🌼جنتي🌼( كرونيك باللهجة التونسية : مكتملة )

part 5

"💙💚"

الايااااام والمكتووووب ،للاثنين بيا غروووو وبعيد ع المحبوووووب كاس الفراڨ يا ممرووووو"
تقول تحكي عليه ها الكلمات ،عشرين عام ظلم في عركة ودافع على روحو يلقى روحو بين حيوط ااحبس ،فكرو مشغول على ليليا وين تنجم تكون زعمة برات من علتها ،نهارو وليلو متشابهين ،بوه عمل المستحيل باش يلقى حد يشهد بايلي صار واخيرا لقاه ,عمل استئناف للقضية و بشهادة زوز بانت حقيقة اخرى صدمت بوه قبل ماتصدم حد اخر .
وقت وقف ااشاهد الاول بين يدين القاضي ،هبط راسو وهو يحكي " كنا انا و خالد والمرحوم احمد كيف الاخوة ،اصحاب وبيناتنا عشرة ،خالد يسال احمد فلوس ،كل مرة يمهطلو فيها،اما خالد لا نهار تشكى والا قالو توا ترجعلي ومانصبرش عليك ،اما احمد كانت ايدو طويلة وديما يطلب منو ،دينو كبر ،ولى خالد قالو معادش باش نسلفك الا ماترجع القديم لانو كان يستغل في طيبتو و صحبتنا،نهارتها تقابلنا في البار ،تجبدت الحكاية و خالد قام باش يهرج لانو احمد ولى يقول في كلام في حقو خايب ،قال شارب و موش في عقلو ،فهمتش كيفاش والا وقتاش جبد سكينة وحب يدغر خالد وقتها خالد دزو و طيشلو السكينة وماحبش يكبش معاه،احمد وصلت بيه انو يجبدلو امو بالخايب وقتها خالد نجمش يتحمل و ضربو ،احمد عاود جبد السكينة وحب يقتلو مرة اخرى و خالد مالقى بيها كان يدافع على روحو بشقف"
"انا سكت لانو بو  احمد لزم علينا السكات ،و حب يخرجنا لبرا حب خالد يمشي فيها لانو  هو سبب موت ولدو "

كلام الشاهد الثاني كان تقريبا كيف الاول ،بو احمد حب يخبي ايلي ولدو ظالم وهو ايلي بدا وموش كيما تعدت القضية القتل العمد ،هكا القاضي ما لقى غير انو يخرجو براءة ويكفيك الايامات ايلي عداها في الحبس ،بوه ايلي حبس واقف قدام  ولدو بعد قداه ماشافهوش،ضعف شوي وطوالت لحيتو ،و طفت لمعة عينو ،لكن مع الامل الجديد لمعت من اول وجديد.
**""""***

بعد شهرين حبس ،اول مرة هواء الشارع يدخل رواريه ،بعد عتمة الباب المسكر بانت خيوط الضو ،غمض عينو يتحسس في الهواء ،ايه والله قفص الطير لو تعمل بالذهب مايجيش في قيمة لحظة وهو يطير بجوانحو
"جنة وين!؟ اكيد برات قتلي اخر مرة تداوي ،يعني حالتها تحسنت"
جبدو من مرفقو "اطلع للكرهبة انت ليوم تدلل قد ماتحب ،ليوم شنتعشو انا وانت راس راس"
جبد يدو من عندو ،احساسو ايلي عمال يخنق روحو كل يوم ،حاسس ايلي جنة موش لاباس،و الدليل بوه ايلي مايعرفش يخبي"جنة بيها حاجة"
نفخ بوه بقلة صبر"يعني احنا وين وانت وين ! انا خرجت من الحبس وبانت براءتك فيه البركة"
"عندك عنوانها"
"خالد...."
"بابا جنة وين"
كلامو وجديتو واضحين"اسمها ليليا،وهي تو عند اختها "
"عنوان اختها باز عندك ،على الاقل اسمها تو انا نتكفل بالباقي"
"خالد"
استنى كلام بوه لانو عارف وراء اللعثمة ايبي عندو فمة ان "ليليا مريضة بارشا"
تقول ضربو برصاصة ،شحب وجهو وصفار بطريقة غير عادية رعشت شفايفو وهو يسأل"وين "
" سبيطارالامراض العقلية والنفسية"
"مفتاح الكرهبة"
حل فمو موش مصدق" ولدي ،ياخا بجدك ماشيلها ،اسمعني الطفلة ضاربة في مخعا وهايكا تتداوى احنا شعندنا فيها "
"ضاربة!؟ باهي يعطيك الصحة "
تقول صب عليه سطل ماء بارد في العادة يفهم ولدو و يحترم رايو واختيارتو ،لكن المرة هاذي غير.
من فرملي لفرملي ومن طابق لطابق ومن بيت لبيت وهو يسأل على ليليا ،واخيرا وجهوه للطبيب ايلي لاهي بحالتها،خلاه يدخل ويقعد ،متحمس انو يراها ويقابلها بعد ها الشهور بين توقيف وحكم و ربطية
"ليليا بلڨاسم ،يعني انا مانعرفش شنوة بالضبط حالتها "
"اه ليليا ،بون ،شباش نقلك حالتها كارثية
" شنوة معناها
"ليليا بدنها ولى ضعيف لدرجة انو نخافو اي نكسة والا توتر والا غلطة في الدواء تنجم ...لكن هي تو تحت المراقبة وعلى عينينا "
"انجم نراها
" لا لا ،ممنوع انك تشوفها،اخر مرة حبت اختها تزرها دخلت في هستيريا كبيرة"
"لكن انا تنجم تقبلني"
"شكونك انت بالنسبة ليها ،يعني ماكش من عايلتها هذا اكيد ،
" بعني تنجم تقول انسان قريب منها بارشا وهي تاثق فيه"
"لا ماانجموش نجازفو بحاجة كي هكا"
"يادكتور  انا مستحيل نخلي حالتها تزيد تتأزم "
شو سي...
"خالد
" سي خالد ،كيما قتلك انا نجمش نلعب بحياة مريضة عندي"
"على الاقل نشوفها من بعيد "
"ياسي خالد ،هي توا في بيت خاصة ،اما اذا تحسنت حالتها شوي وعد مني نخليك تراها"
حاب يراها بصيفة موش عادية ،يحب يشوف وجها ويسمع ضحكتها ،زعمة مازالت ضحكتها كيف قبل ،مازال وجها بريء كيف ماراها اول مرة،لوجت عينيه بين المرضى بالكي يراها بينهم ،لكن وجوه المرضى غير الوجه ايلي يلوج عليه.
******
تلمست شعرها وتفقدتو ،استوت روحها وهي تدخل وراء الطبيب
"المريضة مريضة خاصة وحالتها خاصة ولهوتها باش تكون خاصة فهمتني"
شاورتلو براسها اي
"انت شتتلهى بيها و مدام بن سعد تو تعاونك ايامات لين تستنس بالخدمة هوني"
عاودت شاورتلو براسها
حل الباب ودخل ،كان عاطيتهم بالظهر ،ضفيرة شعرها واصلة لحزامها ،بان ضعف بدنها ،بلعت ريقها وهي تستنى في ردة فعل عنيفة ،لكن المريضة ماتلفتتش تقول ماسمعتش حسهم كي دخلو ،تبعت خطوات الطبيب لين وقفت قدامها ،وساعت عينها وهي ترى في وحدة في عمرها والا اقل ،رغم وجها الشاحب وعينها المحوقة وفمها الشايح لكن زينها غير عادي ،سبحانو ربي اذا يعطي حاجة ياخو حاجة الكمال لله
"ليليا"
تلفتتلو بعين ترمش برزن كبير ،خزرتلها وركزت عينيها عليها ،ماتت في بلاصتها مشى لبالها باش تدخل في حالة متاع تكسير والا تضربها كيما يحكولها ،لكن قعدت مثبتة في عينيها ،الطبيب خاف من ردة فعل عكسية حاول يشتتلها تفكيرها "ليليا هاذي سهى الفرملية ايلي شتتلهى بيك من اليوم "
"جهنم "
تربثت سهى وماعرفتش شتعمل ،شنوة قصدها بجهنم ،لكن خزرة عينها فيها لين وموش قارية الشر،حاولت تتقرب منها
"عسلامة يا ليليا،احنا من اليوم باش نولو اصحاب "
قربت منها وشدتلها يدها ،لكن ليليا باقية مثبتة في عينيها ،لون عينيها الاخضر يفكرها بذكرى مااحلاها كل يوم تحلم بيها ،مازالت تصويرتو بين عينيها ،لون عينيها نفس لون عينين خالد،نفس لون الجنة .
كاول مقابلة مع المريضة كانت ناجحة ،حمدت ربي ايلي قبلتها براحة كبيرة ،الطبيب بيدو قعد باهت شنوة حكاية جهنم ايلي عندها شهور تعاود فيها،وبهت كيفاه تقبل سهى بها السهولة هاذي.
رجعتلها في العشية ،معاها عشاها ودواها لكن وحدها ،دزت الطاولة بجنب فرشها
"العشاااء جاء ،اكيد جعت"
تقربت منها وثبتت في لون عينها مرة اخرى ،مدت يدها لعيونها ،خافت سهى لا تطمزها في عينها وخرت ،ايلي خلى ليلى تخاف هي زادا وتوخر
"تخافش ،انا هوني "
مرة اخرى تفكرها بخالد ،جاء لبالها وقت كان يقعد على ركايبو قدامها و يمسد على شعرها "تخافش ،انا معاك"
"جهنم"
خرج صوتها مبحوح ،خايف وحزين ،تفكرها فيه بصيفة غريبة ،دمعت عينها وهي تتخيل فيه قدامها ،لون عينين سهى شجعها ،ترمات عليها تعنق فيها في بالها خالد ،استغربت من تصرفها ،لكن هي بدورها عنقتها ،عطاتها الامان ايلي تلوج عليه بعد ما بعدت عليه.
****
مشى خطوات وهو يلوج بعينو بين المرضى ،وقيت يخرجو فيه  يدورو شوي في الجنينة ،لوج يلقاهاش ،شاف الكبير والصغير ،المرا والراجل ،ايلي يضخك وايلي يبكي وايلي يصيح وايلي يضرب في شجرة والا حيط ،تجمدت ساقو وهو يخزر للوجوه
"مسيو ...مسيووو "
تلفت مربوث"نعاونك في حاجة،عندك شكون في العايلة والا حد تعرفو بين المرضى"
بلع ريقو و مشط شعر لحيتو "اه نلوج في ....وحدة ايمها ج.. ليليا...اسمها ليليا بنبلڨاسم"
وساعت عينها الخضراء شاح فمها وهي تثبت فيه "تقصد مريضة الدكتور أنيس"
"يظهرلي هو ،أنا نحب نراها ونزورها "
شافت ضخامتو ،وعينو الخضراء،ريحة برفانتو وبدنو العريض وستيلو الفتوق
"تحب نعاونك "
"تعمل مزية "
"باهي " جبدت تاليفونها "حط نومروك هوني وانا نلوج عليها ونعرف حالتها واذا نجمت نخليك تراها "
تفرهد من كلامها تقول غريق ولقى قشة يشد فيها ،فيسع قيد نومروه " يعيش اختي ،اعمل الماكس خليني نراها خليني حتى نشوفها من بعيد "
"تهنى ايلي نقدر عليه نعملو،توا لازم تخرج من هوني  ممنوع  "
"انت عطيتني كلمة تنساش "
"قتلك اتهنى ،اقرب وقت نكلمك "
تبعتو بعينيها ،يعني هذا و هاكي شنوة العلاقة بيناتهم ،عايلتها ؟! تعرف دوسيها مليح ،عندهاش خوات ولا حد كيفو ،زعمة يحبها ،لا شباش يحب بربي وحدة ناقصة عقل ،مجنونة ،طلعت لوين ليليا لقاتها حذى الشباك ،بصوابعها ترسم في حاجة مجهولة ،محمحت باش تتلفتلها
"ليليا "
من غير ماتجاوب كملت ترسم على الشباك ،خطوط ودور ونقاط"وقيت دواء "
حبست ايدها ودارتلها ،لون عينيها الاهضر رجعها مرة اخرى لوجه تحبو وتتمنى تراه "جهنم "
"جهنم !؟ " قربت منها و عدات يدها على مرفقها"شكون جهنم ليليا"
"راجل "
بلعت ريقها "عينيه خضر كيف عينيا "
"ايه " رسمت لحية على وجها
"خوك "
قالتلها براسها لا
"تحبو "
خزرتلها بعين موء فاهمة شقالت "يعني ،انت وهو مرا وراجل باش يعرسو ويجيبو صغار"
عقدت حواجبها و رجعت للشباك،حضرتلها الدواء ،عاونتها تشرب ،شويات و ضربها النوم وفشل بدنها وغرقت في النوم .
قعدت تخزرلها وتثبت ،يعني هو يحبها وهي تحبو !؟