واقفة ساعه كاملة قدام دولابي افتش لي في حاجة البسها و اي شي اطلعه القاه ضيق و لا قصير و ما كنت عايزة البسهم لانو ايهم ما بحب كدة .... عاافرت و نكشت في دولابي لحدي و اخيرا لقيت لي بلوزة طويلة كان اشتريتها لكن ما لبستها بحجة انها طويلة شديد ... لبست و عملت ميك اب خفيف زي كل مرة .... شلت مفاتيحي و طلعت .... عاينت للتلفون لقيت انو الموعد قررب و انا لسة ما اتحركت من البيت بسرعه دورت عربيتي و مشيت .....و صلت المطعم لقيت ايهم قااعد مستني و سرحان في اللا شئ .... كان شكلو حلو شديد و هو بالمنظر دة حسيتو بريئ و غير كل الناس ... ما كنت متوقعه انو ممكن اعجب لي بواحد من جنس آدم في حياتي .... مشيت على اتجاهو ... عااين لي و ضحك قال لي "سحبت منك لقب الخواجية ياا زولة يااخ اتأخرتي ساعه كاملة "... زحيت وش البت المعجبة و طوالي قلت ليهو " و طول،الساعه دي،ما فكرت تتصل هسي يمكن حصلت لي حاجة " ... ضحك و قال لي " انتي ما بينخاف عليك انتي انثى بهيئة رجل " ... ضحكت من كلامو شديد ... قعدنا فتررة كدة و اتونسنا... و بقينا نتكلم عن انو حياتنا حتبقى كيف لما نسافر الاردن و بعدين حنعمل شنو بس نخلص الماستر و وراني انو ابوهو انجز ليهو امورو كلها من سكن و ترحيل و جواز ... يعني امورنا الاتنين ماشة تمام التمام ...
قعدنا ساعه كاملة و احنا بنتونس لحدي ما انا نسيت اسأله هو عاوزني لي شنو ... فجأة بدون اي مقدمات قال لي و انا بشرب في الموية " ربا انا بحبك" .... يااا الله من كلمة بحبك دي جات طالعه منه زي العسل ... اتشرقت و الموية اتدفقت و بقيت بكح ...استأذنت منه و مشيت الحمام .... قفلت الباب علي و بقيت بفكرر يا الله دة شنو الشعور الغريب اللي حاسة بيهو دة في حياتي ما حسيت بيه ... اطرافي باردة و نفسي مكتوم ما قدرت اتنفس ...و حيلي برد ... بقيت ما قادرة اقيف ع رجولي ..... بقيت بفكر هسي اعمل شنو و اتصرف كيف ..المشكلة صحبات زي باقي البنات ما عندي .. عندي صاحب واحد و ياهو بيعترف انو بحبني ..... غمضت عيوني و اخدت لي نفس عميق و طلعت ... مشيت قعدت بكل هدوء ما عرفت اقول شنو بقيت ساكتة .... و هو بعاين لي ساي عايز يضحك لكن ما قادر .. قام قال لي " احم زي ما قلت ليك يا ربا انا بحبك " .... اتلبشت شديد و بقيت بعاين ليهو في عيونو اول مرة اشوف عيونو سمحة للدرجة دي يااا الله بالجد ما قادرة اوصف اني كنت حااسة بشنو وقتها ..... واصل كلامو و قال لي " انا بحبك من و احنا في سنة اولى .. من اول لحظة شفتك فيها حبيتك ... بنيت احلامي معاك و انا ما متأكد انك اصلا حتوافقي بي و لا لا .. حبيتك من اللحظة اللي اديتي فيها الولد اللي ف الجامعه داك كف .. حبيتك من اللحظة اللي وقفتي فيها قدام العميد بكل قوتك ووقفتيه عند حده ...حبيت قوة شخصيتك و شجاعتك ... انتي غير كل البنات انتي مختلفة عنهم انا بحبك والله و ما بقدر اعيش بدونك و بتمنى بالجد يا ربا انك تقبلي بي دة الموضوع اللي انا كنت عايز اتكلم معاك فيه" ...... ضربات قلبي بقيت سامعاها في اضاني و يدي بقت تلج بس قررت اني اتشجع قلت ليهو " و انا كمان بحبك" ...ايهم قال لي شنوو؟؟؟؟ قلت ليهو " و انا كمان بحبك" ... ايهم ايدو بقت ترجف و بقا يعرق .... شرب من الموية اللي قدامه و قال لي "يعني خلاص انا ليكي و انتي لي " ... قلت ليهو "اي انا ليك و انت لي " .سكتنا مساااافة حتى فكيناها ضحكة انا و هو الاتنين مع بعض بأعلى صوت الناس كلها بقت تعاين لي و هم متضايقين .. لكن و لا اشتغلنا بيهم ... ايهم مسك يدي لكن زحاها بسرعه و قال لي "معليش عارفك ما بتحبي زول يلمسك"... و لأول مرة في حياتي قلت ليهو ما مشكلة امسكها ..... ايهم ابتسم و قال لي "انا مبسوط شديد انك وافقتي ياخي والله نفسي اقوم ازغرد وسط المطعم دة "... ضحكت و قلت ليهو عارفاك مجنون و بتعملها .... ..قال لي انا من متين بخطط اقول ليك .. لكن كل مرة بخاف انحرج و ترفضيني .....قلت ليهو واللي خلاك تتكلم هسي شنو؟ ... قال لي استخرت و قررت اكلمك وزي ما تجي تجي عشان لو حصل اي شي و انتي بقيتي مع زول تاني ما احس بالندم و ع الاقل اكون حاولت ... انبسطت من كلام ايهم شديد قعدنا تاني اتونسنا حبة .. و الدنيا خلاص بقت مغرب الساعه كانت6:30 ...قمنا خلاص عاوزين نمشي بيوتنا ... طلعت بي عربيتي و انا مبسوطة و هو ماشي وراي عايز يوصلني لحدي البيت .... وصلنا بيتنا و نزلت من عربيتي و هو كمان ...نزل ووقف قدامي و قال لي ".يلا يا ربا امور الحب اللي تحت تحت دي انا ما بحبها ... عايز بأسرع فرصة انو نعلن خطوبتنا كلمي اهلك و انا الليلة بكلم اهلي و لما تكونو مستعدين حنجي و نطلبك من امك و ابوك على سنة الله و رسوله" ... فرحت من كلامو شديد ووافقت طوالي و قلت ليهو حاضر حأكلم اهلي طوالي ... وودعني و مشا بقيت واقفة قدام باب الشارع لحدي ما غاب عن عيوني .... ياا الله في حياتي كلها ما كنت مبسوطة للدرجة دي ... ضحكتي لآخر ضرس ... دخلت جوة البيت ولقيت امي و ابوي و احمد قاعدين مع بعض بيتونسو ... ابوي عاين لي و قال "ان شاء الله دايما مبسوطة كدة الحاصل شنو ي بتي" قلت ليهو "الحاصل خير بكرة بكلمكم الصباح " و جري مشيت على غرفتي ورقدت في السرير و بقيت افكر في الموقف اللي حصل قبيل و كيف ايهم اعترف انو بحبني و السخافات و العوارات اللي عملتها و الموية اللي اتكشحت بقيت راقدة في السرير و بضحك براي ... غمضت عيوني و فجأة من دون اسباب جاتني صورة حاتم في وشي ... قمت مخلوعه من السرير و قلت ياا الله انا عملت شنوو كيف وافقت و انا لسة ما حكيت ليهو بموضوع حاتم و اللي حصل معاي زمان ... كيف نسيت موضوع مهم زي دة ... عصبت شديد من نفسي و قلت انا اصله ربنا ما كاتب لي افرح في حياتي دي ... بقيت افكر اني اكلمه كيف...كيف اقدر احكي ليهو حاجة زي دي ... عيوني اتملت دموع و قعدت ابكي بحرقة و كل ما اتذكر حاتم و ايهم البكا يزيد ...قضيتها بكا لحدي ما نمت ......صحيت الصباح و عيوني واارمة من البكا قبل ما اعمل اي شي اتصلت على ايهم رد و قال لي"صبااح النوور و الورد و السرور على احلى ربا في الكون" .. ضحكت فيهو و قلت ليهو بصوت مخنوق"صباح النور "... قال لي "مالك شكلك مستاءة ... ما تكوني غيرتي رايك فيني يا بت؟؟" قلت ليهو لا ما غيرت رأيي ولا شي بس ف حاجة مهمة شديد يا ايهم لازم تعرفها ... قال لي "انا حأديك المهم ..كلمت امي و ابوي واحنا جااهزين بس يا ريت يكون الاسبوع دة لانو ابوي مسافر عمرة و لو سافر قبل ما يصلكم حنضطر نأجل الخطوبة و انا ما عايز أاجلها كتير ... عايز اقدر امسك يدك و قدام الناس اقول دي حبيبتي اها رايك شنو؟؟"... ما عرفت اقول شنو و ما قدرت ارفض ... قلت ليهو خلاص كويس يا ايهم انا حأكلم اهلي برضو .. ايهم قال لي "يعني انتي امس ما كلمتيهم ...ياخي شكلك ما بتحبيني زي ما انا بحبك .. انا اول ما وصلت و قبل ما اسلم كلمتهم " ... و قعد يضحك .. قلت ليهو خلاص خلاص حأكلمهم ما تخاف قال لي يلا بسرعه ووريني بحصل شنو ...قفلت الخط مشيت استحميت و غيرت ملابسي و دخلت ع مكتب ابوي لقيتو قاعد قلت ليهو ابوي انا عاوزاك في موضوع ضروري هسي لو سمحت .....للبقية تتمة ❤️
