حكايتي ( روايات ليبية )

حلقة 29

رواية #حكايتي
( واقع ممزوج بلخيال )
للكاتبة #حنو
الرواية بلهجة الليبية
الحلقة 29
.
.
.
حذيفة..لالا خلي نقعد معاكم شوية
عشيتهم وقعد حذيفة يلعب هو والصغار واني نتفرج عليهم ونصور فيهم
بعد ايام رجعت حياتنا زي ماكانت حذيفة يخدم واني في الحوش ومرات من الكساد ندير في عزومات ونغير في الجو👻
.
.
حذيفة..نونييي وينك
اني..اهو جيت حبيبي نعم
حذيفة..تعالي قعمزي
جيت قعمزت جنبه..شن في
حذيفة عطاني شنطة وكانت رزينة شوية
اني..شن فيها
حذيفة..افتحيها
فتحتها ونلقا فيها فلوس..من وين هدم!😳
حذيفة..هدو حصتك من المستشفى كل شهر يجو يعطو فيهم لي احمد وهو كان داسهملك واهو الحمدلله لقطي منغير ماتخدمي
اني..هههههه حي هدو كلهم ماشاءالله ربي يزيد ويبارك
حذيفة..امين باه توا وين بتحطيهم
اني..مشعارفة
حذيفة..نقترح عليك اقتراح ديري مشروع ليك ابني حوش اجريه او ديري حاجة يخدمو بيها فلوسك
اني..ايه والله حق خير مانقعد داستهم اسمع خطرتلي فكرة
حذيفة..شنو
اني..بما ان الفلوس هلبا ف اني نبي نصدق
حذيفة..كيف
اني..اهو نقولك الجامع الي في جنبنا هدا اكيد فيه حجات تبي تصليح ومافيشي امية شراب تقدر تكلمهم وتقولهم نبي نديرله اميا
حذيفة..باه
اني..هدي نبيها صدقة جارية ع ماما وبابا الله يرحمهم
حط يده ع خدي..وربي انك بنت أوصول ربي يحفظك ليا يارب اني منغيرك ولا شي
اني..والي يفضل نبي نمشي نشري هلبا لبس وحجات للأيتام في الميتم ونرفعهولهم هداية ليهم وهدي صدقة بإسم جدي الله يرحمه وهكي نكون مرتاحة ونكون درت احسن مشروع في حياتي
حضني حذيفة..نحبكك
اني..نموت فيك
ليليان..حتى ني نحبببتم
اني..ههههههه تعالي ياقلب ماما
ليليان..نبيس نبي بابااا😍
اني..اشي باعتتني
محمد..اهو اني نبي ماما حبيتي
اني..هههههه سلمه ياربي حبيبي
قعمزته في حجري
حذيفة يوشوش لي ليليان..قولي لماما وين الغدي
ليليان..ماما وين الغدي
اني..اهو بنحطه يا ماما
محمد..وعلاس ماتحطاس هيا علاس ماتعاونس فيت
اني وحذيفة..😂😂مزال صغيرة خيرك
محمد..تضرب فيا هيا
ليليان دارت روحها بريئة..حي ع التدددب (الكدب)
محمد..اييييه والله تضرب فيا
اني..باهي تو نوريها خلاص اشش بابا تعبان هي نحطو الغدي
ليليان دارت بيديها..حي بابا حيييلك (خيرك)
حذيفة بيضحك قدامها وشاد روحه..اااه مريض تعبان بابا
ليليان قعدت اطبطب عليه..ثلامتك بيبي
اني..شن بيبي هدي
ليليان..اتِ هتي دولي لبابا (انتِ هكي تقولي لبابا)
اني..لالا ماقلتش عيب معاش تقوليها
ليليان..باه تبي نساعدك في حازة ماما
اني..لالا تساعديني انك تقعمزي في مكانك
ليليان طرمت شواربها وطلعت قعمزت
حطيت الغدي وقعمزنا نتغدو ونضحكو اني وحذيفة على محمد وليليان وفرحانين بيهم ❤
.
.
بعد شهر
اني..حبيبي بنقولك حاجة
حذيفة وهو فاتح لاب توب..نعم
اني سكرت لاب توب..هيا بنقولك
حذيفة..شنو هي
اني..امممم خبر حلو
حذيفة..شنو
اني..اني حااااامل😍
حذيفة..😍😍جديااات
اني..ايه والله
حذيفة ناض وحضني..نحبككك
اني..نموت فيك ياعيوني
حذيفة..كيف عرفتي باه
اني..تبي الحق رفعني احمد بكري وقت كنت عندهم ودرت تحليل لاني كنت شاكة وطلعت نتيجة وطلعت حامل😍
حذيفة..الحمدلله ياقلبي الف مبروك علينا😍
.
وفاتت الليلة على خير وكنت فرحانة بحياتي ان خلاص درت عيلة بعد فقدت عيلتي كنت نشكر في ربي ليل ونهار ع حياتي راضية بيها بكل شي فيها
.
.
.
سنابل..حميدا
احمد وهو ياكل..نعم
سنابل..مشروعي قرب
احمد..باهي!
سنابل..يعني نبي نطلع نشري حجات
احمد..حاضر غدوا نطلعو
سنابل ابتسمت..تمام😊
احمد..إلااا قوليلي
سنابل..نعم
احمد..وين بيجامتي متع رياضة مالقيتهاش
سنابل وهي تفتح في الكيسة وبطلع منها ساندوتشها..في دولاب هونا تلقاها في الرف الفوقي
احمد..تمام صحتين حبيبي
سنابل..ع قلبك😘
مشي احمد طلع البيجامة وطاح منه شريط حبوب شافه حطه في جيبه وجي لي سنابل وقعمز جنبها
احمد وهو يهز في رجله وطلع الشريط من جيبه..شن هدا
سنابل قعدت تلكلك..ءءء ه هداا ءءء
احمد خبط يده ع طاولة..تكلللللممممي هدااااا شن يديييير في دووولاااااب؟؟؟؟
سنابل..والله والله ع خاطر قرايتي مابيتش نلبز ع روحي😭
احمد..ع خاطر قرايتكككك تحرميييينيي من النعمة هدي تحرميني من صغار يحملو اسمممي تكللللمي قصرررت معاااااك في حاااااجة؟؟؟ تي باهي علااااش علااااش ما استأذنتيش مني😡 علااااااااااش؟؟؟
سنابل تبكي وحطت يديها ع وجهها وخايفة من احمد..والله مابقصد د ي😭😭كل الي نبيه ان احني لاحقين عليهم ونعيشو مع بعض احلا سنين وبعدين نبدو نجيبو صغار😭
احمد وهو متعفلق..تعرفي تواااا نطلع باااهي تكلمي خوووك يجي يرفعك من وجهي والا والله يصير شي مايعجبككك واني اهو حذرتك نروح ساعة 9 نلقاك قاعدة تشوفي مني شي عمرك ماشفتيييه
سنابل وهيا ترعش..ءء حااضر😭
خشت تجري طلعت شنطة وحطت فيها حوايجها لانها عارفة ان قعدتها مطولة💔وان احمد من الصعب يسامحها قامت الشنطة من فوق السرير واتصلت بي خوها
محمد..ها سنبولة
سنابل وهي تبكي..م مممحمد😭
محمد..نعم خيرك شن في
سنابل..تعالالي
محمد..شن في خيرك
سنابل..تعالى ارفعنني بالله عليكك بسرررعة😭
سكر منها محمد وناض يجري ركب سيارته وخاف ان يكون صايرلها حاجة جاها يجري واول ماخش لقاها بشنطتها وكيف سكرت باب الحوش وطلعت
محمد..شن في خيرك ؟؟
سنابل..تعاركنا😔
محمد..تعاركتوو تطلعي من حوشك؟؟!!
سنابل..هوا قالي نروح نلقاك قاعدة تشوفي شي لا يرضيك ولا يرضي حد
محمد..شن يحسابها سايبةةة اركبي توا
ركبت سنابل وهي ترعش وتبكي روحت لحوشهم وخشت تجري لدارها وسكرتها عليها وقعدت تبكي وتلوم في روحها ع الي داراته ولابت تفتح لحد الباب تبكي وبس
.
.
بوها..لالا الامر هدا ماينسكتش عليه كلمه يا محمد
محمد..بوي شن نكلمه شنن؟؟
بوها..توا تكلمه ونفهمو شن صااااير البنت جي ليل ولابت تفتح الباب ولا كلت ولا شربت شن دايرلها وشن صاير
امها..ياراجل استهدى بالله وتو تفتح الباب لما تهدا ونعرفو منها شن صاير
بوها..بتكلموووه والا انوض نمشيله
محمد مسح ع وجهه..توا نكلمه حاضر
اتصل بي احمد رد عليه طول خاف ان صارلها شي
احمد..ايوا محمد سنابل فيها شي!!!!
محمد..سنابل يا احمد لا تاكل ولا تشرب وهي من بكري مسكرة دارها وتبكي ومافهمناش شن الي صاير
احمد مسح ع وجهه..اختك يا محمد لقيتها واكلة حبوب مانع حمل ليا 3سنين اني نستنى في عيل يحمل اسمي واختك حارمتني منهم 3سنييين مش حرام عليها!! غلط والا مش غلط يا محمد تكلم😠
محمد انصدم..لا معاك الحق وسامحنا واختي ليا معاها تصرف تاني وسامحني امسحها في وجهي ياخوي
احمد..لا انتم مدخلكمش خليها هيا تعرف غلطها وتعرف روحها شن دارت اني مستحيل نطلقها او نتخلى عليها بس خليها قرصة وذن
محمد..عندك الحق سامحنا ياخوي
احمد..ولا يهمك
محمد..هي تصبح على خير
احمد تنهد..وانت من اهله
سكر احمد وهو قاعد مصدوم من الي داراته سنابل فيه كان طول الوقت يدعي ربي ان يرزقه بي بيبي ويفرحه ويملي حياته طلعت حبيبته حارماته من الفرحة هدي مرته ماتبيش بيبي منه!! قعد يفكر يمين ويسار ومش فاهم علاش مرته هكي دارت ...!!
.
.
محمد تلفت لبوه
بوه..قولي شن صاير وشن قالك احمد باش قعدت تعتذر منه شن دايرة اختك تكلمم؟؟
محمد..بوي سنابل طلعت واخدة حبوب منع حمل طول فترة زواجها من احمد
بوه..شنوووووو؟؟؟؟؟
امه حطت يدها ع قلبها..هيييي نهار ابيض شن تقول انت غبارتها السودة
محمد..هكي قالي احمد قالي لقيته شن مزال تبيني ندير بعد الي ريته ولو اني في مكانه لكننت رميت عليها يمين الطلاق بس طلع طيب الراجل وكتم غضبه حتى شعرة مامسها منها تي بنتك وطت راسنا قدامه مش هي الي كانت بتقتل روحها باش تتزوجه شن صار توا علاش ماتبيش صغار في ناس تتمناااهم وهيا حارمة روحها وحارمة راجلها من الفرحة هدي علاش!! ولما نسئلوها تقول ان متفقين مانبوش صغار كانت تكدب حتى علينا؟؟؟ والله لما نربيها 😡
بوه..اسكككت ضم فمك ياحيوان من امتى تعلي في صوتك عليا ااااه !!! تكلمم؟؟ اختك اني تو نتفاهم معاها وانت ماشغلكش فيها اني بوها مدامني حي اني نتفاهم معاها غير هكي لاا
وركب وقعد يطق ع الباب
سنابل وهي تبكي..مانبي حددد خلوووني في حالي😭
بوها..افتحي نبي ندوي معاك كلمتين بس
سنابل ناضت مسحت دموعها وفتحت لبوها..نعم
خش بوها وسكر الباب..قعمزي
سنابل..نعم بابا
بوها..علاش؟
سنابل انفجرت بالبكي..والله مابقصدي يا بابا والله مانحساب هكي بيصير😭😭
بوها..فهميني بس علاش !
سنابل..كنت خايفة لاني نقرا وكنت حاملة مسؤلية هلبا قراية وحوش وراجل وبنزيد لو جبت عيل بنكترها على روحي 😭😭
بوها..باه يابنتي مش مفروض كنتي تقولي لراجلك مرات هوا يتفهمك وكنتي تاخديهم بعلمه
سنابل..والله اندهبت شيرتي يابابا😭
بوها..استغغفرالله العظيم خلاص هدا موضوع بينك وبينه وتتفاهمو مع بعض بس والله العظيم يا سنابل لو تكررر المووضوع هدا او تكرر شي تاني يندار ممنك والله ماني مسامحك فاهمة مش اني الي بنتي تجي حرجانة مش اننني الي ننهان بسبب تفاهات زي هدي
لو تكرر الشي هدا ماتلومي الا نفسك
وطلع وخلاها تبكي خشتلها امها وزادتها هزبتها وخشلها محمد نفس الشي ماخلا ماقاللها وكلهم خلوها تحس بالذنب الي داراته ليلها مارقداته وهي تلوم في نفسها ع غلطة زي هدي وهل حيسامحها احمد والا لا وقعدت فكرة ترفعها وفكرة تجيبها لعند رقدت
.
.
اني..كيف هكي!!
احمد..هدا الي صار
اني..هي يومها قتلي ان انتم متفقين تبوش صغار توا
احمد..كدب اني مانندريش ونحسابه تعطيل هدا كله من عند ربي وساكت وخلاص
اني..اخخخ ياوخيي بس سنابل والله طيبة وكويسة وتلقاها ع خاطر قرايتها وصغر سنها دارت هكي لانها تقدرش تتحمل هدا كله
احمد..لنفرض هكي تماام باه علاش اني ماحقليش ناخد قرار معاها؟؟؟والا شنو!؟
اني..صح والله معاك الحق وهيا غالطة بس سنابل والله طيوبة رد بالك تخسرها وادير شي غلط
احمد..مشعارف مشعارف ملخبط بس خليها تتأذب شهرين 3 اربعة خليها تعرف روحها وتعرف غلطتها
اني..لاحول ولا قوة الا بالله ربي يهديكم يارب🤕
فاتت شهر سنابل عند اماليها واحمد يكابر وفايتها ومايردش عليها ولا على مسجاتها
.
.
سنابل..حفلة تخرجي بعد غدوا وهوا مزال مش طايب خاطره يكلمني😭
مسرة..خلاص ياوخيتي قطعتي روحك بالبكي راه
سنابل..كيف تبيني تراه😭حفلة تخرجي ومافيش حد فرحانلي
مسرة..بالعكس والله كلنا فرحانين
سنابل..توا بتجي هديكا وبتقولي وين راجلك مسيبك في يوم زي هوا وبتتشمت
مسرة..من هيا
سنابل..هنادي الي كانت تبي احمد
مسرة..قولي مسافر هيا نوضي اطلعي نشرو شن ناقصك
سنابل..يومها قتله نبي نطلع نشري قالي حاضر😭
مسرة..اففف رجعنا لنفس السيرة ياوخيتي والله ماهو نافعك البكي بحاجة ره هي نوضي معاي
ناضت سنابل وطلعت مع اختها باش تشوف حجات ليها وكانت مسرة هيا الي تشري ع ذوقها وسنابل طول الوقت سارحة وتفكر
اما احمد
احمد..السلام عليكم
صاحب المحل..وعليككم السلام
وخش احمد خدي هلبا حجات لي سنابل لانة كان واعدها ان هياخدلها كل شي ومايبيش اماليها يصرفو عليها بما انها مرته هو المجبور كمل تبضيع من محل لمحل لين رجليه طاحو روح تغدا وبعدين طلع مشي لحوش امالي سنابل
سنابل وهي نازلة من سيارة.. احمد!
احمد..وين كنتي😡
مسرة..ءء احمد اني طلعتها حرام من يوم ماجت وهي لا طلعة ولا خشة وماعندهاش حوايج وبدت تلبس مني قلت نطلعها نشريلها
احمد..لا خلاص البسيه انتِ يا مسرة جبتلها اني مرتي اني نصرف عليها كنتي تقوليلي واني نجيبلها
مسرة..هدا الي صار توا
سنابل..احمد سامحني بالله عليك والله تعذبت والله خلاص هلبا عليا معقولة بعد غدوا حفلة تخرجي وانت مش معاي😭
احمد بقسوة..كنتي تحسبيله اليوم هدا قبل ماديري الي في راسك
نزل احمد الكيس كل وحدة معبية حجات وحدة ماكلة وشكاليط وعصائر وكل شي ووحدة لبس ووحدة حجات ليها وكل وحدة احلى من تانية حطهم في جنان وركب سيارته وطلع
سنابل..😭قوليله يا مسرة قوليله ان هدا كله مانبيشي نبيه هوا بس😭
مسرة..ربي يهديك ياوخيتي درتيها بيدك
ركبتها ونزلت ركبت الحجات وقعدت تعلقلها فيهم
مسرة..ياوخيتي محلاه جايبلك كل شي
سنابل..هو بس مايحبش من يصرف عليا غيره لاني على ذمته تو يوم تاني يمل ويجي يقولي بنطلقو☹😭
مسرة..اششش اهدي مستحيل احمد يطلقك خيرك هبلة انتِ ووتو تشوفي يوم تخرجك حيكون معاك مدامه مش ناسيك
سنابل مسحت دموعها..انتِ امتى بتروحي لحوشك
مسرة..بعدين بنروح ماما تبيني ندير معاها حجات
سنابل..سعدودك تخرجتي قبلي
مسرة..ماه لو ماوقفتيش سنة راك متخرجة😂
سنابل..ايه باه خلاص هي مبردك
مسرة..😂😂
.
.
اني.. #يتبع
حذيفة..😳
.
.
.
ان شاءالله تنال اعجباكم😘 #حنو
إذا عجبتك القصة لا تنسي الإعجاب و الإضافة ليصلك كل جديد مشاركة القصة مع الأخريين
و لا تنسوا أيضا تعليقكم و اقتراحاتكم لنقدم ما تريدونه

MBC LIBYA تابعوا صفحة