مازن بقى بعاين لي و ما مستوعب اصلا انا قلت شنو " نعم حاامل؟؟".... ضحكت و قلت ليهو " اي حامل " ......ولسة بعاين لي و كأنو ما فاهم حاجة ....بقا بين عايز يبكي و لا يضحك انا زاتي ما فهمته القصة شنو..... خت يدينو في وشو و بقا بمسح في شعرو و قال " ياااااا الله" ........ لمن قال كدة حسيت بدفء غريب كانت طالعه من اعماق قلبه .....فجأة كدة قام من السرير و بقا بتنفس بسرعه قرب علي و مسك يدي" والله ما عارف اعبر ليك عن احساسي ما عارف اقول شنو " ..... طبعا دة كلو و انا بضحك فيهو .... ياخي انا ما فرحت للدرجة دي .... قال لي" بحبك بحبك بحكبك مووت والله و ان شاء الله نولد بالسلامة" ......ضحكت بأعلى صوت و قلت ليهو " نولد؟؟؟؟؟" ..... قال لي اي اي معليش اعذريني حبيبك مجنون و قعد يضحك بطريقة غريبة .... رفعت راسو و انا بضحك قلت ليهو مازن " انت عايز تبكي؟" .... قال لي " اي نفسي ابكي" .... و فعلا بكا و دموعو نزلت دي كانت اول مرة اشوف مازن متأثر للدرجة دي كان مبسوط لدرجة انه ما قادر يعبر الا بدموعه ......بعد ما هدأ شوية قعدنا نفكر في الاسماء اول حاجة اتفقنا انو لو ولد انا اللي حأسميه ولو بنت هو اللي حيسميها جات في بالنا اسامي كتيرة لكن قلنا ما حنقول الاسماء الا لما اولد اول ......و اتكلمنا عن انو حنربيهم كيف و حيقرو وين و حيعرسو من السودان ولا الاردن (طبعا النقطة الاخيرة دي قربنا نتشاكل فيها عديل😂)فجأة و احنا بنتونس جاتني لحظة كدة و سرحت في مازن .....ملامح وشو كانت جميلة و قلبو ابيض حتى مرات بغار منو انو كيف هو طيب للدرجة دي و انا لا....كان مسامح و كريم و وناس و رائع بعمنى الكلمة كيف انا ما قدرت اشوف الحاجات دي كلها اول ما جيت الاردن او كيف خطيبتو السابقة طاوعها قلبها تخليهو ....عاين لي و قال لي " ليه بتعايني لي كدة؟" ..... قلت ليهو " مازن انت واحد من الناس اللي انا ما بتمنى اشوفك زعلان في يوم من الايام بحبك دايما تكون ضاحك و مبتسم اوعدني" .... ابتسم و قال لي" بوعدك طول ما انتي مبسوطة انا حأفضل مبتسم لحد ما اموت"...دي كانت احلى ليلة في حياتي..تاني يوم مازن كلم امه انو حيجيهو بيبي ....اتفقنا ما نكلم ناس كتار بموضوع الحمل الا اهلنا القراب شديد اما الباقين يتفاجئو بس لاني بصراحة كنت من النوع البخاف من العين شديد ......انا كلمت امي وابوي فرحو لي و كانو مبسوطين انو حيجيهم حفيد خصوصا امي ...... اما رغد بلتني بتلفوناتها كل يوم تتصل علي ... البيبي كيف ؟و صوري لي بطنك؟ و خليني انا اسميه جننتني عديل ........اما إليانا جات باركت لي و ما فرحت لي شديد لكن لما باركت لأخوها ديك يا الدموع و السلام بالاحضان و كمية من الادعية غايتو ما اشتغلت بيها كتير ..... ام مازن كانت بتجي تتطمن علي كل اسبوع لانو امي بعيدة عني فكانت بمثابة الام التانية كانت بتقول لي " ما تخافي انا حأكون معاك لحدي ما امك تجي انشاء الله " .... بحبها شديد ياخ مرة عسل بشكل ما طبيعي عكس إليانا تماما .....مرت 3 شهور على الحمل زي السم لأنو صادف مع امتحاناتي انا و مازن و بنساهر مع بعض لي 1 او 2 حتى ننوم ..... اما بالنسبة للروائح كنت بقرف اي ريحة حتى البرفانات بتاعت مازن بقيت ما بطيق اشمها و الاكل الا بي تحانيس ... مازن خلص امتحانات الدكتوراه قبليني (كان بقرا هندسة كيميائية) و انا لسة كنت شغالة ... ف مازن كان بجيني يوديني البيت لانوالسواقة حرمت علي الا بعد اولد لانى بتعب و بيغمى علي بسرعه .... بعد ما خلصت الامتحان لاقيت ايهم قاعد براهو في بينش كدة منزل راسو و بيتكلم مع نفسه و كان باين عليهو متضايق و زعلان و اصلا انا طولت ما شوفته و حتى لو لاقيته كنت بعمل منه رايحة او ما شايفاه ... مشيت ليهو و قلت ليهو" ايهم" .... رفع راسو و عاين لي" كان وشو تعبان باين انو بساهر كتير في الايام اللي فاتت " .... ما عارفة ليه قلبي حن عليهو مع اني بكرهه شديد بسبب الكلام اللي كان بقوله عني زمان ....رفع راسو و قال لي "اهلين كيفك " ... قلت ليهو تمام الحمد لله و انت؟؟" ... عاين لبطني و قال لي" مبروك يتربى في عزكم" ...ابتسمت و قلت ليهو الله يبارك فيك و عقبالك..... نزل راسو و تاني عاين لي" انا جابو لي بت قبل 5 شهور" .....قلت ليهو" ما شاء الله الف مبروك تتربى في عزكم طيب و انت زعلان مالك؟.... قال لي بصوت مخنوق" مروة اتوفت في الولادة يا ربا ....." .....طبعا مع جملة اتوفت في الولادة دي حسيت قلبي اتقبض و عيوني اغرورغت خلاص ما عرفت اقول ليهو شنو و ما قدرت اصدق اصلا مروة البت الواحدة دي الكلامها كتير اتوفت.....واصل كلامو وقال لي " ما عارف اعمل شنو عندي طفلة لازم اربيها و عندي منحة لازم اخلصها انا بقيت محصور بين نارين ما عارف اعمل شنو ولا اخلي شنو حاولت اكلمك كم مرة لكن انتي كنتي بتتحاشيني حتى اظن انك ما لاحظتي غيابي عن الجامعه صح؟؟ ...... اتقهرت شديد ما عرفت ابكي ولا اسكت و لا اعمل شنو ... لكن انا حلفت ما ابكي على ايهم دة في يوم من الايام ... طلعت منديلي و مسحت دموعي وقفت ع حيلي و قلت ليهو" البركة فيكم و الله يصلح الحال يا ايهم دي الحاجة الوحيدة اللي حأقدر اساعدك بيها حأدعي ليك بس " .......مسكني من يدي و قال لي" ربا سامحيني ع اللي قلته عنك زمان و انا اسف ع الكلمة اللي قلتها ليكي كان لازم اقيف جمبك و ما اخليك انا ندمان و بتمنى لو نرجع....." قبل ما يكمل كلامو زحيت يدي و قلت ليهو" العفو و العافية" ...و بس اتلفتة كدة عشان امشي لقيت مازن واقف و بقا بعاين لي و بعاين لي ايهم ما قال لي شي بس " اتصلت عليك كتير و ما رديتي كنت مستنيك برة" .... طلعت تلفوني و قلت ليهو" ما سمعت طلعت من الامتحان يدوب و خاتاه ع وضع الصامت" .....قال لي طيب ارح البيت مشا و حتى بدون ما يسألني اشتغلت كيف ولا سلم على ايهم ولا اي شي مشينا العربية و مازن ساكت الوقت كلو ....قلت ليهو" مازن ما سألتني اشتغلت كيف".... قال لي " اهاا كيف؟؟.... سكت و ما رديت عليهو كان في هدوء غريب في العربية اول مرة مازن يتعامل معاي كدة ...رجعنا البيت و دخلنا و بقيت بسأله اكلت ؟؟؟ بقول لي" لا" و بمشي يخليني طيب اعمل ليك حاجة تاكلها برد لي" ما لي نفس" بحنسه و بقعد جمبه بقوم من جمبي و بمشي ..... كان بسألني اسئلة معينة بس " ان شاء الله ماتعبتي الليلة حبيبتي " ..... و امشي ارتاحي عشان تذاكري للامتحان الجاي ...... حتى كلمة حبيبتي حسيتها بتجي منو غريبة كان زعلان بس ما عايز يقول لي ..... و انا ما كنت مرتاحة للوضع كدة .... مشيت ليهو " مازن حبيبي " ... قال لي " نعم" ..... قلت " حتعاملني كدة لمتين طيب " ..عاين لي مسافة كدة و تعابير وشو ما كانت زي اللي انا متعودة عليها .... اخد نفس و قال لي " بتعامل معاك عادي زي كل مرة وين الغريب في الموضوع" وقام عايز يمشي ..... و انا بالجد خلاص كنت مالة شديد من القصة دي ما متعودة انو مازن يتعامل معاي بالاسلوب دة و خلاص اتعصبت و مسكته من يده و كوركت فيهو " خلاص كفاية لمتين يعني حنفضل كدة" ... جرا يده مني و صرخ فيني " خليتيهو يلمسك ليه؟.... و انتي عارفة اني زعلان عشان ايهم مسك يدك بس انتي اصلا ما فتحتي موضوع ايهم ولا فكرتي تعتذري عارفة ليه ؟؟ لانو انتي زي امك.....للبقية تتمة❤️
