حكايتي ( روايات ليبية )

حلقة 26

رواية #حكايتي
( واقع ممزوج بلخيال )
للكاتبة #حنو
الرواية بلهجة الليبية
الحلقة 26
.
.
.
مهند..خيرك انت واضحة توزيعة راهو
حذيفة..شن دخلك انت الها بي عمرك
بدرية..خيرك معاها انت شن دارتلك البنية
حذيفة..شي ماخيرني شي وامورنا تمام بس هكي نبيها تركب تقرا شن قتلها اني؟؟
مهند..كانك علينا احني احني زي خوتها وربي نشبح فيها زي سوسن واعز شن تصرفات البايخة هدي
هاني..حذيفة انت من يومك هكي اصلا تحشم في الشخص وانت ماتندريش ماريتش وجهها كيف والا احمر كانت مقعمزة تهدرز وماخيرها شي انت لبزت شن بتجيبلها مرض توحد انت حتى معانا ماتبيهاش تقعمز؟😐
حذيفة..كليتوني بقشوري الزفت باهي😏
ناض حذيفة وطلع برا الحوش
مهند..اشي الغبي نحسابه بيركبلها
بدرية..تو ماتتحشموش انتم ؟ راجل ومرته شن دخلنا احني خلاص ضم فمك انت وياه نوضو اقرو
مهند..قالب وجهي اهو
اني كنت مقعمزة نبكي وخلوقي ضايقة وجوي اخييي
مهند خطم من جيهت داري لانة داره جنبنا سمع صوتي نبكي طق عليا الباب
اني..منو
مهند..اني مهند
حطيت وشاحي ع راسي وفتحت الباب..نعم تبي حاجة؟
مهند..بنقولك معاش تبكي والله حيوان خوي نعرفه فوتيه هو هكي حزار هلبا ماتعدليش عليه عادي باهي
اني..لا عادي غير لقطة اخي كانت
مهند..عادي احني اهلك اصلا واني خوك وين تضايقي اني معاك باهي😉
اني ابتسمت..تمام
مهند..والله حيوان خوي
اني..اسكت حشاه
مهند..😂اشي هي ادافع عليه
اني..يابارد
مهند..هي خلي نمشي نقرا خير مايدير علينا مداهمة
اني..😂😂باه
مشي مهند لداره واني سكرت الباب وحق ربي غيرلي جوي خطر ع بالي احمد اتصلت بيه
اني..ايوا
احمد..الو
اني..احممد وينك
احمد..مني
اني..كيف!!! شن مني اني نور اختك
احمد يتسهوك..كان عندي وحدة اسمها نور بس سيبتني وخلتني ونسيتها
اني تعصبت..اوك تمام
وسكرت في وجهه
احمد..الو الو حي عليها سكرت 😂
عاودلي مارديتش اتصل بيا ع فايبر رديت
اني..نعم تفضل؟
احمد..خيرك
اني ببرادة..منو انت😌
احمد..اني احمد خوك خيرك
اني..والله معاش نذكرك صراحة من كتر سئلانك عليا
احمد..ياباردة مني الي قطع اني والا انتِ اه؟
اني..باه اني ضروفي وانت؟؟؟تكلم في حذيفة تقول هوا الي خوك مش اني ولا نسمع من بنت الناس انك خطبت ومانسمعهاش منك معقولة هكي ياخوي🙂
احمد..سامحيني والله الا لهيت ونحساب روحي قتلك اصلا
اني..تي باهي باه
احمد..وحق ربي الا ناسي هي باهي
اني..اممم ايه
احمد..هي فكيها عاد
ااني..باه شن جوكم
احمد..ماشية
اني..احمد
احمد..نعم
اني..وين بتسكنو
احمد..والله ماعارف حوشي فيه امي وبوي
اني..الحوش الي انت فيه اسكن فيه غير ديكوره وخلاص بس طلب خاص داري تقعد مسكرة☺
احمد..اكيد بس متأكدة انتِ؟
اني..ايه متأكدة عادي اني تزوجت والحمدلله
احمد فرح..باهي ان شاءالله
اني..انت وخيي ومنرخيش بيك
احمد..ربي يحفظك ليا بتحضري عرسي؟
اني..امتى حددتوه
احمد..ههههههه مزال حتى ماردوش علينا 😂
اني..تي باه يامن عاش😂😂هي العروسة بيني وبينك موافقة بس اماليها
احمد..اتفقت مع خوها وان شاءالله خير
اني..ان شاءالله ربي يتمم عليك بالخير ياوخيي
احمد..امين يارب
اني..بنبدا نقرا اهني
احمد..ايه قالي حذيفة
اني..مبردكم تهدرزو ديما خزي
احمد..😂
وقعدنا نهدرزو ساعة
خش عليا حذيفة لقاني عاطية بالظهر ونضحك ونهدرز
اني..والله ليك وحشة ستاحشتككك
احمد..والله اني اكتر اخييي من مشيتي الحوش فضي عليا وربي نتمنى نجيك توا مش قادر نعيش منغيرك في الحوش
اني..هههههههه لهدرجة مستاحشني واضح ايه لانك تتصل ماشاءالله
احمد..تي باهي باه
اني..ربي يحفظك ليا يارب ويخليك ليا وفي اقرب وقت حنرجع ليبيا ونجيك😍
احمد..ان شاءالله شن بديتي قراية؟
اني..لا قالي بعد غدوا توا كيف قلت خلي نبدا قراية
احمد..باهي تمام خلي اني نمشي على حالي وانتِ اقري وراجعي
اني..اوك تمام
احمد..ردي بالك على روحك
اني..حاضر حتى انت دير بالك على روحك
سكرت منه وتلفتت واني الابتسامة ع وجهي تلاشت الابتسامة كيف شفت حذيفة وراي واقف ومتكي ع الحيط ويشوف
اني..من امتى اهني انت؟
حذيفة..من كلمة استاحشتك
اني..اها باهي مليح
حذيفة..منو
اني..احمد
حذيفة..شن جوه
اني..كويس خطب
حذيفة..ايه عندي علم
اني..كويس😏
فتحت كتاب وقعدت نقرا فيه ونشوف وسكرت قلت اصلا قرايتهم مرات مش زينا او تختلف خلي اصلا اني بنبدا سيم من جديد لاني موقفة قداش ليا ف نخش من جديد خيرلي
حذيفة قاعد واقف ويشوفلي
اني..خيرك
حذيفة..شي
اني..في صورة؟
حذيفة..ايه نتأمل فيها
اني..اممم باهي
حذيفة جي قعمز جنبي..اسف
اني..ع شن
حذيفة..ع امبكري بس والله الا جوي ملخبط بكل وانتِ عفلقتيني وقت نفنصلك نبيك تنوضي وماتبيش تعرفيني تقعميز مع خوتي مانحباش
اني..خيرك انت خوتك هما خوتي
حذيفة..واثق فيك وواثق فيهم بس شن بندير نغار اني😌
اني..خلاص غير السكراتيرة متعك ودير سكراتير
حذيفة يساير فيا..باهي حاضر
اني..به
نشوفله وحسيت روحي مش طايقاته بكككل ونبي نستفرغ
قربلي حذيفة حضني دفيته وطلعت نجري للحمام لحقني حذيفة بالوشاح😂
طلعت بدرية..خيرها؟
حذيفة..مش عارف فجأة هكي
بدرية فهمت..اممم باه برا ارفعها عاينها
حذيفة..خلي تطلع
طلعت اني ونشوفلهم
حذيفة..هاك البسيه
لبست وشاحي وقلبت عيوني عليه
بدرية..خيرك يابنتي
اني..مانعرفش هكي من بكري مضايقة ونفسي تلعي ولما شفت حذيفة طول معش تحملت
بدرية ابتسمت
اني وحذيفة..شنو خيرك؟
بدرية..اسمعو كلامي وبرو دييري تحليل وتو تشوفي علاش نبتسم اني
اني مفهمتش خيرها وشن تقول وتحليل شنو نبي نرقد ياهمي بس
خشيت للدار
حذيفة..نوضي البسي ونمشو تعايني
اني..ماخاطريش والنبي فوتني مش طايقاتك ره
حذيفة..احترمي نفسك وتكلمي معاي زين
اني..خلاااص اسكت راااسي
حذيفة..قلنا نوضي توااا
اني..مانبيش ماعنديش نية
حذيفة بعياط..كلمة هييا
خفت اني من نبرة صوته ونضت لبست وطلعت وراه مشينا للعيادة
اني..وين به
حذيفة ماردش عليا وخشينا خدي موعد عند دكتورة وقعدنا نستنو شوية وخشينا وكانت دكتورة سورية حكيتلها الي صارلي عطتني تحاليل نديرها درتها وبعد طلعو جيناها وعطينها التحاليل
دكتورة ابتسمت..مبروك انتِ حامل😄
اني نصدمت..كييف
حذيفة فرح..😍😍الحمدلله يارب الله يبااارك فيكك
دكتورة..مدام نور اركبي معي ع الفرشي لحتى اكشف عليكي
.
اني مزال تحت تأثير الصدمة شعور فرحة وشعور خوف وهلبا حجات اتكيت ع السرير وهي دارتلي الايكو وشفنا البيبي وطلعت حامل ليا شهر قعمزنا وقعدت تحكيلي شن ندير وشن مانديرش ونبهت عليا اي شي يضرني ويضر البيبي طلعنا اني وحذيفة واني نص فرحان ونص زعلان
حذيفة..اليوم اسعد يوم بحياتي😍
اني ابتسمت..ايه
حذيفة..قاعدة زعلانة مني
اني..اي
حذيفة..اسف ياعمري
باسني ع خدي
اني..الناس يامهبوول
حذيفة..شن دخلي بيهم حلالي انتِ
اني..ههههه
كنت مش طايقة قربه ليا ومتحملة بالسيف باش مانزعلاش مش طايقة حتى ريحته 🙂
روحنا للحوش استقبلونا امه وخوته وبوه كانو يستنو فينا
حذيفة..جدو كيف حالك
عبدالهادي..ماتقولهاش😍
حذيفة متحشم ابتسم وهز راسه بإيه
بدرية تغمرتني ع طول..الف الف مبروك يابنيتي والله شاكة ليا ايام بس قلت لين تتأكدو هدا اليوم المبارك😍
مهند..قصدك بنولي عم😍
حذيفة..ايه😂
عبدالهادي..الف مبروك عليكم وان شاءالله من الذرية الصالحة يارب🙌🏻
حذيفة واني..اللهم امين
ناض مهند جاب حلويات وجي كلينا حلوان الببيبي وبعدين اني حسيت روحي ناعسة نضت ركبت رقدت ع طول ومش خاطري في شي
ناضو عبدالهادي واولاده ركبو حتى هما الي هدا بيرقد
حذيفة..هي امالا انوض حتى اني
بدرية..قعمز نبيك
حذيفة..نعم
بدرية..اسمعني اهني البنت الفترة هدي حتمر بأيام صعبة وانت ماتزيدهاش عليها يعني هيا زي ما لاحظتها بكري شكلها وحمها جايها عليك يعني كرهاتك لا تحب ريحتك لا قربك ليها وانت ماتضايقش سايرها هالشهير وبعدين تخف عليك تبدا عادي غير الفترة هدي بس
حذيفة..وحم شنو يام
بدرية..هكي وحم يجي ع الحب ومرات ع الكره وجتها عليك انت كرهاتك
حذيفة..ديما؟
بدرية..تي لا يا ولدي هكي فترة وحتعدي بس ماتشغلش بالك غير اني قلتلك باش ماتتعاركش معاها وتسايرها ع قد ماتقدر فاهم
حذيفة..باهي
ركب حذيفة لقاني راقدة غطاني واتكى جنبي بعت مسج لي احمد ..خااالو شن ادير
احمد رد عليه..خيرك تخرط عقاب هالليل
حذيفة..معقولة ياخااالو
احمد..قصدك بنولي خااال؟؟
حذيفة..ايوااه
احمد..بجديات 😍
حذيفة..ايه 😂
احمد..الف مبروووك عليكمم
حذيفة..الله يبارك فيكك
احمد..من امتى الخبر هدا
حذيفة..توا كيف عرفنا
احمد..الحمدلله يارب والف مبروك عليكم😍مش مصدق اني بيبي بيجيب بيبي😂
حذيفة..تو كان تسمعك تهيج فيك
احمد..خيرها
حذيفة..مش طايقة حد ونوم وبس
احمد..ربي يعينك😂
حذيفة..وين
احمد..برا والله
حذيفة..باهي امالا هي بنرقد اني
احمد..تم تو توصلكم هديتكم😍
حذيفة..علاش اتعب في روحك
احمد..كيف عاد اختي هدي هي تصبح
حذيفة. تصبح
سكر حذيفة وشافلي وقعد يتأمل فيا لين ررقد حتى هوا
.
.
.
.
سنابل..الله الف مبروك😍
احمد..الله يبارك فيك
سنابل..شن ادير
احمد..شي مع الشباب تبي حاجة؟
سنابل..لالا
احمد..امتى اهلك بيردو
سنابل اضايقت..مانعرفش يا احمد
احمد فهم عليها..اوك خلي بنسكر اني تو نكلمك بعدين
سكر منها ونقلب جوه اخي حاس ان هما مش حيقبلو
سنابل..افففف
مسرة..خير بلاك
سنابل..مش قادرة نقوله ان ماقبلوش
مسرة..باش قالك محمد تو نحاول معاهم
سنابل..والله مادخلي فيهم هوا والا لا
مسرة..ان شاءالله خير
.
.
محمد..يام مدامها تبيه وهو يبيها خلاص علاش التعقيييد
امه..ياولدي اني مش ع الولد والله ماعندي فيه مانقول راجل وسيد رجالة لكن
محمد..لكن شنو هي
امه.. الولد امه ماتنفعش
محمد..كيف
امه..متع سحر وايامات سود غبر
محمد انصدم..كييييف
امه..ايه مرة حكتلي نور شن مدايرتلها وكيف مهبلتها
محمد قعد يفكر..لكن يما الراجل مافيه شي غلط
امه..ايه ونعم رجال قام وخيته وسيب امه ع خاطرها ماخلا مادارلها حتى من العرس دارهولها من ناحية نتهنى ع بنتي معاه نتهنى بس امه مش حتهني بنتي
محمد..امممم باه وبنتك تبيه
امه..تو يجي يوم وتنساه
محمد..مانقدرش نكسر كلمتي مع الولد يام
امه..اسمع اني موافقة باهي لكن والله ع مسؤليتك تطرالها حاجة مادخلي بيك
محمد..تم اقنعي بوي
امه..بوك موافق غير اني معكلة الموضوع
محمد..خلاص امالا حليها هي😂
خش محمد لدار سنابل..سنابل
سنابل..انعم
محمد..عادي نهدرزو
سنابل سكرت شيتاتها..تعالى خش
خش محمد ودار كرسي وقعمز
سنابل..شنو
محمد..انتِ عارفة بموضوع امه
سنابل نزلت راسها..ايه
محمد..امممم وتقدري تواجهيها؟
سنابل شبحتله..ايه الي معاه ربي مايقدره حد
محمد..كويس باه احمد وين بيسكن عارف انك تدوي معاه
سنابل..ءء ققال في المكان الي هوا فيه
محمد..باه يعني بعيد ع امه
سنابل..ايه
محمد..امي وافقت وبوي وافق بس اني قاعد بين وبين
سنابل..خيركم عاد
محمد..معاش تتحشمي بديتي 😂 قصدي خايف عليك منها
سنابل..ماتخافش اختك قدها
محمد..عارفك تجلي حتى الجنون انتِ هدا باش بعتت رسالة لي احمد ان احني موافقين😎
سنابل..بالحقققق
محمد..والله واني جايك توا بعتتله مسج لانة امي ماتبيش تكلم امه
سنابل..😂خشييي
محمد لوحها بالشيت..ضمي فمك خليك متحشمة شوية جدري خزي جيل مايتحشم اني نتحشم من امي نقولها نبي نخطب وانتِ طايحتلي فيها ع الفقش كله
سنابل..هههههههههههههههه
محمد..خلاص اني طالع تبي شي؟
سنابل..ايه
محمد وقف..شنو
سنابل وقفت وتغمراته
محمد قعد يدور بيها..😂مهبولة
سنابل..احسن اخ في العالم كله
محمد..هههههه هي انزلي عندي ماندير
نزلت سنابل وطلع هوا واتصلت بيا اني ع طول
وقتها راقدة
حذيفة..نور نور تلفونك
اني..منو
حذيفة..مش عارف بعيد عليا هونا جنبك
خديت اني الفون لقيته سنابل رديت عليها واني راقدة..ايوا
سنابل..هييي راقدة
اني..حمارة ماهو فرق توقيت
سنابل..نسيت نسيت😂غير بنقولك بسس
اني..لخصي بسرعة
سنابل..وافقو ع خوك
اني..بالحق😍
سنابل..ايه والله توا كيف قالي محمد
اني..ربي يتمملكم على خير يارب
سنابل..اللهم امين يارب
اني..حتى اني حامل
سنابل..بالحقاااا
اني..ايه
سنابل..الف الف مبرووووووك ياقلبي
اني..الله يبارك فيك هي طيري بنرقد
سنابل..ههههه تشاو
سكرت منها ورقدت وتلفون تحت ودني
.
.
بعد فترة بدت مشاكل بيني وبين حذيفة هلبا
اني..خيرك هكي انت خيييييرك
حذيفة..تي خيرني خير امك انتِ بديتي تعلي في صوتك احترميني
اني..محترماتك بس انت مش محترمننني من هدي منوووو جاية وتسلم عليك وجوها مليح يعني لو انت مش فاتحلها المجال مكانتش دارت هكككي😠
حذيفة..قاعد صابر عليك اسكتي احسنلك
اني قعمزت ع سرير..مش ساكتة باهي مش ساكتة
حذيفة فتح الباب لقي امه واقفة
حذيفة..نعم؟
بدرية..ماتقولوليش خيركم كل يوم عياطاتكم معبية الحوش؟
حذيفة..اسئليها هيا تخلق في مشاكل بلا سبب
نزل طول و طلع واني قعمزت نبكي
بدرية..خيركم يابنتي قوليلي فضفضيلي زي اميمتك اني
اني..😭😭محتاجتها ياعميمة هلبااااا
بدرية..الله غالب الله يرحمها اني زي امك احكيلي
اني..مشعارفة شن صايرلي كارهاته وكارهة ريحته مش طايقاته
بدرية..الباين يابنتي وحمك صعب شدي حيلك وتحملي شوية بس و يابنتي من هي البنت الي كنتي تحكي عليها
اني..خداني حذيفة ورفعني معاه لشركة خشيت معاه مشي جت بنت ليبية سلمت عليه وتتمسلك عليه والله لو زادت ثانية لكنت ريشتها تي واضح انها تبيييه
بدرية..ودام ريتيه هدا كله في عيونها علاش درتي عركة مع راجلك
اني..لانه فاتحلها المجال
بدرية..شوفي يابنتي الراجل لما مرته تعبيله حياته مشاكل يبدا يفتح المجال للغير لانه غادي هدوء واهني مشاكل انتم حسيتكم ديما عركات ومشاكل ماكنتوش هكي خيركمم ولو عبيتيله حياته مش حيشوف لغيرك يعني اهتمي بيه لانك بديتي تهملي فيه
اني..تعبت والله نفسيتي تعبانة وهو مش متحملني
بدرية..كلهم هكي رجالة ترخي بيه يرخي بيك اهتمي بيه تو تشوفيه كيف يلين ويهتم بيك
اني..ان شاءالله خير
طلعت هيا واني نفجرت بالبكي كانت خلوقي ضايقة هلبا ومش طايقة ولا حاجة من جيت من جامعة للحوش ومن حوش للجامعة ماطلعتش بككل ولا شفت مكان حلو شن يعني لو هملته يهملني؟ شن الخرافات هدي مفروض يهتم ويزيد يهتم بيا لاني عذري معاي
طق الباب فتحت لقيته مهند
اني..اهلين مهند
مهند..ممكن نخش
اني..ايه عادي تفضل
خش مهند
اني..خير تبي حاجة؟
مهند..حكتلي امي ع اللي صار انتِ مضايقة؟
اني..ايه هلبا
مهند..باه بدلي ونطلعو غيري جوك شوية
اني..اوك
طلع مهند واني نحيت وشاحي بدلت لبست ونزلت اني..قصدك مش ماشية معانا عميمة؟
بدرية..لا يابنتي اعذروني والله رجليا يوجعو فيا برو انتم ماتعطلوش غيري جوك
اني..بس حذيفة حيتعفلق
بدرية...اتصلت بيه قالي باهي خلاص بري
اني..اوك
طلعنا ع رجلينا اني ومهند كان زي الاخ ليا حنون عليا هلبا
مهند..حذيفة يحبك اعذريه ع اللي صار اكيد مشاغل هلبا صارت هدا باش بدي يتعفلق من ابسط شي
اني كنت ساكتة وماخاطريش ندوي فيه الموضوع هدا
مهند فهم عليا..احم وين تبي نمشو
اني..اي مكان المهم يكون مريح
مهند..اوك عندي ليك مكان حلو
قعدنا نتمشو ونمشو كل مرة مكان واني من الراحة الي حسيتها والجو ماحسيتش بروحي ان مشينا هلبا
اني..مهند مش حنقدر نولي هدا كله تعبت
مهند..باهي تو ناخدو تاكسي
اني..اوك
خشينا مطعم تغدينا ويحكيلي مهند ع حجات تضحك لما كانو صغار واني نضحك
مهند..حذيفة ديما كان المنكدي تبعنا😂😂وديما هكي راهو ف ماتستغربيش منه مرة بنت شبحتله فنص فيها يعني مش معقولة يكون فاتح مجال لبنت في شركة زيادة
اني..مانعرفش نظراتها ليه كانت مستفزة بنسبة ليا وهوا عادي سلم وضحك وجوه حلو واني جنبه ولا عدل ع مشاعري
مهند..اكيد فيه تفسير ماتخافيش
اني. ان شاءالله
مهند..امممم
اني..وانت مافيش في حياتك بنوتة😉؟
مهند..لالا فايته جو هوا ماخاطريش فيه نبي نقرا
اني..هدا صح بس حسيتك زيني حتى اني هكي كنت فايتاته جو هوا الى ان لقيت روحي عند خوك😂😂
مهند..😂😂ياشينك طيحة غبرة يناري عليك
اني..امممم بس والله هوا كويس وحنون وطيب والله نحبه رغم هدا كله
مهند..ربي يحفظكم لبعض يارب
واحني نهدرزو نشبح في مهند يشبح وراي وهو وجهه اصفر ومايتفسرش
اني..شن في
مهند..ءءلا لا شي نطلب الحساب خلاص؟
اني ونتلفت..خيرك عاد حي شن الي نشوف فيه هدا😳حذييفة!!!
مهند..اشش فوتيه هيا نطلعو
اني..شن نفوته خيرك انت
نضت وجي مهند معاي اني..ممكن نقعمزو ؟؟
حذيفة وجهه والا الوان والبنت استغربت فينا من هدم
حذيفة..ءءنوور
اني..ايه خيرك استغربت نووووور اني
حذيفة..كيف جيتي
اني..خزي هدي اخرة ثقتي فيك ياحذيفة وزيادة هي حاطة يدها ع يدك والله ماتتحشم بالله حسبي الله ونعم الوكيل (شفت لمهند)هدا الي كنت تقولي عليه يحبك؟؟؟وينه الحب بالله وينه؟؟
مهند وجهه احمر ومتعفلق طلعت اني نجري
مهند..خزي عليك كسرت بخاطرها وهي الي تفكرلك وتبي اديرلك اي شي باش تضحك
طلع وراي مهند ولحقنا حذيفة
البنت..ولك شو هاااد كنت رح زبطو طلع متزوج😑
دفعت الحساب وطلعت
اني نمشي ونبكي..😭😭
مهند..نور استني نوور بالله عليك استني نوقف تاكسي ونمشو نووور
اني..خليني في حالي نعرف طريق😭
حذيفة..نوور نووور استنييي
كان يجري وجي قدامي
اني..حول حول من عليا حووول
حذيفة..والله فاهمة غلط يانور افهميني بسسس بعدين بري
اني..شن بنفهم شنوو تضحكو وجوكم مليح واني اني وين مشييت اني الي متعارك معاي ومداير منها قصة طويلة عريضة تي غير تفوت البنت متع شركة طووول شدت في بنت مانندري ع همها من وين خيرك انت خيرك شن صارلك راني حامل حاااااامل😭حرام عليك الي ادير فيه هدا كله لانة نفسيتي تعبت ماتحملتنيش؟؟ لاني اهملتك يومين درت هدا كله علاش؟؟ شن الي درتهولك اني حول والا والله ماني راجعة للحوش😠
حول حذيفة من طريقي قهرني لانة مادافعش ع نفسه ماسكتنيش ومادافعش ع روحه حرام عليه 😭
روحت للحوش ومهند وراي خشينا طول ركبت للدار وسكرتها بالمفتاح باش مايلحقني حد اتكيت وقعدت نبكي
بدرية..خيرها خيركم
قعد مهند يحكيلها ع خشة حذيفة
بدرية..من هدي منووو؟؟؟
حذيفة..والله اجتماع يام وهي البنت تمادت وجت في عين نور
مهند يشبحله بإستحقار
بدرية..برا راضي مرتك خيرك غبي انت المرا حامل ومش باهي ليها تعصيب هدا امشي
مشي حذيفة ركبلي
اني..شن تبي
حذيفة..اسف
اني..علاش هكي شن درتلك اني شنوو روح بيا لي ليبيا معش نبي نقعد اهننني😭😭😭
حذيفة..اسف والله فاهمة غلط البنت تمادت ووقت حطت يدها انتِ جيتي
اني..اطلع براااا اطلللع كرهتتتك انييي
طلع حذيفة ومباش يكثر معاي دوة قعدت نبكي لين رقدت وحذيفة طلع ومعش روح لبعد العشي واني في دار ماطلعتش جتني بدرية عطتني العشي وقعد زي ما هوا ماقدرتش ناكل بكل توقعت حذيفة يروح جايبلي هدية باش يرضينيي جي خش جايبلي ورد وشكاليط وحجات حلوة😻
اني..شن هدا
حذيفة..اسف سامحيني بس والله مافي غيرك في قلبي ياروحي
اني مزال مش طايب عليا نسامحه طنشته وهو تعفلق وطلع نزل
واني قعدت نبكي لعند رقدت تاني وماكليتش شي وهو رقد لوطة💔بدي فترة عن فترة معش طايق يخش للدار باش مانتعاركوش
اني حسيت بالذنب وان ماسامحتاش هوا ماذنباش واني كبرتها..افف خيره ماجاش لتوا ياربي
قعدت ندور في دار لبست وشاحي ونزلت لقيته راقد ع الكنبة لوطة
اني..يارببي انت راقد اهني واني مشغولة فوق
حذيفة..هممم
اني..نوض اركب ارقد فوق علاش راقد اهني
حذيفة..خليني اهني مرتاح
اني..لا هيا اركب تو ينزل بوك يشوفك لوطة
حذيفة..اففف به
ناض حذيفة وركب واني خشيت مطبخ خديت حليب وركبت خشيت للدار لقيته راقد يي زي البيبي حلااه😍حطيت يدي ع لحيته..اسفة بس مش مني والله والحمدلله بديت معش زي قبل لدرجة ان اني توا نمسح عليك ومرتاحة ومش منقرفة
حذيفة كان يسمع فيا فتح يديه..تعالي اهني كان تبي نرتاحو😌
اني خشيت في حضنه ورقدت وهو رقد ومن وقت ماحملت لتوا هدا وين ارتحت في نومتي💤
نزلت بدرية الفجر زي ماتعودت تنزل وتلقا حذيفة لوطا تنوض فيه باش مايشوفاش بوه بس مالقاتاش شافت من روشن لقت سيارته قاعدة ابتسمت ابتسامة عريضة وعرفت اننا تصالحنا
ركبت طول واني كيف طالعة من حمام (حشاكم)
بدرية..صباح الخييير😘
اني..صباح الورد😅
بدرية..حذيفة ماريتاش لوطة
اني..ايه في دار هونا تبيه انوضهولك؟
بدرية..لا سلامته يابنتي غير نزلت بنوضه للفجر
اني..اهو بنوضه توا اني
بدرية..تصالحتو
اني..ايه شبه
بدرية..الحمدلله يارب خلاص خشي نوضيه وصلي
اني..حاضر
خشت بدرية صلت وقعدت تدعي لصغارها ولينا❤
اني..حبيبي نوض
حذيفة..اااه صباح الخير😍
اني..باحو ورد😘نوض نصلو الفجر
حذيفة..حاضر هي
طلع حذيفة وخش الحمام (حشاكم)
.
.
بعد صلينا
حذيفة..معاش فيها نوم هرب
اني..حتى اني
حذيفة..تتقدري تنزلي اديريلي قهوة توا
اني..قهووة؟خلي نديرلك تفطر وبعدين قهوة
حذيفة..كيف ماتبي😊
فتح هوا TV واني نزلت قعدت ندير بشوية بشوية باش مانوض حد حطيت شاهي ع نار وركبت الفطور فطرنا مع بعض ونزلت اني طفيت ع شاهي لقيت عمي نازل
اني..صباح الخير عمي
عبدالهادي..صباح الورد بنتي نشاط اليوم
اني..ايه صلينا ومعاش جي نوم
عبدالهادي..اني بننمشي نتريض
اني..ااه ماتبيش شاهي؟
عبدالهادي..مدامك درتي هاتي مانرداش منك 😅
اني عطيته وقعد يهدرز عليا حسيته كأنه بابا الله يرمحه لمعو عيوني بالدموع وحاولت نتهرب بس كشفني
عبدالهادي..يابنتي علاش دموع مضايقة؟
اني..لا بس ذكرتني بي بابا الله يرحمه نفس كلامك ونفس ضحكتك ونفس حركاتك😢
عبدالهادي..الله يرحمه صح اني والمرحوم كنا نشبهو بعض هلبا
اني شفت حذيفة نازل مسحت دموعي طول..الله يرحمه ويوسع عليه هوا وماما وجدو💔
عبدالهادي..امين يارب
حذيفة..صبااح الخير بوي
عبدالهادي..صباح النور شنو حتى انت بتتريض؟
حذيفة..ايه نمشو مع بعض؟
عبدالهادي..هي باش نوصلو في الوقت ونمشو شركة
حذيفة..تم
حط حذيفة السفرة متع الفطور وخلا عمي يطلع وجي حضني ع طول وباسني وطلع
اني..مهبوول
حذيفة وهو طالع تلفتلي وهمسلي..بييك
وطلع طول
اني نحرك في راسي يمين ويسار..مهبول وحق ربي😂
هاني..صباح الخيير
اني..صباح النور
هاني..وين امي
اني..ماريتهاش بلكي قاعدة راقدة
هاني..ايه اني طالع
اني..ااه ماتبيش تفطر عادي راه نديرلك
هاني..لالا نتريض قبل وبعدين نجي نفطر
اني..اهااا باهي سهفتوني في رياضة هدي😂
هاني..هههههه من طلع
اني..حذيفة وعمي
هاني..ايه كل يوم هدم
اني..ايه
هاني..هي اني ماشي
اني..سلامات
طلع هاني واني ضميت المطبخ وركبت دوشت وبدلت ووتيت روحي نزلت لقيت بدرية حاطة الفطور ع طاولة
اني..صباح الخير عميمة
بدرية..صباح الورد
اني..وينك مبكري هدا وين نضتي
بدرية..ايه يابنيتي تعبانة ورقدت
اني..اهاا
بدرية..وينهم مالقيت حد
اني..طلعو يتريضو لكن ماريتش مهند اكيد قاعد راقد
بدرية..اهاا تو نركب انوضه
اني قعمزت ونشرب في العصير يخشو كلهم
حذيفة اشرلي بحواجبه متع اركبي
اني..هيا عميمة موتية الفطور وتستنى فيكم
حذيفة..بنركب ندوش اني
عمي..ايه حتى اني
هاني..اني معاد قادر نتحمل نفطر ونركب😥
اني شوية وانسحبت ركبت فوق لقيت حذيفة ممتد ع السرير
اني..حبيبي خيرك تبي حاجة
حذيفة..ايه طلعيلي حوايجي
اني..هونا معلقات ماريتهمش؟
حذيفة..ماركزتش
اني..خيرك
حذيفة..لالا شي غير جريت هلبا خلي انوض ندوش
اني..اوك خلي ننزل اني
نزلت وقعمزت معاهم وقعدو يهدرزو ويحكو
مهند..صباح الخيير
كلنا..صباح الورد
حذيفة..بوي حقا بنقولك
كلنا شفناله
عمي..انعم
حذيفة..حصلت حوش ومش بعيد عليكم نبي ناخده
بدرية شبحتلي وشبحتله..علاش خيركم؟؟
اني صدمني ماكنتش نعرف
حذيفة..يام حسيت حوش بروحي خير
بدرية شافتلي..مضايقة من حاجة؟
اني..ءء اني زيني زيكم ماكنتش نعرف اصلا
عمي فنص في بدرية..باهي خوده عادي وكان نقصوك فلوس قولي
حذيفة..مية مية
طلعنا
اني..خيرك ماقلتليش!؟
حذيفة..شنو؟
اني..ان بنحولو حوش بروحنا
حذيفة..عادي ماكنتش نحسابك بتضايقي
اني..المفروض يكون عندي علم
حذيفة..ماديريش منها قصة حبيبي عادية هيا
اني..به
ووصلنا للجامعة
اني حطني حذيفة في كلية وهو مشي بديت نقرا وحايسة في بعضي قراية وحمل و تحويلة لحوش كله ورا بعضه 😧
.
.
.
.
في "ليبيا" نكملو وين ماوقفنا المرة الي فاتت
في ليل في حوشهم
سوسن..محمد عطيني نكلم ماما اكيد منشغلة عليا
محمد..حييي نسيتك لحظة نازل للسيارة وجاي
سوسن..شن نسيت ياهمي
محمد..تو نجيك قلنا
نزل محمد يجري خدي شكارة الي حاطها في سيارة وركب طول بدون مايشوفه حد وخش
سوسن..شن هدي
محمد ابتسم وطلع الباكو..😎
سوسن..😍😍حيييي ايفون اكسسس
محمد..ايه
سوسن حضناته..😍😍😍هههههههه نحبككك
محمد..نموت فيييك
خدت سوسن الفون وفتحاته
محمد..استني هدي شفرتك مميزة راهو
سوسن..😍😍ربي يخليك ليا يااااارب
محمد..ويحفظك ليا يا مدللتي
رقدو من تعب وتاني يوم ناضو
سوسن..نحطلك فطورك
محمد..لالا تو ننزل نفطر مع الاولاد لوطة
سوسن..لااا والي موتياته
محمد..باهي حاضر هي
قعمزو فطرو ونزل محمد
محمد..صباح الخير
.
.
إذا عجبتك القصة لا تنسي الإعجاب و الإضافة ليصلك كل جديد مشاركة القصة مع الأخريين
و لا تنسوا أيضا تعليقكم و اقتراحاتكم لنقدم ما تريدونه

MBC LIBYA تابعوا صفحة