يوسسف
جنت اريد استعين بصالح بدفنه .. ماينطيني كلبي اخلي ابني جوة التراب .. يسر جانت كاعدة علۑ كرسي متحرك .. رغم الالم ماابعد الولادة بس اصرت تجي .. جنا واكفين حتۑ نستلم الطفل ..
الكل يعزي بيها .. اجو اهلها واخوانها .. واحد بوسها وواحد يحضنها .. وحس بعيونهم الملامه لي .. جنهم يكولون لي .. اي هذا جراءك حذرناك وانته ماارديت علينا تستاهل ..
ستلمت الطفل خليته بحضني .. مااعرف شكول لو شلون اوصف ..
جان طفل كامل .. ماعدا راسه عبارة عن لحمه ومطروحه .. شي غريب وعجيب .. عيون حلك ... شعر .. كلشي بس .. ماكو جمجمه .. عبارة عن طفل بلا راس وبنفس الوقت .. كان براس .....
يسر كانت تباوع له بذهول ممصدكه عيونها .. معقوله وبعد هذا الانتظار الطويل .. تحضن ابنها ميتتت ...
كنت اسمع وهي تكله
ـ ماجنت اريد شي بهاي الدنيا كد مااردت احضنك .. اشمك .. ارضعك مثل كل ام ياروحي .. ياروحي
جانت كل كلمه بغصه .. كل حجايه بشهكه ودمعه ..
حضنته وهي تهز بيه سكته .. بس صوت شهكتها تنسمع .. جنت كاعد مخلي راسي بين ركبي وابجي مثل النسوان من تبجي .. وصالح وعلي يروكضون بالمستشفۑ يسوون الازم من الامور حتئ يطلعونه ..
حسيت عبالك عندي عشر ولد وكلهم خسرتهم مرة وحدة .. شعور يهاجمني مثل المرض ويأكل كلبي .. شويه .. شويه بدون رحمه
خسرت ابني كبل لا حتئ احضنه لو مرة وحدة بس ..
طلعت من المستشفۑ شارد من نظرة الناس الي ... جنت مقرر اشرد لاخر مكان ممكن يلكوني بيه ..
وين ماجان .. جانت انتكاسه حقيقيه بيني وبين يسر .. اخر عصا بينا ونكسرت اشد كسرة ومستحيل تنجبر لو تصلح ..
ركبت السيارة بعدني ماامشغلها .. لكيت علي يركب وياي ..
عيونه شافت عيوني ..
وسؤال بعينه كبل حتئ شفافه تنطق بيه ..
ـ وين رايح عمي المفروض تضل وي عمه يسر تعاونها وتساعدها علۑ البيها .. ترة ماواحد بينا يكدر يساعدها غيرك
كلمه وحدة طلعت مني
ـ مااكدر .. احس روحي خسرت ولدي كلهم اليوم وانه ماعندي اصلا .. هسه اكتشفت انه ماعندي ولد .. حتۑ ابن ايناس مو ابني .. ابنها حكها وانه اخذته منها .. والله مااقصر وياي اخذ ابني مني كبل حتۑ لا حضنه لو اشمه .. حرمت روحي وحرمت يسر من هذا الولد بتصرفاتي علي
تنهد علي .. شفت شفته شلون رجفت تقاوم دمعه عينه حتۑ لا تنزل وي دمعه عيني
ـ ادري بكل الجاي تحس بيه عمي .. بس ترة عمتي يسر الوجع البيها اكبر منك لازم تروح لها وتساعدها وتواسيها
ـ يسر تكرهني علي
رد مستغرب
ـ انته شتكول عمي .. يسر مرة مؤمنه بالله مستحيل تكرهك .. انته مالك دخل
ـ خسارتها مايكدر يقلل منها شي غير كرهها الي ... نصحتني كالت لي لا تجيب ابن ايناس الله يطلعها بأبننا بس انه مااسمعت منها ..
سكتنا شويه .. ونوب كلت
ـ انزل علي اصلا انته شجابك وراي .. روح وياهم
ـ اجيت لزم ايدك .. اعاونك مثل ماعاونتني وطفيت نار كلبي تذكر عمي .. واكلك لازم ترجع هناك مكانك مو هنا بالسيارة
ردة خلاني اسكت .. انصدم .. خله ايدة علئ متني وطبطب عليه ..
ونزل .. ظليت كاعد بالسيارة الئ وقت مايعلم بيه بس رب العالمين .. شغلت سيارتي .. وكمت افتر بالسيارة .. واسولف وي روحي .. مرة الومها .. مرة ابجي عليها ..
انه شحصلت من حياتي .. ششفت بس القهر والضيم ..
دك تلفوني جان علي يتصل عليه ..
يارب دخليك ...
شلون بيه وبحالي ..
رفعت الموبايل ..
جنت خايف اذا يسر صار بيها شي ..
ـ اها علي شصار
رد
ـ عمي عمه يسر ماترضه ندفن الطفل الا تجي انته ادفنه
هنا عرفت عقاب يسر الي وجان هذا اقل شي .. تريدني اشوف ابني وهو ملفوف بالقماش الابيض وبيدي اهيل عليه التراب ..
سألته ...
ـ وين انتم
ـ احنا بسيد اخضير بالمكبرة
"سيد خصير .. قبر احد السادة الصالحين .. يقال انه مات وهو طفل صغير و شاع صيته واسمه لان له كثير من الكرامات و معروف عند اهل الناصريه .. يدفون بمنطقه قريبه منه
الاطفال الرضع عند موتهم "
طلعت بسيارتي ... لسيد اخضير ...من وصلت لكيت ام علي ويسر كاعدة بالكاع والطفل بحضنها .. وتسندها .. وعلي وصالح واكفين .. منتظريني اجي .. ماادري من وين جايبين الكرك .. لازمينه واكفين
يسر اول مااشافتني جاي عليهم وتقربت .. صوتها كان مبحوح مثل واحد صوته رايح من الصياح .. ماادري اذا مصيحه فعلا .. او صوتها راح من الالم والحزن ..
كالت
ـ شني شردت .. ماكو غيرك يحفر كبرة وينومه بيه ..
اخذت الكرك منهم .. وكمت احفر .. بروحي مو بالكاع .. كبر زغير .. ولحد اكبر من عمر النايم بحضن امه ..
شبيك يكلبي مااشفت يوم حلو .. كضيتها الوكت لازمك من خوانيك حسرة عليك تضحك
ادنيت من يسر ...كعدت يمها .. اريد اشيل الطفل من ايدها .. عيونها خلت بعيوني ..
ودموع مغطيه وجهها
ـ لك كلب تدفن ابنك يوسف .. ابني الي كظيت عمري وانه احلم بيه ...هنيال كلبك يهنيال روحك .. يهنيال ضميرك
نزلت راسي ...شلت من حضنها الطفل .. وبسته بصدرة كان مكفن كل جسمه .. كمت بيه وخليته بكبرة ...
كمت اهيل عليه التراب .. بدون مااحد يساعدني .. بهاي اللحظه حسيت كلبي انصدع .. و دار وجهه عن الدنيا ... انه ويسر من ذاك اليوم انه ويسر تفاركنا .. مثل ماكلبي دار وجهه هي هم كلبها دار وجهه عني وعن الدنيا .. اخذوها اهلها وماارجعت
اسبوع وانه .. كاطع الاكل والشرب ..
الئ اليوم الدخلت بيه ام علي عليه ..
شمرت مصطفئ عليه وهي تكول
ـ هاك خاله اخذ ابنك تعبت انه .. شني ماتريدة روح ردة لامه
شلت راسي لها .. جانت بينه تعبانه وتلهث .. مصيفي كبر يريد يزحف .. ويكسر و يلعب وام علي خلكها مو كلش ..
رغم هذا مااقتنعت بكلامها .. يمكن تريد اطلعني من حالتي البيها
ـ ام علي عليج العباس اخذي وطلعي ترة روحي طالعه من الضيم
ـ وانته شني ليمته تضل هيج بهذا حالك .. شوفك لحيتك وجههك اصفر جنه ليمونه ... كوم شوف حالك مالك
ـ مالي خلك ام علي رحميني الله يخليج
ـ شلون مالك خلك .. مرتك المذبوبه عند اهلها .. الوادم كلت وجوهنا
صحت بصوت
ـ انه مااطيح حظي الا الوادم وحجي الوادم وشكالت الوادم .. الوادم ماتجي تشيل البكلبي ام علي انه واحد دفن ابنه الماشام الهوة .. ترديني اهتم الحجي الوادم .. عوفيني هلبت الله ياخذ عمري واخلص
ـ وابنك هذا منهو له اذا تريد تخلص وتدعي علۑ روحك
بلحظه هبت ابني من ايدها وركضت بيه .. ماادري شجرة لي .. طلعت بيه مثل المسودن .. حطيته بالصدر يمي ..
وطلعت بيه .. اخذتني رجلي لعم ايناس ..
دكيت الباب .. وطلعلي هو
سلمت عليه رد بس بوجهه الثكيل .. حكه .. اذيتهم واذيت بتهم بزواجها و من اخذت ابنها و طلاكها .. كلهن ظلمتها بيهن ..
كلته عمي
ـ انه اجيت ارجع مصطفۑ لامه
باوع عليه بغضب وكال
ـ اخذ ابنك وروح منا احسن لك .. شني بويه احنا لعبه بيدك .. يوم جبيبوة ويوم اخذوة يلا منا دربك
ـ عمي حكك شما تكول بس انه اريد اردة لامه ادري بيها متانيته هسه
ـ لا ابشرك امه بخير. ..رجعت لدراستها وراح تدخل جامعه يعني لا معتازتك ولا معتازة ابنك وهسه راويني عرض جتافك ..
سكتت .. تفاجئت .. ايناس .. كملت حياتها .. استمرت ونست مثل مااتوقعت تماما .. تريد تدخل كليه ... وهذا الي جنت توقعه .. بس ممصدكه هسه .. انصدمت من سمعت منه .. عبالك قالب ثلج ونحط علۑ راسي .. انشل عقلي .. مااحسيت الا باب الحوش انسد بوجههي .. هنا فزيت .. ابتبهت لروحي انه وين .. منو .. ليش كلهن لتمن سوة ..
حضنت ابني ومشيت انه وياه غربه بهذا العالم ..
رجعت لبيتي .. لدنيتي .. ولشغلي .. من غير يسر الي رفضت رفض تام ترجع لي رغم كل المحاولات .. وصار الطلاك بيناتنا وعلۑ رفض الاهل والعمام ..
........
بعــد ثلاث سنوات ..
ايناس ..
جنت طالعه من باب الكليه ..
اي ايناس الفصليه .. ام التمر والزرع صارت من امهات الكليات بعد تعب و جهد و دعم ابوي اهلي الي .. ابوي جان يريدني دكتورة .. بس معدلي طلع لي صيدله بجامعه الكوفه ..
...
ماانسيت ابني بعدني انام وانه احضن هدومه الزغار المحتفظه بيهن .. روحي بعدها تحن لكاروكه .. شكد اشتاق اهزة ولولي له .. بس امي تكول ماايصير الكاروك ينهز وهو فارغ ماايصلح وموزين عليه .. وانه ملتزمه كلشي مو زين علۑ ابني مااسويه ..
جنت طالعه للخط جان ينتظرني .. جنت امشي ومامنتبهه االاي احد .. صوت من وراي اجاني
ـ يبنيه .. يبنيه تعالي اوصلج
صح اسمع عن معاكسات الشباب للبنات و مناوشاتهم بس مو توصل لهل حد .. شنو مايستحي ماعندة اخوات هيج يكول لوحدة من بنات العالم .. سكتت بس نار وتفور بضلوعي
امشي واحس الخطوات وراي
ـ شبيج يبنيه ترة سيارتي اخر موديل والله
درت وجهي .. جنت اريد اكب بيه .. وطلع حيفي من عيونه شنو هل اخلاق ..
لكن الصورة صدمتني .. وخلتني ارجع للخلف خطوات ..
منو هذا .. نعكد لساني وانه اسإل عقلي واستنجد بيه .. اريدة يسعفني ويغير الصورة الي رسمها الي
"معقوله "
مستحيل
جان صوت الجهوري الي اول مااسمعته نفسه ماتغير ..
بس الملامح تفسها .. لبس متغير .. هو متغير ...انسان تحسه مو هو من داخل شي ثاني
ـ اي انه هم تغيرت عبالج بس انتي
مااطلعت مني بس هاي الكلمه
ـ شتريد
شريد يعني كلشي .. مظل عندي شي .. كلشي عندي اخذة .. والبنيته مستحيل اهدمه واقاتل في سبيل يكمل ..
والجواب جان اكبر من صدمه الاولۑ
ـ اريدج .. مو بس انه وابنج هم يريدج
جنت اريد .. اقاوم مااخضع للمساومه بالمشاعر والاحاسيس .. مااريد يستخدم ابني ورقه ضغط عليه .. بس يمكن بذيج اللحظه عرف شلون يلعبها وقرا افكاري .. كال
ـ هناك منتظرج بالسيارة ..
روحي طارت للسيارة .. وينها .. هوايه هنه .. منو بيهن ابني .. وشمعه حياتي ودنيتي ..
تقدمت خطوة .. اريد ادورهن وحدة .. وحدة .. اشم ريحته واعرف دربه .. اول مااخطيت ..
لزم ايدي كال
ـ اذا صعدتي ماتنزلين ايناس .. انه جابني الشوك لج .. وانتي يمكن الي راح يجيبج ابنج لي .. بس الله شاهد علي .. الماضي راح .. واحنا ولد اليوم .. البنيتيه وحدج راح يكمل وانه بظهرج وسدج وابنج بحضنج ..
هلن ادموعي مثل المطر .. مثل يوم فاركه واكثر
ـ اريد اشوفه
ضحك وجهه وبينت وصلت الضحكه لعيونه ..
سحبني من ايدي
ـ تعالي ..
....
ماادري اذا جان غلط او صح ..
يصير او مايصير بعد هذا المر الشفته .. ارجع واكمل حياتي واي اكثر انسان كرهته ..
ابوي انسان بسيط وطيب .. يدري حياتي متوقفه هنا .. عند ابني .. من شاف شلون روحي فرفحت عليه قبل رجعني مع لسته الشروط والطويله وتعهد بيها يوسف .. انو مايخالفها ..
الخوف بعدة موجود من امس واليوم وباجر ..
مااجذب واكول ماحبيت يوسف .. حبيته .. بس ماازال الشك بداخلي يجي يوم ويخلخل هذا البنيان شي و يهدمه .. انزرع غصبا عني ..
رجعت .. ابني بحضني .. وايد وعدت تشد علۑ ايدي وماتعوفني ..
اما اخواتي
شهد كملت و تنتظر تعين .. بلكي تتعين
زينب تزوجت واحد واياه بالكليه ..
احمد من سفرته وبعد ماسمعنه عنه شي ..
امجد كبر وصار سند لابوي ..
بدات القصه علۑ لساني وانه انهيهها ..
اكول المرة مو جزه صوف حتۑ تسدون اديونكم بيها .. المرة كيان .. بني ادم يحس وله شخصيته .. ارحموة .. و عطفوة عليه اذا ماكدرتوا تنتطونه حقوقه ..
تمتـــت
بنات حبايب كلبي
احب اشكر كل وحدة دعمتني .. بكلمه ...بتصويت .. حتۑ بمشاهدة ..
اشكركم من قلبي ..
عشت وياكم هاذي الايام وانتم تحملتوا مني .. يمكن اخطا۽ ملائيه او باراتات قصيرة .. كله هذا تشكرون عليه
افاركم وعود لكم ان شا۽ الله بقصه جديدة .. ادعو الي ماافقد الهامي و يستمر قلمي لان فعلا احب الكتابه ..
اشكر كم متابعه كانوا وياي من البدايه .. اكولهم الله يوفقكم ويسهل اموركم ومايوقف لكم حاجه ..
طبعا حبيت انهي القصه قبل لا ينقطع النت .. عشت وي ايناس بكل لحظه واني اكتب .. عشت معاناتها والامها وكول الله يعين كل بنيه مثلها والله يجبر كسر كل بنيه مكسورة ..
النهايه
اتمنۑ تعجبكم .. ونال استحسانكم ..
لا تنسون التعليق وشنو رايكم بالنهايه ..
احبكم
وردة عمــري
