حكايتي ( روايات ليبية )

حلقة 17

حلقة 17
👇🏻
.
.
يوسف..ايه عرفتيني اني ولد صاحب بوك يومها جيتيني اهني وخديتب الامانة الي خلاهالك بوي
اني..ايه مش داعي تقول هدا كله عرفتك من الاول اهلين
يوسف..كيف حالك كويسة؟ الف الحمدلله ع سلامتك ان شاءالله
اني..الله يسلمك الحمدلله كويسة
يوسف بغيرة..راجلك مش مسيبك بكل مشاءالله ربي يحفظكم
اني..ااه منو حذيفة؟
يوسف..ايه الي ديما معاك راجلك صح!
ع خشت حذيفة وهو حامق..ايه
اني ابتسمت ابتسامة صفراء..ايه راجلي
يوسف..ايه الف الحمدلله ع سلامتها استاذ حذيفة
حذيفة شافله وشافلي..الله يسلمك
اني..ءءء حذيفة هدا يوسف الـ... ولد صاحب بابا الي شاد العيادة بدالي
حذيفة سلم عليه ويوسف كذالك والزوز يشبحو لبعضهم في شبحات ماتتفسرش للحظة حسيت ان في شرارة ح تصير
اني..شكرا ع زيارتك دكتور يوسف🙂
يوسف..عفوا هي السلام عليكم🙂
حذيفة يشوفله وشاد روحه بالسيف
طلع يوسف وشافلي حذيفة وحاط يديه في نصه
اني..خيرك تشوفلي هكي😐
حذيفة سكت وشاد غضبه😠
اني سكتت لما لقيته هكي ومعاش نبي ندوي ماخاطريش في شي
حذيفة يقلد في صوت يوسف ويقلد في حركاته..الف الحمدلله ع سلامتها استاذ حذيفة😒😏
اني بنضحك ومش قادرة خايفة يزيد يتعفلق قعد شكلي مش طبيعي خلاص شادة الضحكة بسيف
حذيفة..نازل نجيب قهوة ونجي😤
هوا طلع واني ننفلق بالضحك مشكلتي الوحيدة لما حد يكشخ بطريقة غريبة نقعد نضحك وزادني لما قعد يقلد فيه وفي صوته وتكيت راسي وتنهدت تنهيدة راحة وتأكدت ان حذيفة يموت عليا مش يحبني وبس❤
.
.
.
تعالو في حوش تاني نرجعو بالزمن شوية قبل ايام
خشت اختها ع بوها في مكتبه
الاب..مش فاضي
اختها..بابا عندي موضوع ضروري ومسألة حياة او موت
البنت جت تفنص..قالك مش فاضي خلاص
الاب..شن يا ميرا هي قولي لاني عارفك مش حتخليني في حالي
ميرا..بابا هدي بنتك آسيا
الاب..اختك هدي
ميرا وهي تتكلم بغضب..تي تمنيتها ماتكونش اختي
الاب..ليش الغيرة الي بينكم هدي فهموني!!
ميرا..بابا اني مش غايرة منها لانة افعالها ماتخلينيش نحبها باش نغار منها
الاب..هي شن دارت تكلمي🤕
ميرا..آسيا يا بابا تجري في جرت راجل مايبيهاش والاكبر من هكي الراجل هدا خاطب وشن تاااني ياريت وقفت ع هكي وبسسس مشت فبركت صور للبنت هي ماليهاش ذنب فيهم وبعتت محادثات للبنت ان الراجل هدا يدوي معاها وهو مايدويش معاها بالاصل مش عاطيها وجه هي كله داراته فوتو شوب ومش هكي وبس يابابا ياريت وقفت ع ان فرقتهم ع بعض لاا
الاب..شن تااااااني
ميرا..البنت طلعت تجري من مكتب الراجل وركبت سيارتها وطلعت بسرعة قوية
الاب خايف من الي في باله..شن صار
ميرا..دارت حادث وانقلبت بيها سيارة وهيا تواااا بين الحيي والموووت😭من يستحق الموت قولي هدي والا البنت الي توا في العمليات يابابا البنت يناري يتيمة الاب والام وتبي تزيد تبهدلها تفرقها ع خطيبها علاش الحقد الي في قلبك هدا تكلمي
آسيا تبكي..اني مكانش غرضي الراجل
الاب..وشن يفسر الي درتيييييه تكللللللمي لو تبي تتزوجي جوك احسن الناس وترفضي فيييهم شن هدا اني راسي وقف معقولة بنتي ادير هكي مش مصددق
ميرا..كيف مش غرضك الراجل امالا مننننن؟؟؟؟
آسيا..كدبت عليك اني غرضي ان نخربلها حياتها البنت الي اسمها نور
نصدمو ميرا وبوها يعني لو خلتها غرضها الراجل كان احسن 😣
ميرا..كيييف علاااش
آسيا وهي تتكلم بحقد وغضب..البنت صاحبت اكبر عيادة في طرابلس وتعد من احسن العيادات ومنغير هكي عندها حوش تقول قصر ومنغير هدا عندها عمارة 4ادوار بإسمها هدم كلهم وسيارة فخمة وزيدوو عليييها خطيبها ولد مدير الشركة واما شركة شركة الـ ... ومنغير هدا دلع ع اخر شي وفلوس وتقرا في طب وقريب تكمل وشاطرة هلبااااااا تقدرو تقولولي توا كيف تبوني مانحسدهاش!!!! ومانحقدش عليهاااا ومنغير هدا كله عندها خوها احمد لو حد بس مسها تلقوه واقف قدامه😭واني وينهم خوتي نقولهم هداكا عاكسني يقولولي معاش تمشي جامعة تي شن هدا شن تحسابو انتم معيشيني في عيشة حلوة لا راااااااه😤
ميرا..بتغطي ع عملتك ياسوسة دايرة روحك تبكي هههههه والله انك لفعة بالله تي طلع عندنا وحدة زي هدي في الحوش ومتنندروش تي خزي عليك وخلاص تي حرام نقول انك اختي تفووو
وطلعت ميرا تجري
آسيا..شفتها يابابا شفتهااا اول مالقت فرصة طول بدت فيااا اني اختها والا نور😭
الاب..تعالي
جت آسيا قعمزت قدامه ع الكرسي
آسيا..بابا
الاب..شن الي نقصته عليك!!!
آسيا..اني
الاب..البنت ورثث هدا كله ماداراتاش هيا هي بس حافظت عليه بعد وفاتهم يا استاذة هدا اول شي تاني شي هي ماتخلتش على حلمها هيا كملت قرايتها رغم الفلوس والي مالكاته كله ماعدلتش عليه هيا كملت تقرا بعد الي صار هدا كله بنتي انتِ عندك اني وعندك امك وعندك خوات وعندك خوت هي من عندها راس خو والي تملكه وخطيبها! انتِ عندك عيلة عندك اهم شي في الحياة هدي كلها عندك سيارة عندك التصريح مني امتى مابتسافري تسافري عندك الفلوس يجرو ف ييدك 24 س بدون ماااتخدمي شن تبي تاني فهميني
آسيا..😭
الاب..بدون دموع خلاص دموعك معاش يأثرو فيا من اليوم سيارتك حتاخدها اختك الي كنت مش معبرها ميرا هي تربايتي حق وهي الي خدت طبعي حق وهي الي ماتسكتش ع الحق هدا اوول شي تاني شي فلوس خلاص لين تجي تاخديهم مني اني تالت حاجة اي كلمة يقولوهالك خوتك حتتنفد طلوع من الحوش معاش في وصحبات معاش نبي نشوفهم ماجابولي كان الهم اني من الاول مش مرتاحلهم ماكلة معانا معش في تاكلي مع الخدامات وماكلتك بديريها بروحك بطيبيها برووحك ومانبيش اي اعتراض ويااااويلك وياسوااااد ليلك لو سمعت بي شي غلط باش اني مش معيشككك خلاص هي وريني كيف بتعيشي منغيري تلفونك هاتيه
آسيا..ءءء لا
الاب عقد حواجبه..هاتيه ترا وافتحيه
آسيا..بببابببا
الاب..كنت نبي تلفونك وبنخليه مسكر في القجر بس الباين ان لازم نشوفه شن فيه من فلايط اكبر من الي درتيه افتتتتحي
آسيا نخضت بعد العيطة هدي وفتحاته وعطتهوله
الاب فتح تلفون خش نحا الباسورد وقعد يشوف وآسيا بتموت من الخوف واذا بي الاب لقي عمااايل سودة احرف من الي سمعه دوة مع ولاد 18+ وهلبا حجات الاب معاش قدر يشوف قدامه حط تلفون ووقف ويشوفلها ويفنص وجاها وشدها ضربها كف طيحها ع الارض وسكر الباب بالمفتاح ونحا سبته وطاح فيها ضرب بالسبتة وهيا تعيط
ميرا جت تجري بابا افتح باباااا بابا مش هكي يابابا حرام عليك لاااا
آسياء..😭😭😭اااااه خلااااص لالال خلاااااص ااااه لا باباااااا لااااا اااااااه ماماااااااااااا ااااااااه
ميرا..يابابا افتححح لااااا باباااا بالله علييييك
الاب يضرب فيها بهستيرية ومايندريش ع روحه كيف يدير من الي شافه طلع عن طوره..شن نقصصصصت علييييك تكككككككلمي ياحيوااااانة ياوسسسخة خزي عليك وع تربايتك الفااااسدة تكللللمي شن ناقصككك باش تمشي لي تفاهات هدددي تكلللمي
خوتها جو..شن فييي
ميرا..😭😭بابا بابا طايح في آسيا ضرب ومش راحمها افقعو الباب وشدوه مايندريش على روحه والله
فقعو الباب وشدوه من عليها قامها خوها وهيا مش قادرة حتى تتحررك
محمد..شن دارت يابوي علاش هكي حرام عليك البنت لين دم طلع منها
بوه..شوف الخارب هداااا وبعدين برا كمل عليها😠
محمد شاف لفونها الي ملوح ع طاولة شده وفتحه وقعد يفتش فيه نصدم من الي شافه والي قراه
محمد..يااااا كللللبة
طلع يجري ومشالها قعدو يشدو فيه خوته
محمد..والله نقتللللها يا حيوانة ياتااافهة يا#@$&*
آسيا تبكي ومش قادرة تتكلم
محمد..تي اختك هدي شوفها شن مدايرة
فتحو تلفون وقعدو يشوفو ونصدمو وزادو كملو عليها لين رقدوها في المستشفى
امهم..ياظالمين اني غبت عليكم ساعة هكي اديرو في البنت ياللي ماتستحو على وجوهكم
محمد..بنتك هي الي ماتستحي على وجهها ان شاءالله تموت مرض
وطلع من الدار
ميرا..ماما خلاص هدي روحك اهي طمنا عليها دكتور والحمدلله حالها كويس خير من امس
امها..اني الي شاغلني كيف بوك الي مستحيل يدير هكي في آسيا تي نتوقعه يضربك انتِ ولا يضرب آسيا كيف هكي شن السببب القوي لدرجة دارلها هكي
ميرا..تنوض هيا وتحكيلك كل شي
امها..تي ادويييي معاش عندي صبر اكتر من هكي عليكم
وقعدت ميرا تحكيلها في كل شي صار
امها حطت يدها ع فمها ومصدومة
ميرا..والي زاد غضب بابا ان بو خطيب نور صاحب بابا
امها..حي حي ياحشمتنا مع ناااس ووه عليا اني شن درت باش ربي يجازيني هكي ياربي صبرني على هالبلوة
ميرا..ونزيدك مزززال بابا فتح تلفونها ...وكملت حكتلها
امها..خلاص خلاص اسكتي يانهاري الاغبر اني شن ندير فيها هدي وووه عليا اني
ميرا..خلاص ماما خدت جزاتها تم الموضوع وتسكر
امها..كله مني اني كله منييي
ميرا..كيف
امها..اني ديما لاهية بي مناسبات والناس وناسية بنتي وحوشي شن يصير فيه من اليوم معاد طالعة منه الحوش الا كونش مكان ضروري وتمشو معاي انتم يا لا اسمعي خواتك اكيد حيجو قولو حادث والا اي حاجة مانبيهمش يعرفو شي وووه عليا وخلاص تعرفيها اختك تهاني مادس في شي ع راجلها واختك سرور احرف من تهاني الي عندها في طبق هديكا كان تكدب تبدا عينها ترف وتلكلك ف الاحسن ماتقوليش ياكيتي كية هيييي ياربي صبرررني اللهم إنِّ لا أسئلك رد القضاء بل اسئلك اللطف فيه ياااارب😢😢
.
.
.
.
اني..احمد جيت!
احمد..ايه جيتك ياحنة
اني..خيرك امس ماجيتش
احمد..قلت خليها ترتاح
حذيفة..ايه شن امورك
احمد..مية مية ماتحسوش ان لازم نقرولكم الفاتحة!
حذيفة فرح وتحشم واني نفس الشي تحشمت
احمد..بعد هدا كله لازم من فرحة كبيرة عاد
اني..قرايتي
حذيفة..مش حنحرمك منها وعد
اني..يصير خير ان شاءالله
احمد..ايه
قعدو يهدرزو واني مش معاهم نفكر زواج قراية مسؤلية وغبارة سودة على نور وووه شن درت في روحي بس كنت بروحي مرتاحة لا حبيب ولا شي قراية وحلم وهياجة وجو ااااخ ياقلبي💔
روح حذيفة وقعد معاي احمد هدرزنا شوية وجو عطوني دواء وكان يرقد رقدت ع طول واحمد قعد مقعمز جنبي يقرا في كتاب ويفكر في حياته من بعدي ويفكر كيف بيفضى عليه الحوش هو هكي ومش طايق يقعد في الحوش🖤
بعد فترة طلعت من العيادة وروحت للحوش كانت سوسن و سنابل و مسرة وخالاتي منضفينه ومدايريلي كل شي روحو البنات وقالولهم توونجو العشية😍😍 حطني احمد وطلع ع طول
سوسن..الف الحمدلله ع سلامتك والله خوفتينا عليك💔💔
اني..الله يسلمك😘
سوسن..حذيفة قريب هبل عليك تصدقي اول مرة نشوف واحد يبكي ع حبيبته هكي واول مرة حذيفة يبكي
اني..بجددد
سوسن..ايه بكي عليك هلبا لما قاللنا الدكتور ان حالتك خطيرة وتحتاجي للدعاء بس خلااص الحمدلله ربي نجاك منها
اني ابتسمت..ماتخافوش عليا بسبع ارواح😌😂مش حيوصلو للي يبوه قاعدتلهم زي العلبة
سوسن..😂😂 من هما
اني..الي في بالي🙄
طق الباب ناضت سوسن فتحت لقتهم سنابل ومسرة خشو ع طول
سنابل ومسرة..الف الحمدلله ع سلاااامتك
اني..وااااو 😂 صوت موحد الله يسلمكم
سنابل ومسرة..تفضلي هديتنا ليك
خدتها سوسن
اني..شكرا بارك الله فيكم
سنابل..ولووو😍😍انتِ الحب شن جوك
اني..الحمدلله بخير تحسنت ع قبل
سنابل ضربتني ع كتفي..نوضي ياسرك دلع بسبع ارواح راك
اني من الوجع معاش عرفت نبكي والا نضحك..اااااااه
مسرة..تي يا قردة البنت قاعدة محلها مزال معاش تمسيها
سنابل..سووري بجد☹
اني..عادي عادي😂
قعدو يهدرزو وجوي تغير معاهم ومع خالاتي واجتمعت العيلة
سنابل..اما اني بنديرلكم بكبوكي شن رايكم
كلهم قالو باهي
اني..ماتعبيش روحك
سنابل..انتِ ارقدي
اني..باردة 😂
خشت سنابل اطيب ومعاها البنات وسوسن تهدرز هيا ومحمد مسجات
سنابل..امتى عرسك
سوسن..قاعدين متفركسين وحذيفة بكري لما روح قال انه يبي يتزوج خلاص
سنابل ومسرة تلفتولها..شنووو
سوسن..ايه قال تكمل عندي قرايتها ومش حينقصها شي قال بدو الناس يخشو بيننا واني هدا مانبيشي ف قال احسن شي نتزوج باش معاش يقربنا حد
سنابل..رورورورري بيبدا عندنا عرررس😍😍
مسرة..اعقلي يابنت تقول علينا مش من بطن وحدة ونفس الوقت
سنابل..اسكتي اني اكبر منك بي 5دقائق
سوسن..😂😂😂😂😂
احني خشو جيران يبو يسهرو عندنا ع اساس وجت ام سوسن خويلة بدرية وتهدرز مع خالاتي
الجارات..الحمدلله ع سلامتك يابنتي
اني..الله يسلمكم
قعمزو ويهدرزو
ايمان..مسرررة
جت مسرة سلمت وطلعت بعد شافت خالتي شن تبي دارت عصير وشكلاطة وفرقاته وطلعت
(طبعا مش حنكتب اسماء 😂)
الجارة1..وشن قالولك توا؟
اني..شي كل يوم نمشي يغيرولي ع جرح وهكي
الجارة2..اممم باهي ان شاءالله ع خير
الجارة3 والي مكانتش تندري ع ام حذيفة معانا تحسابها وحدة من خالاتي وتتكلم وتعوج في فمها..هدي خطية ولدي قتلك ناخدك لولدي انتِ ماتبيش ولدي مرابطي ياحنة
بدرية..الدنيا نصيبات ونصيب حد ماياخده حد
الجارة3..والله ولدي قريب هبل عليها
اني..حرام عليك شن دخلي بولدك اني ياخالتي الدنيا نصيبات وولدك تو تجيه بنت الحلال الي خير مني وتستاهله🙂
ايمان..الحمدلله بنتنا تستاهل خير من ولدك الي بعد رفضاته بنتنا بونتو فيها مشي خطب بنت عمها والا تحسابينا نسينا بس الحمدلله بنتنا جي الي يستاهلها والي شاريها ويبيها حق وعرسها بعد شهر🙂😎
بدرية تلفتتلها وخالاتي شافولها واني شفتلها وات امتى صار كيف وشن فيي😂😂😍😍
اني سكتت
بدرية فهمت وتكلمت..ايه الحمدلله ربي رزقني بكنينة زي نور مشاءالله عليها و الطيبون للطيبات والخبيثون للخبيثات
نصدمت الجارة الي تحسابها وحدة من خالاتي 😂
والجارات بدو يلطفو في الجو
الجارة1..ااه ههه ايه الحمدلله والف مبروك عليك يابنيتي
الجارة3..ءء انني بنوض هي بالسلامة وحمدلله ع سلامتك
وهي طالعة..اني..ماتنسيش باش تتفضلي ع العرس🤗
الجارة3..ان شاءالله ان شاءالله
اني..اه استني وقولي بالمرة لي مرت عمي الي ترفعيلها في الاخبار اضن عارفة ع شن نقصد🙂صح ؟ وقوليلها انكم مهما اديرو مولي عليكم انت وهيا وهي بالسلامة
طلعت وهي خايفة تجري وماتدري
والجارات ساكتات ويشبحو لي بعضهم
وبدرية مش فاهمة نص كلامي الي قلته اني جابت سوسن الشاهي وشربوه قعدو يهدرزو شوية وطلعو حتى هما
اني..الصبر الواحد مايقعدش مرتاح😏
بدرية..اي توا قوليلنا شن قصدك بكلامك الاخير يابنتي؟
اني..هدي يا عمتي ترفع في كل اخباري لي مرت عمي الي هيا ام احمد مافيش شي ساكتة عليه وعندهم ع سحر والهم فهمتيني توا
شبحو خالاتي لبعضهم
ايمان..هوا حتى احني بنقولولكم شي
شبحنالهم اني وبدرية وسوسن..شنوو
ايمان..خالك يا نور كان مش صافي
اني..كيف
ايمان..خالك كانت عاملتهوله مرت عمك هدي
اني..شنووو
ايمان..ايه فرقاته ع مرته وعليك
اني دمعو عيوني
ايمان..توا مرته رجعتله الحمدلله وهو يبي يستسمح منك وماعرفش كيف لانك تصدي فيه
اني..مسامحاته😢😢قداش ليه
ايمان..من روح من تركيا واني نجري عليه عرفناه مش صافي عندي صاحبتي خوها شيخ رفعته ليه والمهم تعالج ماعرفناش من الي دار لين توا قلتي معناها مافيش غيرها مرت عمك
اني..حسبي الله ونعم الوكيل فيها😭الله لا تسامحها لأمتى بتقعد هكي جرتي
ايمان..لازم تحكي لي احمد كل شي باش يوقفها عند حدها زودتها راهو
انيي حطيت يديا ع وجهي وقعدت نبكي نفسيتي من الاول اخي وزيد عليها باللي سمعته اليوم خلاص معاش عندي طاقة تعبت معاهم💔
قعدت نتحسب فيها وخلاص
بدرية..الله لا تسامحها حسبي الله ونعم الوكيل فيها خلاص بنتي خلاص معاش تبكي ربك ماينسى حد بإذن الله حقك حياخدهولك خليك واثقة بالله
اني..يارب
ووصل حذيفة اتصل ردت عليه امه واني جنبها نبكي
حذيفة..هيا يام اطلعو
ايمان..وصل؟
بدرية..ايه جي
ايمان..مسرع العشي لمن انديرو فيه
حذيفة..يما من يبكي جنبك
بدرية..لا حد الصغار هدم
حذيفة تجرأ وتكلم..نور؟
بدرية شبحتلي..اييه
حذيفة..عطيها تلفون ترا
بدرية..بعدين كلمها
حذيفة..عطيهولها يام خيرناا
بدرية..هاك يبي يكلمك سمعك تبكي
اني مسحت دموعي ورشفت خشمي وخديته..الو
حذيفة..حبيبي خيرك
اني..شي
حذيفة..هيا عاد بلاش بكي ياعيوني مانتحملش دموعك ينزلو
اني..باهي
حذيفة..حبيبي اهو اني جنبك امي واختي وخالاتك وصحباتك وخوك شن تبي تاني هي الله غالب هدا حكم ربي
اني..الحمدلله
حذيفة..نحبك ياروحي
اني..ايه خليهم يتعشو وبعدين تعالى
حذيفة..ههههه اهو نستنى فيهم اهو احمد جي
اني..به خشو للمربوعة تو يبعتولكم عشي
حذيفة..باهي
سكرت منه وعطيته لبدرية الي مبتسمة وشبحتهم كلهم مبتسمين ويضحكو عليا كيف تحمر وجهي وتلخبطت
اني..😳😳
حطو البنات العشي لينا وطلعت سنابل تحط في العشي لي احمد وحذيفة
مسرة..اطلعي انتِ
سنابل..عينك انتِ
مسرة..بري امشي مش طالعة اني
سنابل..الزففت مبردك مخاطريش فيه احمد هدا
طلعت بالسفرة وجت طقت الباب
احمد..هيا
فتح الباب ولقي سنابل شادة السفرة
سنابل..شد
احمد..الناس تقول تفضل الله ريحتها مليحة
سنابل ابتمست..اني طيبتهااا❤
احمد تغيرو ملامحه..نبصر ريحتها تقول رجاع اع
سنابل..😑👏🏻برافو هي خش صاحبك يستنى فيك
احمد..بري قبل
تلفتت سنابل وتمشي بدلع واحمد مسته فيها وفي مشيتها وفي شعرها الطويل الناعم الي طالع من الوشاح
حذيفة..احم احم
احمد..ااه هي تفضل
حذيفة..😂😂شكلك طحت
احمد..حتى لو طحت البنت صغيرة واني مطلق يعني اماليها مش حيقبلو
حذيفة..تفائل خير
احمد..ان شاءالله تي كول كول مرات تحب البنات توا معاش في حد فاضي يامخطوبة يامرتبطة يا متزوجة
حذيفة..😂😂وراسك الا في غير انت كرهتهم
احمد..بالزبط كرهتهم ف مش حيمشي معاي شي خلاص مستقل بروحي واموري تمام
كملو العشي وقعدو يهدرزو شوية وناض حذيفة قال لي امه واخته هيا
طلعو وروحو
بدرية..اسمع اتفقنا عرسكم بعد شهر تو انتِ شوفي كان تبي مع حذيفة والا لا
سوسن تحشمت من خوها ومعش عرفت شن تقول
بدرية..نكلم فيك ادوي باش نروح نقول لبوك
سوسن..ايه بس مش المفروض هما يتكلمو ويقولو؟
بدرية..امه امس كلمتني وقتلي شوفو الموعد الي ينسابكم وكلميني☺
سوسن..به
حذيفة فرحان ومش قادر يتكلم متحشم من امه مبتسم وبس
بدرية..خيرك طايحلي فيها ابتسامات انت
سوسن..اضحك فيه ملايكته😂😂
حذيفة..وانتِ خيرك تتضحكي
سوسن سكتت
بدرية..اتضحك فيها ملايكتها
سوسن انبكت بالضحك
وصلو للحوش ونزلو
بدرية..وانت مش نازل
حذيفة..تو نجي ماشي للقهوة حاتم يستنى فيا
بدرية..ماتعطلش سلم وليدي
خشت للحوش ولقت عمكم عبدالهادي مقعمز هو واولاده ويهدرزو ع شركة
بدرية..ديما وانتم تدوو ع الخدمة خلاص اطلعو من جوها شوية شن هدا
عبدالهادي..اهي جت ها 😂
بدرية..نبي نحكي معاك في موضوع
عبدالهادي..كيف حالها نور
بدرية..الحمدلله بخير متحسنة على قبل
عبدالهادي..باهي الحمدلله
سوسن تهدرز مع خوتها وجوها مليح
بدرية..اسمع اتفقت اني وياهم العرس بعد شهر ولدك قالي خلاص
عبدالهادي..كيف باش قلنا خطبة بس والبنت بتكمل قرايتها🤔
بدرية..والله حسب مافهمت من كلامه ان صارت مشكلة وجو زي هدا وبدو يخشو بينهم مفرخ الحرام ف قالي احسن شي نتزوجو خير من هكي يصير كل يوم مشكلة وموضوع جديد🙂وحسيته ناوي يقريها برا وهيا افيدلها برا خير😊
عبدالهادي.. #يتبع
.
.
.
ان شاءالله تنال اعجابكم يارب 😍😍وشكرا هلبا على تشجيعكم وتفاعلاتكم ياحبايبي😘واني مش ضد اي واحد ينتقد حلقة بس مايجيش في كل كومنت نلقاه معلق في تعليقات ماليهاش داعي بالاساس وللأسف صبرت هلبا وفي نهاية درت بلوك ولأي شخص يدير زيه حندير بلوك لانة صراحة لما تسكت لحد حسيته تمادى بدي حتى يرد ع كومنتاتكم ويغير في رأيكم ع الحلقة قصدي الي مش عاجباته الرواية مع الف سلامة والي عاجباته يعلق بإحترام الي ماعجباش شي في رواية برضو يعلق بإحترام بس مش بإستهزاء ياريت تقدرو وتحتؤمو التعب الي نتعبو فيه بغض النظر ع الناس الي اول ماتشوف اسم ايميلها عيوننا بروحهم يفرحو والي تفصل في الحلقة تفصيل بارك الله فيكم😊 #حنو

إذا عجبتك القصة لا تنسي الإعجاب و الإضافة ليصلك كل جديد مشاركة القصة مع الأخريين
و لا تنسوا أيضا تعليقكم و اقتراحاتكم لنقدم ما تريدونه

MBC LIBYA تابعوا صفحة