رجعنا انه وامي ..
وابوي .. بالسيارة وابني بحضن امي ..
وانه باوع عليه .. احس السؤوليه صارت اكبر على كاهلي ..
هذا طفل ماله اب .. ماله شي يثبت وجودة لا بيان .. لا جنسيه .. لا هويه .. اجه للحياه بوقت صعب .. بوقت الناس تأكل لحم ناس بدون مايرف لها جفن ..
بهاي اللحظه قررت ابني ماراح يشوف الظيم الي شفته انه ..
راح احاول بكل جهدي ابني له حياه تليق بيه وترفع منه لاعلى درجات ..
ظليت اباوع عليه وارسم الاحلام واتخيل
راح اعلمه .. اي اسويه دكتور
ادخله احسن مدرسه... ادخله اهليه اي شنو يعني !? واذا غاليه .. اشوفلي شغله اشتغلها حتى لو كناسه
اشتري له احسن الملابس ..
اربيه احسن تربيه .. اعلمه مايظلم الناس ولا يسكت عن الي يظلمه ..
وروحي بدت تسافر لعالم التخيلات ..
ارسم خط الحياه الجديدة .. يمكن لا اكيد راح تكون صعبه عليه بس مااحسسه بهاي الصعوبه لو على كص ركبتي
من وصلنا للبيت ونزلنا ابو التكسي ..
تلكني اخواتي .. زنوبه وشهد ..
زينب كالت
ـ اها اجيتن .. شجابت يمه
ـ شجابت ولج غير ندري بيه وليد .. بس فدوة اروح له شلون وليد شحلاته ..
اجت شهد تأخذة منها .. بس امي دفعتها
ـ عابتلجن ولجن اسندن اخيجن بوسنها باركن لها ركضنتن على الفرخ .. والفرخ تشبعن منه وتملن .. ادري بيجن تالي الليل شاردات وانظل انه ومكرودة
ردت شهد
ـ شقضيه يمه غير نشوفه حلو لا
ـ دهر دهرها ام حثل ادور حلاه الحمد الله دامه سليم موش معيوب شلنا بحلاه خاله
شهد فكت عينها وهي تسندني
ـ اييااا انه ام حثل
وهي تباوع لروحها
ابوي ورانا .. صاح
ـ ام احمد جيبيه الوليد خليني اكبر بأذانه ..
عرفت من هاي للحظه ابوي راح يأخذ دور الاب .. والمربي لابني
خذاه من امي .. وشفته شلون كبر بأذن ابني .. ونوب شال وجهه لي
ـ شسمينه بويه
دمعت عيني ..
ـ بكيفك بويه انته سميه
سكت ورجع بنظرة عليه وهو يتأمله
ـ كرار ..
باسه وهو يكول
ـ هلا بيك بويه كرار
وناوشه لامي
ـ اخذيه ام احمد وديري بالج على كرار
ردت امي فرحانه
ـ بعيني وبكلبي
رغم تعبي بس ظليت واكفه حتى اشوفه وتتأمله عيوني
اجت امي
ـ فوتي يمه لا يكفخج الهوا انتي ووليدج وانتي مرضع.
دخلنا جوة والبنات جانن فارشات لي فراش .. ومحضرات الصينيه حتى نخلي بيها كرار ..
ساعدني حتى امدد وامي كالت
ـ شهد جيبي يمه دشداشه جديدة لاخيتج ترة هاي وصخه. وغسليلهابعد امج
وزينب كعدت وكابلت كرار وهي تتحسر
ـ يمه خليني اشيله فدوة
ـ ولج تركي الفرخ نايم تعبان .. تكومي جيبيلنا سجينه نحطها بالصينيه ..
دارت وجهها رادت تروح
صاحت امي وراها
ـ ولج زنيبه تعالي ..
ـ اها يمه
ـ جيبي وياج جفيه من جفافي ابوج
هم رادت تروح صاحت امي
ـ ولج زنيبه اوكفي
ـ دورينا مفتاح لنلبسه لاخيتج خطيه
ـ اي يمه
بس دارت وجهها صاحت امي
وزينب طلعت روحها
ـ فدوة اروح لج يمه مو شلعتي كلبي ومرمرتيه ترة مااصايرة ولج زينبه ولج زنيبه
ـ اوكفي ولج. شمالج برد حيلج اسمعي كلي لابوج ينزل للولايه ويجيب لنا حليب وممه وحفاظات ولو عدنا حفاظات بس ميخالف وكليله يجيب كلنس يلا روحي
بس سمعت حجي امي طارت
ـ خل اطلع كبل لا صيحيني ..
اجت شهد وجايبه دشداشه منها .. واخذتني للحمام غسلتني
ساعدتني ونزعتني دشداشتي .. ولبستني الثانيه ..
امي عصبتني .. تكول عن الهوا لا يكفخج ويفكك عضامج .. و لفت بطني وشدتها ..
خاف تكبر ويدخل لها الهوا ..
نوب كامت كالت
ـ شهودة يمه ظلي يم اخيتج وانه رايحه اسويلها عصيدة بعد عيني ماماكله شي
"عصيدة تأكلها النفساء بعد الولادة .. "
وضلت يمي شهد .. صافنه على كرار .. تنهدت
ـ حلو ابنج .. يمكن يشبه ابوة
باوعت عليه ..
وانه اتمعن بيه
فعلا يمكن يشبهه .. والمثل يكول من شبه اباها فما ضلم ..
ظليت ساكته ..
دائما كانت شهد انسانه فلسفيه .. كلامها بي شي من العجب و ادخلك من باب لان تريد تخليك تطلع من باب ثاني
باوعت عليه
ـ انظلمتي انتي نوسه بس احنا هم انظلمنا وياج .. اذا احنا ماعشنه لي عشتيه .. انتي هم ماعشتي الي عشنا احنا .. واحنه مجهولين من بيت البيت وابوج بس يحن واين عليج ..
جنت ساكته وهي تحجي
ـ ينوسه الدنيا قدار .. مثل مااقدرج تبطلين من المدرسه وانتي بالسادس .. هم قدرنا اني وزينب انبطل من كلياتنا وتركنا شهاداتنا .. واجينا هنا .. نحرث ونزرع و نحصد .. عمرج تخيلتي يصير بينا هيج ..
ـ لا عمري ماتخيلت اجيب طفل ماعندة شي ثبوتي له يضمن له حقه يتعلم بالمدرسه و يتسجل بأسم ابوة
ـ ابوي كال اسجله بأسمي .. انه اكلج هذا الكلام حتى تتقوين .. حتى توكفين على حيلج انتي صرتي ام لازم تواجهين ودافعين عن نفسج وابنج ..
ااه لو تدرين شسويت قبل لا اجي لهنا ..
ـ اخوج باعنا .. برخص الماي .. اجه وكف كدام ابوج وطالب بحقه بالبيت على عين حياته ..
مااحترم شيبه ابوج والي صار بيه من وره سوايته
تعجبت .. معقوله احمد وصل لهيج مواصيل .. عافنا بشدة والازمه وطلع منها مثل الشعرة من العجينه .. يعني مو ابوي كال له اطلع .. هو .. هو وبكل عين وكحه اجه يطالب بحقه .. هذا اذا له حق .. من وين له الحق وهو عمرة مااشتغل ودخله فلس احمر للبيت
ـ صدك شهد وابوي شصار بيه
دخلت علينا زينب وبيدها .. السجينه والمفتاح وجفيه من جفافي ابوي
وكالت
ـ اها بدت شهد تقص عليج قصتنا الحزينه يبعد عيني .. انه اكملج .. اخوج احمد بعد مااخطف بنت العالم اخذها لبيت عمي .. ونوب جانت مصوبه .. عاد طاح على نبيل المضمد الي يم بيت عمي تعرفينه ..
ـ اي اعرفه
ـ اي خيه هو .. جابه وطلع الرصاصه الي بظهرها .. ولج ورادت تموت بيدة .. بس الله ستر تعرفين نبيل المضمد وي الحشد وداخل عمليات يعني ايده مااخذة .. وطلعت من حلك الموت ..
حطت السجينه جوة راس كرار .. والجفيه على راسه .. واجت وبيدها خيط حطت بيه المفتاح وهي تلبسني كالت
ـ عاد تعرفين بعد الوادم تريد فصلها باع ابوي البيت وانطاهم فلوسهم .. من سمع احمد اجه لابوي وطالب بالفلوس .. ابوي انقهر كلش
ـ عمت عيني بويه شاف الضيم
ـ اي والله شاف الضيم .. ابوي مااراد مشاكل .. انطاه عشرة .. بيومين .. بيومين خايبه نهيدة صار عدها جواز .. يكولون دفع حفنه فلوس علمود جوازها
درت وجهي لها .. ولزمت ايدها
ـ عليج الله زنيبه هم شفتيها
صاحت شهد
ـ منو نهيدة .. لا خايبه من طبوا بيت عمي لمن طلعوا ابوي منع علينا الروحه وكال ممنوع ..وهو شهر وسافروا لتركيه
ردت زينب
ـ اي عيني هنيالها راحت تشوف مهند و نور .. اووووف جانت امنيتي اشوف يحيى وراحت ام الوصخ تشوفه حضوضضضضض خيه
ضحكت عليها ..
كالت
ـ ولج لا تضحين نوب تتأذين وانتي نفسه على كوله امي
ـ شني السالفه زنيبه مسويه عمليه خو مامسويه عمليه .. الحمد لله هاي المرة الي رحنا لها مااقصرت وياي
ادنت يمي شهد
ـ نوسه وانتي شلون جانت عيشتج .. ششفتي .... ماشفتي
رديت بكلمه وحدة وجرتها كلمات
ـ شفت ذل والقهر وحقد
حجيت لهم كل الي صار وياي واستثنيت سالفه حوراء وماحجيتها ..
ـ الله ينتقم منهم .. ولج جا انتي شعليج هم بتهم طايح حظها ومغسوله
كالت زينب
دفعتها شهد
ـ كومي ولج شوفي امي وين صارت ترة مااصارت عصيدة هاي باجه ..
كامت زينب راحت لامي...
ظلينا انه وياها .. بجه كرار .. كالت
ـ خاف جوعان ..
ـ والله ماادري
شالته وهي تكول
ـ اسم الله الرحمن الرحيم .. يمه زغيرون ويكركش ولج .. نوب يخوف شلون تكضينه ..
جانت ترجف ..
قربته مني
ـ اي والله محتارة شلون اكضه .. خليته على ايدي ..
خايفه لا كضه ايدي قويه عليه .. وهو يعقج وجهه ويدور منا ومنا ..
دخلت علينا امي ركض ..
وكالت
ـ بس لا رضعتيه يمه
ـ لا بعدني ..
ـ اي همزين تجيبيه خليني انطيه اميه وشكرات اول مرة ..
