطبيب كانت زودت في الدواء والا غلطتها ،لانو مثلتلها اكبر حاجز لولا هي كان خالد متعلق بيها .
دخلت حالة فمها في الدار ،كيفاه دار بالضخامة هاذي في الجبل ،و في وسط ها السواني ،جاتها ضحكة جنة ،شافتها هابطة ومعاها خالد
"شفنا البحر "
"وماشينالو تو "
استغرب بوه من الهبال"توا وقت بحر "
ضربو على كتفو وهو يزرب وراها " الله غالب اوامر"ضحك بوه وهو يرى في ولدو في اكثر لحظات حياتو سعادة ،جنة بالنسبة ليه اكثر من مرا ،اخيرا عرف قصدو .
بعد ماكمل عمل بيها دورة في الدار والسواني ،لقى جيهان حضرت فطور كيما قالت هي شطر لباس لين يجو الجماعة ،كلات سهى وحاولت تبان كيف العادة المرا الطيبة المتواضعة وايلي عملت اكبر المزايا عليهم ،بعدها ديراكت هز وصلها بالطبيعة بعد ما شكر ومجد وقفتها معاها ،اتفق معاها كل جمعة تطل مرة والا اثنين تتفقد جنة احوالها دواها دمها سكرها ،ماكلتها هذا كان الاتفاق .
البحر كان هايج وصوت الموج قوي ،جرات على الرمل رغم انو بارد ،لكن هي موش هوني
"جنة ،رد بالك "
"ماسمعتكش"
"رد بالك "
قاتلو بالاشارة ماسمعتكش ،خلط عليها و جبدها ليه "رد بالك يا طرشة "
ضحكت ودزتو "عيط "
"جنة "
بعدت عليه
"جنة"
"ايه نسمع "
"نحبببببببك "
"ما سمعتكش"
"نموت عليك يا سخطة " وشوش بينو وبين روحو
"جهنم "
"وي"
"تسمع فيا"
"وي"
"جعت "
ضحك عليها وبعد عاود خلط عليها "جيعانة مالا نمشاو لاكثر رستو يعمل حوت مشوي "
"حوت !؟ انت مرة طيبتلي حوت "
"وفمة حوتة مرة هبطت تعوم ياخا شوية لا غرقت "
عقدت حواجبها تحب تفهم ،قداه يشيخ عليها كي تعمل ها الفازات ،دخلوا للرستو واختارت هي حوتة هزها وطيبوهالها ،كلات وضحكت ولعبت خلاها تحس ايلي هي اسعد وحدة في ها الدنيا ،حب ينسيها الشقاء ايلي عانتو ،بون موش غلطو اما كي يتفكر ايلي اختها حبت تقتلها و ترتاح منها يوجعو قلبو عليها لدرجة انو ما يحبش يتخيل حالتها وحالة وجها وهي تخلاها وتمشي ،ساعات يجبدها ليه ويكبس عليها بين ضلوعو ،ياخو وجها بين يديه و يخزر لعينيها ،يتلمس خدودها يلعب بشعرها ،عاش معاها أيامات ماتخيلش انو يتعاودو ،فرحت معاه  من كل قلبها ،وقت تعنقو تكبش فيه وتبوسو حتى قدام بوه والا سهى الشي ايلي زاد بغيضها .