انا بقيت مصدومة و بعاين لحاتم و امه ... يعني بالجد امي قررت تبيعني و تتخلى عني ... قررت نهائيا تنسى انو عندها بت اسمها ربا..... حاتم عاين لي من فوق لي تحت و هو بتبسم و قال لي " ما شاء الله كبرتي عن آخر مرة شفتك فيها"......سكت و ما رديت امه ضحكت و قالت لي " خلينا نخش ي بتي موقفانا كدة قدام الباب" .... دة كلو و انا ما برد ساكتة بس .... جات امي من جوة و جرتني عليها .... سلمت على حاتم بكل حرارة ولا كأنو حصلت حاجة من قبل ...دخلتهم جوة و رسلتني امشي اجيب موية و اعمل شاي و جرجرة النسوان البتحصل ديك لما يجو ضيوف ... كرهت امي شديد كرهتها لدرجة اني بقيت اتمنى موتها كل يوم ... باللي عملته الليلة معاي فقدت اخر ذرة احترام و حب انا كنت خاتاها ليها بالنسبة لي بقا ما عندي ام.... وديت ليهم الموية و الشاي و انا صارة وشي ..... قامت ام حاتم ( خالتو نجاة) قالت لأمي و هي بتضحك " انتي متأكدة بتك دي موافقة لاني شايفاها زي الزعلانة كدة" .... امي عاينت لي وصرت وشها و ضحكت تاني و قالت " اي موافقة و خالتها موافقة باقي بس ابوها" ..
دخلت جوة على غرفتي و حلفت اني تاني ما ابكي بسبب امي... حلفت اني تاني ما حأبكي الا في جنازتها ..... جاتني امي في غرفتي بعد حكاية ساعه كدة و قالت لي " حاتم و امه طالعين قومي ودعيهم ... ما سمعت كلامها و من سريري ما قمت و عيني ما رفعتها ليها ....كوركت فيني و قالت لي قومي بأعلى صوت عندها .... اتمنيت انو خالتو نجاة تكون سمعتها و تعرف اني ما موافقة .... نزلت من سريري و انا بحدر لأمي طلعت برة الهول ووقفت قدامهم قلت ليهم يلا مع السلامة امي اصرت اني اطلع اودعكم و انا ما لي مزاج ..... حاتم صرة لي وشو و عاين لي امو .... خالتو نجاة جات علي و قالت لأمي عاوزة اتكلم معاها بإنفراد لو سمحتي ..... دخلت غرفتي و قعدت جمبها و انا وشي ما بتفسر .... قالت لي " واضح انك ما موافقة و امك جابراك او بالاصح خالتك جابرة امك " .... لاني من قعدت خالتك ما اتكلمت بس بنظراتها بتأمر امك .... عاينت لي وقالت " ربا انا بعرفك من و انت طفلة مولودة جديد و بعزك زي بتي واحد لو ما عايزة حاتم ولدي دة قولي لي عادي" .. مع اني حلفت اني ما ابكي لكن دموعي تلقائا بدت تنزل ... و قعدت ابكي ... قالت لي "انتي رافضة ليه قولي لي عشان اعرف.... ولدي دة ماف احسن منو حتى لو كان قاري خلوة .... احسن من تعاليم القرآن و الدين مااف وانا متأكدة من الحاجة دي" ... قلت ليها و انا ببكي "برضو ما عايزاه" ..... قالت لي طيب قولي لي السبب ..امه الحت علي شديد عشان اوريها في النهاية كلمتها .... حكيت ليها عمل فيني شنو زماان حكيت ليها اي حاجة ... و كان املي فيها انها تخلصني من الجحيم اللي انا عايشاه دة .... خالتو نجاة اخدت نفس عميق و قالت لي جملة انا ما عرفت قصدها شنو " يعني عملها تاني " ... انا بقيت بعاين ليها و عيوني مليانة دمووع .. قامت من السرير فتحت باب غرفتي لقت امي واقفة قدام باب غرفتي بتتنصت و قالت ليها بي نهرة " حسبنا الله و نعم الوكيل فيك حرام عليك اللي بتعمليه في بتك دة حسابك عند الله كبير " .... حاتم بقا مخلوع من كلام امه لي امي و قبل ما يفتح خشمه قالت ليهو " و انت ما عافية ليك دنيا و اخرة " و طلعت و حاتم جاري وراها و بحنس فيها و هي ما شغالة بيهو ... امي بقت تبكي و خالتي جات علي و جرتني من شعري و بقت تكورك و تقول لي " قلت ليها بالحصل صح انتي واحدة شيطانة و ما نافعه لكن انا بعرف اربيكي" و رفعت يدها عايزة تضربني لكن امي مسكتها و قالت ليها " اطلعي برة يا اروى و ما عايزة اشوف وشك في بيتي مرة تانية " خالتو اروى بقت تعاين لامي و تقول ليها انتي مجنونة عايزة بتك تكون حايمة كدة من غير زوج و انتي عارفة ماف زول حيقبل بيها تاني دي فضيحة حتقولي شنو للناس" ... امي بقت تبكي زيادة و قالت ليها اطلعي يا اروى الباب مفتوح .... انا جريت ع غرفتي و قفلت الباب ... خليت امي و خالتو اروى بيكوركو في بعض في النهاية امي انتصرت في النقاش و خالتو اروى طلعت زعلانة منها و تاني بقيت ما بشوفها الا في المناسبات العائلية لكن بيتنا تاني بي رجلها ما عتبتو ..... اخواني كانو في غرفهم لكن زول استرجى يطلع مافي لانو امي لما تكون هايجة ماف زول بسلم من لسانها و يدها لا بتعرف كبير ولا صغير ..... اليوم دة مرة ببطء مبالغ فيهو كان يوم تقيل شديد كل زول في غرفتو ماف زول طلع نهائي و امي قاعدة في الهول بتفكر بنفتح الباب بنعاين ليها و بنقفلو بسرعه ... اخواني طبعا ما فاهمين الحكاية شنو ف الموضوع بالنسبة ليهم كان زي اللعبة يزعجو امي و تكورك فيهم و تطردهم ع غرفهم و هكذا.....مرت الايام و امي تعاملها معاي اتغير تماما بقت تهتم بي وتسألني من المدرسة و قرايتي ماشة كيف ... و لو عاوزة حاجة .... دة كلو و انا ما شغالة بيها .. لو باست رجلي انا ما عافية ليها... كرهتها اكتر من حاتم ... كرهتها لدرجة انو الحتة اللي بتقعد فيها انا ما بقعد فيها تاني ... قرفت صوتها و نظراتها و طريقة كلامها و اي شي ...حتى ابوي كرهته لانو برضو عندو يد في الحصل كيف كان بوافق انو يجيب اولاد اعمامي و يسكنهم عندنا في البيت يدوب انا وعيت للكلام دة لما كبرت و فهمت اي حاجة قريت عن غشاء البكارة و انواعه و الجهاز التناسلي و فهمت انو الشي اللي حصل لي زمان دة كان اسمو ( اغتصاب) .مرت السنين و كل ما اكبر كنت بكره نفسي زيادة و امي بتاخد نفس المقدار من الكره ... بس كنت متحملة عشان اختي رغد بحبها اكتر من روحي بفديها بالغالي و النفيس ....اللي بيلمس شعره منها بقتلو فعليا ... حتى امي لما كانت تضربها لمن تعمل شي غلط بجي بدافع عنها و بتشاكل مع امي عديل ....مرت سنين و انا و امي علاقتنا كدة لا بشكي ليها و لا بتكلم معاها بتجي غرفتي و تحاول تفتح معاي موضوع طوالي بسكتها و بطردها و بقفل غرفتي بالمفتاح ...كبرت و امتحنت شهاادة سودانية و جبت 93.8 قبلوني صيدلة ... مع انو الناس اصرت اني امشي طب لكن رفضت حاول ابوي يقنعني لكن بالجد منظر الدم انا ما بحبو ... بتذكر في يوم و احنا قاعدين في الصفرة بنتغدا و اخواني اخر ونسة و ضحك مع امي و ابوي ....فجأة ابوي قال لي " صحبك ايام زمان امورو ما ماشة تمام " ... عاينت ليهو بإستغراب و قلت ليهو صحبي منوو .... قال لي حاتم ...اتخلعت من الاسم لاني طولت شديد ما سمعته .... قلت لابوي و انا باكل و عيني ما رفعتها ليهو "حصل عليهو شنو اخر مرة شفتو لما جانا في البيت زيارة " و عاينت لامي و ضحكت ضحكة استفزاز كدة .... ابوي قال لي " اشتغل في الزراعه و شغلو كلو ما مشة .... و دخل ليهو في مشروع مواشي برضو شغلو ما مشا كويس ... في الاخر مشا اغترب في السعودية و يشتغل راعي و ان شاء الله امورو تمشي كويس المرة دي " .... ضحكت شديد و قلت لي ابوي " شكلو الزول دة امه داعية عليهو " قمت من الصفرة و مشيت غرفتي و قلت الحمد لله اخيرا شوية عدل ....تاني يوم الصباح كان اول يوم لي ف الجامعه و من اول يوم عملت مشكلة و رفعوني للعميد ........ للبقية تتمة ❤️
