فما الحب الا انتظار

معقد

أدري كلكم مريتوا بهاي الفترة ، او ربما دتمرون

فترة اللي تبدي تتغير وتلتزم وتشوف طريقك الصحيح اللي عفته كل ايام حياتك ، فترة اللي تبدي تشوف النور .. من تروح لعرس مثلا وتلكاهم مشغلين اغاني  وتروح تكعد ومتسوي شي ..انتَ اللي جنت تلزم الديجي وتشغل اغاني بيدك ، وهنا تبدي كلها تجي يمك ، هاااا شيخنا ، هااا سيدنا ، تكوم تقرالنا دعاء كميل شيخنا ، لو يجون يمك ويشغلون الاغاني بأعلى صوت ، ورغم كل هذا انت تسكت وتصبر لان شفت النور بعد وميهزك الظلام ، تباوعلهم وانت بين المتأذي لان جنت مثلهم وبين المتأذي لان هيج تصرفاتهم وياك ...

لو من تروحين لبيت عمج بدون مكياج -ولاول مرة- ويشوفوج هناك ويستغربون ها اليوم فلانة وجهها اصفر ، ويكومن بنات عمج يضحكن عليج ، ها المعقدة ، ها المتدينة ، ها سماحة الشيخة ...

لو من يروحون للمنتزه وانتِ الوحيدة اللي تبقين بعباتج ويبدي الكلام يمطر مطر عليج ، ها العجوز ، هاي لسه تلبسين عباية ، خلوها خلوها هاي المعقدة ، الناس وصلت للقمر وهاي بعدها مچلبة بالعباية ...

لو من انت واصدقائك بالمطعم ويأذن الآذان وتكوم لابو المطعم تسأله ، اكو مكان للصلاة هنا ؟
ويبدي تحشيش اصدقائك عليك .. غير يكعد السيد الخوئي ، هاي من شوكت صاير متدين ..

واشكال والوان من الحجي
معقد
معقدة
عجوز
شيخ ..

بس عادي ....الفخر من امام الزمان يفتخر بيك حتلو الناس ذلتك ، الفخر من الله يحبك حتلو الناس كرهتك ، الفخر من انت راضي عن نفسك ومريح ضميرك ، الفخر من مسوي العليك ، الفخر من صحيفتك بيضة يم امام زمانك ، الفخر من اهل السماء تعرفك ، الفخر كل الفخر منك ، اي اني معقد واني شيخ واني عجوز
گول عني شما تگول ..
هي ناس وتعرف الله
أشكال ذبت عالرسول!

كمل طريقك😍 ترا نبيّك محمد جانوا يصيحوله المجنون ، ف كلش زين انت يصيحولك بس معقد

كمل طريقك ..طريق الله ..طريق النبي واهل البيت .. طريق الشهادة❤️

انت الصح لو كلها صارت غلط
انت اللي ماسك ع جمر دينك لوكلها تنازلت عنه
انت اللي يتسجل اسمك بسجل الزهراء ..مو همَّ💜

منقولة