حكايتي ( روايات ليبية )

حلقة 40 والاخيرة

رواية #حكايتي
( واقع ممزوج بلخيال )
للكاتبة #حنو
الرواية بلهجة الليبية
الحلقة  40 و الأخير
.
.
.
الممرضة..اممم في زوز جابوهم توا تعالي تراه تعرفيه وله
اني..ايه اني مرته
الممرضة..تمام اوك
رفعتني للإسعافات خشيت ندور بعيوني بس ماريتاش
الممرضة..هذا مضروب توا كيف جابوه
اني شفتله بتمعن بس مش هو..ارفعيني للتاني😢
رفعتني للتاني واذا بيه حذيفة
تعبو عيوني بالدموع ع شكله كيف مولي شعره ولحيته وجهه جسمه كله اثار تعذيب
الممرضة.. يا اخت هوا هذا؟
اني..ايه😭
الممرضة..شكله كان مخطوف
اني هزيت راسي بإيه وشفتله كيف راقد
الممرضة..عطيناه مهدء حالياً شوية وينوض
اني مسحت دموعي..لازم يطلع توا
الممرضة..كيف بطلعيه توا يا أختي راهو حالته صعبة
اني..مادخليش بيطلع يعني بيطلع تووا مكان هدا مش امن واسمعي توا توا نبيك تمشي للمحل الي جنبهم متع المحجبات تجيبيلي لبسة شرعية ريتهم توا بخمارها وماتخافيش انتِ بس جيبيلي وجيببيله هوا توا بسرعة بالله عليك
مشت الممرضة تجري للمحل ودارت لي قتلها عليه عطيتها حقهم وبزايد لبستها لحذيفة ورقدناه من جديد خش علينا واحد وباين عليه من رجالة طارق
هو..عفوا معليشي يا ممرضة وين المريض الي كان اهني
الممرضة..هييي كيف تخش ع المراء هكي باهي الي لابسة نقابها خيرك انت تحشم شن هدا
هو..اوك اسفين قلنا ووين المرييض الي كان اهني
الممرضة..مكانش اهني حد جيت لقيته فاضي وخشت المريضة هدي
هو..كييف ؟؟
الممرضة..ايه خيرك برا تعفلق ع ناس تانية مش وقتك ياخوي
وخشت دارت روحها تكشف ع حذيفة وتقيم في نقاب بشوية
الممرضة..يناري مزال واخد مفعوله المخدر فيها تو شوية تانية وتفيق
اني غيرت صوتي..صحيتي ياوخيتي
الممرضة..تمام
طلعت وشافتله ومشت وقعد يشوفلنا شوية ومشي طلع ممن العيادة
اني..حذيفة حبيبي نوض حذيفة
قعدت نحاول نفيقه بس شي شي اتصل بيا احمد
احمد بعصبية..وين انتِ مننن بكررري نتتصل حتى صغااار كلموني متع الحضانة باش نجي ناخدددهم ويننننككك
اني..بشوية خيرك اني عند حذيفة
احمد..يانور قتلك من امس انك تحلمي خيرك راجلك مات افهمي
اني..واني نقولك راجلي حي اه اسمع احجز تذاكر توا توا ليا وللصغار لي اين مكان المهم ننتلفو من هالبلاد هي تشاو
سكرت عليه وذكرت ان حذيفة يعتبر ميت !!! وين بنمششي بيه ياهمي اني😩
احمد يعاودلي واني نسكر عليه سندت حذيفة عليا لما لاحظته بدي يفيق ومشيت بيه للسيارة والحمدلله مافيش حد شك فينا ركبت سيارة وطلعت طول مشعارفة وين بنمشي بيه واني مراقبة من طارق خطر ع بالي حاتم هو الوحيد الي حيصدقني اتصلت بيه المرة الاولى ماردش التانية رد
حاتم..الو السلام عليكم
اني..وعليكم السلام حاتم
حاتم..استغرب منو
اني..نور ياحاتم مرت حذيفة
حاتم..اهلين بمرت المرحوم كيف حالك
اني شفت لحذيفة ووليت نشوف للطريق..اني مش مرت المرحوم اني مرت حذيفة وقاعدة مرته وحذيفة مش مرحوم
حاتم..شن قصدك
اني..ياحاتم اني تصلت بيك لانك الوحيد الي حتفهمني وتصدقني اني توا توا جاياتك في حوشك لانك الوحيد الي مش مراقب وجايبة معااي اختي
سكرت عليه قبل مايتكلم
حاتم..خيرها هدي هبلت ممن اختها
هالة..شن في يا حاتم
حاتم..ماني عارف والله يناري واجعتني مرت المرحوم تخيلي اتصلت توا قتلي جايتكم اني واختي وحذيفة مش ميت حذيفة حي تحسابنا في الافلام وقتلي اني واختي وهيا ماعندهاش خوات
هبة استغربت..اللطف
حاتم..زي ماندويلك
هبة..هيا قتلك جاية باهي؟
حاتم..ايه ققتلي جاية وتو نشووفو توا
شوية ووصلتله
.
.
اني..حذيفة حبيبي ياروحي
حذيفة بتعب ومش قادر حتى يدوي..نننعم
اني..هي تسند عليا ياروحي باش نخشو هيا بسرعة قبل مايشوفنا حد
حذيفة..اااه
خشيت بيه للحوش متع حاتم طول وسكرنا الباب
حاتم..منو هدي يا نور
اني قمت نقاب من على حذيفة وينصدم حاتم
حاتم..حذذذيفة!!!!؟!
اني..صدقتني توااا اني ماهبلتش رااه
حاتم جبد حذيفة ليه وقعد يحضن فيه ودموعه ينزلو دخله للمربوعة واني خشيت وراه
اني..لازم نسعفوه بأي طريقة
حاتم..وين لقيتييه حذيفة خليك معاي
حذيفة..اااه راسيي
اني..في واحد كان خاطفه وقصة انه ميت كدب بكدب واحد من رجالة خان الي خاطفه وخدي مني فلوس وقالي ان حذيفة في المستشفى ومشي وهدي جيتي
حاتم..والله انك بنت رجال ربي يحفظك ليه نحينا العباية منه وقعدت نداويله في جروحه واني نبكي
اما حاتم طلع لمرته وقعد يحكيلها
اني دموعي ينزلو مني عليه واني نداوي فيه قام يده ومسحلي دموعي من ع خدي
اني شفتله..اسفة كله بسببي😢
حذيفة..اششش خلاص تعالي
اني..نخاف نوجعك
حذيفة..مستحيل توجعيني انتِ
حضنته وقعدت نبكي وهوا يبكي مر ع فراقنا 4شهور مر هلبااااااااااااا ع فراقنا تمنينا الوقت يوقف في هدي اللحظة قعدنا هكي شوية وبعدها قمت راسي اني ومسحت وجهي وقعدت نداويله في كل جرح وجابله حاتم حوايج منه باش يدوش ويلبس
حاتم شافلي..يقدر يدوش بروحه هوا؟
حذيفة بتعب..اكسر عينك اهني وكلمني اني
اني بنضحك مش قادرة
حاتم..حتى وانت مريض مش هافت😂باهي يا خونا شنو ندوشلك اني ؟
حذيفة شافلي وشافله وقاله..اطلعو خلوني تو نعرف بروحي مش معاق اني
اني..حذيفة نقعد معاك نساعدك
حذيفة بوجع..باهي
طلع حاتم لصغاره ومرته المشغولين علينا خش حذيفة للحمام حشاكم شوية معش قدر يوقف خشيت معاه وقعدت ندوشله وهو يهدرزلي شن دارو فيه من تعذيب ومن ضرب ومن كل شي لعند لبس حوايجه واتكا ع الكنبة..تصدقي من يومها لعند اليوووم بس كيف دوشت وحسيت براحة
اني..ايه واضح حتى من شعرك طويل ولحيتك طويلة هلبااااا
حذيفة..الله غالب
اني..توا كيف بنديرو فكرت ان نحجزو ونطلعو طول بس للأسف انت تعتبر ميت💔
حذيفة..كلمي صغار ينادو بوهم وانتِ حقا روحي
اني..وين بنروح
حذيفة..للحوش صغار وين
اني شفت لفوني لقيته يشرين
حذيفة..ردي
اني..ايوا احمد
احمد..تفكيني من ام الهبال متعككك وتروحي توا قلنالك حذيفة مات وله
اني..خيرك انت اني مش مهبووولة قتلك حذيفة حيييي واهو قدااامي
حذيفة..افتحي المايك
فتحت المايك وتكلم حذيفة
حذيفة..احمد
احمد..منننن
حذيفة..يا احمد خيرك نسيتني
احمد وقف وقعد مصدوم
اني..توا تأكدت ان اني مهبولة يا احممد؟؟
احمد..وين انتِ توا
اني..عند صاحبه حاتم
احمد..تم سكر مني وجانا طول وماصدقش الا لما شافه قدامه
.
.
.
.
طارق..كييييييييف كيييييف يهرببببب وهوااا مضروب منكم كييييف
كلهم واقفين قدامه وخايفين
طارق..تجيبولي مررررته تووووووواااااا تحركووووو
.
.
.
اما احني ف احمد جاب معاه كتيبة زعميتك بتحمينا وفجأة تعمم الخبر ان حذيفة عايش وعرفو امالي حذيفة مشينالهم و كانت سيارة من قدامنا وسيارة ورانا للحماية😊 ونزلنا وكانت اصوات الزغاريط تتعالى من بدرية ومني ومن سوسن وكانو خوته وعيلته يحضنو فيه وفرحانين بيه اما الصغار فكانو يتغمرو فيه من رجليه وفرحانين
ووتين في غمري شادتها
حذيفة..وتين بنت بابا تعالي يابابا بدت وتين تبكي
اني..قداش ليها معاش شافاتك هدا باش صغار فيسع ماينسو
حذيفة ابتسملي وسكت بعد فترة طارق معاد قدر يوصل فينا بكل وشكينا فيه وحبسوه وحجزنا من جديد باش نديرو الي كنا ناويين عليه
.
عند طارق كانت الشرطة محاوطة المكان الي هوا فيه
الشرطي..طاارق اطلع المكاان محاصر من كل الجهات سلم روحك احسنلك
طارق وهو يدور في مكانه..كككيف هككي كككيف
امه..سلم ولدي برا سلم روحك كان تبيني راضية عليك
طارق..يما كله بسببها هيا
امه وهي تبكي..حول ماتمسنيش انت خطفتلها راجلها وعذبته وماخليت مادرتله وتقولي كله بسببها هيا حووول ماني راضية عليك لين ماتسلم روحك ليهم
طلع طارق وسلم روحه ورفعوه
.
.
اني..تصدق ان اني هدا وين رجعتلي روحي
حذيفة حط يده ع خدي..وحتى اني هدا وين رجعتلي حياتي وروحي وقلبي بدي ينبض وكل شي💕
.
.
سوسن..محممد سمممعت ولد عمتك طلع هو الي كان خاطف خوووي
محمد دار روحه مايندريش..سمعتها توا ايه
سوسن..معقولة هككي
محمد..صدمني حتى اني بس اصلا اني ماعنديش بيهم خلطة
سوسن..حسبي الله ونعم الوكيل💔
محمد..ربي ياخد الحق ان شاءالله
سوسن..الحمدلله ربي الي رجعه لينا ولي مرته وصغاره والله كنت واكلة همهم ياقلبي عليهم
محمد..الحمدلله
.
.
احمد..سنبولة حياتي
سنابل وهي طالعة من المطبخ..ههههههه نعم
احمد..هيا نمشو بحر
سنابل..حق!
احمد..والله
سنابل..به خلي نوتي حجات
احمد..به جبت دلاع وجبت قلعاوي وووه الدنيا حريقة نووو
سنابل..ايه
حطت سنابل كل شي في سلة وبدلت للصغار وطلعو للبحر💕
.
.
بعد فترة قررنا نمشو للسعودية😌من جدديد وهالمرة بصغارنا❤
حذيفة شد يدي..ياروحي انتِ والله نحبك هي
اني..نموت فيييك
ومشينا للمطار مع بعضنا وكانت العيلة معانا ووصلونا لغرفة الانتظار وكل شوية يتصلو بينا يشوفونا 😂 وخايفين ان يصير نفس الي صارلنا والحمدلله ركبنا طيارة
فاتو ساعاااات ووقت طووووويل لين وصلنا وارتحنا في الفندق وكان الفندق لما ركبنا للغرفة مبين كل شي😍 فاتت ايام والفرحة مالية قلوبنا دعيت لي عيلتي هلبااااااا ولصغارنا ارتاحت نفسيتي هلباااااا
اني..حذيفة تصدق ماعمري حسيت براحة قد الراحة الي اني فيها توا😍
حذيفة..اكيييد
اني..شوف حتى من وجهك نور وتصفا ع قبل
حذيفة..ايه من الراحة الي تحسي بيها مهما كان عندك 😌الف الحمدلله الي وصلنا للمكان هدا
اني..الحمدلله على كل شيء😍 ربي يوصل كل مشتاق ليها ومايحرم حد منها فعلا راحة وطمئنينة
حذيفة..اللهم امييين يارب العالمين
.
.
The end 💕
.
.
ان شاءالله تكونو استمتعتو بالرواية وحبيت نخليهالكم سعيدة مابعد الحزن إلا الفرح لازم تكونو واثقين ان ربي يحبنا ان ربي ماينسى حد وكل حد يعطيه حقه الحمدلله زي مثلا نور حزنت بسبب فراق اهلها ليها و تعذبت في حياتها هلباااااااااا انظلمت وانكرهت و صارو هلبا اشياء في حياتها بس ربي عوضها بإنسان ينسيها بكل الوجع الي هيا حساته وعوضها بصغار فرحوها في حياتها❤ربي ماينسى حد وكل ظالم ياخد جزاته زي ام احمد و طارق الحب لا يعرف لا كبير ولا صغير والنصيب لما بيجمع مافيش شن يوقفه زي احمد الي عمره في ثلاثينا وسنابل الي عمرها كيف خشت للعشرينات😍 دائما نكونو مؤمنين بالله سبحانه وتعالى و نحمدوه ونشكروه ع ابسط شي باش نتقربو من الله سبحانه بالإستغفار و الصدقات زي مادارت نور وحذيفة كل مايتصدقو بشي ربي يزيد في رزقهم ويبارك فيه😌 وبعد نخطف حذيفة قعدو صابرين ويدعو لربي سبحانه وهو الي حيستجيب لدعائهم ومنغير الدعاء الي داعينه الناس ليهم ديما الي في يدكم يكون لغيركم ديما تصدقو بكل شي عندكم حسو بالناس الغلابة ربي يحس بيكم😌فرحو الناس الي مش فرحانة ربي حيفرحكم ابتسمو في وجوه بعضكم الابتسامة في وحه اخيك صدقة😊 حبو الناس كلها حتى لو يكرهك اي شخص خليها ع ربي و ماتضايقش حد وماتزعلش حد خليكم مؤمنين بقضاء الله وقدره خليكم فرحانين في عز وجعكم خلوكم صابرين وحاميدن الله في كل شي وشاكرينه حسو بالنعمة الي بين يديكم لانة غيركم يتمناها ولو كانت ابسط شي اللهم لك الحمد والشكر ادعولي نتوفق في حياتي يا فانزاتي😍ادعو ان القراية ترجع زي قبل😔ونكمل هالسيم ونتخصص في اللي نبيه😌ادعولي نكون في اللي نبيه اكيد تبو تعرفو حلمي نكون مهندسة ديكور😌وان شاءالله نكمل هالسيم ع خير ونتخصص فيه يااااارب ادعولي ☹ وادعو لي اميمتي ربي يحفظهالي❤
الـكـاتـبـة #حـنـو
....
بعد انتهاء الرواية ❤️ اكتب لنا رايك في الرواية و سرد الكاتبة ❤️
( و للعلم صعب جدا انك تخلي الناس كلها متشوقة كل حلقة و انت كاتب 40 حلقة هذا يدل علي ان الكاتبة محترفة )