حكايتي ( روايات ليبية )

حلقة 2

رواية #حكايتي
( واقع ممزوج بلخيال )
للكاتبة #حنو
الرواية بلهجة الليبية
الحلقة 2
🔥
.
.
ركبت اني السيارة ع طول وركب احمد وطلعنا
عبدالله واقف ويتفرج وهو يغلي..بوي شن الي ادير فيه هدا
جدي قعمز ع الكرسي..وانت شن ليك علاقة!! اني ولي امرها البنت واني ادرا بيها اكتر منك
عبدالله..يابوي تفتحلها في عيونها ناقصنا بلي احني تي طيرها اول مايجيها خطيب وفكنا وبعدين قولها تتحجب وتلبس لبس باهي
جدي..كله بقناعة يجي بشوية بشوية
عبدالله..والله غلط الي ادير فيه
جدي..ماليكش علاقة انت برا شد مرتك بعدين تعالى تكلم معاي وبعدين هدي بنت يتيمة توا اي شي تقولوه عليها انتم بتحملو خطيتها☺
عبدالله..يابوي خيرها مرتي جتكم كلمتكم؟؟ وانت ديما طايح فيها خيرا ماديرلها زي مادرت لي مرت ولدك الي توفت
جدي..الله يرحمها ويوسع عليها مرتك من يوم ماخديتها لعند اليوم عمرها ماقالت ياعمي بلكي تبي حاجة والا جت ضمتلي حوشي ولا جابتلي حاجة باهية خلعتني بيها ولا عمرها اهتمت بيا وبي دواي وتوا هي اقلب من عليا لفوق وماتنساش كلمة تانية تلقا روحك برا الحوش انت ومرتك والحوش يسكن فيه احمد فااهم والا مش فااهم وانت دبر اجر والا الي بديره ديره وقول لمرتك تعقل ومعاش تتكلم مع البنت نهائي وماعاودتلي شي اني سمعتها بودني شن قالت
عبدالله..ءء بوي خيرك نهدرز عليك اني بس حاضر حاضر الي تبيه
ركب عبدالله يجري لحوشه👣
جدي..هه والله ماعقبت فيكم راجل غير ولدي الي خداه مني ربي الله يرحمه وخلالي هالأمانة هدي بإذن الله مامنقص عليها حويجة ومانعطيها كان الي هي تبيه والي يسر خاطرها وتكمل قرايتها وتاخد شهادتها واني نعرف شن نديرلكم باش ماتقدروش تقربوها ولا تجو جيهتها😎
.
.
.
اني..احمممد نبي نبي
احمد..شنو
اني..نبي جيلاطي بالله عليييك😍😍
احمد..باه تو ننزل اني ماتنزليش
اني..به فرااولة
احمد..حاضر
نزل احمد وخلا فونه شرين وكانت خطيبته
اني..حييي قداش ليا عليها نبي نهدرز عليها
منار..حبيبي وينك
اني..اهلا منوورة شن جوو
منار..نوور ؟؟
اني..ايه نور معقولة هكي من العزي معاش تكلميني ولا تسألي عليا هكي قطعتي ؟؟
منار..غر لحضة هدا فون احمد والا
اني..ايه اني ريتك تشريني قلت نرد عليك ستاحشتك وينك معاش تتصلي اني فوني معاد نندري عليه وين اصلا
منار..ءء والله يانور ماعاد فضيت بكل سامحيني
اني..عادي عادي مانزعلش منك اني انتِ تعرفي عنديش صاحبات وكان خاطري نديرك صاحبتي💔بس شكلك تبيش
منار..عينك والله لا والله ماعاد فاضية بالله وحتى قلت نبي نوليلك ماما قتلي لا عيب وهكي تعرفي ان حوش احمد فوقكم واني خطيبته
اني..ايه صح عندك حق
منار..اي شن اديري وين انتِ صوت دوشة
اني..جدي شرالي سيارة طلعنا بيها توا اني واحمد قتله يخطم ياخدلنا جيلاطي
منار غارت..باه باه اول مايجي احمد قوليله نبيك
اني..تمام منورة سلامات
منار..سلام
سكرت منار وحطيت الفون ع جيت احمد
احمد..من اتصل
اني..منار
احمد..شدي
خديت جيلاطي وبديت ناكل فيه
احمد..رديتي عليها؟
اني..ايه ليش ماتبيش نرد عليها؟؟
احمد..لا مش هكي بس حتفهم غلط
اني..لا عااادي هدرزنا مع بعض اني نعرفها منار تحبني وواثقة فيا واني يا احمد نحبك زي وخيي والله خيركم كلكم خايفين مني علاش هكي معقولة موتت امي وبوي هكي ادير فيا ؟؟؟
احمد..تؤ سبحااان الله طول بدت تبكي والله ماقلت حاجة اني والله وخيتي انتِ والي تبيه يصير بس تعرفي منار لانك رديتي انتِ بتفهم غلط وماتبيش تجرحك هدا باش ماقالت شي ليك انتِ بس لحضة ها شوفي كيف شن بتقول
اتصل احمد بيها..ايوا عيوني
منار..لا عيوني لا بطيخ وين انت
احمد..مطلع نور نغيرلها في جوها شوية خير في شي!!
منار..وشن مافيش غيرك وين مانسئلك تقولي نور نور نور نور شن هدا موتت بوها وامها جت ع راسي اني ؟؟
احمد..الكلام الي قلتيه هدا معاد نبي نسمعه نور اختي والي تبيه هيا حيصير
منار..واني
احمد..انتِ مكانك غير انتِ خطيبتي وحبيبتي يعني علاش اديري هكي مش فاهم وياريت ماتعرفيهاش نور المشكلة انك تعرفيها ومهدرزة عليها
اني تكلمت والعبرة خانقتني..ماتخافيش منار انتِ وغيرك ماتخافوش مني اني مش سراقة رجالة باش بناخد منك خطيبك هو ولد عمي وخوي ونقولك حاجة ماتعرفيهاش اني واحمد خوت بالرضاعة يعني الكل يحسابني مانعرفش ان احمد خوي بالرضاعة بس نعرف اني ولهدا السبب اني نطلع معاه هوا وبس فهمتي توا منورة وصحيتي هلباااااا ع شكك فيا😊
منار..احمد اعطيهالي
احمد..تو نتحاسبو بعدين اني وياك تو بنسككر
سكر احمد عليها واني نزلو دموعي
احمد مسحلي دموعي..خلاص عاد بلاش منها دموع هدي معاش نبيك تبكي اني
اني..هما يبكو فيا كل مانسكت ونقول خلاص كافي دموع يجي من يبكيني
احمد..خلاص اني اسف بالنيابة عليها والله دموعك غاليات عليا
اني..باه
مسحت دموعي
احمد..سامحيها ع خاطري
اني..مسامحتهم كلهم مش زعلانة من حد ومش حاملة في قلبي ع حد
احمد قرصني من خدي..هدي وخيتي الي نعرفها
كلينا وروحنا للحوش
احمد..الصبح تجيك المدربة والعشية نطلعك اني تتعلمي في سيارتك
اني..باه
احمد..تو قوليلي كيف خوك بالرضاعة
اني..كيف تعرفش انت؟
احمد..والله مانعرف ولا عمرها جت قدامي سيرة هدي
اني..بالحقا!!!!
احمد..ايه والله مانعرف
اني..الله غالب المهم اني اختك بالرضاعة امك مرضعتني
احمد..امي؟؟
اني..ايه امك باش ولدت مع امي حتى هيا وهونا بعد فترة مات وامي مرضت ومعاد قدرت ترضعني بدت امك تجي وترضع فيا
احمد..حي حي وخيرني مانعرفش
اني..مش عارفة نحسابك تندري
احمد..امي الي هيا امي عمرها ماقالتها
اني..ايه الكل يعرف الا انت!!
احمد..الكل؟؟
اني..ايه الككل
احمد..ياربي وكيف هكي مانعرفش
اني..اسئل امك😊
وروحنا لحوشنا
ركب هوا فوق واني خشيت داخل
احمد..كيف ماتقوليليش ان نور اختي؟؟
امه..😳😳
احمد..شن تشبحيلي هكي نور اختي وماتقوليليش!!!!
امه..مانبيكش تتحكك بيها اني مانحبها لا هيا ولا امها ولولا كنت مغصوبة ان نرضعها والله ماني مرضعتها
احمد..امي خيرككك هدي اختتتي اني وياها راضعين من نفس الام تي معقولة هدي زي بنننتك
امه..لا بنتي ولا غيره
احمد..باه خلينا من هدا كله كيف ماتقوليليش انها اختي!!!
امه..انت من قالك؟؟
احمد..اني وياها هدرزنا وحكتلي كل شي انكم شاكين فيها وهيا تعرف وحاكيتلها امها ان اني خوها بالرضاعة وحاكيتلها القصة الي صارت
امه..مشاءالله في يوم قلباتك عليا
احمد..ماقلبتنيش بس اني تعرفي الفرحة الي حسيت بيها ان عندي اخت ماتتصدقش
امه..انت توا خاطب وفكنا من جو طلوع انت وياها وخشوش
احمد..مادرتش شي غلط هدي اختي وليها حق عليا
وخش احمد لداره..ايوا نعم!!
منار..اسفة والله ماقصدي اني
احمد..شن ماقصدك شننن تكلمي تو هدا كلام تقوليه خيرك انتِ اني واخدك واني الي نبيك بتجي وحدة بتغيرك عليا؟؟؟ يعني خلاص الخير انقطع معاش ندير شي ؟؟؟ وبعدين هدي اختي ياناس
منار..باه مانندريش اني وين نندري انها اختك اااه
احمد..هي هكي والا هكي زي وخيتي الصغيرة
منار..في فرق مرات هي تحبك وانت تندريش
احمد..ايه اطمني اهي اختي ومستحيل تفكر في شي تاني ياناس خيركك
منار..باه سامحني
احمد..بري كلميها هيا تسامحك
منار..اتصلت بيها ماتردش
احمد..اتصلي لين ترد عليك
منار..باه
سكرت منار منه وهي تحاول تتصل بيا اني واني في
داري نبكي ع الي يصير فيا هدا كل واحد يهين فيا من جهة💔
رديت عليها..نعم منار شن في تاني بتقوليه!!
منار..نور اني اسفة
اني..ع شنو
منار..ع الموقف الي صار بكري
اني..اني نسيت كل شي
منار..كيف
اني..مانزعلش منك ولا منغيرك ولا حد دايرتله اهتمام باش نزعل منه الي نزعل منهم ومهتمة بيهم ماتو خلاص معاد عندي ع من بنزعل او بنضايق وتاني شي تتهني انتِ واحمد واني توا هاك ارتحتي من جيهتي يعني ماتشبحيش لكل الناس ان بياخدوه منك لانة فعلا حياخدوه لو شفتيله بنظرة هدي بس لما ماتكبريش براسه وتخلي روحك عادية وقتها ماياخده منك حد😊هدي نصيحة مني ليك يا منار وتاني مرة نقولك اني مانزعلش ع حد او من حد من بعد امي وبوي والي يدير حاجة ليا بينه وبين ربي مالياش علاقة هي سلام
سكرت عليها وهي زادت اضايقت من سمعت كلامي وقعدت تبكي
اني وقفت قدام المراية..خلاص من بعد اليوم معاد في بكي قدام اي حد يا نور بتبكي قعمزي ابكي بروحك وبعدها اطلعي وابتسمي😊الحمد لله يارب ع الصحة
طلعت لقيت جدي راقد نوضته عطيته دواه وطيبت العشي وقعمزنا نتعشو ع خشة احمد علينا
احمد. اوووه كيف ماتقولوليش تعالى تعشى اااه
اني..قعمز تو نجيبلك صونية تاكل
احمد..لالا قعمزي تو نجيب اني
مشي احمد جاب صونية وحطيتله وقعمز معانا ياكل
جدي..ااه الحمد لله سلم يدياتك يابنتي مشاءالله عليك
اني..الله يسلمك جدو
احمد..الحمد لله بنسئلك تعرفي اديري كيكة كراميل؟
اني..اكيييد
احمد..خلاص نجيبلك حجاتها وديريهالنا خاطري فيها
اني..وخيي خاطره في كيكة ومايقوليش؟؟
احمد..هههههه بما ان عندي وخية زيك قلت ندلع عليها
جدي..ادلع ماتنفعك كان هيا ره ومايوقف معاك كان هيا
قمت المواعين غسلتهم ومشي احمد جابلي حجات الكيكة وبديت ندير فيها
جدي..ياولدي نور امانة في رقبتك
احمد..عيب ياجدي نور اختي وبنت عمي
جدي..ايوااه خليها قدام عيونك ديما رد بالك منها وماتخليش دمعتها تنزل ديما انصحها وخليها تكون قوية قد حالها لانة كسرتها في بوها وامها صعبة ره
احمد..ايه صح حاضر والله مامخليها
جدي..هي بنطلع اني تو نجي خليك معاها كانا ماعندكش وين طالع
احمد..باهي
كملت اني الي ندير فيه وقعمزت نتفرج ع TV واحمد يهدرز مع منار لعند طابت ناديت عليه
احمد..هي حبيبي تو نكلممك
منار..اوك
اني..هيا تعالى طابت
احمد..اوك
حطيتله واني خديت وقعمزنا نهدرزو
احمد..نور ماتاخديش ع خاطرك ع منار والله طيبة وكويسة غر هي غارت وهكي
اني..خلاص احمد سكرناه الموضوع هدا
احمد..به ..وين سجلتي
اني..في طب بشري😊
احمد..اياااح
اني..ايه
احمد..طب بشري مرة وحدة خديتي حاجة اقل بشوية ع الاقل ماتعطليش
اني..علاش قالق مني!
احمد..مش هكي ياغبية غر حسيت موضوعه طويل هلبا
اني..لالا اني نبيه
احمد..باه ياستي ربي يوفقك😘
اني..يارب
احمد..معاش جي حد من يومها
اني..لانة مايبيني حد ومايحبني حد
احمد..عينك
اني..ايه احمد هدا الحق
احمد..والله يحبوك
اني..مايحبني منهم حد احمد مادافعش عليهم
احمد..باه
اني..كلمتني خالتي بكري قتلي نبيك تجيني
احمد..تباتي؟؟
اني..نو اصلا قتلها مش جاية
احمد..علااش
اني..صبح بنمشي مع المدربة والعشية معاك
احمد..خلاص العشية نرفعك ليها ونعوضوها تاني يوم
اني..بالحقا😍
احمد..ايه
اني..وربي نحبك
احمد..ههههههههه
شفشلي شعري
اني..مبردددك
احمد..شكرا ع الكيكة هي اني في الشارع اهني تبي اي حاجة كلميني
اني..تمام
طلع احمد واني قعمزت نتفرج ع TV ونبي نفتح النت مالقيتش في نت اتصلت بأحمد..ايوا
اني..عندك نت؟
احمد..ايه اهو فاتحه
اني..ابعتلي الباس به
احمد..تمام
سكرت منه وبعتلي الباسوورد وفتحت النت حي حي ع الاشعارات وتاقات😏الي يبيني يعرف مكاني ورقمي
تصفحت شوية ورديت ع المسجات الي جوني وسكرت رقدت
.
.
.
نضت تاني يوم
اني..جدي صباح الخير
جدي..هي بنتي نوضي شوية وتجيك مدربة
نضت اني دوشت وبدلت ودرت شعراتي فوق وخشيت للمطبخ لقيت جدي يطيب في الشاهي
اني..جدو
جدي..هي قعمزي درتلك سندوتش كولي وهدا الشاهي وهدا العصير
اني..علاش متعب روحك كنت نديره اني
جدي..هي هي كولي
قعمزت اني وجدي وفطرنا وقمت المواعين وجت المدربة وطلعنا وكان يوم حلو من اول يوم😍
واول ماروحت لقيت احمد يستنى فيا
احمد..هي اركبي
ركبت اني في السيارة وطلعنا مشينا لي استراحتنا
وبديت نسوق وهو يعلم فيا كيف ندير وكل مرة يديرلي شي
اني..احمممد تو ضيييقة هدددي
احمد..مادخليش
اني..والله ضيق كيف بنخش بينهم
احمد وقف وحط يده ع خده ويهز في رجله..هيااا
اني..يارببي بسم الله بسم الله يارب تساعدني
وقعدت نمشي بشوية ونشوف ونعدل لعند طلعت
احمد..هاك قدرتي
اني..ايييه هههههه
احمد..معاش تخافي
اني..به
احمد..جازفي ديما
اني..مش خايفة ع عمري خفت ع سيارة😂😂
احمد..وتمشي السيارة نجيبولك مية غيرها
اني..😍نعليا من وخيي
احمد..هي نقزي جيهة تانية وقت بنروحو
اني..اووك اصلا عييت
طلعنا وروحونا
وصلنا للحوش
لقينا امه مقعمزة في الجنان وتستنى
امه..مشاءالله مشاءالله وين كنتوو
اني..كنا في الاستراحة نتعنا يعلم فيا احمد
امه..وشن ماعندك غير احمد انتِ؟؟ اااه قوولي ياسر ولدي خليه في حاله وين مانبي احمد وين تلقيه مع نور احمد وين رفع نور احمد وين روح بي نور تي خلاص يابنت اعتقيه ولدي هو راس ولد مش ناقصاتك راهوو
اني دمعو عيوني وشديت روحي واذكرت كلام جدي زدت تقويت وقفت قدامها بكل قوة ورفعت راسي..احمد خوي وهو مجبور بيا يا مرت العم
امه..لا والله وطلع عندك لساان اسمعيني اهنننيي لا اني ولا عمك نبوك لا في حوشنا ولا في مكان تاني فاااهمة
اني..ساهلة من توا انوض نمشي لحوشي لكن اني قاعدة ع خاطر جدي وبسس
امه..جدك سيوره يمشي وقتها نعرفو كيف نتصرفو
اني..ااعلا ما في خيلك اركبييه
جدي خش بيننا..وشن بتتصرفي ياست هانم بتلزيها؟؟ والا بطلعيها من حوشي اااه تكلمي!!!
ناضت ومشت تجري لحوشها فوق
جدي..وين احمد كيف يخليك هكي معاها وتتكلم معاك هكي
اني..احمد طلع حطني ومشي كلموه صحابه
جدي..ماتخافيش بنتي اني مش حنخليك
اني..جدوو انت شن قتلي كوني قوية وقد كل شي خلاص هاا شوف مابكيتش😊وتقويت بربي عليها
جدي..خايف عليك يابنتي اني ولهدا السبب اني درت الي في راسي
اني..شن درت ياجدو
جدي..يوم تدرق عيني افتحي الصندوق هدا وشوفي شن فيه بس هاا اوعديني ان ماتفتحيشي لو مهما صار
اني..حاضر ياجدو وربي يحفظك ليا يااااااارب ومايغيبك عليا
خشيت للحوش خشيت لداري وقعمزت قعدت شادة الصندوق ونشوفله ياترى شن فيك !! دسيته في دولابي وحطيت عليه حوايجي واتكيت ع سرير وفتحت فوني ع صور ونتفرج ع صوري معاهم ونبكي عيلتي في يوم تهدمت💔بكيت لعند فشيت غلي
.
.
جدي جي بيفتح الباب سمع شهقاتي وبكاي وقف وقعد يسمع فيا لعند رقدت فتح الباب لقاني راقدة غطاني وباس ع راسي وطلع من دار وخش رقد💤💤
.
.
.
وهكي كل يوم😒نروح اني واحمد هو يمشي واني نخش نلقاها تستنى فيا تهزب وتهزب وتهزب ولما تكمل نقولها هي بنخش نرقد اني تعبت هلبا اليوم وتنجلط هيا وتركب تبكبك😒كانت مدرهتلي كبدي في كل شي
.
.
في يوم كان جمعة جتنا مراء من الجيران دخلتها ورحبت بيها وضيفتها
المراء..شن اسمك😊
اني..نور
المراء..نور مشاءالله عليك اني جارتكم اهني
اني..اهلا وسهلا بيك خويلة
المراء..مشاءالله عليك زي اميمتك الله يرحمها
اني..امين يارب ويوسع عليهم
المرا..شوفي يابنتي اني ولدي ندورله ويشوف فيك هوا وعاجبتيه يعني شن رايك انتِ
اني..والله ياخويلة اني مزال صغيرة وبنبدا قراية توا في جامعة ومشواري طويل
المرا..ولدي قابل وهو يعرف تفاصيل هدي كلها
اني..مش عارفة الحق نفكر قبل
المرا..ولدي اسمه محمد يشتغل مهندس والحمد لله حالتنا ومستورة والي تبيه حاضر مواليد 90 صح كبير هلبا عليك بس زيدي فكري في الموضوع😊
اني..مش عارفة نفكر ونردو عليك
المرا..اني جيتك منغير موعد سامحيني غر ماعنديش رقمك ومرت عمك ماعنديش بيها خلطة ونبيك بروحك مانبيهاش معاك هدا باش
اني..تفضلي في اي وقت😊
المرا..عطيني رقمك سلمها ياربي
عطيتها رقمي وشرينتلي شوية ونزلت مرت عمي خشت طول
مرت عمي..اهليين خيرية عندنا وماتقوليليش يانوور
اني..ءء
المرا..اي اهو بنروح اني ولدي جاني قلت نشوفها ونهدرز عليها معاش وليت قداش ليا
مرت عمي..اممم غر اقعدي
المرا..لالا بنروح
اني..بسلامة خويلة
المرا غمزتلي..سلمك وزي ماقتلك
اني..ان شاءالله
طلعت هيا وقعدت مرت عمي اتقصقص فيا وتجري وراي
مرت عمي..غر قولي شن تبي هيا خيرها
اني..ماتبي شي تهدرز وخلاص ووصتتني ع حجات تبيهم من جدي بسس
مرت عمي..كدااابة
اني..ايه كدابة باهي شن تبي انتِ
مرت عمي..حنعرف يا نور تو تشوفي
اني..اعرفي والا اطربقي شن الهم هدي
روح جدي واحمد تغدو وخش جدي رقد
اني..احمد انت اقرب واحد ليا ونتحشم نقول لجدي
احمد..شن في خيرك
اني..بكري جتنا جارتنا عيلة الـ...
احمد..ايه عرفتهم باه خيرها
اني وخدودي حمر..جت تخطب
احمد..ايواااه ايواااه من تخطب
اني..في جدي😒 منو يعني
احمد..😂😂😂
اني..تي بلا تسهويك
احمد..لمنو باه
اني..قالت اسمه محمد
احمد..ايه ايه عرفته المعفن يجي بدي هلبا وويهدرز هلبا هدا علاااش
اني..وين نندري اني هكي قالتلي
احمد..باه
اني..شن رايك انت
احمد..الولد كويس وماعندي مانقول فيه شوفي رايك انتِ
اني..نحس في روحي مزال صغيرة ونبي نكمل قرايتي ومزال مشوار طويل قدامي
احمد..وهي شن قالت
اني..قتلها هكي قتلي هو يعرف التفاصيل هدي كلها وقابل انك تقري وتكملي
احمد..والله ماعارف الحق تو نقول لجدي وانتِ صلي واستخيري والي فيه الخير ربي يجيبه
اني..ان شاءالله
خشيت درت زي ماقالي احمد ونعسني النوم رقدت
نضت ع صوت خالي ينوض فيا هدا كان مسافر وماحضرش العزي اني نطيت وتغمرته وقعدت نبكي
خالي..خلاص الله غالب
اني..مشت ياخالي وسيبتنا😭
خالي خانقاته العبرة..خلاص ياعيوني قضاء الله وقدره والله مانخليك محتاجة حاجة غر معش تبكي بس
اني..اني مش محتاجة غير ماما وبابا
خالي حضني بقوة وقعد يمسح ع شعري واني نبكي قداش ليا خاطري نبكي هكي كنت نشد فيها ومانبكيش بالسيف ع خاطر جدي باش مايرعشش💔
كملت بكاي ومسحت دموعي
خالي..كملتي توا
اني..ايه
خالي..وين كنتي داستيه هدا كله
اني اشرت ع قلبي🖤
خالي..من صغرك حملتي الهم ربي يكون معاك
اني ابتسمتله
احمد..نوضي اغسلي وجهك وتعالي قعمزي برا
نضت غسلت وجهي وطلعت قعمزت بحداهم برا وطول الوقت في حضن خالي مانبيش انحي من جنبه
احمد..ريت اوو فاتتنا احني😂
اني..هدا الغالي
خالي..وهدي بنت الغالية💔
احمد..شن خلاص معش مولي لي ماليزيا؟
خالي..خلاص كملت ماعندي علاش مولي صعبة الغربة
احمد..مافيش من احلى من انك تكون بين اهلك وناسك
اني..بالزبط
خالي..هي نوضي بدلي بنرفعك لحوشنا غادي كلهم
اني..ماكلمني حد ياخالي وسئل عليا ولا عاد دوروني
خالي..معليشي كل واحد لهي في همه اعذريهم وهي بري معاي
اني شفت لأحمد وهزلي بي راسه ايه
نضت وبدلت ودرت شعري فوق وخديت شنطي وخشيت نوضت جدي..جدو اني بنمشي
جدي..وين بتمشي
اني..جي خالي بيرفعني غادي تو نروح في ليل
جدي..باهي ماتعطليش
اني..باه حاضر
طلعت وركبت مع خالي
اني..اييي خالي ماوريتكش سيارتي
خالي..ايواااه كبيررة
نزلته من سيارة ولفيته ع الحوش..شووف هدي سيارتي
خالي..مشاءالله بتسووقي؟
اني..يس نتعلم كل يوم نمشي ونتعلم
خالي..باهي احسن شي اصلا
اني..ايه ولينا ركلنا سيارة وطلعنا مشينا للحوش
خالي..انزلي هيا
اني..معاش جيت اهني من توفو
خالي..💔
اني..كنا نجو اني وماما وبابا يخش معانا شوية ويطلع ونقعمزو اني وخالاتي ونلعب في صغار اخييي ع الدنيا
خالي..الله غالب
اني..😔
نزلنا من سيارة وخشينا للحوش
الصغار كلهم جوني يجرو والتمو عليا
اني..ستاحشتكم
نزلتلهم وتغمرتهم كلهم وبستهم وفرحت ان شفتهم وخشيت للحوش
خالاتي..نووور
خالي..اني جبتها
سلمت عليهم بس سلام جاف مش زي قبل وهما فاهمين علاش
خالتي..كيف حالك شن دايرة
اني..الحمد لله بخير
خالتي..امتى بتبدي قراية
اني..مزال مانزلوش امتى
خالتي..باهي ع خير ومن بيرفعك ويجيبك
اني..بديت ننتعلم في سواقة بنبدا نسوق
خالتي2..الله مشااااءالله
اني..ايه😊
وقعدو يهدرزو عليا وطلعت لعبت الصغار وفي اليل خشيت للحوش لقيتهم كيف بيحطو العشي قعمزو كلهم قعدت واقفة نشوفلهم حتى مكانها ناقص بيننا وواضح مخلي فرااااغ كبير بس كيف تعودو هما💔
قعمزت كليت شوية وكل مانشبح لمكان ماما تعلق الماكلة في رقبتي وماتنزل الا مانشرب اميا لعند كملت وقلت لخالي ان احمد جايني في طريق
خالي..باتي معانا اليلة خالاتك كلهم بايتين
اني..مانقدرش نخلي جدي وغدوا المدربة بتجي من صبح
خالي..اهااا باهي امالا ان شاءالله ربي يفتح عليك
اني تغمرته مرة تانية..كان خاطرها تشوفك💔
خالي..الله يرحمها
اني..يارب
وصل احمد بيبلي طلعتله اني وخالي
خالي..هي وصلت الامانة اوو
احمد..وصلت😊
خالي..هي دير بالك عليها
اني ابتسمتله ومشينا
احمد..شنجوو
اني..الحمد لله
احمد..شن جو داخل
اني..حلوو
احمد..باه قلت لجدي حقا
اني..شن قتله
احمد..قتله ان جوك ناس وهكي
اني..اهااا احمد ما ارتحتش
احمد..كيف
اني..صليت وما ارتحتش
احمد..اممم عادي براحتك
اني..شن قالك جدي
احمد..قالي تشوف روحها هيا لكن هو مش راضي
اني..ايه مزال نبي نكمل قراية
احمد..ايه براحتك ياحب😉
اني..اي ياحب شن جوك انت ومنار
احمد..الحمد لله
اني..باهي ربي يجمعكم مع بعض يارب
احمد..امين السنة الجاية ان شاءالله
اني..علاااش مطول
احمد..نبيك تحضري عرسي
اني..امممم لهدرجة مهمة عندك
احمد..اذا اختي مش حتحضر عرسي يعني شن نبي فيه العرس كله اني
اني..ربي يخليك ليا
احمد..ايه ومزال الحوش ماكملش يعني
اني..ايه ربي يسخر
احمد..امييين
وصلنا للحوش خشيت لقيت جدي مقعمز يتفرج
اني..جدوو ستاحشتكك
جدي..اهلا اهلا
قعمزت بحداه وقعدت نحكيله ونهدرزله
جدي..بكري هدرزت اني واحمد
اني وجهي والا احمرر..ءء
جدي..شن رايك انتِ ؟
اني..فيي شن😳
جدي..في محمد
اني..جدي محمد والله شاب ماينرفض بس اني صراحة نبي نكمل حياتي قرايتي وبعدها نفكر مزال مش مستعدة للحجات هدي بكل
جدي..وهدا رأي اني هو كبير عليك وتاني شي انتِ مزال صغيرة ع زواج والمسؤلية وقراية وخاصة تبي تخش لمجال مافيشي بصارة وتقري مش باش تنجحي لا تقري باش في المستقبل بإذن الله لما يكون شخص بين يديك تقدري تنقديه وتقدري تساعديه مش تقعدي تشوفيله زي الي صاير توا💔
اني..بإذن الله
جدي..بنتي حياة بشر حتكون بين يديك ماتستهينش بشي فاهمة
اني..حاضر😌
جدي..خلاص هي تو بري ارتاحي
اني..اوك
خشيت للدار واتكيت ع سرير
اني..اااااه قداش ما استاحشتكم💔 ستاحشت نقولكم تصبحو ع خير قبل مانرقد ستاحشت نشوفكم فرحانين وتضحكو ستاحشت ايام نطلعو مع بعض ونسهرو مع بعض ونسافرو مع بعض😭يااااااااارب تلحقني ليهم💔مش متحملة فراقهم ياربيي💔
رقدت ودمعتي ع خدي
نضت صبح وركبت سيارتي ودعيت ربي يسرلي اموري وطلعت بيها كانت اول مرة نطلع بروحي طلعت ومشيت للجامعة
اني..اياااح زحمة تو وين بندرس اني
قعدت ندور في مكان لعند لقيت ودرست ونزلت عطيتهم ملفي لتكميل التسجيل وقالولي نبدو الاحد طلعت واني فرحانة حلم حياتي بنبدا بيه😍 بس وينك ماما كنتي واعدتيني ان اول مانخش لكلية تخشي معاي وتكوني واقفة جنبي💔نزلت دمعتي واني نمشي وناسية الناس ومايجي منها
جي ولد وقف قدامي
الولد..****
اني..😳
.
.
.
#يـتبع
إذا عجبتك القصة لا تنسي الإعجاب و الإضافة ليصلك كل جديد و مشاركة القصة مع الأخريين
و لا تنسوا أيضا تعليقكم و اقتراحاتكم لنقدم ما تريدونه

MBC LIBYA تابعوا صفحة