🌼جنتي🌼( كرونيك باللهجة التونسية : مكتملة )

The end💙

💙💚🌸
يخزر لجروح يدو ،جروح ايلي نهار من النهارات ليليا داوتهم و عنقتو وقتلو "انا معاك " وينك تو ،فمة جروح دخلانية لازم تداويها ،تلمست اكتافو ،هز راسو لقاها جيهان ،عينيها حمر و جهدها وفى ،قعدت بجنبو "ماحبو يقولولي شي ،قالو استناو الطبيب وهو يقلكم "
"أنا السبب"
استغربت من اتهامو لروحو " عديت معاها شهور وهي ماتعرفش ايلي معاها قاتل روح " سكت شوية وهو يتلمس في جروح يدو " الايد هاذي في لحظة غش وباش مانموتش انا دغرت واحد كان شيضربني بسكينة ،بشقف دبوزة ،قعد ايامات في البلوك وبعد مات ،شديت الحبس شهور وبعد سيبوني ،كنت شنعدي عمري متهوم بقتل نفس ،" عاود سكت " لكن انا لا عمري خممت نضرها ولا نستغلها ولا حتى ناخو ايلي نحب عليه منها،ايامات وباب مسكر علينا ،لا نهار استغليتها ،بالعكس كنت نخاف باش نخمم اصل ،في محنتي ربي بعثلي جنة ،نجاني من شري ،شفت للجروح هاذم ،انا ضربت روحي نهار ايلي سمعت بايلي الطفل مات ،كنت نحب ندمرها ها الايد ونشوها و نقصها كان لزم ،لقيت جنة تاقف بيني وبين ايلي خممت فيه ،جنة ملايكتي ايلي ديما على يميني ،تمنعني من انو نعمل حاجة نندم عليها"
"جنة كانت تحبك وبارشا،مانعرفش اذا نفس الحب ايلي انت حبيتهولها والا لا ،اما نعرف ايلي اكثر واحد حبتو فينا،انا زادا حبيتها كيف بنتي وممكن اذا ربي رزقني بطفلة ماكنتش نحبها كيفها ،في عز مرضها كنت بجنبها ومعاها ،كنت متمنية ربي يرحمها و تشفى ،متمنية ربي يفرحها وترى الدنيا بلون اخر ،في نفس الوقت ايلي اختها من دمها تخلت عليها ،لقاتك انت ،بالنسبة ليها انت كل شي تو ،لاخر لحظة محتمية بيك لانو تظن ايلي انت مستحيل تخليها ،لو جات تشك لحظة برك في نيتك الخايبة كانت بعدت عليك ،انا مايهمنيش انت علاه قتلو وعلاه دخلت الحبس ،انا ايلي يهمني انت شنوة ،وانا كي نراك مع جنة نعرف انت شنوة "
هبط راسو وسالت دموعو ،ياريت ماكانت ايدو مسخة بدم وياريت ماكانت جنة مريضة ؟!
وقفو صف واحد ،هو بوه جيهان سهى ومن بعيد عايدة " ايلي باش نقولو صعيب عليكم الكل ،انا مافهمتش علاش قاعدين تستعملو في دواء هو اصلا ممنوع في حالتها"
"اذا تقصد في الدواء القديم عندها قريب العامين ما شربتش حربوشة منو " وضحلو خالد
"والله التقرير ايلي قدامي عكس هذا ،صحيح فمة مدة ماخذاتش الدواء لكن من مدة رجعت ،والتحاليل هاذم يثبتو ايلي نحكي فيه "
جاوبتو جيهان"يادكتور كل شي على عيني ،انا نعرفو دواها القديم ونأكدلك ايلي ما خذاتش حتى حربوشة" 0
"ديجا سهى فرملية تعرف حالتها تجي مرة والا مرتين في الجمعة تتفقد دمها " وخزر خالد لسهى شجعها باش تزيد تأكد ،اكيد فمة غلطة ،تربثت وحمار وجها ومالقات ماتحكي"ياسهى قلهم ،اومورها مريڨلة "
"اه...يعني ..هي"
"انت ايلي تراقب في حالتها "
"وي هي ,وملي كانت في السبيطار زادا "
"ابون ،وكيفاه مالاحظتش ايلي  للتونسيون عندها طالعة شي كبير ،وكيفاه مالاحظتش اثار استهلاك الدواء وغير هذا كيفاه استهلكتو ،لانو حسب كلامك ،مافيبالكمش وانتوما لاهين بيها"
"اكيد خذاتو  من غير علمنا "
اقترحت سهى
"مستحيل تعملها ،جنة ماهيش بالخبث هذا ،نيتها صافية "
"من الاخير ،فمة تعاطي للدواء هذا ،ونتيجة لاستعمل ها الدواء ،االمخ متاع مريضتنا بدا يتخلى عن الوظائف متاعو وكيما نعرفو ،المخ هو ايلي يخدم بدنا الكل واذا هو تخلى على وظيفة صغيرة بدنا الكل يمشي ،انا كنت على اتصال مع طبيبها واكدلي ايلي حالتها صعيبة ،نحن نجمنا نوقفو النزيف ،لكن ماناش قادرين رجعو مخها يخدم كيف قبل
" شنوة معناها الكلام هذا"
"يعني تخضرو رواحكم لاي خبر "
وساعت عينو وما فهم شي ،شنوة اي خبر اما خبر"!؟ اكيد موش يقصد موتها؟!
مغمضة عينها ،تقول راقدة مطمانة ،قعد بجنبها ،عدى يدو على شعرها ،كتمت اهاتو ودموعو ،خذا يدها بين صوابعو ،قد الطرف ،حطها على لحيتو كيف ماكانت تعملو ،باس كفها ،حلت عينها الذابلة ،عين حزينة تحكى على معاناة ،العبد الضعيف في ها الدنيا ينهشوه الناس الكل ،حتى اقرب الناس ليه
"جهنم "
تخنق بالدموع و دفن راسو عندها ،يبكي بالصوت ايلي مابكا هو شفي عمرو الكل ،تلمست شعرو وقعدت تمسد عليه
"جهنم ،خليني نراك "
هز راسو ليها
"انت ماكش باش تخليني موش هكا"
شاورلها براسو لا
"باش تهزني للبحر و تعلمني نعوم ،باش نتفرجو في فيلم ،باش تخوس بيا في الجبل "
شاورلها براسو اي
تلمست لحيتو "أقرب امان " قرب منها  ،وجهو في وجها ،خزرت لعينيه ايلي تعشقهم "جنة " هي ايلي قالتهالو  المرة هاذي" انت جنة خالد " تصدم من كلامها ،اول مرة تعيطلو باسمها ،قربت وجهو ليها اكثر ،باستو من عينيه ،باسها من خشمها ،من خدها تعدى لشفايفها و باسها ،هبطت دموعو ،دفنت راسها على اكتافو ،هبط لوطة باش ماتقعدش معنكشة فيه "ليليا نحبك ،ومستحيل قلبي يحب غيرك "
ضحكت ضحكة عسل،تبسم معاها "جنة "
حبس فمها على تبسيمة وحبست عينها "جنة " صوت الاباراي حذاه صملو وذنو ،قام واقف "جنة ،" رجها بقوة شي ،مشى للماكينة يثبت فيها ،ماعرف شنوة يعمل ،جرى حل الباب" واحد يجي يشوف المريضة " ،تصبو عندها سطاف كامل "
خرجوه لبرا وسكرو الباب ،ضربو بكف يدو ،حاولهم باش يحلوه ،وقعد يضرب فيه
تحل الباب ،وتحل على كبرو ،مع خلوط جيهان و بوه ،ديراكت عينو مشات للسرير متاعها ،غطوها بالابيض ،بهاك الملحفة البيضاء متاع كل سبيطار ،شافهم يبعدو في الخيوط عليها ،جرالها وكشف وجها "جنة ،جنة حل عينك ،جنة قتلي باش نحوسو نمشو للبحر ،باش نعلمك تعوم ،جنة بجاه ربي حل عينك ،امان اعملوا حاجة ،تصرفو انتوما باش طبة ،يا اختي علاه غطيتلها وجها ،شو يدها سخونة ،شوف تتبسم ،شوف مازالت عايشة " صاحت جيهان ،ترجت معاها  حيوط  السبيطار
هبطت دمعة بوه ،نجمش يشدها ،اتكى على الباب يخزر لولدو ايلي اقل مانجمو نقولو انو مات بالحياء.
الموت علينا حق صحيح،لكن موت الانسان ايلي ماشافش حاجة باهية في ها الدنيا رحمة ،ممكن لفوق في سابع سماء يلقى الحب واللهوة ،يلقى الامان و الرحمة ،الموت مايكسرلش الميت يكسر ايلي يحبوه ،بالضبط كيما ايلي صار لخالد ،لاخر  لحظة استناها تحل عينها من اول وجديد ،استناها تقلو جهنم ،قاتلو ماتخلينيش وخلتو ،قاتلو انا معاك و مشات ،دخلت بضحكة وخرجت بضحكة ،اخر مرة ضحكتلو و باستو من عينيه و عطاتو البوسة ايلي تمناها .
بعد ما دفنوها و ردو عليها ترابها ،قعد بجنبها ،دافن وجهو بين كفوفو
"خالد ،خلينا نروحو "
"ماانجمش نخليها وحدها ،جنة تخاف ،والليلة اول ليلة في القبر ،جنة تخاف من الظلام ،تخاف وحدها ،يقولو الميت يسمع شكون حذى قبر ،خليها تعرف ايلي انا معاها "
"خالد يعيش ولدي ماتعملش في روحك هكا ،هاكي الدنيا"
"اما دنيا ،القبر هذا  فمة ناس اولى بيه من جنة،شنوة عملت شنوة عاشت ،وقتاش فرحت وقتاش كانت عبد كيف العباد النرمال "
"قوم معايا تو غدوة نزوروه"
"بابا يعيشك ،برا خليني "
كان يحكي بجدو وبكامل عقلو ،بالفعل الليلة هاكي عداها حذى جنبها ،بوه ماخلاهوش ،جابلو فرشية وغطاه بيها ،ليلة شتاء و الطقس بارد ،قعد معاه لين طلع الصباح ،وهكا كان يعمل تقريبا كل ليلة .
بحكم كل ليلة يعديها في الجبانة ،وفي طقس شتوي ،خذئ برونشيت قوي ،قعد ايامات محموم و ماينجمش يقوم من فرشو ،يهتري باسم جنة ،يبكي في نومو ،ضعف بارشا وهمل روحو لدرجة معادش تعرفو الا ماتثبت ،جاتو سهى نهارتها صبح خير شوية خرج قعد في البالكونة ،يتبع في السحاب والشجر ،باهت ماتعرش فاش يخمم
"خالد "
من غير لا يتلفتلها ولا يجاوبها ،قعدت بجنبو "تحيرت عليك خالد ،بوك قالي تاعب بارشا "
باقي موش معاها "عايدة حالتها ما طمنش ،تقريبا هبلت ،الطبيب قال حالتها النفسية صعيبة ،البارح حاولت تنتحر ،سمعت بيها "
"كل حد يلقى فعلو ،الحمد الله حق جنة قاعد يخلص بالشوية بالشوية "
بلعت ريقها و هي حاستو ماعوش عادي"انت لاباس،قاعد في دواك "
دخلت جيهان وايلي رسمي ولات تخدم في الدار هاكي خالد قالها انت ايلي قعدت من ريحة ليليا وكي نراك نتفكر ايلي فمة حد كان باهي معاها وما خلاهاش وحدها
"سهى نجيبلك حاجة تشربها"
"لا يعيشك جيهان ،شوف خالد جبتلك دواء ،تاخو حربوشة قبل ماترقد ،باعي لحالات الاكتئاب ايلي كيفك "
"مثبتة متاع اكتئاب ،يظهرذ يهبل ،كان ناوية تقتلني ،مخي مازال فيه وبدني يتحمل السم "
حمار وجها و بلعت ريقها بصعوبة " شنوة معناها "
"كيفاش نجمت تعطيها الدواء حتى من غير مانشلقو احنا "
"شنوة ،فاش تحكي ،مانيش نفهم فيك "
دارلها بكلو وخزر ديراكت في وجها ،عينيه تلمع ببارشا شر" وقتااااش نجمت الدواء" ضرب الطاولة وهو يصيح ،نڨزت مفجوعة وقامت "لا انت ماكش طبيعي ،جات خارجة جبدها ولصقها على الحيط "
"علاه قتلتها ،علاه حرمتني منها ،شنوة عملتلك "
"فاش تحكي،ابعد عليا"
خنقها لين حمار وجها كانت قريب تموت بين يديه ،تدخلت جيهان "خااالد خاالد فيق باش تباسي روحك وتحطم حياتك "
"حياتي تحطمت ملي دفنتها "
جبدتو بعدتو "خااالد "
"الق....هاذي هي ايلي عطاتها الدواء رغم ايلي تعرف انو شيقتلها ،رغم انو بدنها رفض الدواء و دمها كان طالع وفمة امكانية نمنعو النزيف ،سكتت وكل مرة تقول لاباس مريڨلة "
"بالرسمي ايلي يحكي فيه سهى"
"انا ...والله....هو "
"جاااوبني " عيطت جيهان ،"بالرسمي ايلي يحكي فيه سهى"
"انا ...والله....هو "
"جاااوبني " عيطت جيهان ،سكتت سهى و بدات تبكي ،تهز يدها وتضربها بكف ،وتكمل تشدها من شعرها وتضربلها راسها على الحيط ،مرة واثنين وتلاثة ،تفلق راسها بالدم ،دخل بوه جرالها وبالسيف فكها من يديها
"في بالك انا باش نخلي حق جنة يضيع ،انت باش تدخل لڨلبو وقضيتك واضحة بشهايد طبية و شهادة الفرمسيان ايلي تاخو منو في الدواء ،واستغليت صيفتك كفرملية ،وعايدة تحطت في البلاصة نفسها ايلي تمنات تتحط فيها جنة"
"انت واحد اعمى ،جريت وراء وحدة لا نهار حست بحبك ولانهار قتلك نحبك و لا نهار كانت مرا كيف ماانت تحب ،وانا غلطت ايه ،اما ماقصدتش نقتلها حبيتها ترجع لحالتها وتهستر وهكاكا تتعب معاها وتخلاها وتخزرلي حتى بشطر خزرة اما انت كنت اعمى "
"ايلي عطاتهولي جنة ولا واحد ينجم يعطيهولي ،حتى لو قتلك والا حكيتلك مستحيل تفهمو ،انك تكون مرا مايكفيش باش تدخل قلب الراجل ،حطها في مخك ،وانا قلبي هذا تسكر لا انت ولا غيرك ينجم يبدل ها الحقيقة ،انا وثقت و كنت متصور ايلي مستحيل ننرجعلك ايلي عملتو معايا ،اما خسارة شيطانك غلبك "
"خالد سامحني ،والله ندمت ،ماتصورتش جنة تموت "
"اسمها ليليا ،مريضة السبيطار متاعك ،خليه اسم جنة خاص بيا انا اكاهاو "
خلاها مع بوه و جيهان وخرج اكيد عارفين وين ماشي ،مستحق يقعد مع قبرها شوي .