بعد ما قال كلامو دة عاينت ليهو و عيوني اتملت دموع وقلت " اي انا بت امها" ......قال لي " ربا انا اسف ما ....." ... طوالي طلعت مشيت خليتو.... مسكني من يدي ...زحيت منه و صرخت فيهو" اوعك تهبشني مرة تانية ما عايزة اشوف وشك " ... و مشيت قعدت في الصالة برة.... جاني تاني "ربا حبيبتي اسمعيني انا ما كان بقصدي ..."....قلت ليهو " عايزة اقعد براي" ..... واصل كلامو " طيب ع الاقل اسمعيني ..." ... هنا بالجد اعصابي باظت معاهو صرخت " اي جزو من جملة عايزة اقعد براي انت ما قادر تفهمو... ما عايزة اتكلم معاك و لا عايزة اسمعك غور من وشي " .... قال لي "طيب راحتك حبيبتي " طوالي شال مفتاح عربيتو و طلع .....بقيت قاعدة براي في البيت و بفكر " انا زي امي كيف يعني" ... اول شي جا في بالي "اني حأعامل اولادي بنفس طريقة اللي امي عاملتني فيها" ..... بسبب كلام مازن مية استفهام جاني .... بعد الفترة اللي عشناها كلها مع بعض و هسي حامل بي طفلو يقول انا بشبه امي؟ معقولة انا بشبها؟ ......كنت خايفة وفي نفس الوقت زهجت من مازن شديد و من طريقة كلامو معاي ..... ما عرفت اعمل شنو..... انا عارفة نفسي غلطت مع ايهم بس هو اللي مسك يدي كان مفروض اعمل شنو يعني ؟..... قعدت مسافة كدة حتى اتذكرت انو الليلة عندي موعد مع الدكتور و مفروض مازن يوديني .....قلت اتصل عليهو لكن كرامتي ما سمحت لي .... غيرت ملابسي و شلت مفاتيحي و طلعت ... مشيت الدكتور وصفت لي كمية بتاعت فايتمينات و اتكلمت معاها شوية عن النظام الغذائي اللي حأتبعو في التلاتة شهور اللي جاية و استفسرت عن كم حاجة كدة .... بعد ما خلصنا كلام قالت لي حابة تشوفي البيبي ..اترددت الصراحة لانو كان نفسي مازن يكون معاي ف اخر النهاية وافقت .....مشيت رقدت و بدت تمرر الجهاز قالت لي الاول نبضو كويس و التاني نفس الشي عايزة تشوفي اصابعهم ؟؟؟.... عاينت ليها و انا مذهولة قلت ليها" الاول؟و التاني؟؟؟....هنا الدكتورة عاينت لي و قالت ما حصل عملتي سونار؟؟؟ قلت ليها لا دي اول مرة اجي الدكتور اصلا ؟؟ ضحكت و قالت لي " انتي حامل بتوأم".....بعد ما خلصت من الدكتور مشيت الصيدلية اشتري الفايتمينات اللي وصفتها لي ... و مشيت السوبر ماركت اشتريت كم حاجة كدة و خلاص راجعه ع البيت اول ما دخلت البيت لقيت مازن قاعد في الصالة ......اول حاجة قالها لي "وين كنتي؟"..... رديت عليهو بكل برود "الدكتور"...... قام ع حيلو و قال لي "و ليه ما كلمتيني؟".....رديت"انت عارف مسبقا " ..... اخد نفس عميق و قال لي"ربا ما تصعبيها علي ارجوك مفروض ع الاقل ترسلي لي رسالة بدل ما تخليني قاعد افتش فيكي زي المجنون "..... قلت ليهو "انا تعبانة هسي عايزة انوم يا مازن "..... مشيت و خليتو ...قال لي "اقيفي اسمعيني الاول"..... و لا اشتغلت بيهو كتير ..... هنا قال لي بصوت عالي "حتقيفي و حتسمعيني عايز اقول شنو فهمتي؟ "..... اتلفت عليهو و صرخت فيهو "عايز تقول شنو اتفضل انا بسمعك ؟عايز تقول ما قاصد و انك كنت زعلان مني عشان شفتني مع ايهم و ما قدرت تتتحمل المنظر و عشان تزعلني زي ما انا زعلتك شبهتني بأكتر مخلوقة قهرتني في حياتي ؟دة اللي انت عايز تقولو لي ؟؟ عايز تفتح معاي المواضيع القديمة يعني ؟ "..... قرب علي ...قلت ليهو "رجاء يا مازن ابعد مني لاني بالجد ما طايقاك " ... مشيت ع غرفتنا غيرت ملابسي و رقدت نمت بعد مسافة كدة حتى مازن جا ..... دي اول مرة كان ننوم من بعض زعلانين و بدون ما زول يقول للتاني تصبح على خير ..... تاني يوم صحيت مع الاذان صليت و قريت شوية حتى بعداك مشيت اذاكر كان دة آخر امتحان لي اللي هو تاني يوم ....المشكلة كل ما اقعد براي بتذكر كلام مازن اني بشبه امي و بنكد على نفسي و بزهج .... بحب مازن شديد لكن حتى الحب مرات ما بغفر اخطاء حبيبك ..... بعد فترة كدة مازن صحا و جاني " صباح الخير حبيبتي" ... عاينت ليهو و ابتسمت بتكلف " صباح النور" ......جا قعد جمبي و قفل المرجع اللي كنت فاتحاه و قال لي "ربا دي اول مرة في حياتنا و احنا مع بعض ننوم زعلانين ... انا اسف اولا لاني جبت سيرة امك ع لساني عارف كويس انو موضوع زي دة حساس و ليكي كل الحق تزعلي مني .... ما عايز ابرر لي نفسي بس انا لمن شفتك مع ايهم كنتي قاعدة معاه و بتتكلمي معاه بكل اريحية ولا كأنو انا م عندي قيمة عندك.... انا كلمتك قبل كدة اكتر من مرة ما بحب اشوف ايهم حولينك ...حتى لو مجرد صداقة لانو كان خطيبك قبل كدة .... ثانيا انتي ما بتشبهي امك ما بعرف امك كويس عشان احكم عليها لكن انتي ما بتشبهي زول في الدنيا دي و انا بحبك كتير والله و انتي اغلى من روحي و عايزك تعرفي الحاجة دي كويس " .... قلت ليهو " ما مشكلة عادي امور زي دي بتحصل و ايهم اتكلمت معاه من باب صداقتي معاهو ايام الجامعه ما عشان كان خطيبي قبل كدة و لأنو زوجتو اتوفت دة السبب اللي خلاني اتكلم معاه ... اما بالنسبة لأمي ما عايزة اتكلم عنها خالصو ما حابة افتح موضوعها و خلاص ما زعلانة " ...... قعدنا اتكلمنا كدة مسافة و ابتدينا نضحك مع بعض و رجعنا زي اول بس لسة قلبي كان مقهور من جوة لانو بالجد الحاجة اللي بتجرحك من جوة مستحيل تنساها بسهولة خصوصا لو كانت من اقرب زول لي قلبك .... مازن قال لي بي هظار كدة " يااا الله منك لما تزعلي ما بتتقابلي ".... ضحكت و قلت ليهو " ما مشكلة لو ما اتشاكلت معاك اتشاكل مع منو؟ " ........ مسك يدي و قال لي " طيب وين حضن الصباح ولا الليلة مافي" .... قلت ليهو "اكيد في و حضنتو " عاين لي و قال " صافي يا لبن؟ " ... رديت"حليب يا قشطة " .... و قعدنا نضحك مع بعض ..قبل ما يقوم قلت ليهو "لما مشيت الدكتور عملت سونار عشان اشوف البيبي".... مازن عاين لي"بدوني؟؟؟؟؟"..... قلت ليهو "كنت متحمسة عشان اشوفو..... الموضوع ما هنا القصة انهم طلعو اتنين حأجيب توأم ي مازن" .... عاين لي و هو مصدوم" توأم؟؟؟؟؟" ..... حضني عليهو و قال لي" بحبك شديد والله بوعدك اني ما ازعلك تاني و حنكون حلوين مع بعض انتي بس اهتمي بنفسك و من الليلة ماف سهر و لا في طلوع كتير الا معاي طبعا " مازن كان متحمس شديد اكتر مني .... ما حصل شفت لي راجل بحب الاطفال للدرجة دي. ... تصرفاته كلها كانت غير.. مع الناس التانين بكون صارم و جدي لكن معاي انا زي االطفل تاني يوم مازن وصلني الجامعه و قعد يدعي لي ان شاء الله اشتغل كويس وركزي و ما تستعجلي بسمعني الكلام دة كل امتحان ...... ودعتو و مشيت .... اول ما دخلت لقيت ايهم جا سلم علي رديت السلام و مشيت طوالي قال لي" مالك مستعجلة كدة؟" ..... عاينت ليهو " شوف يا ايهم صداقتنا انتهت من زمان و هسي انت عندك حياتك الخاصة و انا نفس الشي ما عايزة يكون بيناتنا في علاقة غير الزمالة و بس " .. و قبل ما يرد علي مشيت و خليته ما كان لي نفس اتكم معاه لانو بسببو انا و مازن اتزاعلنا...بعد ما خلص الامتحان قعدت في الجامعه شوية و دايما طبعا في شلة بنات كل ما يشوفوني بيقعدو يهمسو لبعض مرات بسمعهم بقولو " شايفة نفسها و مفترية .... متزوجة لكن شاطرة في نفس الوقت " مرات بسمعهم بيمدحوني و مرات بيشتموني كأني عاملة ليهم حاجة و المشكلة الكلام كلو بكون عينك عينك يعني نظام حتعملي شنو .... العجب لما عرفو انو مازن زوجي ... كيف و ليه اتزوجها بنات الاردن هنا مالهم؟ ... ماكنت بشتغل بيهم كتير لاني اذا قمت عليهم ما بفكنا الا الحرس دة غير انو برستيجي ما بيسمح لي يعني ممكن يتكلمو من وراي لكن ماف زول في الجامعه كلها عندو الجرأة يقيف قدامي و يقول كلامهم دة بإختصار كدة بيكرهوني لكن بيحترموني في نفس الوقت ....بعد فترة كدة حسيت انو مازن طول علي شديد و انا مليت من القعدة في الجامعه اتصلت عليهو " مازن وين انت ياخ ؟ "..... قال لي" حبيبتي شوية و بكون عندك " ... قلت ليهو" لو بعيد لسة حأرجع براي" .... قال لي" لا لا استني بس انشغلت بي حاجة كدة هسة بجي" .....قفلت منو الخط كنت قرفانة عيشتي و غير كدة تعبانة خالص .... بعد حوالي 10 دقايق كدة مازن جا ..... مشيت ليهو و كان باين اني مستاءة ... قال لي " اسف حبيبي اتأخرت عليكي بس حصل لي ظرف " .... عاينت ليهو" ظرف شنو ؟؟؟ " ..... ضحك و قال لي" بعدين حتعرفي" اول ما وصلنا البيت مازن جراني من يدي و قال لي تعالي عندي ليكي مفاجئة حتعجبك؟ .... قلت ليهو في شنو ؟؟ اي مفاجئة؟ .... وداني للغرفة اللي كان بنوم فيها هو زمان لما كنت بمشي للطبيبة النفسية ..... اول ما فتحت الباب اتفاجئت بالمنظر 😍للبقية تتمة ❤️
