قعدت مع ابوي و انا متوترة و ايديني بيرجفو من الخوف .. ابوي بعاين لي ساااي و بتبسم قال لي " نفس حركات امك لما اتقدمت ليها" .... عاينت ليهو و قلت ليهو شنووو ؟؟؟ لا لا ماف حاجة زي دي بس كنت دايرة استفسر من موضوع السفر و خلاص كل شي جاهز يعني ولا لا ؟؟ ... ابوي ضحك و قال لي " ما اتكلمنا في الموضوع دة و قلت ليك اي شي جاهز و كل شي اترتب و بقا تمام ...ربع يدينو و قال لي دة اصلا ما موضوعك ف شنوو ؟؟ .....اتكركبت في الكلام و اخدت لي نفس عمييق و قلت ليهوو ..." في واحد عايزني و انا عايزاه بس دة الموضوع" .... ابوي ضحك و قال لي "طيب الواحد دة ما عندو اسم ؟" ... قلت ليهو عندو طبعا اسمو ايهم اخد معاي المنحة و حنسافر مع بعض الاردن انت لاقيتو قبل كدة لما كان واقف معاي في الشارع قبل سنة لو بتتذكر " ... ابوي طلع نضارتو و صر وشو و قال لي طيب " خليني الاقيهو اول بعدين بديك رأيي" قلت ليهو طيب اقول ليهو يجي متين؟ قال لي بعد بكرة مناسبة جدا ... اتفقت مع ابوي ع الموعد باقي بس اكلم ايهم ..عايزة اطلع كدة ناداني و قال لي " كلمتي امك ؟؟" ... قلت ليهو " لا كلمها انت " و مشيت دخلت غرفتي ... لقيت كم مكالمة من ايهم الشمار حارقو عايز يعرف حصل شنو ....ما رجعت ليهو قفلت تلفوني و قعدت في سريري فتحت اللابتوب بتاعي كالعادة و بقيت اتصفح في الفيس بتاعي قمت اتذكرت (مازن) ياا الله نسيته خالص طولت شديد ما اتكلمت معاه .... رسلت ليهو رسالة ...رد لي (وين انتي مختفية) .. قلت ليهو (والله كنت مارة بي سنة شوية صعبة وهسي الحمد لله مرقت ... وانت الحاصل عليك شنو و اختك كيف بقت و بشرني جابت بت ولا ولد ؟؟؟).... قال لي (لا دة ولا دة الطفل مات بعد ولدتو)...اتخلعت من كلامو و ما عرفت الزول في المواقف اللي زي دي بقول شنوو ... قلت ليهو و(هي كيف طيب ؟ ) قال لي (يعني الحمد لله حياتها ماشية بالقوة بس )... سألني من اخباري و انا عاملة كيف ؟.. قلت ليهو اخدت منحة في الاردن في جامعه كدة .... اتبسط شديد قال لي( ما شاء الله يعني حتجينا ؟) قلت ليهو (طبعا واصلا حأكون محتاجة زول يوريني البلد وكدة ؟).... رسل لي (😂😂😂😂😂 اكيد حأوريك ليها بس انتي تعالي) .... اتونست معاه مساافة بالجد ولد ظريف بعمنى الكلمة و حلو زي القشطة .... قفلت منه و رقدت في سريري افكر في اني كيف اوري ايهم موضوع حاتم .. ياخ كل ما اتذكر حاتم دة بجيني مغص ما طبيعي ....سمعت صوت دق في باب غرفتي قلت اتفضل لقيت دة احمد اخوي (علاقتي مع احمد اخوي متوترة كلها في حدود السلام و بس ... ما بنتونس و لا بنتكلم .. ولا بيسألني من قرايتي و لا اي شي يعني من الاخر كدة طالع على امي ) ... قال لي "ابوي كلمني هسي انو في واحد عايزك و كدة " .. قلت ليهو ' اي في واحد عايزني ' قال لي بس حبيت اقول ليك مبروك .... قلت ليهو لسة بدري لكن الله يبارك فيك .... عاين للارض مسافة و قال لي " نحن ما حصل اتكلمنا في اللي حصل زمان داك يا ربا " ... قلت ليهو " كبرنا و الزمن فات ع الكلام و اصلا ماف داعي نتكلم فيهو هسا وما تخاف انا ما بلومك لانك كنت طفل وقتها و اكيد ما حتعرف تتصرف " ... صرخ و قال لي " ما كنت طفل و كنت بقدر اتصرف كنت بقدر اعمل اي حاجة " ... عاينت ليهو و انا مخلوعه و ما رديت .... عاين لي و حضني عليهو دي كانت اول مرة احمد يتكلم معاي كدة اول مرة يحسسني انو بالجد اخوي قال لي " بس اعرفي انو انا ما ناسيك " و فكاني طلع من غرفتي .. عاينت ليهو و هو طالع و انا مذهولة من اللي حصل هسي و بقيت بقول لنفسي( يا ربي اخوي حصل مع شنو في السنين اللي فاتو ) .... جات امي داخلة غرفتي توشك طبعا و بدون ما تدق الباب كالعادة قالت لي " ابوك.." ....و قبل ما تتم كلامها قلت ليها " اي واحد زميلي في الجامعه غيروو" ... قالت لي بس حبيت اعرف انك حتلبسي شنو للخطوبة ... قلت ليها ما قررت حأمشي السوق براي و احتار لي فستان .... قالت لي لو احتجتي اي حاجة كلميني ... عاينت ليها و خلاص،كنت وصلت الحد ... مشيت قفلت باب الاوضة بعصبيه و عاينت ليها و قلت "لا يا ستي ما محتاجة ليك و عمري ما حأحتاج ليك .... انت عايزاني اسامحك صح .. بس بتصرفاتك دي انتي بتجننيني اكتر و بتخليني اكرهك كل يوم اكترر ... لما حاتم عمل فيني عملتو ديك.انتي كنتي وين ؟؟؟ جاوبيني كنتي وين ؟؟ ... كنت عند الجيران صح ؟ ... وقتها احتجتك و ما لقيتك ... لما كلمتك باللي عملو فيني حاتم انتي عملتي شنو ؟ مشيتي و كنت عايزة تزوجيني ليهو وقتها برضو احتجتك و ما لقيتك ؟ .. لما خالتو اروى كانت بتشتمني و تضربني قدام عيونك انتي كنتي وين ؟ .... للاسف كنتي قاعدة و بتعايني لي و بتضحكي كمان ... انا في ايام زعلي احتجتك و طلبت مساعدتك و انتي نكرتيني و لا كأني بتك و جاية هسي في اسعد لحظة في حياتي تعملي فيها انك ام و تقرري اني محتاجاك ؟؟ .... لا ما محتاجاك ...يلا اتفضلي اطلعي برة و اشرت ليها على الباب ... قلت ليها الكلام دة و انا العبرة خانقاني و ببكي .... امي قعدت تبكي و طلعت من غرفتي ....بقيت بقول لنفسي "هسي انا الله حيحاسبني على اللي بعمله دة ... لانو قال المفروض زول يبر امه ... المشكلة هي اصلا ما معتبراني بتها و لا انا معتبراها امي".....فجأة تلفوني رن لقيت دة ايهم بيتصل علي ما عرفت ارد ولا اطنش لكن بالجد كنت محتاجة اسمع صوتو ... رديت عليهو قال لي " ازيك يا حلوة .. عادي اقول ليك يا حلوة صح ؟ عشان ما يجيني كف طاير ولا حاجة " ... ضحكت و قلت ليهو" لا لا ما تخاف ماف كفوف طايرة ولا شي " ...قلت ليهو عارفاك متصل لي " ما تخاف كلمت ابوي و قال عايز يشوفك و كدة " فرح و قال لي خلااص كويس بعد بكرة حنجي عليكم.... قلت ليهو بدلع كدة "يااا الله معناها بكرة لازم امشي السوق" ... قال لي "اي زاتك ذكرتيني عايز اقول ليك حاجة لكن عليك الله ما تزعلي ؟ ... ابوس يدك ما تلبسي ضيق او قصير او مكشوف؟" ... اتخلعت و قلت ليهو "رايك شنو البس عباية ؟"... قال لي خلاص ي ستي اصلا عارفك طيرة و ما عندك صحبات بكرة بمشي معاك السوق و نشتري لينا حاجة حلوة كدة .... اتفقت مع ايهم على انو خلاص بكرة نمشي و بعد بكرة حيجي هو و اهلو"تاني يوم حوالي الساعه 9 صحيت من النوم استحميت و كالعادة ما عندي شي كدة البسو بالمواصفات اللي قالها لي ايهم ... ف لبست لي بنطلون جينز اسود و بلوزة بس بأكمام طويلة و خليت شعري فاكي ما ربطتو زي كل مرة ..دورت عربيتي و مشيت كنت متفقة مع ايهم نتلاقى في المطعم نفطر حتى بعدين يلف معاي في السوق ... مشيت و لقيتو قاعد في المطعم اتصدمت لمن شفته .. كان قاعد يتونس و يتضاحك ليهو مع وحدة ما بعرفا ......للبقية تتمة ❤️
