الســلام على الحسيــن وعلى علي ابن الحسين وعلى اولاد الحسين وعلى اصحاب الحسين .. الذين قتلوا دون الحسين عليه السلام
عظم الله لكم الاجر بمناسبه اربعينيه الامام الحسين عليه السلام وكتبكم الله سبحانه من زوارة ......
اينــاسسس
شكد الجبل عالي .. وشكد قوي وماتهزة ريح ..
لكن مرات تحريك حجارة ممكن تأدي الى سقوطه وانهيارة ..
ينتر وتبقى بس تراكم الحجارة بمكانه ..
بعد مارجعوا اهلي من شغلهم وتصافت الكلوب بيني وبين شهودة .. وبيني وبين نفسي قررت احجي وي امي واكيد هي كلبها الحنون راح تحن عليه .. ماترضالي بالضيم والقهر وفراك ابني ..
امي وابوي مو على بعضهم ... يختلفون .. شي بيهم مكسور من صدك .. امي بعينها الدمعه وهي تعاين عليه .. امس ماخلت كرار بحضنها .. اليوم من رجعت لهسه وهي حاطته بحضنها وتبوس بيه ..
رغم هذا فرحت كلت اي هذا حمل وطاح .. كعدت يمهم والستكاين كدامي .. ابوي يحب الجاي ورة الغدا .. كعدت اصب لهم جاي ..
حجيت وانه اصب بستكانه
ـ بويه كرار ماعندة حفاضات وحليب وكون تنزل للولايه خوش حتى تجيب وياك ملابس له ملابسه صغرت عليه
دنيت استكانه يمه ... رفع راسه لي بس ماحاجاني .. ملامحه متجهمه ... الحزن غالب على عيونه ..
ـ شبيك بويه .. اشوفنك ضايج ..
رد عليه وهو منزل راسه عني
ـ مابيه شي بعد ابوج انه اكول خلي روحه الولايه لباجر العصر بلكت يحلها من عندة
"يحلها من عندة "
شنو ابوي عباله ماعندي فلوس .. جاانه لمن اشتغل وتعب غير حتى اصرهن لكرار و مصاريفه ...صدك ابوي مامقصر بس ماريد اصير انه وابني عاله عليهم وهمه بيهم المكفيهم..
ـ ابويه ترة عندي فلوس .. مصاريف كروري عازلتهن وكونك مضايق على اجم فلس هم اطيك من العندي
طك الستكان بالصحن حيل وحجه بعصبيه
ـ فلوسيش بويه .. فلوسيش ماتكليلي هو انه يمته نتطرتج تنطيني فلوس
وخله وكام ...
ضليت اعاين لظهره .. خلاني ومشه .. شبيه ابوي مو طبعه يعصب هيج ابدا ...
اندنيت يم امي وهي مخليه كرار بحضنها وتلولي عليه .. وهو خدران على حضنها
ـ يمه شبيه ابوي .. شني جنه ضاج مني
امي حالتها اصعب من حاله ابوي .. بعيونها الدمعه تلالي مثل الماسه من تضربها الشمس لو الضوة هيج عين امي ...
ـ خلي ابوج بحاله يمه .. حكه الرجال تعبان من الشغل والضيم العليه
دنكت راسي
هم صدك حكه .. بس شبيدي .. وانه يادوب شايله روحي وكلبي من الهموم
ـ وانتي يمه شبيج .. يمه اذا موال ام حيدر بعدة براسج .. فدوة اروح لج انسيه انه مااكدر اهل كرار بس يسمعون بهذا الحجي يرجون ويأخذون ابني مني وانحرم منه ..
ردت ببحه البكاء المكمومه
ـ وانتي ياهو الكالج يخلونه لج يغبرة .. باجر عكبه ويجون يأخذونه شسوين .. اها شسوين تضلين هيج طول عمرج ... الوادم عايشه .. بيوت ورجوله و افروخ وانه هذا حظي وحظ بناتي الضيم والقهر ومكدته
خليت ايدي على رجلها الي تهز بيها حيل
ـ يمه ....يمه فدوة روح لج لسكتهم كل هاي الايام يسكتهم سنين بس اذا انتم وديتوا عليهم وكولتهم طلكوا بتننا اكيد يأخذونه مني ..
ردت عليه بسرعه وبدون وعي والحركه دارسه كلبها
ـ ارتاحي باجر يجون يأخذونه والسكتهم ايام.. حجاهم هسه ..عمج خابرانه
ارتديت للورة ... جمود صابني .. وانه واحس مثل قالب ثلج ونحط على كلبي .. اي ثلج
خله كلبي يتجمد من الالم .. والخوف .. ارمش بعيوني .. اريد اشوف صورة امي .. وصفن بملامحها .. بلكي بيها شي يكول لا .. شنو .. يعني
اريد افسر ..
استوعب ..
واعيد حجايتها بدماغي
"ارتاحي باجر يجون ويأخذونه "
"باجر "
"باجر "
ابني اني .. عمري .. دنيتي .. جروحي ودواها ..
صبر سنيني ..
باجر ..
ليش .. ليش
وين اروح .. شسوي باجر ...
لا مستحيل .. مو معقوله ..
رجعت لامي وعندي امل تنفي كل كلمه كالتها ..
تتراجع وتكول جذب بس تريد تقنعني بشغله ام حيدر وابنها ..
ماادري شلون طلع صوتي
ـ يمه ...يمه شتكولين شنو باجر .. ياباجر .. ياهو اليأخذونه ابني
مااحجت امي ولا ردت عليه ..
دموعها سالن على خدها سكته ..
السكته تكتل ..
السكته تطعن كلبي ..
السكته موت روحي ..
صحت بصوت رج البيت وهز اركانه
السكته يعني الي حجته امي صدك
ـ يمممممممه ..
خرطت وجهي مثل الثواكل ..لمن ينثكلن بأولادهن ..
كنت اتصرف بلا وعي مني ..
طلع ابوي يركض يشوف شكو ... ادنيت عليه زحف وانه ابوس رجله ..
اريدة يكذب الخبر السمعته .. مامعقوله الناس وصلت لهل درجه من الغل والحقد و انعدام الانسانيه .. مامعقوله ماتنكسر كلوبهم ... وين الضمير .. ليش مايخافون الله
ـ ابويه ... ابويه فدوة اروح لك صدك .. صدك يأخذون ابني مني ..
سكت ابوي شال راسه لامي
ـ انه موش كلتج لا كليلها تريدينها تموت ..
جاشت امي بالبجي
ـ شسوي كلبي مفرفح على بتي .. شوفلك حل يا رجال مايصير يأخذونه واحنا نتفرج عليه وعليها
شك ابوي زيك دشداشته بحركه
ـ شسوي .. كليلي ... والكمممممم الله اكبر ماصارت هاي عند الوادم ضيم وقهر وطيحان حظ وبعدني ماخلصان ..
صحت بعلو صوتي
ـ نمشي بويه خلينا نشرد .. نروح من هذا المجان كبل لا يجونه
نظر لي نظرة المجروح
ـ وترضينها لابوج يكولون عليه شرد
رديت عليه بحركه
ـ وترضاها يأخذون ابني مني بويه
سكت
يرضاها ... ليش ماايرضاها .. اذا انه هنت عليه من اخذوني فصل لهم مااهون عليه من يأخذوني ابني
سحلت ابني من حضن امي وركضت بيه للغرفه ..
وسديت الباب عليه وقفلته ..
عيوني مفتوحات على وسعهن .. وهو بحضني كام يصرخ ويبجي ..
شسوي ..
كمت افتر بالغرفه مثل المسودنه ..
شسوي وين اروح وين اولي
اشرد ... اي اشرد انه وابني .. خليته بالكاع .. ماهمني وهو مفرفح من البجي .. والدك بالباب اسمعه .. صوت امي وابوي واخواتي ..
فتحت الخانه مالتي .. جنت شادة الفلوس الي حصلتهن من شغلي بطرف حجاب ولالفته عليهن ..
طلعتهن .. ادري بيهن مو هوايه 500 الف هذا الكدرت اجمعه من هذا الضيم والشغل مايكفن الشي بس مو مهم المهم اطلع منا ..
طلعتهن .. واخذت جنطه مالت مدرسه قديمه عندي لميت بيها ملابس لكرار و دشداشه لي.
لبست حجابي وشديت فلوسي بطرف الحجاب وحطيت عباتي على راسي وشلت ابني على متني بس شم ريحتي سكت .. وطلعت ..
فتحت الباب وكلها صارت بوجهي
ابوي بعده بشداشته ام زيك المشكوك .. وامي وجهها احمر وشليتها واكعه من راسها والبنات يبجن .. ماهتميت ولا جن اشوفهم كدامي ..
اريد اتعداهم .. وابوي لزمني من ايدي
ـ ولج وين رايحه ... تريدين تفشلينا جدام الوادم
ـ بويه عليك العباس خليني اطلع .. عليك الزهرة ارحم حالي بويه اذا انت ماتكدر تمشي خليني .. خليني انه امشي اخذ ابني وشرد
ـ وين تولين للشارع الوادم تنهش لحمج ولحم ابنج .. ياهو عندج يلفيج اخو .. عم .. خال
اخو ...
منين اجيب الاخو الي يسندني علي الدنيا ..
احسد كلمن وحدة عدها اخو يحبها ويعزها و مداريها ... يهنيالها ..
رديت عليه
ـ انام بالشارع وابني بحضني ولا انام جوة سكف وحضني فارغ بويه
انهار ابوي .. انهيارة كان اصعب من السيف من ينحط على الركبه ..
انهيارة خلاني ارجع. .. انخفاض بالضغط .. انتظر موتي .. باجر موتي ..
الليله مثل الليالي الي مرت عليه مانمت بيها ... مامكثر الليالي المانمت بيها ..
بس اللوعه بيها تختلف .. الغصه مافاركت بلعومي .. كرار بحضني .. اليوم مارضعته ممه
بس من صدري .. اريدة يشبع مني ومن ريحتي وحليبي .. اريد يغزر بيه حليبي بلكت يذكرني لو اخذوة مني ...
ذيج الليله ابتهلت لله سبحانه وتعالى ..
ربي حنن كلوبهم عليه وخليهم يخلولي ابني
اللهي وسيدي ومولاي انه ضعيفه ومالي غيرك .. ارحمني .. انظر لي برحمتك وعطفك عليه ..
اريد ابلع ريكي ماكو مااكدر ... شيسكن الروح يمه ..
اريد اشم الهوة .. احط راسي بركبه كرار واشم الهوة ..
اموت بعدك يوليدي .. روحي تروح وياك ..
وفكرت بيني وبين روحي .. اروح وياه اي .. اروح حتى لو اصير خدامه جوة رجليه ورجلين ام علي ..
لو يدك عليه الصبح والعصر اقبل .. اتحمل لخاطر كرار وشوفته وجهه الصبح
