ايناس ...
يمكن مانحس بتعب الاهل علينا .. الا اذا صار عدنا اطفال وشفنا شلون نتعب عليهم
مانحس بخوفهم الا اذا جربنا نفس الخوف ..
مانهتم الا اذا جربنا نفس الاهتمام ..
بيوم الثالث .. امي قررت تسبح كرار واني لازم اسبح ياه .. خطيه امي شكد تعبت وياي .. هي محضرة نفسها ..
طشت جديد. والا فافون ..
صابونه ركي ..
حنه وملح ..
حضينه جديدة رغم راح تنذب .. بس لازم جديدة
حطت امي رجليها بالطشت وخلته بين رجليها ..
وهو كام يبجي .. وجهه صار احمر
امي كامت تسمي
ـ يمه اسم الله الرحمن .. اسم الله .. الزهرة ام الحسن تحميك من العين ..
كامت تأخذ من الماي الي بالكدر اليمها وتخلي على راسه
وانه كلبي فرفح
ـ يمه فدوة على كيفج وياه ..
ـ ايااا يمه شمالج .. شني اول مرة اسبح جاهل .. لو هذا جي ابنج ...
خلت الصابونه على راسه وفركته على كيف .. وخلتها يمها .. كامت تمسح على راسه حتى توغف .. ونوب صبت ماي هم بيدها ..
وصبت على جسمه ماي .. بعدين طلعته لفته بالبطانيه الزغيرة ..
زنوبه مكابلتنه وكاعدة .. وشهد خطيه طلعت هي وامجد وي ابوي للمزرعه ..
عدهم محصول طماطه .. وعلى وجهه حصاد .. والشمس قويه يغطونها خاف تحترك ..
ندس بيه
ـ ولج لو انه منج مااسلم ابني لهاشميه "تقصد امي " شوفيها شلون تفرك بجسمه .. راح ينهرس بيدها ويصير ثريد
انه سمعتها وانه صحت .. ونوب زينب تضحك بسكوت
ـ يمه فدوة على كيفج وياه راح تفركين ايدة
دارت امي وجهها عليه ضايجه
ـ ولج نويسه .. والله وامان الله اذا مااسكتي اخليج واكوم وشوفي ياهو الي يسبح ابنج بعد .. زينبه تترس براسج
كامت زينب
ـ يا طركاعه زنيبه .. عمي ليش مااروح واخليجن .. ولكم حسرة عليه احجي ...
وطلعت زينب ..
امي يمها .. طاسه الحنه والملح .. دافتهن وعجنتهن قبل لا تسبح كرار .. دهنت جسم كرار بالحنه والملح .. كل جسمه حتى راسه .. بعدين كمطته ..
ـ يلا نخليه بمكانه لمن يبس الحنه ونمسحه ..
كرار بعد مااسبح وكمطته .. سكت ونام ...
ـ اي هسه ارتاح اوليدج
وانه اكول بكلبي يامرتاح وهو على راسه طن مال حنه ..
وكفت فوك راسي .. يلا كومي اسبحج ماايصلح وليدج سبح ..
كمت على حيلي وامي صاحت
ـ زنوبه يمه
"زنوبه " مو هسه جانت زنيبه ..
بس امي حالها حال الامهات العراقيات .. اذا رادت منج هي لازم ادلعج
ـ زنوبه .. ولج تعالي يم كرار مايصلح يظل وحدة
وكفت امي وطلعت ملابس لي ..
وزينب بعدها مااجئت ...
ـ يلا امشي ..
مشتني ووكفنا بباب الغرفه ..
البيت الي احنا كاعدين بيه عبارة عن اربع غرف كلها ابوابها على صاله جبيرة .. ومن بين الغرف امي مسويه وحدة مطبخ .. وصحيات صايرات لجوة .. تدخل من باب مفتوح على صاله .. وتدخل للحمام.. برة هم اكو حمامات خارجيه .. و ديوانيه خارجيه .. يعني خوش بيت ..وهذا تابع للمزرعه .. والملاج ابو المزرعه .. يتوجب عليه يهيى مسكن للفلاليح ..
ورجعت امي تنادي
ـ يمه زنوبه تعالي خايبه اريد اسبح اخيتج خطيه ابنيها سبح ومايصلح تظل بلايه سبح
طلعت زينب من وحدة من الغرف ..
وهي تكول
ـ هسه جنت زنيبه واترس براس نوسه عليج .. شبساع صرت زنوبه .. امي العزيزة انتي ام مصلجيه .. ماادلعين الا اذا تردين شي .. معقوله نبع الحنان هيج صارت ..
صاحت بيها امي
ضحكت اني .. "صدك لو كالوا الكلوب سواجي " لان حجيتها قبل لا تحجيها زينب
ـ تعالي ولج لا بنعالي .. اريد اسبح اختج خطيه
ـ اي هسه عرفتح هاشميه .. قبل شويه ختلطت عليه الامور وكلت يجوز امي كامت ادلعني من باب الحب
امي خطيه كامت تعضعض بشفتها ..
ـ ولج زنيبه شلعتي كلبي تعالي.
ـ جايه ..
وكفت يمي وهمست ..
ـ روحن خليني اخذ راحتي وين ابو الكور .. واشيله ..
امي صاحت
واحنا ندخل للحمام
ـ زينبه ديري بالج اتشيلين الفرخ ترة هسه انام ..
ظلت زينب ادردم ..
واحنا دخلنا للحمام .. امي خطيه سبحتني .. وكعدتني .. بالجفت ..
وطلعنا ..
بعد هذا اليوم توالت الايام .. كرار كبر طلع من الاربعين يكولون الطفل بس يطلع من الاربيعين يكبر .. وابوي جابله كاروك .. من الخشب .. جوة جرارة سفطت بيه الملابس ..
رفضت اظل عاله على اهلي انه وابني الى متى ابوي يشتري الحليب و الحفاظات و تبعاته.. .. قررت انزل وي اهلي للمزرعه اشيل عن امي وهي تكعد بالبيت ويدير بالها على كرار . بيت الملاليج ابد مااشايفتهم .. بس انه سألت امي وعرفت ... ام حيدر المرة الي جيبتني هي امهم .. بس كاعدة عند ابنها الجبير وباقي اولادها هنا بالمزرعه مالتهم وبساتينهم ..
محصول الطماطه خوش جاب فلوس .. ابوي ايدة مبروكه .. والمزرعه جابت محصول زين .. لان ايدة دوم بيها ...
اجت امي واخواتي تعبانات كلش .. وانه على نومه كرار طبخت الغدا لهم ..
عركانات .. وحالهن حال ..
بكلبي كلت الله ينتقم منك احمد بهذلت احوالنا ..
ركضت عليهن .. نزعت امي جواريبها ..
ـ الله يساعدجن
ـ ويساعدج يمه .. شقضيه كومي .. يمه كومي ..
ـ ايااا شني سالفه مدي رجليج ..
مدت امي رجليها .. خطيه .. نزعت جواربيها ..
وكلت لهن
ـ كومن خيه غسلن حتى اصبلجن غدا ..
زنوبه كالت
ـ شطابخه ام كرار ترة ميتين من الجوع ..
ماادري كلبي ليش نبض .. فرحه صاغت روحها صواغه ودخلت روحي
"ام كرار "
شحلات الاسم ..
شحلات السند يمه ..
رديت عليها
ـ بانيه زنوبه روحي غسلي وتعالي
كامن البنات غسلن .. وامي جبت لها طشت غسلت رجليها ..
واسألتها ..
ـ جا ابوي وامجد وين ...
