بعــض النهايــــات عجيبــــه ..
لا تقبل التغييـــر ...
لا تقبل السعـــادة ...
ولا تقبــل الحــب ...
ايناس ...
بدات مرحله التحقيق بعد هذي الليله ... بعد صفنه طويله بوجهي ..
للحضه حسيت راح يحضني .. او انه هذا الي اتمنيته
بعــد مااطلعني غصبــا ... كعدني مقابيله على السريـر .. وهو في حاله من العصبيه الغريبه الي مااعرفت سببها .. وعيونه .. قصه لوحدها ...
لكن السؤال انطاني الخيط الاولي عن السبب ...
سؤال اخترق مسامع روحي قبل جسمي و دخله بالحالات التفسير والتحليل بعقلي ..
لهجه صارمه الي نطق بيها وكأنما يكولي اياج تكذبين او تضمين شي ..
ـ اهلج وين ممكن يرحون! ?
صدمه .. اهلي بعد شهر من الاقامه ببيت الذل والمهانه انسأل عنهم ..
وكأنهم هسه تذكروا عندي اهل وناس ...
وعشيرة ...
واني هم نسيت وهسه تذكرت ...
ورديت بأستغراب ...
ـ شنو
ـ لاتسوين روحج غبيه .. سؤال وجاوبي عليه .. اهلج وين ممكن يهجون بعد طلعتهم من الناصريه .. عدكم كرايب بالنجف .. بكربله .. ببغداد ولو شكولكم مو شكول بغداد انتم حدكم هنا لصحراء الناصريه ..
ماادري شوهدني وحجيت ..
ـ ليش يمه شبينا .. اشرف منكم ..
انه حجيت لو كفرت ..
مااعرفت الضرب من وين يجيني .. وبكل انواعه ... حتى ااه ماالحكت اكول ..
رفع راسي له بعد هجمه من الضرب ...
وهمس كدام وجهي
ـ وداعتج .. وداعه عيونج الحلوات الا اراويج هذا المو شريف شيسوي .. اذا مااندمكم مااتسمى ابن ابوي .. وهسه انطقي وين عدكم كرايب
هزني من شعري حيل
ـ حجي الا وال خلقج مايطلع عليج نهار اليوم ..
رغم الاذى الاشفته من اهلي لكن عمري مااراح اودي الاذيه لهم ..
ـ والله وتطحني ...طحن مااحجيت ..
نكثني من ايده حيل .. عبالك جان لازم شي مجرب .. وخايف ينعدي
ورجع كعد بمكانه وخله رجل على رجل ..
ـ لا يحلوة راح تحجين برضاتج لو غصبا ماعليج ..
يمكن بحظه ضعف ردت استعطفه .. ردت ارجع شي حلو صار بينا امس ..
ـ كلتلي تحبني .. يوسف كلت تحبني .. انت تريدني
كان ردة غرب شئ سمعته .. وضيع الامال الكنت راسمتها بخيالي .. انهدم اخر ركن ممكن استند عليه وممكن ينقذني
ـ احنا يابنت الناس مو مال حب .. انه وياج اعداء ماتلاكينا حتى نعشك .. ولا نحب احنا تلاكينا حتى ننتقم ويا انه الانتصر يا انتي المنتصرة .. وهسه ردي .. سولفيلي اهلج وين لكاهم ..
ااه ... يانار كلبي .. بدلي الزمه بين اديه و اكطعه اتكطع ..
ـ ماادري .. شمدريني مو انه اخذتني حتى يبات ثارك وتبرد نارك .. اذا هيج انته مااراضي وماايرضيك الا الثار ليش اخذتني وكسرت بختي .. الله يكسر بختكم ..
صرخت بيه ودموعي ماانشفن ..
رد علي ببرود ..
ـ اكتشفت انتي ارخص من توفين الدين وتبردين النار يااخت احمـد ...
ماادري من وين اجتني القوة واندفعت له ... تجلبت بيه من ركبه .. رغم من كام شالني عن الارض ..
رجليه هي اتولت موضوع الضرب ..
واديه تخرمش كل مكان ممكن توصله وتزيد اثاره ... اثار
فقدت التركيز لمن اركعت للكاع ..
صحيت الصبح .. وانه بفراشي ..
بنفس الكفشه ..
بنفس الالم ..
بنفس الروح ..
بنفس الجسـد ...
