ارواحنا تغادرنا بقرب مغادرة اقرب الناس لنا ..
انحبهم .. همه ارواحنا ...
اريد اموت ... اي والله الموت اهون عليه من ذيج الليله المرت عليه ..
انه اخاف على كرار .. مااانومه يمي اخاف بالليل اكلب عليه .. انومه بحضني ... ذيج الليله وبعد الكلام الي صار بيني وبين امي الظهر ... احس كلهم اتفقوا عليه ... امي واخواتي اعزلوا عني ... ظليت بالغرفه وحدي طول الوكت .. من وصل الليل امي مااجت نامت يمي مثل كل يوم ... شفتها طبت لغرفه البنات ..
الصفعه على الخد ممكن .. يروح اثرها بيوم او يومين ..
بس الصفعه على الكلب شيطيبها ... تخليه ينزف .. وانه هيج انصفعت على كلبي من شفت امي خلتني ودخلت لغرفه البنات ..
اول مرة وبعد وقت طويل .. حسيت روحي طفله ... اريد حضن ... الغصه تكونت بحلكي مثل الموس ويجرح بلعومي لا اكدر ابلعها ولا اكدر اطلعها ...
بذيج الليله نزلت افراش كرار يم افراشي ... وخليته بحظني مثل ماتسوي امي ليليه .. وكمت انعى عليه بصوت ناصي ...
گلبي مثل زراع ديم
يكرب صبخ و يناطر الغيم
منهو اليساعدني عل? الظيم.....
........
يمه راسي اوجعاني گومي شديه
او شد الغريبه ما مضه بيه
شدچ ييمه العافيه بيه...
نمت ودمعتي ماافاركت خدي يمكن .. يمكن انكتب عليه الدمع ...
روحي فرفرت مثل الطير جنحه مكسور ..
يمه انه مكسور جنحي ليش تكسرينه بالزايد ...
كعدت بعد ليل اخذه صبح يشبهه ... ابني نايم بصفي .. دخلت عليه امي ..
ـ يلا كومي ورانا شغل .. امس شهد كلش تعبت وماتكدر تروح
رديت عليها
ـ يمه وابني ...
ـ ابنج شعليه عرج مايصيبه يمه شهد ... يلا كومي
طلعت وضليت مدنكه راسي .. صافنه على ابني .. على روحي ...
امي تحجر كلبها عليه ....
تقربت من كرار وشميته ... وبست راسه .. مااعوفك لمن روحي تعوفني ... يروحي انته
والله لو اموت وادري بتركك حياتي ماعوفك لان انته حياتي وروحي
كمت طلعت ورة امي .. لكيتها مخليه قوري الجاي كدامها ... وابوي كاعد ... وزينب و امجد ... كعدت بدون حتى مااكول صباح الخير ... اباوع للوجوة متغيرة ... غريبه عني احسها ... احساس فاجئني ليش احس روحي غريبه عنهم .. عبالك مو بتهم ... ابوي منزل راسه يخوط بالستكان سكته .. جفيته على راسه "شماغه "
وزينب تكسم بالخبزة وتعمس بالطماطه كدامها مكلايه .. هي وامجد .. وامي تشرب بالجاي سكته ..
شال ابوي راسه وباوع عليه شويه .. ورجع دنك ..
محتار ... لا مغموم ...
اي مغموم ومهموم ... فجاة كبر ... صار مثل واحد عمرة بالثمانين .. يمكن الي صار قبل كبرة بس هسه وهاي نظرته حسيته اكبر واكبر من اي لحظه ضيم وقهر شفته بيها ..
لا لكمه نحطت بحلكي و لا جاي الي نشرب .. خليت وكمت ... دخلت للغرفه ... بدلت لكرار .. وبدلت حفاظته .. وعندي بطل ماي .. ترسته ماي نظيف .. والحليب خليته بقوطيه زغيرة اخذته من القوطيه الحليب الجبيرة ... وممته سويتله بيها .. وحطيتهن بعلاكه .. وخليتهن يمي .. لبست هدومي .. حجابي وعصابتي .. وشديت حزامي .. وخليت ابني على اديه وطلعت ... رغم بعدة منعس بس كعد وكام يضحك الي .. يمن ريت فدوة اروح له .. انه واهلي كلهم ..
خليته على خاصرتي وعلاكتي بيدي .. لكيت ابوي توة يريد يطلع هو وزينب و امجد وامي تشد بحزامها ..
من طلعت كلهم باوعوا عليه ..
امي صفنت بيه ... باوع عليه مرة ومرة لكرار
حجت تستفسر رغم كلشي واضح
ـ وين رايحه بيه
رديت عليها وانه اسند ابني لي .. وانسد روحي بيه
ـ ماخذته وياي
ذبت حزامها
ـ وين ماخذته .. للتراب وجبس التمر و الشمس والضيم
حجت اخر كلمه بصياح ..
ماادري ليش انفجرت بالبجي ... وانه اكول لها
ـ ابني مااخليه هنا .. ابني يمه ابني ... تردين اذبه
ـ وين ذابته مخليته عند اختج ولج ... لو هسه شهد صارت مو زينه
ـ مو .... مو زينه ... بس هذا ابني وانه ملزومه بيه ..
ـ اسمعي ولج نوسه ابنج ماايطلع تخلينه هنا واطلعين عرفتي يو لا لج
صحت بوجهها
ـ لا ... ابني مااعوفه لو تموتوني .. تردون تبيعوني مثل مااسويتوها كبل .. تردون تحرموني من امي ... اكتل روحي ..
درت وجهي لابوي
ـ اكتل روحي بويه .. اكتلها وخطيتي بركبتكم
سكت ابوي .. وعيونه تنظر لي ..
وصوته مثل ماي وطفه ناري
ـ ردي بويه ... اخذي ابنج وردي الشغل مايوكف على غياب يوم
امي صاحت
ـ اياااا
ابوي كال لها
ـ اششش ... شدي حزامج وطلعي كدامي
رديت وابني بحضني ... ودمعتي بخدي مثل النار ... وتجوي ..
يمر الوكت مثل السيف علينا ... يكطع من اعمارنا واحنا بس انريده يخلص ...
بذاك اليوم خلصت وكتي وانه العب وي كرار ... يناغي ويكركر حيل ...
على الضحك وتكركر كعدت شهد ... ساد الصمت لمن شافتني وطلعت راحت تغسل .. رجليها مضبرة ... وتمشي على كيفها ... شفتها فاتت للغرفه ... كمت وراها .. لكيتها تريد تسوي ريوك لروحها ...
وكفت يمها ..
ـ وخري انه اسويلج ريوك ..
ردت
ـ ماعليج بيه انتي انه اسوي شنو شايفتني معوقه ..
سكتت رجعت كلت
ـ شهد انه مو قصدي والله بس اخذني الفضول يمكن ... انه ... انه والله شهد
دارت وجهها عليه
ـ اششش بسج .. انه رايحه وانتي سويلي ريوك
طلعت من المطبخ وانه ركض .. ركض سويته لها ..
رجعت وانه شايله الصينيه .. لكيتها لازمه كرار وتضحك بيه وتدغدهه ..
وهو اخدودة كبار من يضحك يصير شحلاته ..
خليت الصينيه كدامها ...
دارت وجهها لي
ـ هذا ابنج كل ما يكبر يصير حلو .. راح يخبل البنات من يكبر ..
ضحكت
ـ يمن فدوة تروح له امه .. جا غير طالع لابوة
حجيتها بدون وعي .. بدون ماادري ..
عم الصمت بينا .. والحجايه غصيت بيها مثل العضم .. طلعت وظليت غاصه بيها ..
بدات شهد تتريك ..
ـ نوسه هاي الدنيا مانصحت ويانه مدري شبيها .. تدرين الي شفتيه بالصورة .. تزوج
ـ تزوج! ?
ـ اي تزوج لو شايفه الخذاها .. لا خلقه ولا اخلاق .. اكلج احنا مااعدنا حظ .. الصورة اخذتها من وحدة تصور بالكليه اشتريتها منها بعد مانسختها نسختين وحدة لي والثانيه انطتها له ..
شفته اول ماادخلت الكليه .. جان مرحله ثانيه .. جان عدني امل ممكن يوم يحس بيه وتلتفت لي .. بس هو ابد ولا جنه يشوفني كدامه .. ويمكن يشوفني بس كلبه ماارادني ..
قبل ماابطل سمعت عنه تزوج .. بيومها متت .. احترك كلبي وعطب .. وتحول الى خرابه .. الصورة صدك ضامتها بس مااشوفها الا مرات .. من تحن روحي واشتاك .. من اشتاك لضحكته لصوته و عيونه اطلعها ..
تقربت منها وحضنتها ..
شهكت بحضني وكامت تبجي مثل الطفله ... حسيت بيد زغيرة تنمد بينا .. وشفت كروري يمد روحه يريد يدخل بيناتنا .. شالته خالته وهي ضحك
ـ يمه فدوة لليريد يحضن خالته ..
.....
يوسف ..
كل الوجوة انشالت .. كلها كامت تباوع عليه .. اول واحد استوعب كلامي وحجه هي ام علي
ـ هذيج البت بعد مالها دخله لهذا البيت يوسف
رديت عليها
ـ وانه كلت ام علي .. اريد اجيب ابني مااكلت اريد اجيب امه
ـ اي خويه خاف لك نيه تردها .. مالها ردة
سكتت ودرت وجههي لاخوي
ـ صالح انه اريد اجيب ابني .. الى متى يظل عد الوادم الغرب ..
رد عليه صالح
ـ انجيبه خويه احنا ماعدنا فروخ تظل بعيد عن اهلها وعمامها .. حضر روحك نروح لعمهم ونشوف همه بايا نويه كاعدين
....
وكفت كدام المرايه عدل بجفيتي و عكالي .. و يسر وراي .. شايله بيدها الخاجيه "عبايه الرجال الصيفيه "
جنت اشوف بعيونها الحجي ...
كلت لها وانه ارش بالعطر
ـ سولفي شعدج عيونج تسولف
تحسرت وهي ترد عليه
ـ تردها
وكان جوابي قاطع
ـ لا
ـ ليش ماامعقوله تنطيك ابنها .. لازم تكول اخذوني وياه
ـ مااجيبها .. اجيب ابني واجي .. هاي البت هواي انظلمت واذا رديتها لي هسه تنظلم اكثر يمكن اليوم الي يجيبها العاطفه على ابنها بس بعد يوم يومين تنساه وتبني لنفسها حياه جديدة تنساه وتنسه اهله ..
اخذت خاجيتي منها وطلعت .. لكيت صالح متانيني ...طلعنا سوة ..
رايحين لعمها ..
بالسيارة كال لي صالح
ـ احنا اليوم نروح لعمهم .. ننطيه خبر حتى نحضر ارواحنا ونخبر عمامنا ونوب نجي عليهم حتى همه هم يحضرون عمامهم ..
هزيت راسي
ـ هاي هيه خويه مثل ماتكول ...
وصلنا لبيت عمهم من دكينا الباب .. استقبلنا الرجال وعرفنه ..
ودخلنا للبيت .. بعد مااكعدنا وشربنا الجاي .. كال صالح
ـ شوف خويه احنا اجينا حتى نخبركم .. ترة اجينا حتى ناخذ وليدنا .. صدك احنا تأخرنا بس اخرنا عنه القوي
سكت الرجال وخله راسه بالكاع .. رد علينا
ـ عمي خلوا الفرخ عد امه .. ظليمه تأخذونه وتبعدونه عنها
ـ جا بويه مو ظليمه ابوة لليوم ماشايفه و هو يتحسر على ريحه فريخ له ... بعدين عمي هاي سنن العشاير .. الفصليه يخلص فصلها من تولد ولد .. بتكم خلص فصلها انطونا ابننا
ـ هاي هيه تدلل حجي .. اوصل خبر لاهلها واكولهم .. وانخبر عمامنا والله كريم ..
كمنا على هل حجي ..
يتبــع
بنات باجر هم انزل لكم .. ان شاء الله ..
البارت 2000 كلمه
